1 KORINTOEK 1 - Bukuit Ne Tilil

Kagateet

¹ Paulo, ne ki kiguur koek kayooktoindet ne po Kristo Jeso eng' mageetap Kamuktaindet, ak Sosten tupchennyo,

² kisirchini kanisetap Kamuktaindet ne miitei Korinto, icheek che ki kitabaan eng' Kristo Jeso, che ki kiguur koek che tiliileen, kobooto tugul che kuurei kainetap Kiptaiyandennyo Jeso Kristo eng' komosta age tugul, Kiptaiyannyo ak ko nenywa.

³ Ingotep kobootok myeeindo ak kaalyeet ne punu Kamuktaindet Kwandanyo ak Kiptaiyat Jeso Kristo.

Mwaetap kongoi

⁴ Amwachini Kamuktaindet nenyu kongoi kotugul agobo okweek, amu myeeindap Kamuktaindet ne ki kigoonok eng' Kristo Jeso;

⁵ amu kigeyaak oegu mogoreek miising' eng' ineendet eng' kiy age tugul, eng' ng'aleek tugul, ak naet tugul;

⁶ ko uu ye ki kigimit paornateetap Kristo eng' okweek:

⁷ si moletu eng' konunotyot age tugul; ogeni ng'ang'utyetap Kiptaiyandennyo Jeso Kristo.

⁸ Ne igimitok agine agoi let, ko motinye kiy ne kirwoogunenok eng' peetuutap Kiptaiyandennyo Jeso Kristo;

⁹ Kamuktaindet ko ne kiyani, kigeguurok eng' ineendet obwonji yamdaetap Weeriinnyi Jeso Kristo Kiptaiyandennyo.

Pesyosyek eng' kaniset

¹⁰ Asoomok miising' anyun, che kitupche, eng' kainetap Kiptaiyandennyo Jeso Kristo, ale, omwa tugul kiit agenge, si ma piit pesyosyek eng' kwenung'wong'; ago si oegu che ititaatiin kibagenge eng' kabwaatet agenge ak eng' kirwooget agenge.

¹¹ Amu ki komwoiwo icheek che mi kootap Kloe agobo okweek, tupchosyekyuk, kole mi toiyasyek kwenung'wong'.

¹² Ki it anyun ne amwae ko ni, ale, mwaei age tugul eng' okweek, kole, “Aa po Paulo,” kole age “Aa po Apolo,” kole age “Aa po Kepha,” ak kole age “Aa po Kristo.”

¹³ Tos pcheat Kristo? Tos ki kigartatwok Paulo? Anan ki kibatisanjok kainetap Paulo?

¹⁴ Amwachini Kamuktaindet kongoi amu ma abatisan chii eng' okweek, kobatee Krispo ak Gaio,

¹⁵ si ma mwa chii age tugul kole ki kibatisanjok kainennyu.

¹⁶ Nga ki abatisan che po kootap Stephana ak icheek: mangen kogeny, ngo kita abatisan chii age.

¹⁷ Amu ma iyookwo Kristo abatisanis, ago aamda logoiywek che myach: ma eng' utaatyet ne po ng'aleek, si ma ki yai kimurtoiyotap Kristo koek puch.

Kristo ko kimnateet ak utaatyetap Kamuktaindet

¹⁸ Amu perberyo ng'olyootap kimurtoiyot eng' icheeget che lustos; ago eng' acheek che kisaru ko kimnateetap Kamuktaindet.

¹⁹ Amu ki kisir keele, Ang'eme utaatyet che utaatiin, Ak aeesyoi kaguiyetap icheeget che iguitos.

²⁰ Mi ano ne utaat? Mi ano siriindet? Mi ano kiptiyotyot ne po kenyisyechu? Tos ma yai Kamuktaindet ng'omnatetap ng'wonyuni koberberit?

²¹ Amu eng' utaatyet ne po Kamuktaindet koma nai ng'wony Kamuktaindet eng' utotyennyi, ki cham Kamuktaindet kosar icheeget che iyani, eng' perberyo ne po ng'olyoot ne ki amdoi.

²² Amu soomei Yahudik kaboorunoik, ak cheeng'ei Yunanik utaatyet:

²³ ago ki amdoi acheek Kristo ne ki kigartaat, ne kanagutyet eng' Yahudik, ak ko perberyo eng' Pororyosyek;

²⁴ ago eng' icheek che ki kiguur, Yahudik kobooto Yunanik, Kristo ko kamuktaetap Kamuktaindet, ak utaatyetap Kamuktaindet.

²⁵ Amu perberyo ne po Kamuktaindet ko utaat kosiir utaatyetap piik; ak nyalulnatetap Kamuktaindet ko kiim kosiir ne po piik.

²⁶ Amu, ogeer kuurseng'wong', tupchosyechu, ole ma kiguur che chaang' che utaatiin eng' atebeetap poorto, anan che chaang' che kiimeen, ama che chaang' che taagunotiin:

²⁷ ago ki lewen Kamuktaindet tuguuk che perber che po ng'wony, si kogoochi kalilanet che utaatiin; ak ki lewen Kamuktaindet tuguuk che nyalulyotin che po ng'wony, si kogoochi kalilanet tuguuk che kiimeen;

²⁸ ak ki lewen Kamuktaindet tuguuk che ma taagunotiin che po ng'wony, ak tuguuk che kisasei, ak tuguuk che ma miitei, si kowal koek puch tuguuk che miitei:

²⁹ si mat koloskei chii age tugul eng' taitap Kamuktaindet.

³⁰ Ago oo po ineendet okweek eng' Kristo Jeso, ne ki kiyai eng' Kristo Jeso, ne ki kiyai eng' acheek koek utaatyet ne punu Kamuktaindet, ak imanda, ak tiliilindo, ak katyaget:

³¹ si koek, ko uu ye ki kisir keele, “Ineendet ne ilasugei, ko ingoloskei eng' Kiptaiyat.”