1 JOHANA 3 - Bukuit Ne Tilil

Chamanigap Kamuktaindet

¹ Ogeero, chamyet ne uu nee ne ki chamenech Kwanda, kot keguurenech lagogap Kamuktaindet! Ago ki chooto acheek. Amu niito anyun, koma ingenech ng'wony, amu ki ma nai ineendet.

² Chamanichu, ki lagogap Kamuktaindet nguno, ak tomo keng'aany kiit ne tuun ki uu. Kingen keele, ye tuun kaging'aany ineendet, kegergeitu ak ineendet; amu tuun kigeere ko uu ole uu ineendet.

³ Ak chii age tugul ne tinyei kamang'unoni agobo ineendet kotiliilegei, ko uu ye tiliil ineendet.

⁴ Chii age tugul ne yaei tengek koyaei pistoet: amu tengekto ko pistoet.

⁵ Ak ongen ole ki king'aany ineendet si kobiit koip tengekwogik; ama mi tengek eng' ineendet.

⁶ Chii age tugul ne menyei ineendet koma yaei tengek: ak chii age tugul ne yaei tengek ko tomo kogeer ineendet, ama ingen ineendet.

⁷ Lagochu mengech, among' kobeetook chii: ineendet ne yaei imanda ko po imanda ko uu ye po imanda ineendet:

⁸ ineendet ne yaei tengek ko po chesawil; amu ki yai chesawilyet tengek kobooch taunet. Kigeng'aany Weeriitap Kamuktaindet amu nooto, si kobiit kong'em poisyonigap chesawilyet.

⁹ Chii age tugul ne kigesich eng' Kamuktaindet koma yaei tengek, amu tebyei keswondennyi eng' ineendet: amaimuuchi koyai tengek, amu ki kisich eng' Kamuktaindet.

¹⁰ Ng'ang'aksei lagogap Kamuktaindet eng' niito, ak lagogap chesawil: chii age tugul ne ma yaei imanda koma po Kamuktaindet, anan ineendet ne ma chamei ne tupcho.

Chamyetap Tupchosyek

¹¹ Amu ni ng'olyoot ne ki ogas kobooch taunet, keele kechamye acheegei eng' acheegei.

¹² Ma ko uu Kain ne ki po ineendet ne ya, ak ki par ng'eetap kamet. Amu nee si kobar? Amu kiyaachen poisyonikyik, ak ki po imanda che po ng'eetap kamet.

¹³ Amokwong'ye che kitupche, ngot kowechok ng'wony.

¹⁴ Kingen keele kigemang'une meet kemong'ji saboondo, amu ki chame che kitupche. Ineendet ne ma chamei komenyei meet.

¹⁵ Chii age tugul ne wechei ne tupcho ko rumin: ak ongen ole ma mi rumin ne tinyei saboondap koigeny ne menyei eng' ineendet.

¹⁶ Kingen eng' niito chamyet, amu ki igoito saboondanyi agobo acheek: ak kanyool kigoite saboonwekyok agobo che kitupche.

¹⁷ Ago chiito ne tinyei tuguugap ng'wonyuni, ak kogeerei ne tupcho kobanani, ak koger muguleldanyi, ama riiree ineendet, komeng'doi ano chamyetap Kamuktaindet ineendet?

¹⁸ Lagochu mengech, among' kecham eng' ng'olyoot, anan eng' ng'elyepta; ago eng' poisyet ak imanit.

Nyiganatennyo eng' taitap Kamuktaindet

¹⁹ Kinae eng' niito keele ki po imanit, ak kigoigoi mugulelwekyok eng' tainnyi,

²⁰ eng' kiy tugul ne irwogunenech mugulelwekyok; amu oo Kamuktaindet kosiir mugulelwekyok, ak kongen tuguuk tugul.

²¹ Chamanichu, ngot koma irwokwech mugulelwekyok ketinye nyiganateet eng' taitap Kamuktaindet;

²² ak kiy age tugul ne kisoome, kenyooru eng' ineendet, amu kiriibe ng'atuutikyik, ak keyae tuguuk che chamaksei eng' tainnyi.

²³ Ak ni ng'atuutyennyi, keele kiyan kainetap Weeriinnyi Jeso Kristo, ak kechamye acheegei eng' acheegei, ko uu ye ki koonech ng'atuutyet.

²⁴ Ak ineendet ne riibei ng'atuutikyik komenyei eng' ineendet ak ineendet eng' inee. Ak kingen eng' niito keele menyech ineendet, eng' Kabuuset ne Tiliil ne ki kogoonech.