1 ATEPTAP PEETUUSYEK 9 - Bukuit Ne Tilil

Jerusalem, nganaseet ne tiliil

¹ Ki kiit anyun Israel tugul kobee tetuutigap ibinwekwak che ki kosiirto ak ki kisirchi kitabuutap laitorinigap Israel. Ki kimut Judah keluul kwo Babilon amu pistoennywa.

² Piik che tai che kisip komeny ole po porotennywa eng' nganasookwak ko ki Israel, tisiik, Lawiik ak otwogigap Hekaluut.

³ Piik che ki meny Jerusalem eng' che po lagogap Judah, che po lagogap Benjamin, che po lagogap Ephraim ak che po Manasseh ko ki:

⁴ Utai weeriitap Amihud, weeriitap Omri, weeriitap Imri, weeriitap Bani, che po lagogap Peres weeriitap Judah.

⁵ Ak che po Silonitik ko ki: Asaiah taita ak weeriikyik.

⁶ Ak che po weeriigap Zerah, ko Jeuel ak tupchosyekwak, piik pogol lo ak tamanwogik sogool.

⁷ Ak che po weeriigap Benjamin: ko Salu weeriitap Mesulam, weeriitap Hodabiah, weeriitap Hasenuah;

⁸ Ibneiah weeriitap Jeroham, Elah weeriitap Usi, weeriitap Mikri, ak Mesulam weeriitap Shepatiah, weeriitap Reuel, weeriitap Ibnijah.

⁹ Ak tupchosyekwak, ko uu tetuutigap ibinwekwak che ki kosiirto, ko pogol sogool ak konom ak lo. Pichuuto tugul ko ki kandoigap kooriigap kwanisyek, eng' kooriigap kwanisyekwak.

Tisiik che ki menyei Jerusalem

¹⁰ Ak eng' tisiik ko ki: Jedaiah, Jehoiarib, Jakin,

¹¹ ak Azariah weeriitap Hilkiah, weeriitap Mesulam, weeriitap Zadok, weeriitap Meraiot, weeriitap Ahitub, pounindetap kootap Kamuktaindet;

¹² ak Adaiah weeriitap Jeroham, weeriitap Pasur, weeriitap Malkija; ak Maasai weeriitap Adiel, weeriitap Jasera, weeriitap Mesulam, weeriitap Mesilemit, weeriitap Imer.

¹³ Tupchosyekwak ak kandoigap kooriigap kwanisyekwak, ko piik eliphuut agenge ak pogol tisap ak tamanwogik lo. Ki piik che tinyei kamuget inne ne po poisyetap otet eng' kootap Kamuktaindet.

Lawiik che ki menyei Jerusalem

¹⁴ Ak eng' Lawiik ko ki: Semaiah weeriitap Hasub, weeriitap Asrikam, weeriitap Hasabia, eng' weeriigap Merari;

¹⁵ ak Bakbaka, Heres, Galal, ak Mattaniah weeriitap Mikah, weeriitap Zikri, weeriitap Asaph;

¹⁶ Obadiah weeriitap Semaiah, weeriitap Galal, weeriitap Jeduthun, ak Berekiah weeriitap Asa, weeriitap Elkanah, che ki menyei nganasoogap Netopatik.

Riibiigap hekaluut eng' Jerusalem

¹⁷ Riibiigap kurgeet ko ki: Shallum, Akub, Talmon, Ahiman, ak tupchosyekwak, ki ne oo Shallum;

¹⁸ che ki riibei kurgeetap laitoryat komostap kong'asiis agoi peetuunooto. Ki riibiigap nganaseetap lagogap Lawiik.

¹⁹ Ki pou Shallum weeriitap Kore, weeriitap Ebiasap, weeriitap Kora, ak tupchosyekyik, che po kootap kwandanyi, Koraik, poisyetap ooreet, riibiigap kurgotigap emait, ko uu ye ki cham kobou kwanisyekwak nganaseetap Kamuktaindet ne Toroor.

²⁰ Eng' peetuusyek che po tai ko ki pounindennywa Phineas weeriitap Eleazar, ak ki mi Kamuktaindet ne Toroor ak ineendet.

²¹ Ki riibindetap kurgeet Zekariah weeriitap Meselemya ne po kurgeetap emait ne kituiyechin.

²² Chuuto tugul ki kilewen koek riibiigap kurgeet eng' kurgotik, ko ki pogol aeng' ak taman ak aeng'. Ki kiit chuuto kobee tetuutigap ibinwek che ki kosiirto eng' nganasookwak. Ki iyanji Daudi ak Samuel keerindet poisyeennywa ne po riipseet ne kiga kigoochi.

²³ Koriip anyun icheeget ak lagokwak kurgotigap kootap Kamuktaindet ne Toroor, kootap emait, kowoljingei.

²⁴ Ki mi riibiik komoswek ang'wan: komostap kong'asiis, cherongo, murot kaataam ak murot tai.

²⁵ Ki cham kobwanei tupchosyekwak, eng' nganasookwak, konyil agenge eng' peetuusyek tisap, kotebyei ak icheek.

²⁶ Amu kimi poisyet ne kiga kigoochi riibiik ang'wan che eecheen, che ki Lawiik, ki pou kooriik ak ole kigonoree tuguuk eng' kootap Kamuktaindet.

²⁷ Ki ruitos ole neegitee kootap Kamuktaindet, amu ki nenywa poisyet, ak kiboisyennywa koyaat kurgotik karonet age tugul.

Lawiik alak

²⁸ Kiriibei alak eng' icheek tuguuk che kiboisyee eng' otet; amu ki kiiti si keibu kobwa ko, ak ki kiiti si keibei komanda.

²⁹ Ki kilewen alak kogeny eng' icheek koriip tuguuk tugul che po ole-tiliil, ak peek che ng'ootiin che tambulul, divaik, mwanik, ubani ak nyamdutik.

³⁰ Ak ki chobei alak eng' weeriigap tisiik nyamdutik che kiburuchi.

³¹ Kiga kinde Matitia age eng' Lawiik, ne kitaitap Shallum Koraindet, koriip tuguuk che ki kigelei eng' taabook.

³² Kiriibei alak eng' tupchosyekwak, eng' weeriigap Kohatik, magatinigap kabartaet, kochop eng' sabatut age tugul.

³³ Icheek che tyeniik, kandoigap kooriigap kwanisyek che po Lawiik, che ki menyei kooriik, ko ki ityagotiin eng' poisyonik alak amu kimi poisyennywa peet ak kemoi.

³⁴ Chuuto ko ki kandoigap kooriigap kwanisyek che po Lawiik, eng' ibinwekwak tugul, piik che eecheen, ak ki menyei chuuto Jerusalem.

Piik che tai eng' Saulo

³⁵ Ki kiguure Jeiel kwandap Gibeon ak ki menyei Gibeon. Ki kiguure osotyonnyi Maaka,

³⁶ ak weeriinnyi taita ko ki Abdon, korup Sur, Kish, Baal, Ner, Nadap,

³⁷ Gedor, Ahio, Zekariah ak Miklot.

³⁸ Ak ki sich `Miklot Simeam. Ki menyei ak icheek kobooto tupchosyekwak kotokyindos eng' Jerusalem.

³⁹ Ki sich `Ner Kish, ki sich `Kish Saulo, ak ki sich `Saulo Jonathan, Malki-sua, Abinadab ak Esbaal.

⁴⁰ Weeriitap Jonathan ko ki Meri-baal, ak ki sich `Meri-baal Mikah.

⁴¹ Weeriigap Mikah ko ki: Piton, Melek, Tatea, ak Ahaz.

⁴² Ki sich `Ahaz Jara, ki sich `Jara Alemet, Asmabet, ak Shimri, ak ki sich `Shimri Motsa.

⁴³ Ki sich `Motsa Binea; ak Repaiah weeriinnyi, Eleasa weeriinnyi, Asel weeriinnyi.

⁴⁴ Ki sich `Asel weeriik lo, che kainaikwak ko ki: Asrikam, Bokeru, Ishmael, Searia, Obadiah ak Hanan. Chuuto ko ki weeriigap Asel.