1 ATEPTAP PEETUUSYEK 21 - Bukuit Ne Tilil

Koiiti Daudi piigap lugeet ak pireet ne ki piit

¹ Ki ng'eet Setani kogirinda Israel, ak ki igoochi Daudi koiit Israel.

² Ki leenji Daudi Joab ak pounigap piik, “Oba ak oiit Israel kong'etee Beer-sheba agoi Dan, yeityo obwa omwaiwo si anai koiitennywa.”

³ Ki wol Joab kole, “Ingotes `Kamuktaindet ne Toroor piikyik konyil che tee koiitennywa pogol! Ago kiptaiyandennyu laitoryat, tos icheek tugul koma otwogigap kiptaiyandennyu? Amu nee si komach kiptaiyandennyu kii? Amu nee si komachei ineendet kong'eetyi `tengekto Israel?”

⁴ Ago ki iterteer ng'olyootap laitoryat Joab. Kwo anyun Joab amu nooto, kochut emet tugul ne po Israel, agoi Jerusalem.

⁵ Ki nyo Joab kogoochi Daudi kiit ne tee koitetap piik. Ki ek Israel tugul murenik millionit agenge ak eliphuusyek pogol che ki po rotoogap chok. Ki ek che po Judah eliphuusyek pogol ang'wan ak tamanwogik tisap.

⁶ Ago ma ki itito Lawiik ak Benjamin, amu ki ek ng'olyootap laitoryat kiit ne kiwechei eng' Joab.

⁷ Ma cham Kamuktaindet kiito; kibir anyun Israel.

⁸ Ki leenji Daudi Kamuktaindet, “Ki ayai tengekto ne oo, amu ki ayai kii. Ago nguno asoomin ale iste tengektap otwogindeng'ung', amu ki ayai eng' perberyo ne oo.”

⁹ Ki mwachi Kamuktaindet ne Toroor Gad keerindetap Daudi, koleenji,

¹⁰ “Ui mwachi Daudi ileenji, ‘Kamwa Kamuktaindet ne Toroor kole: Kagoonin tuguuk somok; lewen agenge eng' chooto, si kobiit ayaun.’ ”

¹¹ Konyo anyun Gad ole mi Daudi, ak koleenji ineendet, “Kamwa Kamuktaindet ne Toroor kole: ‘Lewen ne imache:

¹² kenyiisyek somok che po rubeet, kobarin puuniguk arawek somok, ye imwee koonotin puuniguk eng' rotweet, anan ko peetuusyek somok che po rotwetap Kamuktaindet ne Toroor, nooto ko koroitap ng'wony ne nyoonei emet, kobarisyoti malaikaiyatap Kamuktaindet ne Toroor eng' kiwotosyek tugul che po Israel.’ Ibwaat anyun nguno kiit ne awoljini ineendet ne koiyookwo.”

¹³ Ki leenji Daudi Gad, “Ami eng' pichiindo ne oo. Ngabutyi eutap Kamuktaindet ne Toroor; amu eecheen miising' rireenosyekyik; ameng' abutyi eutap chii.”

¹⁴ Koyokyi Kamuktaindet ne Toroor anyun koroitap ng'wony Israel, ak ki pek murenik eliphuusyek tamanwogik tisabu che po Israel.

¹⁵ Ak ki iyookto Kamuktaindet malaikaiyat kwo kobar Jerusalem. Ago ye ki neegit kobar, kogeer Kamuktaindet ne Toroor ak kowal kabwaatennyi agobo yaityonooto, ak koleenji malaikaiyat ne ki parisyei, “Kagoyam! Pagakte!” Ak kitonone malaikaiyatap Kamuktaindet ne Toroor ole neegit rwanyut ne kiboorsee ne po Ornan Jebusindet.

¹⁶ Ki ing'eet metit Daudi ak ki keer malaikaiyatap Kamuktaindet ne Toroor kotononi eng' kwenutap ng'wony ak kipsengwet, kotinyei rotwetap chok ne kaging'us eng' eunnyi, ak kong'werere Jerusalem. Kobutyi ng'wony anyun Daudi ak poisyek kotooree togoochikwak ng'wony, kolaachi kuniok.

¹⁷ Ki leenji Daudi Kamuktaindet, “Koma ko anee ne kong'atei ki iit piik? Aneendet ne koayai tengekto ak ayai kiit ne ya miising'. Ago koyai nee kechirechu? Ee Kamuktaindet ne Toroor, Kamuktaindennyu, asaain ale, ingobira eung'ung' ak kootap kwandanyu, ago matkebir piiguk eng' koroito.”

¹⁸ Ki ng'at anyun `malaikaiyatap Kamuktaindet ne Toroor Gad kwo koleenji Daudi, kotogosta kwo koteekyi Kamuktaindet ne Toroor kaptisisyet eng' rwanyut ne kiboorsee ne po Ornan Jebusindet.

¹⁹ Kotogosta Daudi anyun eng' ng'olyootap Gad, ne kamwa eng' kainetap Kamuktaindet ne Toroor.

²⁰ Ye kiborei Ornan nganuuk kogiwelelgei ineendet ak ki keer malaikaiyat; ak kiunygei weeriikyik ang'wanu che ki mi ak ineendet.

²¹ Ak kingo nyoonei Daudi ole mi Ornan, kotabendo Ornan kogeer Daudi, kwo komanda eng' rwanyunooto kiboorsee ak kong'uruuk eng' taitap Daudi kot kotiiny togeet ng'wony.

²² Koleenji anyun Daudi Ornan, “Koono komosita iborse, si ateekyi Kamuktaindet ne Toroor kaptisisyet eng' yuto si kosiis koroito, mata kobar piik. Igoono eng' alyet ne yamegei.”

²³ Ki leenji `Ornan Daudi, “Ip, kobunjiin! Ingoyai kiptaiyandennyu laitoryat kiit ne keerei kole myee. Keero, agoonin eik koek kagoochinoik che kibeelei, ak agoonin tuguuk che kiboorsee koek kweenik, ak agoonin nganuuk koek kagoochinetap peek; kagoonin tugul.”

²⁴ Ago ki leenji `Laitoryat Daudi Ornan, “Achicha, aalen alyet ne yamegei iman. Ma ibe king'ung' ak agoochi Kamuktaindet ne Toroor, anan agoite kagoochinet ne kibeelei ne ma aal.”

²⁵ Kogoochi anyun Daudi Ornan shekelisyek pogol lo che po thahabu ngegaman, koale olooto.

²⁶ Kiteekyi Daudi Kamuktaindet ne Toroor kaptisisyet eng' yooto, ak ki igoito kagoochinoik che kibeelei ak kagoochinoigap kaalyeet. Ki sa Kamuktaindet ne Toroor, ak ki wolji ineendet eng' kipsengwet eng' maat ne kichoorchigei kaptisisyet ne po kagoochinet ne kibeelei.

²⁷ Ki ng'at `Kamuktaindet ne Toroor malaikaiyat; ak kiger rotwennyi eng' choget.

²⁸ Kingo keer anyun Daudi eng' sainooto kole kagowolji `Kamuktaindet ne Toroor ineendet eng' rwanyut ne kiboorsee ne po Ornan Jebusindet, koeny kagoochinoik eng' yooto.

²⁹ Amu kimi eng' peetuusyechooto kootap Kamuktaindet ne Toroor ne kiteechei Musa eng' surkwen, kobooto kaptisisyetap kagoochinet ne kibeelei komosta ne toroor eng' Gibeon.

³⁰ Ago ki ma imuuch Daudi kwo taitap kaptisisyonooto kwo koteepse Kamuktaindet, amu ki iyweisyei amu rotwetap chok ne po malaikaiyatap Kamuktaindet ne Toroor.