1 ATEPTAP PEETUUSYEK 16 - Bukuit Ne Tilil

¹ Ki ip anyun moingetap Kamuktaindet ak konde kwenutap emait ne kiga teekyi Daudi ak ki igoito kagoochinoik che kibeelei ak kagoochinoigap kaalyeet eng' taitap Kamuktaindet.

² Kingo kagogees Daudi kogoitoetap kagoochinet ne kibeelei ak kagoochinoigap kaalyeet, koberuur piik eng' kainetap Kamuktaindet ne Toroor.

³ Yeityo kogoochi chii age tugul ne po Israel, ne muren ak kwony, magatyat, pendo kitigin ak magatyatap sabibuk che yamyotiin.

⁴ Ki lewen alak eng' Lawiik kobois eng' taitap moingetap Kamuktaindet ne Toroor, koyai kabwaatet, komwachin kongoi, ak kolasu Kamuktaindet ne Toroor, Kamuktaindetap Israel;

⁵ Chooto ko ki chu: ki ne oo Asaph, korubei Zekariah, ak Jeiel, Semiramot, Jehiel, Matitia, Eliap, Benaiah, Obed-edom ak Jeiel. Kibutei icheek kibugandinik ak ketubosyek; kibirei Asaph sanisyek che po sugunonik kocheiyo miising';

⁶ ak kiguutei kotugul iryagook tisiik Benaiah ak Jahasyel eng' taitap moingetap arorutyetap Kamuktaindet.

⁷ Ki ng'at ne po tai anyun Daudi eng' peetuunooto Asaph ak tupchosyekyik kole kewekyi Kamuktaindet ne Toroor kongoi.

Tyendap Daudi ne po kalasunet

⁸ Oweekyi kongoi Kamuktaindet ne Toroor, oguur kainennyi; ongonaak poisyonikyik eng' piik tugul.

⁹ Otyenji, otyenji kalasunoik; ong'alaale poisyonikyik che kikwong'ee!

¹⁰ Olasunegei kainennyi ne tiliil; ingoboiboitu mugulelwegap icheek che cheeng'ei Kamuktaindet ne Toroor.

¹¹ Ocheeng' Kamuktaindet ne Toroor ak kimnateennyi; ocheeng' togeennyi kotugul.

¹² Obwaat poisyonikyik che kikwong'ee che ki koyai; kwang'utikyik ak kirwoogutigap kutinnyi,

¹³ ee okweek kesweegap Israel kiboityondennyi, okweek lagogap Jakobo, chechiik che kigelewen.

¹⁴ Ineendet ko Kamuktaindet ne Toroor, Kamuktaindennyo; miitei kirwoogutikyik ng'wony komugul.

¹⁵ Ibwaate kayomisennyi koigeny, ng'olyoot ne king'atyi ibinwek eliphuut.

¹⁶ Arorutyet ne ki yai kobooto Abraham, ak kayosyennyi ne ki iyasyechi Isak.

¹⁷ Ki igimityi Jakobo nooto koek ng'atuutyet, ki igimityi Israel koek kayomiset ne po koigeny,

¹⁸ koleenji, “Agoonin emetap Kanaan, koek kebebertap poroteng'ung'.”

¹⁹ Ye kita ko oo piik che ng'ering', ee ki oo ng'ering' miising', ak ki oo toek eng' olooto.

²⁰ Kibendat icheek kobunoot pororyet age agoi pororyet age, kobooch laitornatet age agoi age.

²¹ Ki ma chamji chii koyachi icheek ne ya; ee amu icheek, ko ki kergong' laitorinik:

²² Kole, “Amat otwaa chechuuk che iilaatin, amoyachi ne ya maotikyuk.”

²³ Otyenji Kamuktaindet ne Toroor, ng'wony komugul; omwaite yetunennyi eng' peetuut age tugul.

²⁴ Omwaite toroornatennyi eng' pororyosyek, poisyonikyik che kikwong'ee eng' piik tugul.

²⁵ Amu oo Kamuktaindet ne Toroor, nyolu kilas ineendet miising'; kanyool kiywei ineendet kosiir kamuktaik tugul.

²⁶ Amu kamuktaik tugul che po piik koma tilei kiy; ago kiyaei Kamuktaindet ne Toroor kipsengwet.

²⁷ Mi tainnyi teegisto ak etunateet; mi oldanyi kimnateet ak kagasetapkei.

²⁸ Ogoochi Kamuktaindet ne Toroor, okweek tilyonutigap pororyosyek, ogoochi Kamuktaindet ne Toroor toroornatet ak kimnateet.

²⁹ Ogoochi Kamuktaindet ne Toroor toroornatet ne nyoljin kainennyi; Oibu kagoochinet, ak obwa tainnyi; ogutung'ji Kamuktaindet ne Toroor eng' karaaranindap tiliilindo.

³⁰ Potan eng' tainnyi, ng'wony komugul! Ki kigimit ng'wony si ma ng'eigei.

³¹ Ingogaskei kipsengwet, ingobaibait ng'wony! Ingomwa eng' pororyosyek, kole “Laitorani Kamuktaindet ne Toroor!”

³² Ingomoror nyanjet, ak tuguuk che nyiitaat olooto! Ingogaskei mbareenik, kobooto tugul che mi olooto!

³³ Si kotyenso anyun eng' poiboiyet keetiik che mi timiin eng' taitap Kamuktaindet ne Toroor, amu nyoonei ineendet korwookyin ng'wony.

³⁴ Oweekyi Kamuktaindet ne Toroor kongoi, amu myee ineendet; amu tebyei rireenennyi koigeny.

³⁵ Omwa ole, “Sarwech, ee Kiptaiyat Kamuktaindetap yetunennyo, iyumech ak isarwech kemong'u eng' pororyosyek, si kobiit keeweekyi kongoi kaineng'ung' ne tiliil, ak kigaaskei eng' kalasuneng'ung'.”

³⁶ Iberuurot Kamuktaindet ne Toroor, Kamuktaindetap Israel, kobooch koigeny agoi koigeny! Ki mwa piik tugul kole, “Amen, ilasunoot Kamuktaindet ne Toroor!”

Saaet eng' Jerusalem

³⁷ Ki pagaach anyun Asaph ak tupchosyekyik eng' yooto, eng' taitap moingetap arorutyetap Kamuktaindet ne Toroor, si kobiit kobois eng' yooto peetuusyek tugul ko uu ye yamegei ak poisyetap peetuut age tugul.

³⁸ Ki pagaach kora Obed-edom kobooto tupchosyekwak, piik tamanwogik lo ak sisiit kobois eng' olooto; Obed-edom weeriitap Jeduthun ak Hosah ko ki riibiigap kurgeet.

³⁹ Ki pagaach Daudi Zadok tisiindet ak tupchosyekyik tisiik, eng' taitap kootap Kamuktaindet ne Toroor eng' komosta ne toroor ne ki mi Gibeon,

⁴⁰ si kogoochin Kamuktaindet ne Toroor kagoochinoik che kibeelei eng' kaptisisyetap kagoochinet ne kibeelei kotugul, karon ak koskoleny, ko uu tugul che ki kisirchi Ng'atuutigap Kamuktaindet ne Toroor, che king'atyi Israel.

⁴¹ Ki mi kobooto icheek Herman ak Jeduthun ak che kiga ng'et tugul che ki kilewen, che ki kimwa eng' kainaikwak, koweekyi kongoi Kamuktaindet ne Toroor, “Amu tebyei rireenennyi koigeny.”

⁴² Ki mi kobooto icheek Herman ak Jeduthun che ki tinyei iryagook ak sanisyek che po sugunonik che kibirei, che po icheek che pirei kocheiyo miising', ak tuguuk che kibutei che po tyenwogigap Kamuktaindet. Ki tebee weeriigap Jeduthun ormariich.

⁴³ Ki pa piik tugul, ki wo chii tugul koonnyi, ak ki week Daudi agine kwo koberuur koonnyi.