1 ATEPTAP PEETUUSYEK 11 - Bukuit Ne Tilil

Koegu Daudi laitoryatap Israel

¹ Ki iyumjigei anyun Israel tugul ole mi Daudi eng' Hebron ak koleenji, “Ki koweguk ak ko ki panyeeguk.

² Eng' peetuusyek che ki kosiirto, ye ki Laitoryat Saulo, ko ki inyee ne ki imaandoi Israel ak imutu koweek. Ak ki leenjin Kamuktaindet ne Toroor Kamuktaindeng'ung', ‘Ibae piikyuk Israel, ak iegu pounindennywa.’ ”

³ Ki pwa anyun poisyek tugul che po Israel ole mi laitoryat eng' Hebron, ak ki iyomiskei Daudi ak icheek eng' Hebron eng' taitap Kamuktaindet ne Toroor, ak ki iil Daudi koek laitoryat eng' Israel, ko uu ng'olyootap Kamuktaindet ne Toroor ne ki mwa eng' Samuel.

⁴ Ki wo Daudi kobooto Israel tugul Jerusalem (nooto ko Jebus). Ki mi olooto Jebusik che ki menyei emonooto.

⁵ Ak ki leenji piik che ki menyei Jebus Daudi, “Menyone oli.” Ago ki nam Daudi irimeet ne po Zion, nooto ko nganaseetap Daudi.

⁶ Ki le Daudi, “Chiito age tugul ne sip kobarei Jebusik koegu ne oo ak koek kiptaiyat.” Ak kisip kwo kotogosta Joab weeriitap Zeruiah, ak ki kiyai koek ne oo.

⁷ Ki meny Daudi irimeet, ak ki kiguure anyun nganaseetap Daudi.

⁸ Ki teech anyun komuut nganaseet, kobooch Milo koyiem, ak koteech Joab kogetyi ole kiga kobutok eng' nganaseet ne kiga ng'et.

⁹ Ak kieet Daudi kotesak, amu ki mi Kamuktaindet ne Toroor ne po lugoosyek kobooto ineendet.

Piik nyigoonik che po Daudi

¹⁰ Chu ko che eecheen che po piik che kiimeen che ki tinyei Daudi che ki took kogimegitu kobooto ineendet eng' laitornatennyi, kobooto Israel tugul, si koyai ineendet koek laitoryat, ko uu ng'olyootap Kamuktaindet ne Toroor agobo Israel.

¹¹ Ak ni ko koitetap murenik che kiimeen che ki tinyei Daudi: Jasobeam, weeriitap Hakmonindet, ne oo ne po piik sosom; ki nam ng'otinnyi ak kobar pogol somok, tugul kibagenge.

¹² Ne kirubei ineendet ko ki Eleazar, weeriitap Dodo, Ahoindet ne ki agenge ak murenik somok che ki kiimeen.

¹³ Ki mi ak Daudi eng' Pas-damim, ak kiga iyumgei eng' yooto Philistiik koyai lugeet, eng' ole ki mi mbareet ne ki mi sairik che chaang', ak ki mwei piik eng' taitap Philistiik.

¹⁴ Ak kitononso eng' kwenutap mbaranooto. Koet anyun mbaranooto ak kobar Philistiik, ak ki sar `Kamuktaindet ne Toroor icheek eng' katerteeret ne oo.

¹⁵ Ki choortagei somogu eng' che eecheen sosom, koba ole mi Daudi eng' rwandet, kot koit kebeneetap Adulam, ak kiga teech lugeetap Philistiik eng' atebweetap Repaim.

¹⁶ Ak kimi Daudi eng' peetuunooto irimeet, ak kimi agine lugeetap Philistiik Bethlehem.

¹⁷ Ki am melelda Daudi, ak ki le, “Eiye, inaga ng'oo peegap keriingetap Bethlehem ne neegitee ormariichet, aee!”

¹⁸ Ara kichut lugeetap Philistiik murenjoto nyigoonen somogu, koba koram peek eng' keriingetap Bethlehem, ne ki mi ye neegitee ormariichet, ak koipchi Daudi. Ago ma cham Daudi koe, kitumda eng' taitap Kamuktaindet ne Toroor,

¹⁹ ak ki le, “Ingoetena Kamuktaindennyu, si ma yai kii! Tos aee korotiigap pichu koinde saboonwekwak ng'oiyondit?” Amu kaip peechu eng' kandaet ne kainde saboonwekwak ng'oiyondit. Ara ma cham anyun koe amu nooto. Ki yai tuguuchuuto pichooto kiimeen somogu.

²⁰ Ki ne oo Abisai ng'eetap kametap Joab eng' pichooto somok. Ki nam ng'otinnyi ak kobar piik pogol somok, ak ki took kainennyi kobooto pichooto somok.

²¹ Eng' pichooto somok ko ki konyitot Abisai kosiir chuun aeng', ak ki kiyai koek kiptaiyannywa, nganda ma ityi che po tai somok.

²² Ki par Benaiah, weeriitap Jehoiada, weeriitap chiito ne nyigan ne po Kabseel, ne kiga koyai poisyonik che eecheen, weeriik aeng' che po Ariel ne po Moab. Ki choortagei agine kwo kobar ng'etundo eng' kwenutap keriinget eng' peetuusyegap teluji.

²³ Ak ki par Misirindet, chiito ne kooi kot, ne po mitainik aeng' koindonyi. Nganda kimi eutap misirindonooto ng'otit ne uu keetit ne taachin usiisyek chiito ne nabisyei, ko ki choortagei ole mi ineendet kotinyei kirokto ak korep ng'otit eng' eutap Misirindet ak kobare ineendet ng'otinnyi.

²⁴ Ki yai tuguuchuuto Benaiah weeriitap Jehoiada, ak ki took kainennyi kobooto pichooto somok ki kiimeen.

²⁵ Ki konyitot ineendet kosiir pichooto somok, ago ma ityi che po tai somok. Ak ki inde Daudi ineendet koboi riibiikyik.

²⁶ Piik che kiimeen che po lugoosyek ko ki: Asahel ng'eetap kametap Joab, Elanan weeriitap Dodo ne po Bethlehem,

²⁷ Samot Harorindet, Heles Pelonindet,

²⁸ Ira weeriitap Ikes Tekoindet, Abiezer Anatotindet,

²⁹ Sibekai Husatindet, Ilai Ahoindet,

³⁰ Maarai Netopatindet, Heled weeriitap Baanah Netopatindet,

³¹ Itai weeriitap Ribai ne po Gibea ne po lagogap Benjamin, Benaiah Piratonindet,

³² Hurai ne po kereruusyegap Gaas, Abiel Arbatindet,

³³ Asmabet Baharumindet, Eliaba Saalbonindet,

³⁴ weeriigap Hasem Gisonindet, Jonathan weeriitap Sage Hararindet,

³⁵ Aiam weeriitap Sakar Hararindet, Elipal weeriitap Ur,

³⁶ Hepher Mekeratindet, Ahija Pelonindet,

³⁷ Hesro Karmelindet, Naarai weeriitap Esbai,

³⁸ Joel ng'eetap kametap Nathan, Mibar weeriitap Hagri,

³⁹ Selek Amonindet, Naarai Berotindet, chiito ne ki ipchin kariik Joab weeriitap Zeruiah,

⁴⁰ Ira Itrindet, Garib Itrindet,

⁴¹ Uriah Hitindet, Sabad weeriitap Alai,

⁴² Adina weeriitap Shisha Reubenindet, ne oo ne po piigap Reuben, ak piik sosom che ki mi kobooto ineendet,

⁴³ Hanan weeriitap Maaka, Josapat Mitnindet,

⁴⁴ Uzziah Asteratindet, Shammah ak Jeiel weeriigap Hotam Aroerindet,

⁴⁵ Jediael weeriitap Shimri, Joha ng'eetap kamet, Tisiindet,

⁴⁶ Eliel Maabindet, Jeribai, Josabia, weeriigap Elnaam, Itma Moabindet,

⁴⁷ Eliel, Obed ak Jaasyel Mesobaindet.