ಅಪೊಸ್ತಲನಾನ ಪೌಲ ತೀತಂಗ್ ಒಳ್‍ದ್‍ವ ಕಾಗದ 3 - ಕೊಡವ ಬೈಬಲ್ನಲ್ಲದ್ ಮಾಡ್‍ವದ್ 1 ಯೇಸುನ ನಂಬ್‍ನಯಿಂಗ, ಸರ್ಕಾರಕೂ ಅದ್ಂಡ ಅದಿಕಾರಿಯಂಗಕು ಒಳಪಟ್ಟಿತ್ ನಡ್‍ಕಂಡೂಂದ್ ಇಂಞೊಮ್ಮ ಅಯಿಂಗಕ್ ಎಣ್ಣಿತ್, ಏದ್ ನಲ್ಲ ಕೆಲಸ ಮಾಡ್‌ವಕು ತಯಾರಾಯಿತ್ ಇಪ್ಪಕ್ ಎಣ್ಣಿ ಕೊಡ್. 2 ಅಯಿಂಗ ದಾರ್‌ನು ಕೆಟ್ಟಯಿಂಗಾಂದ್ ಎಣ್ಣತೆ, ದಾಡ ಕೂಡೆಯು ಜಗಳ ಮಾಡತೆ, ಎಕ್ಕಾಲು ಬೋರೆಯಿಂಗಡ ವಿಷಯತ್‍ನ ಬಲ್ಯದಾಯಿತ್ ನೋಟ್‌ವಯಿಂಗಳಾತು, ನೇರಾನ ತಾಳ್ಮೆನ ಎಲ್ಲಾ ಜನಕ್ ಕಾಟಂಡೂಂದ್ ಗೇನ ಮಾಡ್‍ಚಿಡ್. 3 ಎನ್ನಂಗೆಣ್ಣ್‌ಚೇಂಗಿ, ಒರ್ ಸಮಯತ್‍ಲ್ ನಂಗ ಸಹ ಮುಠಾಳಂಗಳಾಯಿತ್, ದಾಡ ತಕ್ಕ್‌ನ ಕೇಕತಯಿಂಗಳಾಯಿತ್, ವಂಚನೆ ಮಾಡ್‌ವಯಿಂಗಳಾಯಿತ್, ಎಲ್ಲಾ ತರ ಆಸೆ ಪಿಂಞ ಇಚ್ಛೆಕ್ ಅಡಿಯಾಳಾಯಿತ್, ಜನ ಕಷ್ಟಪಡ್‌ವಕ್ ಕುಶಿಪಡ್‌ವಯಿಂಗಳಾಯಿತ್, ಹೊಟ್ಟೆಕಿಚ್ಚ್‌ಲ್ ಬದ್‍ಕಿಯಂಡ್, ಬೋರೆಯಿಂಗ ನಂಗಳ ವಿರೋದಿಚಿಡ್‍ವನೆಕೆ ಪಿಂಞ ಒಬ್ಬನ ಒಬ್ಬ ವಿರೋದಿಚಿಟ್ಟಂಡ್ ಇಂಜತ್. 4 ಆಚೇಂಗಿ, ನಂಗಡ ರಕ್ಷಕನಾನ ದೇವಡ ದಯೆ ಪಿಂಞ ಅಂವೊಂಗ್ ಜನಡಮೇಲೆ ಉಳ್ಳ ಪ್ರೀತಿ ಪೊರಮೆ ಕಾಂಬನೆಕೆ ಪ್ರತ್ಯಕ್ಷ ಆಪಕ, 5 ನಂಗ ಮಾಡ್‍ನ ನೀತಿರ ಕೆಲಸತ್‍ರಗುಂಡ್ ನಂಗಳ ರಕ್ಷಣೆ ಮಾಡತೆ, ಅಂವೊಂಡ ಕರುಣೇರಗುಂಡ್ ನಂಗಳ ರಕ್ಷಣೆ ಮಾಡ್‍ಚಿ. ಅನ್ನನೆ ನಂಗಡ ಪಾಪತ್‍ನ ಕತ್ತಿತ್, ಪುನಃ ಪುದಿಯದಾಯಿತ್ ಪುಟ್ಟಿತುಳ್ಳನೆಕೆ ನಂಗಕ್ ಪುದಿಯ ಜೀವ ತಂದಿತ್, ನಂಗಡ ಮನಸ್ಸ್‌ನ ಪವಿತ್ರಾತ್ಮಂಡ ಮೂಲಕ ಬದ್‍ಲ್ ಮಾಡ್‍ಚಿ. 6 ದೇವ ನಂಗಡ ರಕ್ಷಕನಾನ ಯೇಸು ಕ್ರಿಸ್ತಂಡ ಮೂಲಕ ನಂಗಕ್ ಅಂವೊಂಡ ಪವಿತ್ರಾತ್ಮತ್‍ನ ದಾರಾಳವಾಯಿತ್ ಕೊಡ್‌ತಿತುಂಡ್. 7 ಆನಗುಂಡ್, ಅಂವೊಂಡ ಕೃಪೇರಗುಂಡ್ ನಂಗಳ ನೀತಿವಂತಯಿಂಗಳಾಯಿತ್ ಮಾಡಿತ್, ನಿತ್ಯ ಜೀವತ್‍ರ ಹಕ್ಕ್‌ದಾರಂಗಳಾಯಿತುಂಡ್‍ೕಂದ್ ಎಣ್ಣುವ ನಂಬಿಕೇನ ನಂಗಕ್ ತಂದಿತುಂಡ್. 8 ಇಲ್ಲಿಕತ್ತನೆ ನಾನ್ ಎಣ್ಣ್‌ನದ್ ಸತ್ಯತ್‍ರ ತಕ್ಕ್. ದೇವಡ ಮೇಲೆ ನಂಬಿಕೆ ಉಳ್ಳಯಿಂಗ, ನಲ್ಲ ಕೆಲಸ ಮಾಡ್‌ವಕ್ ಅರ್ಪಿಚಿಟ್ಟಯಿಂಗಳಾಯಿತ್ ಇರಂಡೂಂದ್ ಉಳ್ಳ ಈ ತಕ್ಕ್‌ನ ನೀನ್ ಕಂಡಿತವಾಯಿತ್ ಬೋದನೆ ಮಾಡಂಡೂಂದ್ ನಾಡ ಆಸೆ. ಈ ತರ ಬೋದನೆ ಸರಿಯಾನದು, ಎಲ್ಲಾರ್‌ಕು ಪ್ರಯೋಜನವಾಯಿತು ಉಂಡ್. 9 ಬುದ್ದಿಯಿಲ್ಲತ ತರ್ಕ, ವಂಶಾವಳಿರ ವಿಷಯತ್‍ರ ತರ್ಕ, ಜಗಳ ಮಾಡ್‍ವದ್ ಪಿಂಞ ನ್ಯಾಯಪ್ರಮಾಣಕ್ ಒಳಪಡಂಡೂಂದ್ ಎಣ್ಣುವ ವಿಷಯತ್‍ರ ಚರ್ಚೆನೆಲ್ಲ ನಿಪ್ಪ್‌ಚಿಡ್. ಇನ್ನನೆ ಮಾಡ್‌ವಗುಂಡ್ ಒರ್ ಪ್ರಯೋಜನ ಇಲ್ಲತದು ಒರ್ ನಲ್ಲದ್ ಮಾಡ್‌ವಕ್ ಕಯ್ಯತದು ಆಯಿತುಂಡ್. 10 ಕಳ್ಳ ಬೋದನೆ ಮಾಡಿತ್, ದೇವಡ ಮಕ್ಕಳ ಬೋರೆ ಬೋರೆ ಮಾಡ್‌ವಯಿಂಗಕ್, ಒರು ಕುರಿ ಅಥವ ದಂಡ್ ಕುರಿ ಎಚ್ಚರ ಮಾಡ್. ಅದ್ಂಗ್ ಅಯಿಂಗ ಕೆಮಿ ಕೊಡ್‍ಕತೆ ಪೋನಕ, ಅಯಿಂಗಳ ತಿರಸ್ಕಾರ ಮಾಡ್. 11 ಅನ್ನನೆ ಮಾಡ್‌ವ ಜನ ಸತ್ಯತ್ಂಜ ಬಯ್ಯಕ್ ಪೋಯಿತ್, ಪಾಪತ್‍ಲ್ ಮುಳುಗಿತುಂಡ್. ಅಯಿಂಗಡ ಪಾಪವೇ ಅಯಿಂಗಳ ತೀರ್ಪ್ ಮಾಡ್‌ವಾಂದ್ ನೀಕ್ ಗೊತ್ತುಂಡ್. ಆಕೀರ್ ವಂದನೆ 12 ನಾನ್ ನೀಡ ಪಕ್ಕ ಅರ್ತೆಮನ ಎಣ್ಣ್‌ವಂವೊನ ಪಿಂಞ ತುಖಿಕ ಎಣ್ಣ್‌ವಂವೊನ ಅಯಿಪಕ, ನೀನ್ ನಿಕೊಪೊಲಿ ಎಣ್ಣುವ ಪಟ್ಟಣಕ್ ನಾಡ ಪಕ್ಕ ಬಪ್ಪಕ್ ಪ್ರಯತ್ನಪಡ್; ಎನ್ನಂಗೆಣ್ಣ್‌ಚೇಂಗಿ, ಕುಳ್‌ರ್ ಕಾಲತ್‍ಲ್ ನಾನ್ ಅಲ್ಲಿ ಇಪ್ಪಕ್ ಗೇನ ಮಾಡಿಯೆ. 13 ನೀಕ್ ಕಯ್ಯುವಚ್ಚಕ್ ವಕೀಲನಾನ ಜೇನ ಪಿಂಞ ಅಪೊಲ್ಲೋಸಂಗ್ ಒರ್ ಕೊರತೆಯು ಇಲ್ಲತೆ ಅಯಿಂಗಡ ಪ್ರಯಾಣಕ್ ಬೋಂಡಿಯಾನ ಎಲ್ಲಾ ವ್ಯವಸ್ತೆನ ಮಾಡ್. 14 ನಂಗಡ ಜನ, ನೇರಾಯಿತ್ ಕೊರತೆ ಉಳ್ಳಯಿಂಗಕ್ ಬೋಂಡಿಯಾನದ್‍ನ ಪೂರೈಚಿಡುವ ನಲ್ಲ ಕಾರ್ಯತ್‍ನ ಮಾಡ್‌ವಕ್ ಪಡಿಕಡ್. ಅಕ್ಕ ಅಯಿಂಗಡ ಬದ್‍ಕ್ ಪ್ರಯೋಜನ ಇಲ್ಲತೆ ಪೋಪುಲೆ. 15 ನಾಡ ಪಕ್ಕ ಉಳ್ಳ ಎಲ್ಲಾರು ನೀಕ್ ಪ್ರೀತಿರ ವಂದನೆ ಎಣ್ಣಿಯಂಡುಂಡ್. ದೇವಡ ಮೇಲೆ ಉಳ್ಳ ನಂಬಿಕೇಲ್ ನಂಗಳ ಪ್ರೀತಿ ಮಾಡ್‌ವಯಿಂಗಕ್ ವಂದನೆ ಎಣ್ಣ್. ದೇವಡ ಕೃಪೆ ನಿಂಗ ಎಲ್ಲಾಡ ಕೂಡೆ ಇರಡ್. |
© 2017, New Life Literature (NLL)