ರೋಮ್ 4 - ಕೊಡವ ಬೈಬಲ್ನಂಬಿಕೇರಗುಂಡ್ ಅಬ್ರಹಾಮ ನೀತಿವಂತಂವೊನಾನದ್ 1 ನಂಗಡ ಜನಾಂಗತ್‍ರ ಮುತ್ತಜ್ಜನಾನ ಅಬ್ರಹಾಮಂಡ ವಿಷಯತ್‍ಲ್ ನಂಗಕ್ ಎಂತ ಎಣ್ಣ್‌ವಕ್ ಕಯ್ಯು? ಅಂವೊ ಎನ್ನನೆ ನೀತಿವಂತವೊನಾಚಿ? 2 ಅಬ್ರಹಾಮ ಅಂವೊಂಡ ಕ್ರಿಯೆರ ಮೂಲಕ ನೀತಿವಂತಂವೊನಾಯಿತ್ಂಜತೇಂಗಿ ಹೊಗಳಿಚಿಡ್‌ವಕ್ ಅಂವೊಂಗ್ ಜಾಗ ಉಂಡ್; ಆಚೇಂಗಿ ದೇವಡ ಮಿಂಞತ್ ಅನ್ನನೆ ಮಾಡ್‌ವಕ್ ಆಪುಲೆ. 3 ದೇವಡ ವಾಕ್ಯ ಎಂತ ಎಣ್ಣಿಯಂಡುಂಡ್? ಅಬ್ರಹಾಮ ದೇವನ ನಂಬ್‍ಚಿ, ಅದ್‍ನ ದೇವ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಮಾಡ್‍ಚೀಂದ್ ಎಣ್ಣಿಯಂಡುಂಡ್. 4 ಕ್ರಿಯೆ ಮಾಡ್‌ವಂವೊಂಗ್ ಕ್‍ಟ್ಟುವ ಕೂಲಿನ ಕೃಪೇಂದ್ ಎಣ್ಣುಲೆ, ಆಚೇಂಗಿ ಅದ್‍ನ ಅಂವೊಂಗ್ ಕೊಡ್‌ಪಕುಳ್ಳದ್‍ೕಂದ್ ಎಣ್ಣುವ. 5 ಒಬ್ಬ ಕ್ರಿಯೆ ಮಾಡತೆ, ಪಾಪಿಯಳ ನೀತಿವಂತಂವೊನಾಯಿತ್ ಮಾಡ್‌ವಂವೊಂಡ ಮೇಲೆ ನಂಬಿಕೆ ಇಟ್ಟತೇಂಗಿ, ಅಂವೊಂಡ ನಂಬಿಕೆಯೇ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಆಪಲ್ಲ. 6 ಅನ್ನನೆ ಕ್ರಿಯೆ ಮಾಡತೆ, ದೇವಡಗುಂಡ್ ನೀತಿವಂತವೊನಾಪ ಮನುಷ್ಯಂಡ ಆಶೀರ್ವಾದತ್‍ನ ದಾವೀದ ಸಹ ಇನ್ನನೆ ಎಣ್ಣಿತುಂಡ್. 7 ದಾಡ ಅಕ್ರಮಕೆಲ್ಲ ಮನ್ನಿಪ್ ಕ್‍ಟ್ಟ್‌ಚೋ, ದಾಡ ಪಾಪತ್‍ನೆಲ್ಲ ದೇವ ಮುಚ್ಚಿತೋ ಅಯಿಂಗೆಲ್ಲ ಆಶೀರ್ವಾದ ಪಡ್ಂದಯಿಂಗ. 8 ದಾಡ ಪಾಪತ್‍ನೆಲ್ಲ ಒಡೆಯ ಲೆಕ್ಕ ಮಾಡಿತ್‌ಲ್ಲೆಯೋ ಅಂವೊ ಆಶೀರ್ವಾದ ಪಡ್ಂದಂವೊ. 9 ಈ ಆಶೀರ್ವಾದ ಸುನ್ನತಿ ಮಾಡ್‍ನಯಿಂಗಕ್ ಮಾತ್ರ ಕ್‍ಟ್ಟುವಾ? ಅಥವ ಸುನ್ನತಿ ಮಾಡತಯಿಂಗಕು ಉಂಡಾ? ಅಬ್ರಹಾಮಂಡ ನಂಬಿಕೆನ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಮಾಡ್‍ಚೀಂದ್ ನಂಗ ಎಣ್ಣಿಯಂಡುಂಡಲ್ಲ? 10 ಅಕ್ಕ, ಅದ್ ಅಂವೊಂಗ್ ಎಕ್ಕ ಕ್‍ಟ್ಟ್‌ಚಿ? ಅಂವೊಂಗ್ ಸುನ್ನತಿ ಮಾಡ್‌ವಕ್ ಮಿಂಞ ಕ್‍ಟ್ಟ್‌ಚಾ? ಅಥವ ಸುನ್ನತಿ ಆನ ಪಿಂಞ ಕ್‍ಟ್ಟ್‌ಚಾ? ಸುನ್ನತಿ ಆನ ಪಿಂಞ ಅಲ್ಲ, ಸುನ್ನತಿ ಆಪಕ್ ಮಿಂಞಲೇ ಕ್‍ಟ್ಟ್‌ಚಿ. 11 ಅದಲ್ಲತೆ, ಅಂವೊಂಗ್ ಸುನ್ನತಿ ಆಪಕ್ ಮಿಂಞ, ನಂಬಿಕೇರ ಮೂಲಕ ಅಂವೊಂಗ್ ಕ್‍ಟ್ಟ್‌ನ ನೀತಿಕ್ ಮುದ್ರೆಯಾಯಿತ್ ಸುನ್ನತಿ ಎಣ್ಣುವ ಗುರ್‍ತ್‍ನ ಅಂವೊಂಗ್ ಕೊಡ್‍ತತ್. ಆನಗುಂಡ್, ಸುನ್ನತಿ ಮಾಡತಯಿಂಗಳಾಯಿತ್ ನಂಬುವ ಎಲ್ಲಾರ್‌ಕು, ನೀತಿರ ಲೆಕ್ಕ ಕ್‍ಟ್ಟಿತ್ ಅಯಿಂಗಕ್ ಸಹ ಅಂವೊ ಅಪ್ಪನಾಯಿತ್ ಇಪ್ಪನೆಕೆ ಆಚಿ. 12 ಅಬ್ರಹಾಮ, ಸುನ್ನತಿ ಮಾಡ್‍ನಯಿಂಗಕ್, ಅಯಿಂಗ ಸುನ್ನತಿ ಮಾಡ್‍ನಗುಂಡ್ ಮಾತ್ರ ಅಪ್ಪನಾಯಿತ್ ಅಲ್ಲತೆ, ಅಂವೊ ಸುನ್ನತಿ ಮಾಡ್‌ವಕ್ ಮಿಂಞ ಅಂವೊಂಗ್ ಇಂಜ ನಂಬಿಕೇರನೆಕೆ, ಸುನ್ನತಿ ಮಾಡ್‍ನಯಿಂಗ ನಂಬಿಕೆ ಇಡ್‍ವಕ, ಅಂವೊ ಅಯಿಂಗಕ್ ಅಪ್ಪನಾಯಿತ್ ಆಪನೆಕೆ ಆಚಿ. 13 ಅಬ್ರಹಾಮಂಗ್ ಪಿಂಞ ಅಂವೊಂಡ ಸಂತಾನಕಾರಂಗಕ್, ಈ ಲೋಕತ್‍ರ ಹಕ್ಕ್‌ದಾರಂಗಳಾಪಿರಾಂದ್ ಕ್‍ಟ್ಟ್‌ನ ವಾಗ್ದಾನ, ನ್ಯಾಯಪ್ರಮಾಣತ್‍ರ ಮೂಲಕ ಕ್‍ಟ್ಟತೆ, ನಂಬಿಕೇರ ಮೂಲಕ ಬಪ್ಪ ನೀತಿರಗುಂಡ್ ಕ್‍ಟ್ಟ್‌ಚಿ. 14 ನ್ಯಾಯಪ್ರಮಾಣತ್‍ರನೆಕೆ ಮಾಡ್‌ವಯಿಂಗ ಹಕ್ಕ್‌ದಾರಂಗಳಾಚೇಂಗಿ, ನಂಬಿಕೇಕ್ ಒರ್ ಬೆಲೆಯು ಇಪ್ಪುಲೆ, ವಾಗ್ದಾನವು ಅರ್ಥ ಇಲ್ಲತೆ ಪೋಪ. 15 ನ್ಯಾಯಪ್ರಮಾಣ ದೇವಡ ಬಲ್ಯ ಚೆಡಿನ ಕೊಂಡ್ ಬಪ್ಪ, ನ್ಯಾಯಪ್ರಮಾಣ ಇಲ್ಲೇಂಗಿ ಅಪರಾದವು ಇಲ್ಲೆ. 16 ಆನಗುಂಡ್, ಬಾದ್ಯತೆ ಕೃಪೆಯಿಂಜ ಬಪ್ಪನೆಕೆ ಅದ್ ನಂಬಿಕೇರ ಮೂಲಕ ಬಾತ್; ನ್ಯಾಯಪ್ರಮಾಣಕ್ ಕೂಡ್‍ನ ಸಂತಾನಕಾರಂಗಕ್ ಮಾತ್ರ ಅಲ್ಲತೆ, ನಂಗ ಎಲ್ಲಾರ್‌ಕು ಅಪ್ಪನಾನ ಅಬ್ರಹಾಮಂಡ ನಂಬಿಕೇಕ್ ಕೂಡ್‍ನ ಎಲ್ಲಾ ಸಂತಾನಕಾರಂಗಕು ಆ ವಾಗ್ದಾನ ಕಂಡಿತವಾಯಿತ್ ಬಂದಂಡುಂಡ್. 17 ದುಂಬ ಜಾತಿಯಂಗಕ್ ನಿನ್ನ ಅಪ್ಪನಾಯಿತ್ ಮಾಡ್‌ವೀಂದ್ ಒಳ್‍ದಿತುಳ್ಳನೆಕೆ, ಅಂವೊ ನಂಬ್‍ನಂವೊಂಡ ಮಿಂಞತ್ ಪಿಂಞ ಚತ್ತಯಿಂಗಳ ಪುನಃ ಜೀವತ್‍ಲ್ ಕೊಂಡ್ ಬಪ್ಪಂವೊಂಡ ಮಿಂಞತ್ ಪಿಂಞ ಇಲ್ಲತದ್‍ನ ಉಳ್ಳನೆಕೆ ಕಾಕ್‍ವಂವೊನಾಯಿತ್ತುಳ್ಳ ದೇವಡ ಮಿಂಞತ್‍ಲ್ ನಂಗ ಎಲ್ಲಾರ್‌ಕು ಅಪ್ಪನಾಯಿತ್ ಆಚಿ. 18 ನೀಡ ಸಂತಾನಕಾರಂಗ ಇಚ್ಚಕ್ ಇಪ್ಪಾಂದ್ ಎಣ್ಣ್‌ನನೆಕೆ, ಅಂವೊ ದುಂಬ ಜಾತಿಯಂಗಕ್ ಅಪ್ಪನಾಯಿತ್ ಆಪಕ್ ಏದ್ ಸಾದ್ಯವು ಇಲ್ಲತೆ ಇಂಜತೇಂಗಿಯು, ಅದ್‍ನ ನಿರಿಕ್ಷೇಲ್ ನಂಬ್‍ಚಿ. 19 ಅಂವೊ ಸುಮಾರ್ ನೂರ್ ವಯಸಾಯಿತ್ ಇಪ್ಪಕ, ತಾಂಡ ತಡಿಯಿಂಜ ಒರ್ ಕುಂಞಿ ತಪ್ಪಕುಳ್ಳ ಶಕ್ತಿ ಇಲ್ಲೇಂದು, ಅಂವೊಂಡ ಪೊಣ್ಣ್ ಸಾರಳಡ ಗರ್ಬಗೂಡ್ ಚತ್ತ್ ಪೋಯಿತ್‍ೕಂದು ಗೊತ್ತ್ಂಜತ್. ಆಚೇಂಗಿಯು, ಅಂವೊಂಡ ನಂಬಿಕೆ ಕಮ್ಮಿಯಾಯಿತ್‌ಲ್ಲೆ. 20 ದೇವಡ ವಾಗ್ದಾನತ್‍ರ ವಿಷಯತ್ ಅಂವೊಂಗ್ ಅಪನಂಬಿಕೆ ಮಾಡತೆ, ನಂಬಿಕೇಲ್ ಸ್ತಿರಪಟ್ಟಿತ್, ದೇವಕ್ ಮಹಿಮೆ ಕೊಡ್‍ತತ್. 21 ದೇವ ವಾಗ್ದಾನ ಮಾಡ್‍ನದ್‍ನ ನೆರೆವೇರಿಚಿಡುವಕ್ ಅಂವೊಂಗ್ ಶಕ್ತಿ ಉಂಡ್‍ೕಂದ್ ನಿಶ್ಚಯವಾಯಿತ್ ನಂಬ್‍ಚಿ. 22 ಆನಗುಂಡ್, ದೇವ ಅಂವೊನ ನೀತಿವಂತಂವೋಂದ್ ಲೆಕ್ಕ ಮಾಡ್‍ಚಿ. 23 ಅದ್ ಅಂವೊಂಗ್ ನೀತಿಯಾಯಿತ್ ಲೆಕ್ಕ ಆಚೀಂದ್ ಎಣ್ಣುವದ್ ಅಂವೊಂಗ್ ಮಾತ್ರ ಅಲ್ಲ, ನಂಗಕಾಯಿತ್ ಸಹ ಒಳ್‍ದಿ ಬೆಚ್ಚಿತುಂಡ್. 24 ನಂಗಡ ಒಡೆಯನಾನ ಯೇಸುನ ಚಾವ್‍ಯಿಂಜ ಎಪ್ಪ್‌ಚಿಟ್ಟಂವೊನ ನಂಬುವ ನಂಗಕ್ ಅನ್ನನೆ ಲೆಕ್ಕ ಆಪ. 25 ನಂಗ ನೀತಿವಂತಯಿಂಗಳಾಯಿತ್ ಆಂಡೂಂದ್, ನಂಗಡ ಪಾಪಕಾಯಿತ್ ಅಂವೊನ ಚಾವ್‍ಕ್ ಒಪ್ಪ್‌ಚಿಟ್ಟಿತ್, ಅಂವೊನ ಚಾವ್‍ಯಿಂಜ ಎಪ್ಪ್‌ಚಿಟ್ಟತ್. |
© 2017, New Life Literature (NLL)