ರೋಮ್ 14 - ಕೊಡವ ಬೈಬಲ್ತೀರ್ಪ್ ಮಾಡತಿ 1 ನಂಬಿಕೇಲ್ ಸ್ತಿರಯಿಲ್ಲತಯಿಂಗಳ ಕೂಟಿಯೊಳಿ; ಆಚೇಂಗಿಯು ಅಯಿಂಗಡ ಅನುಮಾನತ್‍ನ ಕುತ್ತ ಪರಿಯತಿರಿ. 2 ಒಬ್ಬ ಎಂತ ಬೋಂಡ್‍ಚೇಂಗಿಯು ತಿಂಗಲೂಂದ್ ನಂಬಿಯಂಡುಂಡ್; ನಂಬಿಕೇಲ್ ಸ್ತಿರವಿಲ್ಲತಂವೊ, ತರ್ಕಾರಿನ ಮಾತ್ರ ತಿಂದಂಡುಂಡ್. 3 ಎಲ್ಲಾನ ತಿಂಬ ಒಬ್ಬ, ಎಲ್ಲಾನ ತಿಂಗತಂವೊನ ಕಮ್ಮಿಯಾಯಿತ್ ನೋಟ್‌ವಕ್ಕಾಗ; ಎಲ್ಲಾನ ತಿಂಗತಂವೊ, ತಿಂಬಂವೊನ ತಪ್ಪ್ ಮಾಡ್‍ನಂವೋಂದ್ ತೀರ್ಪ್ ಮಾಡ್‌ವಕ್ಕಾಗ. ದೇವ ಅಂವೊನ ಸಹ ಸ್ವೀಕಾರ ಮಾಡಿತುಂಡಲ್ಲ. 4 ಬೋರೆ ಒಬ್ಬಂಡ ಆಳ್‌ನ ತೀರ್ಪ್ ಮಾಡ್‌ವಕ್ ನೀನ್ ದಾರ್? ಅಂವೊ ನಿಂದತೇಂಗಿಯು, ಬುದ್ದತೇಂಗಿಯು ಅಂವೊ ಅಂವೊಂಡ ಎಜಮಾನಂಗ್ ಕೂಡ್‍ನಂವೊನಾಪ. ಅಂವೊ ನಿಪ್ಪಕ್ ದೇವ ಶಕ್ತಿ ಕೊಡ್‍ಪಂವೊನಾಯಿತುಂಡಲ್ಲ. 5 ಅದಲ್ಲತೆ ಒಬ್ಬ, ಒರ್ ದಿವಸತ್‍ನ ಬೋರೆ ಒರ್ ದಿವಸತ್ಂಜ ವಿಶೇಷವಾನದ್‍ೕಂದ್ ಗೇನ ಮಾಡಿಯಂಡುಂಡ್; ಬೋರೆ ಒಬ್ಬ ಎಲ್ಲಾ ದಿವಸತ್‍ನ ಒರೇ ರೀತಿಯಾಯಿತುಂಡ್‍ೕಂದ್ ಗೇನ ಮಾಡಿಯಂಡುಂಡ್; ಒಬ್ಬೊಬ್ಬನು ಅಯಿಂಗ ಅರ್ಥಮಾಡ್‍ನದ್‍ಲ್ ಸ್ತಿರವಾಯಿತ್ ಇರಂಡು. 6 ಒರ್ ದಿವಸತ್‍ನ ವಿಶೇಷವಾಯಿತ್ ಕೊಂಡಾಡುವಂವೊ ಅದ್‍ನ ಒಡೆಯಂಗಾಯಿತ್ ಮಾಡಿಯಂಡುಂಡ್, ಎಲ್ಲಾನ ತಿಂಬಂವೊ, ದೇವಕ್ ವಂದನೆ ಎಣ್ಣಿತ್ ತಿಂಬಗುಂಡ್, ಒಡೆಯಂಗಾಯಿತ್ ತಿಂದಂಡುಂಡ್; ತಿಂಗತಂವೊನು ಒಡೆಯಂಗಾಯಿತ್ ತಿಂಗತೆ, ದೇವಕ್ ವಂದನೆ ಮಾಡಿಯಂಡುಂಡ್. 7 ನಂಗಡಲ್ಲಿ ಒಬ್ಬನು ತಾಂಗಾಯಿತ್ ಬದ್‍ಕ್‍ವದು ಇಲ್ಲೆ, ತಾಂಗಾಯಿತ್ ಚಾವದು ಇಲ್ಲೆ. 8 ನಂಗ ಬದ್‍ಕಿಯಂಡಿಂಜತೇಂಗಿ ಒಡೆಯಂಗಾಯಿತ್ ಬದ್‍ಕಿಯಂಡುಂಡ್. ನಂಗ ಚತ್ತತೇಂಗಿಯು ಒಡೆಯಂಗಾಯಿತ್ ಚತ್ತ್ ಪೋಪ; ಆನಗುಂಡ್, ನಂಗ ಬದ್‍ಕಿಯಂಡಿಂಜತೇಂಗಿಯು, ಚತ್ತತೇಂಗಿಯು ಒಡೆಯಂಗ್ ಕೂಡ್‍ನಯಿಂಗಳಾಯಿತುಂಡ್. 9 ಚತ್ತಯಿಂಗಕು, ಬದ್‍ಕಿಯಂಡುಳ್ಳಯಿಂಗಕು ಒಡೆಯನಾಯಿತ್‌ಪ್ಪಕಾಯಿತ್ ಕ್ರಿಸ್ತ ಚತ್ತ್ ಎದ್ದಿತ್ ಬದ್‍ಕಿಯಂಡ್ ಉಂಡ್. 10 ಇನ್ನನೆ ಇಪ್ಪಕ, ನೀಡ ಅಣ್ಣತಮ್ಮಣಂಗಳ ತಪ್ಪ್ ಮಾಡ್‌ನಯಿಂಗಾಂದ್ ಎನ್ನಂಗ್ ತೀರ್ಪ್ ಮಾಡ್‌ವಿಯ? ನೀನ್ ನೀಡ ಅಣ್ಣತಮ್ಮಣಂಗಳ ಎನ್ನಂಗ್ ಕಮ್ಮಿಯಾಯಿತ್ ನೋಟ್‍ವಿಯ? ನಂಗ ಎಲ್ಲಾರು ದೇವಡ ನ್ಯಾಯತೀರ್ಪ್‌ಕ್ ಮಿಂಞ ನಿಕ್ಕಂಡು ಅಲ್ಲ? 11 ಅನ್ನನೆ: ಎಲ್ಲಾ ಜನಳು ನಾಡ ಮಿಂಞ ಮೊಣಕಾಲ್ ಇಡ್‌ವ, ಎಲ್ಲಾರು ಅಯಿಂಗಡ ನಾವ್ಂಜ ನನ್ನ ದೇವಾಂದ್ ಅರಿಕೆ ಮಾಡ್‌ವಾಂದ್ ಎಕ್ಕಾಲು ಜೀವವಾಯಿತುಳ್ಳ ಒಡೆಯನಾನ ನಾನೇ ಎಣ್ಣಿತುಳ್ಳ್‌ಂದ್ ಒಳ್‍ದಿ ಬೆಚ್ಚಿತುಂಡ್. 12 ಆನಗುಂಡ್ ನಂಗ ಒಬ್ಬೊಬ್ಬನು ದೇವಡ ಮಿಂಞತ್ ನಂಗಡ ವಿಷಯತ್ ಲೆಕ್ಕ ಕೊಡ್‍ಕಂಡು. ದಾರ್‌ನು ಬೂವನೆಕೆ ಮಾಡತಿ 13 ಆನಗುಂಡ್ ಇಂಞು ಮಿಂಞಕ್ ನಂಗ ದಾರ್‌ನು ತಪ್ಪ್ ಮಾಡ್‍ನಂವೋಂದ್ ತೀರ್ಪ್ ಮಾಡ್‌ವಕ್ಕಾಗ. ಒಬ್ಬನು ತಾಂಡ ಅಣ್ಣತಮ್ಮಣಂಗ ಬುದ್ದ್‌ಪೋಪನೆಕೆಯು, ಬೊಳಿಯುವದ್‍ನ ತಡ್‍ಪನೆಕೆ ಮಾಡ್‌ವಕ್ಕಾಗ. 14 ಏದ್ ಆಹಾರವು ಅದಾಯಿತೇ ಅಶುದ್ದ ಆಯಿತಿಪ್ಪುಲೇಂದ್ ಒಡೆಯನಾನ ಯೇಸುರಲ್ಲಿ ಗೊತ್ತಾಯಿತ್ ದೃಡವಾಯಿತ್ ನಂಬುವಿ; ಏದಾಚು ಒರ್ ಆಹಾರ ವಸ್ತುನ ಅಶುದ್ದಾಂದ್ ಒಬ್ಬ ಗೇನ ಮಾಡ್‍ಚೇಂಗಿ, ಅಂವೊಂಗ್ ಅದ್ ಅಶುದ್ದವಾಯಿತ್‌ಪ್ಪ. 15 ನೀನ್ ಉಂಬ ಆಹಾರತ್ಂಜ ನೀಡ ಅಣ್ಣತಮ್ಮಣಂಗಕ್ ನೊಂಬಲ ಆಪದಾಚೇಂಗಿ, ನೀನ್ ಪ್ರೀತಿಲ್ ನಡ್ಂದಂಡಿಲ್ಲೆ; ಅಂವೊನ ನೀಡ ಆಹಾರತ್‍ರಗುಂಡ್ ಪಾಳ್ ಮಾಡತೆ. ಕ್ರಿಸ್ತ ಅಂವೊಂಗಾಯಿತ್ ಸಹ ಜೀವ ಕೊಡ್‍ತಿತುಂಡಲ್ಲ? 16 ನಿಂಗ ನಲ್ಲದ್‍ೕಂದ್ ಗೇನ ಮಾಡ್‌ವ ವಿಷಯಕ್, ಕೆಟ್ಟ ಪೆದ ಕ್‍ಟ್ಟ್‌ವನೆಕೆ ಬುಡತಿ. 17 ಎನ್ನಂಗೆಣ್ಣ್‌ಚೇಂಗಿ, ದೇವಡ ರಾಜ್ಯ ತಿಂಬದು ಕುಡಿಪದು ಅಲ್ಲ, ಅದ್ ನೀತಿಯು, ಸಮಾದಾನವು ಪವಿತ್ರಾತ್ಮತ್‍ರಗುಂಡ್ ಕ್‍ಟ್ಟ್‌ವ ಕುಶಿಯು ಆಯಿತುಂಡ್. 18 ಈ ವಿಷಯತ್‍ಲ್ ಎಚ್ಚರ ಎಡ್‍ತಂಡ್ ಕ್ರಿಸ್ತನ ಸೇವೆ ಮಾಡ್‌ವಂವೊಂಡ ಮೇಲೆ ದೇವನು ಕುಶಿ ಪಡುವ, ಮನುಷ್ಯಂಗಡಿಂಜ ಅಂಗಿಕಾರವು ಕ್‍ಟ್ಟುವ. 19 ಆನಗುಂಡ್, ಸಮಾದಾನ ತಪ್ಪ ವಿಷಯತ್‍ನ ಪಿಂಞ, ಒಬ್ಬೊಬ್ಬನು ಆತ್ಮೀಯ ವಿಷಯತ್‍ಲ್ ಬೊಳ್‍ತ್‍ವಕ್ ಸಹಾಯ ಮಾಡ್‌ವ ವಿಷಯತ್‍ನ ಮಾಡ್‌ವಕ್ ಪ್ರಯತ್ನ ಪಡಂಡು. 20 ಆಹಾರ ವಿಷಯಕಾಯಿತ್ ದೇವಡ ಕ್ರಿಯೇನ ಪಾಳ್ ಮಾಡತಿ. ಎಲ್ಲಾ ಆಹಾರವು ಶುದ್ದವಾನದ್; ಆಚೇಂಗಿಯು, ಬೋರೆ ಒಬ್ಬ ಬುದ್ದ್‌ಪೋಪಕ್ ಕಾರಣವಾಯಿತ್ ಅಂವೊ ತಿಂದತೇಂಗಿ, ಅದ್ ಅಂವೊಂಗ್ ಕುತ್ತವಾಯಿತ್‌ಪ್ಪ. 21 ಯರ್ಚಿ ತಿಂಬದು, ಕುಡಿಪದು, ಬೋರೆ ಎಂತಾಚು ಮಾಡ್‌ವದು, ಯೇಸುನ ನಂಬ್‍ನಯಿಂಗ ಪಾಪತ್‍ಲ್ ಬುದ್ದ್ ಪೂಪನೆಕೆ ಬಟ್ಟೆ ಕೊಡ್‍ತತೇಂಗಿ, ಅದ್‍ಲ್ ಒರ್ ವಿಷಯತ್‍ನು ಮಾಡತೆ ಇಪ್ಪದ್ ನಲ್ಲದ್. 22 ಅದ್‍ಲ್ ತಪ್ಪು ಒಂದು ಇಲ್ಲೇಂದ್ ನೀನ್ ನಂಬ್‍ಚೇಂಗಿ, ಅದ್‍ನ ನೀಕು ದೇವಕು ಮದ್ಯತ್‍ಲ್ ಬೆಚ್ಚೊಳಿ. ನೀಕ್ ನಲ್ಲದ್‍ೕಂದ್ ನೀನ್ ತೀರ್ಮಾನ ಮಾಡ್‍ನ ವಿಷಯತ್‍ಲ್, ನಿನ್ನ ತಪ್ಪ್ ಮಾಡತಂವೊನಾಯಿತ್ ಕಾಪಾಡಿಯಂಡತೇಂಗಿ ನೀನ್ ಆಶೀರ್ವಾದ ಪಡ್ಂದಂವೊ. 23 ಒಬ್ಬ ಅನುಮಾನತ್‍ಲ್ ತಿಂದತೇಂಗಿ, ಅಂವೊಂಗ್ ತೀರ್ಪ್ ಕ್‍ಟ್ಟ್‌ವ; ಎನ್ನಂಗೆಣ್ಣ್‌ಚೇಂಗಿ, ಅಂವೊ ಅದ್‍ನ ನಂಬಿಕೆಯಿಂಜ ತಿಂದಂಡಿಲ್ಲೆ. ನಂಬಿಕೇರ ಆದಾರ ಮೇಲೆ ಬರತದ್ ಎಲ್ಲಾ ಪಾಪವೇ. |
© 2017, New Life Literature (NLL)