ರೋಮ್ 11 - ಕೊಡವ ಬೈಬಲ್ಇಸ್ರಾಯೇಲ್ ಜನಡಮೇಲೆ ದೇವಡ ಕರುಣೆ 1 ಆನಗುಂಡ್, ದೇವ ತಾಂಡ ಜನತ್‍ನ ತಿರಸ್ಕಾರ ಮಾಡ್‍ಚಾಂದ್ ಕ್‍ೕಪಿ. ಅನ್ನನೆ ಮಾಡುಲೆ. ನಾನ್ ಸಹ ಅಬ್ರಹಾಮಂಡ ಸಂತಾನತ್‍ಲ್ ಬೆನ್ಯಾಮೀನಂಡ ಕುಲತ್‍ಲ್ ಪುಟ್ಟ್‌ನ ಇಸ್ರಾಯೇಲ. 2 ದೇವ, ಮಿಂಞಲೇ ಗೊತ್ತ್ ಮಾಡ್‍ನ ತಾಂಡ ಜನತ್‍ನ ತಿರಸ್ಕಾರ ಮಾಡುಲೆ. ಎಲೀಯ ಪ್ರವಾದಿರ ವಿಷಯತ್‍ನ ದೇವಡ ವಾಕ್ಯ ಎಣ್ಣುವ ಜಾಗತ್‍ಲ್, ಎಂತ ಎಣ್ಣಿಯಂಡುಂಡ್‍ೕಂದ್ ಗೊತ್ತ್‌ಲ್ಲೆಯ? ಎಲೀಯ ದೇವಡ ಪಕ್ಕ: 3 ಒಡೆಯನೇ, ಅಯಿಂಗ ನೀಡ ಪ್ರವಾದಿಯಳ ಕೊಲೆ ಮಾಡಿತ್, ನೀಡ ಬಲಿಪೀಠತ್‍ನೆಲ್ಲ ಪೊಳಿಚಿರ್‌ತ್; ನಾನ್ ಒಬ್ಬ ಮಾತ್ರ ಬಾಕಿ ಉಂಡ್. ನನ್ನ ಸಹ ಕೊಲ್ಲ್‌ವಕ್ ಪ್ರಯತ್ನ ಪಟ್ಟಂಡುಂಡ್‍ೕಂದ್ ಇಸ್ರಾಯೇಲ್ ಜನಕ್ ವಿರೋದವಾಯಿತ್ ಬೋಡ್‍ಚಿ. 4 ದೇವ ಅಂವೊಂಗ್ ಎಂತ ಉತ್ತರ ಕೊಡ್‌ತತ್‍ೕಂದ್ ಗೊತ್ತುಂಡಲ್ಲ? ಬಾಳಂಡ ವಿಗ್ರಹಕ್ ಮೊಣಕಾಲ್ ಇಡತ ಏಳಾಯಿರ ಜನತ್‍ನ ನಾಕಾಯಿತ್ ಬಾಕಿ ಬೆಚ್ಚಿಯೇಂದ್ ಎಣ್ಣ್‌ಚಿ. 5 ಅನ್ನನೆ ಇಕ್ಕ ಸಹ, ಇಸ್ರಾಯೇಲ್ ಜನತ್‍ಲ್, ಕೃಪೇರಗುಂಡ್ ಆಯ್ಕೆ ಮಾಡ್‍ನ ಒರ್ ಚೆರಿಯ ಗುಂಪ್ ಬಾಕಿ ಉಂಡ್. 6 ಅಂವೊ ಗೊತ್ತ್ ಮಾಡ್‍ವದ್ ಕೃಪೇರಗುಂಡ್, ಕ್ರಿಯೇರಗುಂಡ್ ಅಲ್ಲ. ದೇವ ಗೊತ್ತ್ ಮಾಡ್‍ವದ್ ಕ್ರಿಯೇರಗುಂಡ್ ಆಯಿತ್ಂಜತೇಂಗಿ, ಅಕ್ಕ ಕೃಪೇಂದ್ ಎಣ್ಣ್‌ವದ್ ನೇರಾನ ಕೃಪೆಯಾಯಿತ್ ಇಪ್ಪುಲೆ; 7 ಆನಗುಂಡ್ ಎಂತ? ಇಸ್ರಾಯೇಲ್ ಜನ ತ್‍ೕಡ್‍ವದ್ ಅಯಿಂಗಕ್ ಕ್‌ಟ್ಟಿಯಂಡ್ ಇಲ್ಲೆ. ದೇವ ಆಯ್ಕೆ ಮಾಡ್‍ನಯಿಂಗಕ್ ಮಾತ್ರ ಅದ್ ಕ್‌ಟ್ಟಿಯಂಡುಂಡ್; ಬಾಕಿಯುಳ್ಳಯಿಂಗ ಇಲ್ಲಿಕತ್ತನೆ ಅಯಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡಿತುಂಡ್. 8 ದೇವಡ ವಾಕ್ಯತ್‍ಲ್: ದೇವ ಅಯಿಂಗಕ್ ಕಣ್ಣ್ ತೊರ್‌ಪಕ್ ಕಯ್ಯತ ವರ್‌ಕ್‌ನ ತಂದಿತ್, ಕಾಂಬಕ್ ಕಯ್ಯತ ಕಣ್ಣ್‌ನ ಪಿಂಞ ಕ್‍ೕಪಕ್ ಕಯ್ಯತ ಕೆಮಿನ ಅಯಿಂಗಕ್ ಕೊಡ್‌ತತ್‍ೕಂದ್ ಒಳ್‍ದಿತುಳ್ಳನೆಕೆ ಆಚಿ. 9 ದಾವೀದ ಅಯಿಂಗಡ ವಿಷಯತ್‍ನ: ಅಯಿಂಗಡ ಗದ್ದಾಳ ಅಯಿಂಗ ಚಿಕ್ಕುವ ಕೆಣಿಯಾಯಿತು, ಬೂವನೆಕೆ ಮಾಡ್‌ವ ತಡ್‍ಪ ಕಲ್ಲಾಯಿತು, ಬದ್‍ಲ್ ಮಾಡ್‍ವಕ್ಕುಳ್ಳ ವಿಷಯವಾಯಿತು ಇಕ್ಕಡ್; 10 ಅಯಿಂಗಡ ಕಣ್ಣ್, ಕಾಂಗತನೆಕೆ ಕುರ್‌ಡಾಯಿತ್ ಪೋಡ್, ಅಯಿಂಗಡ ಬೆನ್ನ್ ಎಕ್ಕಾಲು ಡೊಂಕಾಯಿತ್ ಪೋಡ್‍ೕಂದ್ ಎಣ್ಣ್‌ಚಿ. 11 ಅಕ್ಕ ನಾನ್ ಇನ್ನನೆ ಕ್‍ೕಪಿ: ಅಯಿಂಗ ಬುದ್ದ್ ಪೋಪಕಾಯಿತಾ ಮೀರ್‌ಚಿ? ಅನ್ನನೆ ಅಲ್ಲ, ಅಯಿಂಗ ಮೀರ್ನಗುಂಡ್ ಯೆಹೂದ್ಯ ಅಲ್ಲತಯಿಂಗಕ್ ರಕ್ಷಣೆ ಕ್‍ಟ್ಟ್‌ಚಿ, ಅನ್ನನೆ ಅಯಿಂಗಕ್ ಒಟ್ಟೆಕಿಚ್ಚ್ ಬರಂಡೂಂದ್ ಇನ್ನನೆ ಮಾಡ್‍ಚಿ. 12 ಅಯಿಂಗ ಮೀರ್ನಗುಂಡ್ ಲೋಕಕ್ ಐಶ್ವರ್ಯವು, ಅಯಿಂಗಡ ನಷ್ಟ ಯೆಹೂದ್ಯ ಅಲ್ಲತಯಿಂಗಕ್ ಆಶೀರ್ವಾದವು ಆಯಿತ್ಂಜತೇಂಗಿ, ಅಯಿಂಗ ಎಲ್ಲಾರು ಸ್ವೀಕಾರ ಮಾಡ್‍ಚೇಂಗಿ ಎಚ್ಚಕ್ ಬಲ್ಯದಾಯಿತಿಪ್ಪ. ಯೆಹೂದ್ಯ ಅಲ್ಲತಯಿಂಗಕ್ ಕ್‍ಟ್ಟುವ ರಕ್ಷಣೆ 13 ಯೆಹೂದ್ಯಂಗಲ್ಲತ ನಿಂಗಡ ಕೂಡೆ ಇಕ್ಕ ನಾನ್ ತಕ್ಕ್ ಪರಿವಿ; ಯೆಹೂದ್ಯಂಗಲ್ಲತ ನಿಂಗಕಾಯಿತ್ ನಾನ್ ಅಪೊಸ್ತಲನಾಯಿತ್ ಉಳ್ಳಾಂಗ್, ನಾಡ ಸೇವೇನೆ ಬಲ್ಯದಾಯಿತ್ ಎಣ್ಣ್‌ವಿ. 14 ಅನ್ನನೆ ಆಚೇಂಗಿಯು, ನಾಡ ಜನವಾಯಿತುಳ್ಳ ಯೆಹೂದ್ಯಂಗಕ್ ಒಟ್ಟೆಕಿಚ್ಚ್ ಬಪ್ಪನೆಕೆ ಮಾಡಿತ್, ಚೆನ್ನ ಜನಕ್ ರಕ್ಷಣೆ ಕ್‍ಟ್ಟ್‌ವನೆಕೆ ಆಡ್. 15 ಅಯಿಂಗಳ ದೇವ ಬೋಂಡಾಂದ್ ತಿರಸ್ಕಾರ ಮಾಡ್‍ನದ್ ಮೂಲಕ, ಈ ಲೋಕತ್‍ನ ಅಂವೊಂಡ ಕೂಡೆ ಇಂಜ ವಿರೋದತ್‍ನ ಕಳೆಂಜಿತ್ ಸಮಾದಾನ ಮಾಡ್‌ವಕ್ ಅಂವೊಂಗ್ ಕುಶಿಯಾಚೇಂಗಿ, ಇಸ್ರಾಯೇಲ್ ಜನಳ ಸ್ವೀಕಾರ ಮಾಡ್‍ವದ್, ಇಂಞು ಎಚ್ಚಕ್ ಬಲ್ಯದಾಯಿತಿಪ್ಪ; ಅದ್ ಚತ್ತ್ ಪೋನಯಿಂಗ ಜೀವತ್‍ಲ್ ಬಂದನೆಕೆ ಇಪ್ಪ ಅಲ್ಲ? 16 ದೇವಕ್ ಅರ್ಪಿಚಿಡುವ ಬಲಿರ ಮುದ್ದೆಲ್, ಆದ್ಯ ಬಾಗ ಪವಿತ್ರವಾಯಿತ್ ಇಂಜತೇಂಗಿ, ಬಾಕಿ ಮುದ್ದೆ ಎಲ್ಲಾ ಪವಿತ್ರವಾಯಿತ್ ಇಪ್ಪ, ಮರತ್‍ರ ಬೇರ್ ಪವಿತ್ರವಾಯಿತ್ ಇಂಜತೇಂಗಿ ಅದ್ಂಡ ಕೊಂಬ್ ಸಹ ಪವಿತ್ರವಾಯಿತ್ ಇಪ್ಪ. 17 ಇಸ್ರಾಯೇಲ್ ಎಣ್ಣುವ ನಾಡ್‍ರ ಒಲಿವ ಮರತ್‍ರ ಚೆನ್ನ ಕೊಂಬ್‍ನ ಮುರ್‌ಚಿತ್, ಕಾಡ್‍ರ ಒಲಿವ ಮರವಾಯಿತುಳ್ಳ ನಿಂಗಳ ಆ ಜಾಗತ್‍ಲ್ ಅಂಟ್‍ಚಿಟ್ಟ್ ಬೆಚ್ಚತ್. ಅನ್ನನೆ ನಾಡ್‍ರ ಒಲಿವ ಮರತ್‍ರ ಬೇರ್‌ಕ್ ಪಿಂಞ ರಸಕ್ ನಿಂಗ ಪಾಲ್‍ದಾರಂಗಳಾಯಿತುಂಡ್. 18 ನಿಂಗ ಆ ಕೊಂಬ್‍ಕ್ ವಿರೋದವಾಯಿತ್ ಬಡಾಯಿ ಮಾಡತಿ; ಅನ್ನನೆ ಹೊಗಳಿಚಿಡುವದಾಚೇಂಗಿ, ನಿಂಗ ಬೇರ್‌ನ ಪೊರ್‍ತಂಡಿಲ್ಲೆ, ಬೇರ್ ನಿಂಗಳ ಪೊರ್‌ತ್‌ತಂಡುಂಡ್‍ೕಂದ್ ಗೇನ ಮಾಡಿಯೊಳಿ. 19 ನನ್ನ ಅಂಟ್‍ಚಿಡುವಕಾಯಿತ್ ಅಯಿಂಗಳ ಮುರಿಚಿರ್‌ತ್‍ೕಂದ್ ಎಣ್ಣುವಿರಲ್ಲ? 20 ಅಕ್ಕು, ಅಯಿಂಗಡ ಅಪನಂಬಿಕೇರಗುಂಡ್ ಅಯಿಂಗಳ ಮುರಿಚಿರ್‌ತ್. ನಿಂಗ ನಂಬಿಕೇರ ಮೂಲಕ ನಿಂದಂಡುಂಡ್; ಬಡಾಯಿ ಮಾಡತಿ, ಆಚೇಂಗಿ ಬೊತ್ತಿಯಂಡಿರಿ. 21 ನಾಡ್‍ರ ಒಲಿವ ಮರತ್‍ರ ಕೊಂಬ್‍ನ ದೇವ ತಪ್ಪ್‌ಚಿಡ್‌ವಕ್ ಬುಟ್ಟಿತ್ತ್‌ಲ್ಲೆ. ಅಕ್ಕ, ನಿಂಗಳ ಸಹ ಅಂವೊ ಬುಡ್‍ಲೇಂದ್ ಎಚ್ಚರತ್‍ಲ್ ಇರಂಡು. 22 ಆನಗುಂಡ್, ದೇವಡ ದಯೇನ ಪಿಂಞ ಕಂಡಿತತ್‍ನ ನೋಟಿ; ಬುದ್ದಯಿಂಗಡ ಮೇಲೆ ಕಂಡಿತತ್‍ನ ಪಿಂಞ ನಿಂಗಡ ಮೇಲೆ ದಯೇನ ಕಾಂಬ್‍ಚಿಟ್ಟತ್; ನಿಂಗ ಆ ದಯೇಲ್ ನಿಂದಂಡಿರಂಡು, ಅದ್‍ಲ್ ನಿಂಗ ನಿಕ್ಕತೆ ಪೋಚೇಂಗಿ ನಿಂಗಳ ಸಹ ಕೆತ್ತಿರುವ. 23 ಇಸ್ರಾಯೇಲ್ ಜನ ಅಯಿಂಗಡ ಅಪನಂಬಿಕೇನ ಬುಟ್ಟ್‌ರ್‍ತೇಂಗಿ, ಅಯಿಂಗಳ ಪುನಃ ಅಂಟಿಚಿಡುವ. ಅಯಿಂಗಳ ಪುನಃ ಅಂಟ್‍ಚಿಡುವಕ್ ದೇವ ಶಕ್ತಿ ಉಳ್ಳಂವೊನಾಯಿತ್ ಉಂಡ್. 24 ಕಾಡ್‍ರ ಗುಣತ್‍ರ ಒಲಿವ ಮರಕ್ ಕೂಡ್‍ನ ನಿಂಗಳ ಕೆತ್ತಿತ್, ಅಂಟ್‍ಚಿಡುವಕ್ ಕಯ್ಯತ ನಾಡ್‍ರ ಒಲಿವ ಮರತ್‍ಲ್ ಅಂಟ್‍ಚಿಟ್ಟತೇಂಗಿ, ನಾಡ್‍ರ ಗುಣತ್‍ರ ಒಲಿವ ಮರತ್‍ರ ಕೊಂಬ್‍ನ, ತಾಂಡ ನಾಡ್‍ರ ಒಲಿವ ಮರತ್‍ಲ್ ಅಂಟ್‍ಚಿಡುವದ್ ಎಚ್ಚಕ್ ನಿಶ್ಚಯ. ಎಲ್ಲಾಡ ಮೇಲೆ ಉಳ್ಳ ದೇವಡ ದಯೆ 25 ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ನಿಂಗಳೇ ಬುದ್ದಿವಂತಯಿಂಗಾಂದ್ ಗೇನಮಾಡತನೆಕೆ, ನಾನ್ ನಿಂಗಕ್ ಒರ್ ಗುಟ್ಟ್‌ನ ಎಣ್ಣಿ ತಪ್ಪಿ. ಅದ್ ಎಂತ ಎಣ್ಣ್‌ಚೇಂಗಿ, ಯೆಹೂದ್ಯಂಗಲ್ಲತಯಿಂಗಡ ರಕ್ಷಣೆರ ಲೆಕ್ಕ ಪೂರ್ತಿ ಆಪಕತ್ತನೆ, ಇಸ್ರಾಯೇಲ್‍ರ ಒರ್ ಗುಂಪ್ ಕಠಿಣ ಮನಸ್ಸಾಯಿತೇ ಇಪ್ಪ. 26 ಇನ್ನನೆ ಇಸ್ರಾಯೇಲ್ ಜನಕ್ ರಕ್ಷಣೆ ಕ್‍ಟ್ಟುವ. ಅಯಿಂಗಳ ಬಚಾವ್ ಮಾಡ್‌ವಂವೊ ಚೀಯೋನಿಂಜ ಬಂದಿತ್, ಬಕ್ತಿಯಿಲ್ಲತ ಗುಣತ್‍ನ ಯಾಕೋಬಯಿಂಜ ದೂರ ಮಾಡ್‌ವಾಂದು, 27 ನಾನ್ ಅಯಿಂಗಡ ಪಾಪತ್‍ನ ದೂರ ಮಾಡ್‌ವಾಂದ್ ಉಳ್ಳದೇ, ನಾನ್ ಅಯಿಂಗಡ ಕೂಡೆ ಮಾಡ್‌ವ ಒಪ್ಪಂದಾಂದ್ ಒಳ್‍ದಿತುಂಡ್. 28 ದೇವಡ ನಲ್ಲ ಸುದ್ದಿರ ವಿಷಯತ್ ನಿಂಗಡಗುಂಡ್ ಅಯಿಂಗ ವಿರೋದಿಯಂಗ; ಆಚೇಂಗಿ, ದೇವ ಆಯ್ಕೆ ಮಾಡ್‍ನಗುಂಡ್ ಅಯಿಂಗಡ ಮುತ್ತಜ್ಜಂಗಕಾಯಿತ್, ದೇವ ಪ್ರೀತಿಚಿಡ್‌ವಯಿಂಗಳಾಯಿತುಂಡ್. 29 ದೇವಡ ಕೃಪೇರ ವರವು, ಅಂವೊ ಕಾಕ್‌ನದು ಎಕ್ಕಾಲು ಬದ್‍ಲಾಪುಲೆ. 30 ನಿಂಗ ಪಂಡತ ಕಾಲತ್‍ಲ್ ದೇವಕ್ ಬಗ್ಗ್‌ಚಿಡತಯಿಂಗಳಾಯಿತ್ ಇಂಜಿರ, ಆಚೇಂಗಿ ಅಯಿಂಗ ಇಕ್ಕ ದೇವಕ್ ಬಗ್ಗ್‌ಚಿಡತಗುಂಡ್ ನಿಂಗಕ್ ಕನಿಕರ ಕ್‍ಟ್ಟ್‌ಚಿ. 31 ಅಯಿಂಗ ಇಕ್ಕ ಬಗ್ಗ್‌ಚಿಡತೆ ಪೋಚೇಂಗಿಯು, ನಿಂಗಕ್ ಕ್‍ಟ್ಟ್‌ನ ಕನಿಕಾರತ್‌ಂಜ ಅಯಿಂಗಕ್ ಮಿಂಞಕ್ ಕನಿಕರ ಕ್‍ಟ್ಟುವ. 32 ಎಲ್ಲಾಡ ಮೇಲೆ ಕನಿಕರ ಕಾಂಬ್‍ಚಿಡುವನೆಕೆ, ದೇವ ಎಲ್ಲಾನ ಅಂವೊಂಗ್ ಬಗ್ಗ್‌ಚಿಡತನೆಕೆ ಮುಚ್ಚಿ ಬೆಚ್ಚಿತ್ಂಜತ್. 33 ಓ, ದೇವಡ ಜ್ಞಾನತ್‍ರ ಐಶ್ವರ್ಯ ಪಿಂಞ ಅಂವೊಂಡ ಬುದ್ದಿ ಎಚ್ಚಕ್ ಆಳವಾಯಿತುಂಡ್! ಅಂವೊಂಡ ನ್ಯಾಯತೀರ್ಪ್‌ನ ಕಂಡ್‌ಪುಡಿಪಕ್ ಕಯ್ಯುಲೆ, ಅಂವೊಂಡ ಬಟ್ಟೇನ ಪರಿಶೋದನೆ ಮಾಡ್‌ವಕ್ ಕಯ್ಯತನೆಕೆ ಉಂಡ್. 34 ಒಡೆಯಂಡ ಮನಸ್ಸ್‌ನ ಅರ್ಥಮಾಡ್‍ನಂವೊ ದಾರ್? ಅಂವೊಂಗ್ ಆಲೋಚನೆ ತಪ್ಪಂವೊ ದಾರ್? 35 ನಂಗಕ್ ಬದ್‍ಲ್ ತಪ್ಪಕಾಯಿತ್, ಅಂವೊಂಗ್ ಮಿಂಞಲೇ ಎಂತಾಚು ಇನಾಮ್ ಕೊಡ್‍ತಂವೊ ದಾರ್? 36 ಎಲ್ಲಾ ಅಂವೊನಗುಂಡ್, ಅಂವೊಂಡ ಮೂಲಕ, ಅಂವೊಂಗಾಯಿತ್ ಉಂಡ್; ಅಂವೊಂಗೇ ಎಕ್ಕಾಲು ಮಹಿಮೆ ಬರಡ್. ಆಮೆನ್. |
© 2017, New Life Literature (NLL)