ಪ್ರಕಟನೆ 8 - ಕೊಡವ ಬೈಬಲ್ಏಳನೆ ಮುದ್ರೆ ಪಿಂಞ ಪೊನ್ನ್‌ರ ಪಾತ್ರ 1 ಕೊರಿಕುಟ್ಟಿಯಾನಂವೊ ಏಳನೆ ಮುದ್ರೆನ ಪೊಳಿಪಕ, ಸುಮಾರ್ ಅರೆ ಗಂಟೆಕತ್ತನೆ ಪರಲೋಕತ್‍ಲ್ ನಿಸಬ್ದ ಉಂಟಾಚಿ. 2 ಅಕ್ಕ, ದೇವಡ ಎದ್‍ಕೆ ನಿಂದಿತುಳ್ಳ ಏಳ್ ದೂತಂಗಳ ನಾನ್ ಕಂಡಿಯೆ. ಅಯಿಂಗಕೆಲ್ಲ ಏಳ್ ವಾಲಗ ಕೊಂಬ್ ಕೊಡ್‌ತಿತ್ಂಜತ್. 3 ಅಕ್ಕ ಇಂಞೊರ್ ದೇವದೂತ ಪೊನ್ನ್‌ರ ದೂಪತ್‍ರ ಪಾತ್ರತ್‍ನ ಪುಡ್‍ಚಂಡ್ ಬಲಿಪೀಠತ್‍ರ ಪಕ್ಕ ಬಂದಿತ್ ನಿಂದತ್. ಸಿಂಹಾಸನತ್‍ರ ಎದ್‍ಕೆ ಇಂಜ ಬಲಿ ಕೊಡ್‍ಪ ಪೊನ್ನ್‌ರ ಜಾಗತ್‍ಲ್, ಎಲ್ಲಾ ದೇವಡ ಮಕ್ಕಡ ಪ್ರಾರ್ಥನೆರ ಕೂಡೆ ಅರ್ಪಿಚಿಡ್‌ವಕ್ ಅಂವೊಂಗ್ ದುಂಬ ದೂಪತ್‍ರ ಸಾಂಬ್ರಾಣಿನ ಕೊಡ್‌ತಿತ್ಂಜತ್. 4 ಅಕ್ಕ ಅರ್ಪಿಚಿಟ್ಟ ದೂಪತ್‍ರ ಪೊಗೆ ದೇವದೂತಂಡ ಕೈಯಿಂಜ ಪೊರಟಿತ್ ದೇವಡ ಮಕ್ಕಡ ಪ್ರಾರ್ಥನೆರ ಕೂಡೆ ಕೂಡಿತ್ ದೇವಡ ಪಕ್ಕ ಕೊಡಿಕ್ ಪೋಚಿ. 5 ಮಿಂಞ ದೇವದೂತ ದೂಪತ್‍ರ ಪಾತ್ರತ್‍ನ ಎಡ್‍ತಂಡ್ ಬಲಿಪೀಠತ್‍ರ ತಿತ್ತ್ ಕಂಡತ್‍ನ ದುಂಬ್‌ಚಿಟ್ಟಿತ್, ಬೂಮಿಕ್ ಚಾಡ್‍ಚಿ. ಅಕ್ಕ ದುಂಬ ತೆಡ್, ವಾಣಿ, ಮಿನ್ನಲ್ ಪಿಂಞ ಬೂಕಂಪ ಉಂಟಾಚಿ. ಏಳ್ ವಾಲಗ ಕೊಂಬ್ 6 ಏಳ್ ದೇವದೂತಂಗ, ಏಳ್ ವಾಲಗ ಕೊಂಬ್‍ನ ಎಡ್‍ತಂಡ್ ಊದ್‍ವಕ್ ಅಯಿಂಗಳ ತಯಾರ್ ಮಾಡ್‍ಚಿ. 7 ಆದ್ಯ ದೂತ ವಾಲಗ ಕೊಂಬ್ ಊದ್‍ವಕಾಪಕ: ಚೋರೆಲ್ ಕಲ್‌ಕ್‌ನ ಆಲಿಕಾಯಿ ಪಿಂಞ ತಿತ್ತ್ ಬಾತ್, ಅದ್‍ನ ಬೂಮಿರ ಮೇಲೆ ಚಾಡ್‍ಚಿ. ಆನಗುಂಡ್, ಮೂಂದ್‍ಲ್ ಒರ್ ಬಾಗ ಬೂಮಿ ಬೆಂಜಿ ಪೋಚಿ; ಮೂಂದ್‍ಲ್ ಒರ್ ಬಾಗ ಮರ ಬೆಂಜಿ ಪೋಚಿ. ಎಲ್ಲಾ ಪಚ್ಚೆ ಪಿಲ್ಲ್ ಚುಟ್ಟ್ ಪೋಚಿ. 8 ದಂಡನೆ ದೇವದೂತ ವಾಲಗ ಕೊಂಬ್‍ನ ಊದ್‍ವಕಾಪಕ: ತಿತ್ತ್ಂಜ ಕತ್ತ್‌ವ ಬಲ್ಯ ಕುಂದ್‍ರನೆಕೆ ಉಳ್ಳದ್‍ನ ಸಮುದ್ರತ್‍ರ ಒಳ್‍ಕ್ ಚಾಡ್‍ಚಿ, ಆನಗುಂಡ್ ಸಮುದ್ರತ್‍ರ ಮೂಂದ್‍ಲ್ ಒರ್ ಬಾಗ ಚೋರೆನೆಕೆ ಆಚಿ. 9 ಸಮುದ್ರತ್‍ರ ಒಳ್‍ಲಿಂಜ ಪ್ರಾಣಿಲ್ ಮೂಂದ್‍ಲ್ ಒರ್ ಬಾಗ ಚತ್ತ್ ಪೋಚಿ; ಮೂಂದ್‍ಲ್ ಒರ್ ಬಾಗ ಹಡಗ್ ಪಾಳಾಯಿ ಪೋಚಿ. 10 ಮೂಂದನೆ ದೇವದೂತ ವಾಲಗ ಕೊಂಬ್‍ನ ಊದ್‍ವಕಾಪಕ: ಒರ್ ಬಲ್ಯ ನಕ್ಷತ್ರ ಬಲ್ಯದಾಯಿತ್ ಕತ್ತಿಯಂಡ್ ಬಾನತ್ಂಜ ಬುದ್ದತ್. ಅದ್ ಕೆರೆರ ಮೂಂದ್‍ಲ್ ಒರ್ ಬಾಗತ್‍ನ ಪಿಂಞ ಜಲನೀರ್‌ಲ್ ಬುದ್ದತ್. 11 ಆ ನಕ್ಷತ್ರತ್‍ರ ಪೆದ ಕಯಿಪ್‍ೕಂದ್ ಇಂಜತ್. ಅದ್‍ನಗುಂಡ್, ಮೂಂದ್‍ಲ್ ಒರ್ ಬಾಗ ನೀರೆಲ್ಲಾ ಕಯಿಪಾಯಿತ್ ಬದ್‍ಲಾಚಿ; ಇನ್ನನೆ ಆ ನೀರ್‌ನ ಕುಡಿಪಕ ಸುಮಾರ್ ಜನ ಚತ್ತ್ ಪೋಚಿ. 12 ನಾಲನೆ ದೇವದೂತ ವಾಲಗ ಕೊಂಬ್‍ನ ಊದ್‍ವಕಾಪಕ: ಮೂಂದ್‍ಲ್ ಒರ್ ಬಾಗ ಸೂರ್ಯ, ಮೂಂದ್‍ಲ್ ಒರ್ ಬಾಗ ಚಂದ್ರ ಪಿಂಞ ಮೂಂದ್‍ಲ್ ಒರ್ ಬಾಗ ನಕ್ಷತ್ರ ಪಾಳಾಯಿ ಪೋಚಿ. ಒರೋಂದ್‍ಲ್ ಮೂಂದ್‍ಲ್ ಒರ್ ಬಾಗ ಕರ್ತಿತ್ ಇರ್‌ಟಾಯಿ ಪೋಚಿ. ಅಕ್ಕ ಪೋಲ್‍ಲ್, ಮೂಂದ್‍ಲ್ ಒರ್ ಬಾಗ ಬೊಳಿ ಇಂಜಿತ್ತ್‌ಲ್ಲೆ, ಬಯಿಟ್ ಸಹ ಬೊಳಿ ಇಂಜಿತ್ತ್‌ಲ್ಲೆ. 13 ಪಿಂಞ ಒರ್ ಗರುಡ ಗಾಳಿಲ್ ಪಾರಿಯಂಡ್ ಬಂದಿತ್, ಬಲ್ಯ ಸ್ವರತ್‍ಲ್ ಕೂತ್ ಕೊಡ್‌ತಂಡ್: ಇಂಞು ಮಿಂಞಕ್ ವಾಲಗ ಕೊಂಬ್‍ನ ಊದ್‍ವ ಮೂಂದ್ ದೂತಂಗ ವಾಲಗ ಊದ್‍ವಕಾಪಕ, ಬೂಮಿಲ್ ವಾಸ ಮಾಡಿಯಂಡುಳ್ಳ ಮನುಷ್ಯಂಗಕ್, ಅಯ್ಯೋ! ಅಯ್ಯೋ! ಅಯ್ಯೋಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. |
© 2017, New Life Literature (NLL)