ಪ್ರಕಟನೆ 6 - ಕೊಡವ ಬೈಬಲ್ಮುದ್ರೆ 1 ಕೊರಿಕುಟ್ಟಿಯಾನಂವೊ ಮುದ್ರೆಲ್ ಒರ್ ಮುದ್ರೆನ ಪೊಳಿಪದ್‍ನ ನಾನ್ ಕಂಡಿಯೆ. ಅಕ್ಕ ನಾಲ್ ಜೀವ ಪ್ರಾಣಿಯಡಡೆಲ್ ಒರ್ ಜೀವ ಪ್ರಾಣಿ ನನ್ನ ನೋಟಿತ್: ನೀನ್ ಬಂದ್ ನೋಟ್‍ೕಂದ್ ತೆಡ್ ಬಡಿಪ ಸದ್ದ್‌ಲ್ ಎಣ್ಣ್‌ನದ್ ನಾಕ್ ಕ್‍ೕಟತ್. 2 ನಾನ್ ನೋಟ್‍ವಕ, ಇದಾ, ಒರ್ ಬೊಳ್‍ತ ಕುದ್‍ರೆನ ಕಂಡಿಯೆ, ಅದ್ಂಡಮೇಲೆ ಇಂಜಂವೊ ಒರ್ ಬಿಲ್ಲ್‌ನ ಪುಡ್‌ಚಂಡಿಂಜತ್, ಅಂವೊಂಗ್ ಒರ್ ಕಿರೀಟ ಕೊಡ್‌ತಿತ್ಂಜತ್, ಅಂವೊ ಗೆಲ್ಲ್‌ವಂವೊನಾಯಿತ್, ಗೆಲ್ಲ್‌ವಕಾಯಿತ್ ಪೊರಟಿತ್ ಪೋಚಿ. 3 ಅಂವೊ ದಂಡನೆ ಮುದ್ರೆನ ಪೊಳಿಪಕ, ದಂಡನೆ ಜೀವ ಪ್ರಾಣಿ: ನೀನ್ ಬಂದ್ ನೋಟ್‍ೕಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. 4 ಅಕ್ಕ ಚೋಂದ ಕುದ್‌ರೆ ಪೊರಟಿತ್ ಪೋಚಿ. ಅದ್ಂಡಮೇಲೆ ಇಂಜಂವೊಂಗ್, ಬೂಮಿಲ್ ಉಳ್ಳ ಒಬ್ಬೊಬ್ಬನ ಕೊಲೆ ಮಾಡ್‌ವಕಾಯಿತ್, ಸಮಾದಾನತ್‍ನ ಎಡ್‍ತಿತ್ ಕಳೆಯುವಕ್ ಅದಿಕಾರ ಕೊಡ್‌ತಿತ್ಂಜತ್; ಒರ್ ಬಲ್ಯ ಬಾಳ್ ಅಂವೊಂಗ್ ಕೊಡ್‌ತಿತ್ಂಜತ್. 5 ಅಂವೊ ಮೂಂದನೆ ಮುದ್ರೆನ ಪೊಳಿಪಕ: ಮೂಂದನೆ ಜೀವ ಪ್ರಾಣಿ: ನೀನ್ ಬಂದ್ ನೋಟ್‍ೕಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. ನಾನ್ ನೋಟ್‍ವಕ, ಇದಾ, ಒರ್ ಕರ್ತ ಕುದ್‍ರೆನ ಕಂಡಿಯೆ; ಅದ್ಂಡಮೇಲೆ ಇಂಜಂವೊ ಒರ್ ತಕ್ಕಡಿನ ಅಂವೊಂಡ ಕೈಯಿಲ್ ಪುಡ್‌ಚಂಡಿಂಜತ್. 6 ಅಕ್ಕ, ನಾಲ್ ಜೀವಿ ಪ್ರಾಣಿಯಡ ಮದ್ಯತ್ಂಜ, ಒರ್ ದಿವಸತ್‍ರ ಕೂಲಿರ ಪಣಕ್ ಒರ್ ಕಿಲೊ ಗೋದಿ, ಒರ್ ದಿವಸತ್‍ರ ಕೂಲಿರ ಪಣಕ್ ಮೂಂದ್ ಕಿಲೊ ಬಾರ್ಲಿ, ಎಣ್ಣೆ ಪಿಂಞ ದ್ರಾಕ್ಷಿರಸತ್‍ನ ನೀನ್ ಪಾಳ್ ಮಾಡತೇಂದ್ ನಾಕ್ ಒರ್ ವಾಣಿ ಕ್‍ೕಟತ್. 7 ಅಂವೊ ನಾಲನೆ ಮುದ್ರೆನ ಪೊಳಿಪಕ, ನಾಲನೆ ಜೀವ ಪ್ರಾಣಿ: ನೀನ್ ಬಂದ್ ನೋಟ್‍ೕಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. 8 ನಾನ್ ನೋಟ್‍ವಕ, ಇದಾ, ಒರ್ ಮಂಗ್‍ನ ಕುದ್‍ರೆನ ಕಂಡಿಯೆ. ಅದ್ಂಡಮೇಲೆ ಇಂಜಂವೊಂಗ್ ಚಾವ್‍ೕಂದ್ ಪೆದ, ಪಾತಾಳ ಅಂವೊಂಡ ಬಯ್ಯಕ್ ಪೋಚಿ. ಬಾಳ್‍ರಗುಂಡ್, ಬರಕಾಲತ್‍ರಗುಂಡ್, ಬೂಮಿರ ದುಷ್ಟ ಮೃಗತ್‍ರಗುಂಡ್, ಬೂಮಿಲ್ ವಾಸ ಮಾಡಿಯಂಡುಳ್ಳ ನಾಲ್‍ಲ್ ಒರ್ ಬಾಗ ಜನತ್‍ನ ಕೊಲೆ ಮಾಡ್‌ವಕುಳ್ಳ ಅದಿಕಾರತ್‍ನ ಕೊಡ್‌ತಿತ್ಂಜತ್. 9 ಅಂವೊ ಅಂಜನೆ ಮುದ್ರೆನ ಪೊಳಿಪಕ, ದೇವಡ ವಾಕ್ಯಕಾಯಿತ್, ಅಯಿಂಗ ಕೊಡ್‍ತ ಸಾಕ್ಷಿಕಾಯಿತ್ ಕೊಲೆ ಆನಯಿಂಗಡ ಆತ್ಮತ್‌ನ ಬಲಿಪೀಠತ್‍ರ ಅಡಿಲ್ ಕಂಡಿಯೆ. 10 ಅಯಿಂಗ ಬಲ್ಯ ಸದ್ದ್‌ಲ್: ಪವಿತ್ರವಾನ ಸತ್ಯವಂತ ಸರ್ವ ಶಕ್ತಿಯುಳ್ಳ ಒಡೆಯನೇ, ಬೂಮಿಲ್ ವಾಸ ಮಾಡಿಯಂಡುಳ್ಳ ಅಯಿಂಗಡಲ್ಲಿ, ನಂಗಡ ಚೋರೆರ ವಿಷಯತ್ ಎಚ್ಚಕ್ ಕಾಲ ನ್ಯಾಯತೀರ್ಪ್ ಮಾಡತೆ, ನಂಗಳ ಕೊಲೆ ಮಾಡ್‍ನಯಿಂಗಕ್ ಬದ್‍ಲ್ ಶಿಕ್ಷೆ ಕೊಡ್‍ಕತೆ ಇಪ್ಪಿಯಾಂದ್ ಕೂತ್ ಕೊಡ್‍ತತ್. 11 ಅಕ್ಕ, ಅಯಿಂಗ ಒಬ್ಬೊಬ್ಬಂಗಕು ಬೊಳ್‍ತ ಉದ್ದವಾನ ಬಟ್ಟೇನ ಕೊಡ್‍ತತ್. ಅದಲ್ಲತೆ, ಅಯಿಂಗಡನೆಕೆ, ಕೊಲೆ ಆಪಕುಳ್ಳ ತಂಗಡ ಕೂಟ್ ಸೇವಕಂಗಳಾನ ಅಯಿಂಗಡ ಅಣ್ಣತಮ್ಮಣಂಗಡ ಲೆಕ್ಕ ಪೂರ್ತಿ ಆಪಕತ್ತನೆ, ಇಂಞು ಚೆನ್ನ ಕಾಲ ಆರಾಮ್‍ಲ್ ಇಕ್ಕಂಡೂಂದ್ ಅಯಿಂಗಕ್ ಎಣ್ಣಿಯತ್. 12 ಅಂವೊ ಆರನೆ ಮುದ್ರೆನ ಪೊಳಿಪದ್‍ನ ನೋಟಿಯೆ; ಇದಾ, ಬೂಮಿ ಬಲ್ಯದಾಯಿತ್ ಗ್‍ಡ್‍ಗ್‍ಚಿ, ಸೂರ್ಯ ಒರ್ ಕರ್ತ ಗೋಣಿಚೇಲೆರನೆಕೆ ಕರ್ತಿತ್ ಪೋಚಿ, ಚಂದ್ರ ಚೋರೆರನೆಕೆ ಆಯಿಪೋಚಿ. 13 ಅತ್ತಿ ಪಣ್ಣ್‌ರ ಮರ ಒರ್ ಬಿರ್‌ಗಾಳಿಕ್ ಅಲ್ಲಾಡ್‌ವಕ, ಅದ್ಂಡ ಕಾಯಿ ಎನ್ನನೆ ನೆಲಕ್ ಬೂವ, ಅನ್ನನೆ ಬಾನತ್‍ರ ಮೀನೆಲ್ಲಾ ಬೂಮಿಲ್ ಬುದ್ದತ್. 14 ಬಾನ ಒರ್ ಪುಸ್ತಕತ್‍ರನೆಕೆ ಉರ್ಂಡ್ ಕಾಂಗತೆ ಆಯಿಪೋಚಿ; ಎಲ್ಲಾ ಕುಂದು, ದ್ವೀಪವು ಅದ್ಂಡ ಜಾಗತ್‍ನ ಬುಟ್ಟಿತ್ ಕಾಂಗತೆ ಆಯಿಪೋಚಿ. 15 ಬೂಮಿರ ರಾಜಂಗ, ಬಲ್ಯಯಿಂಗ, ಸೇನೆರ ಅದಿಕಾರಿಯಂಗ, ಐಶ್ವರ್ಯವಂತಯಿಂಗ, ಬಲ ಉಳ್ಳಯಿಂಗ, ಅಡಿಯಾಳ್‍ಂಗ, ಸ್ವಾತಂತ್ರವಾನಯಿಂಗ ಎಲ್ಲಾರು, ಕುಂದ್‌ರ ಒಳ್‍ಕ್, ಗುವೇರ ಒಳ್‍ಕ್ ಪಿಂಞ ಬಂಡೇರ ಒಳ್‍ಕ್ ಒಳ್‌ಂಜಂಡ್ ಇಂಜತ್. 16 ಅಯಿಂಗ ಕುಂದ್‍ನ, ಬಂಡೇನ ನೋಟಿತ್: ನಿಂಗ ನಂಗಡ ಮೇಲೆ ಬುದ್ದಿತ್, ಸಿಂಹಾಸನತ್‍ಲ್ ಅಳ್‍ತಂಡುಳ್ಳವೊಂಡ ಮೂಡ್‍ಕ್, ಮಿಂಞಲೇ ಬಲಿಯಾಯಿತ್ಂಜ ಕೊರಿಕುಟ್ಟಿರ ಚೆಡಿಕ್ ನಂಗಳ ಒಳ್‍ಪ್‍ಚಿಡಿ. 17 ಅಂವೊಂಡ ಬಲ್ಯ ಚೆಡಿರ ಬಲ್ಯ ದಿವಸ ಬಾತ್, ದಾರ್‌ಕ್ ನಿಪ್ಪಕ್ ಕಯ್ಯೂಂದ್ ಎಣ್ಣ್‌ಚಿ. |
© 2017, New Life Literature (NLL)