ಪ್ರಕಟನೆ 4 - ಕೊಡವ ಬೈಬಲ್ಪರಲೋಕತ್ಲ್ ಇಂಜ ಸಿಂಹಾಸನ 1 ಇದಾನ ಪಿಂಞ ನಾನ್ ನೋಟ್‍ವಕ, ಇದಾ, ಪರಲೋಕತ್‍ಲ್ ತೊರಂದಿತ್ ಬೆಚ್ಚಿತ್ಂಜ ಒರ್ ಪಡಿನ ಕಂಡಿಯೆ. ಮಿಂಞ ವಾಲಗತ್‍ರ ಸದ್ದ್‌ರನೆಕೆ ನಾಡ ಕೂಡೆ ತಕ್ಕ್ ಪರ್ಂದ ವಾಣಿ: ಇಲ್ಲಿಕ್ ಪತ್ತಿತ್ ಬಾ, ಮಿಂಞಕ್ ನಡ್‍ಪಕುಳ್ಳದ್‍ನ ನೀಕ್ ಕಾಟಿತಪ್ಪೀಂದ್ ಎಣ್ಣ್‌ಚಿ. 2 ಅಕ್ಕಣೆ ನಾನ್ ಪವಿತ್ರಾತ್ಮತ್‍ರ ಪುಡ್‍ತತ್‍ಲ್ ಆನ; ಅಕ್ಕ, ಇದಾ, ಪರಲೋಕತ್‍ಲ್ ಒರ್ ಸಿಂಹಾಸನ ಬೆಚ್ಚಿತ್ಂಜತ್, ಅದ್‍ಲ್ ಒಬ್ಬ ಅಳ್‍ತಂಡಿಂಜತ್. 3 ಅಳ್‍ತಂಡಿಂಜಂವೊ, ಕಾಂಬಕ್ ವಜ್ರ ಪಿಂಞ ಪದ್ಮರಾಗ ಕಲ್ಲ್‌ರನೆಕೆ ಮಿನ್ನಿಯಂಡಿಂಜತ್. ಆ ಸಿಂಹಾಸನತ್‍ರ ಸುತ್ತ್‌ಲ್ ಮಳೆಬಿಲ್ಲ್ ಇಂಜತ್. ಅದ್ ಕಾಂಬಕ್ ಪಚ್ಚೆ ಕಲ್ಲ್‌ರನೆಕೆ ಇಂಜತ್. 4 ಆ ಸಿಂಹಾಸನತ್‍ರ ಸುತ್ತ್‌ಲ್ ಇರುವತ ನಾಲ್ ಸಿಂಹಾಸನ ಇಂಜತ್. ಇರುವತ ನಾಲ್ ಪೆರಿಯಯಿಂಗ ಬೊಳ್‍ತ ಬಟ್ಟೆ ಇಟ್ಟಂಡ್, ಅಯಿಂಗಡ ಮಂಡೆಲ್ ಪೊನ್ನ್‌ರ ಕಿರೀಟ ಇಟ್ಟಿತ್ ಆ ಸಿಂಹಾಸನತ್‍ಲ್ ಅಳ್‌ತಂಡಿಪ್ಪದ್‍ನ ಕಂಡಿಯೆ. 5 ಆ ಸಿಂಹಾಸನತ್ಂಜ ದುಂಬ ಮಿನ್ನಲ್, ತೆಡ್ ಪಿಂಞ ಬಲ್ಯ ಸದ್ದ್ ಪೊರಟಿತ್ ಬಾತ್; ದೇವಡ ಏಳ್ ಆತ್ಮತ್‍ರ ಏಳ್ ತಿತ್ತ್‌ರ ಬೊಳ್‍ಚ ಸಿಂಹಾಸನತ್‍ರ ಮಿಂಞ ಕತ್ತಿಯಂಡಿಂಜತ್. 6 ಆ ಸಿಂಹಾಸನತ್‍ರ ಮಿಂಞ ಶುದ್ದವಾನ ಪಾಕಲ್ಲ್‌ರನೆಕೆ ಗಾಜಿರ ಕಡಲ್ ಇಂಜತ್. ಸಿಂಹಾಸನತ್‍ರ ಮದ್ಯತ್‍ಲ್ ಪಿಂಞ ಸಿಂಹಾಸನತ್‍ರ ಸುತ್ತ್‌ಲ್ ನಾಲ್ ಜೀವ ಪ್ರಾಣಿಯ ಇಂಜತ್; ಜೀವ ಪ್ರಾಣಿಯಕ್ ಮಿಂಞಕು ಬಯ್ಯಕು ಪೂರ್ತಿ ಕಣ್ಣ್ ದುಂಬಿತ್ಂಜತ್. 7 ಆದ್ಯ ಜೀವ ಪ್ರಾಣಿ ಸಿಂಹತ್‍ರನೆಕೆಯು, ದಂಡನೆ ಜೀವ ಪ್ರಾಣಿ ಎತ್ತ್‌ರನೆಕೆಯು, ಮೂಂದನೆ ಜೀವ ಪ್ರಾಣಿ ಮನುಷ್ಯಂಡ ಮೂಡ್‍ರನೆಕೆಯು, ನಾಲನೆ ಜೀವ ಪ್ರಾಣಿ ಪಾರುವ ಗರುಡ ಪಕ್ಷಿರನೆಕೆಯು ಇಂಜತ್. 8 ಆ ನಾಲ್ ಜೀವ ಪ್ರಾಣಿಯ ಒಂದೊಂದಂಗು ಆರ್ ಆರ್ ರೆಕ್ಕೆ ಇಂಜತ್. ರೆಕ್ಕೆರ ಸುತ್ತ್‌ಲ್ ಪಿಂಞ ಒಳ್‍ಕ್ ಕಣ್ಣ್ ದುಂಬಿತ್ಂಜತ್. ಆ ಜೀವ ಪ್ರಾಣಿಯ: ಇಂಜಂವೊನು, ಇಪ್ಪಂವೊನು ಬಪ್ಪಂವೊನು ಆಯಿತುಳ್ಳ ಸರ್ವ ಶಕ್ತಿ ಉಳ್ಳ ದೇವನಾನ ಒಡೆಯ, ಪವಿತ್ರವಾನಂವೊ, ಪವಿತ್ರವಾನಂವೊ, ಪವಿತ್ರವಾನಂವೋಂದ್ ಎಡೆಬುಡತೆ ಬಯಿಟ್ ಪೋಲು ಎಣ್ಣಿಯಂಡೇ ಇಂಜತ್. 9 ಇಂಞು, ಸಿಂಹಾಸನತ್‍ಲ್ ಅಳ್‌ತಂಡ್, ಕಾಲಕಾಲಕು ಬದ್‍ಕ್‍ವಂವೊಂಗ್ ಆ ಜೀವ ಪ್ರಾಣಿಯ ಎಕ್ಕೆಲ್ಲಾ ಮಹಿಮೆನ, ಗನತ್‍ನ, ತುದಿನ ಅರ್ಪಿಚಿಟ್ಟತೋ, 10 ಅಕ್ಕ ಇರುವತ ನಾಲ್ ಪೆರಿಯಯಿಂಗಳು, ಸಿಂಹಾಸನತ್‍ಲ್ ಅಳ್‌ತಂಡ್ ಉಳ್ಳಂವೊಂಡ ಮಿಂಞತ್ ಅಡ್ಡ ಬುದ್ದಿತ್, ಎಕ್ಕಾಲು ಬದ್‍ಕಿಯಂಡುಳ್ಳಂವೊನ ಆರಾದನೆ ಮಾಡಿತ್, ಅಯಿಂಗಡ ಕಿರೀಟತ್‍ನ ಸಿಂಹಾಸನತ್‍ರ ಮಿಂಞ ಬೆಚ್ಚಿತ್, 11 ನಂಗಡ ಒಡೆಯನಾನ ದೇವನೇ, ಮಹಿಮೆನ, ಗನತ್‍ನ, ಶಕ್ತಿನ ಪಡೆಯುವಕ್ ಯೋಗ್ಯನಾಯಿತುಳ್ಳಿಯ. ನೀನೇ ಎಲ್ಲಾನ ಸೃಷ್ಟಿ ಮಾಡಿಯ, ನೀಡ ಚಿತ್ತತ್‍ರನೆಕೆ ಎಲ್ಲಾ ಸೃಷ್ಟಿ ಆಯಿತ್ ನಿಂದಂಡುಂಡ್‍ೕಂದ್ ಎಣ್ಣ್‌ಚಿ. |
© 2017, New Life Literature (NLL)