ಪ್ರಕಟನೆ 3 - ಕೊಡವ ಬೈಬಲ್ಸಾರ್ದಿಸಿ ಪಟ್ಟಣತ್‍ರ ಸಬೇಕ್ ಉಳ್ಳ ಸುದ್ದಿ 1 ಸಾರ್ದಿಸಿ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ದೇವಡ ಏಳ್ ಆತ್ಮತ್‌ನ ಪಿಂಞ ಏಳ್ ನಕ್ಷತ್ರತ್‍ನ ಪುಡ್‌ಚಂಡುಳ್ಳಂವೊ ಇದ್‍ನ ಎಣ್ಣಿಯಂಡುಳ್ಳ. ನೀಡ ಕ್ರಿಯೆ ನಾಕ್ ಗೊತ್ತುಂಡ್, ನೀನ್ ಬದ್‍ಕಿಯಂಡ್ ಉಂಡ್‍ೕಂದ್‌ ಎಲ್ಲಾರು ಎಣ್ಣಿಯಂಡಿಂಜತೇಂಗಿಯು ನೀನ್ ಚತ್ತ್ ಪೋನಂವೊಂಡನೆಕೆ ಉಳ್ಳಿಯ. 2 ನೀನ್ ಎಚ್ಚರ ಎಡ್‍ತಂಡ್, ನೀಡಲ್ಲಿ ಇಂಞು ಬದ್‍ಕಿಯಂಡುಳ್ಳದ್‍ನ ಚಾವಕ್ ಬುಡತೆ ಸ್ತಿರಪಡ್‍ತ್; ನೀಡ ಕ್ರಿಯೆ ದೇವಡ ಮಿಂಞತ್ ಪೂರ್ತಿಯಾನನೆಕೆ ನಾನ್ ಕಂಡಂಡಿಲ್ಲೆ. 3 ಆನಗುಂಡ್, ನೀನ್ ನನ್ನಿಂಜ ಎಂತದ್‍ನ ಪಡ್ಂದಿತುಳ್ಳಿಯ, ಎಂತಾನ ಕ್‍ೕಟಿತುಳ್ಳಿಯ ಅದ್‍ನ ಗೇನ ಮಾಡ್. ಅದ್ಂಗ್ ತಗ್ಗಿತ್ ನಡ್‌ಂದಿತ್, ಪಶ್ಚಾತಾಪ ಪಡ್. ನೀನ್ ಎಚ್ಚರ ಎಡ್‍ಕತೆ ಪೋನಕ, ಒರ್ ಕಳ್ಳ ಬಪ್ಪನೆಕೆ ನಾನ್ ನೀಡ ಮೇಲೆ ಬಪ್ಪಿ; ನಾನ್ ಬಪ್ಪ ಸಮಯ ನೀಕ್ ಗೊತ್ತಾಪುಲೆ. 4 ಆಚೇಂಗಿಯು, ತಂಗಡ ಬಟ್ಟೇನ ಅಶುದ್ದ ಮಾಡತ ಇಂಞು ಚೆನ್ನ ಜನ ಸಾರ್ದಿಸಿಲ್ ನೀಕ್ ಉಂಡ್; ಅಯಿಂಗ ಯೋಗ್ಯವಾನಗುಂಡ್, ಬೊಳ್‍ತ ಬಟ್ಟೆ ಇಟ್ಟಿತ್ ನಾಡ ಕೂಡೆ ನಡ್‍ಪ. 5 ದಾರೆಲ್ಲ ಗೆಲ್ಲುವ, ಅಂವೊಂಗ್ ಬೊಳ್‍ತ ಬಟ್ಟೆ ಇಡ್‍ವನೆಕೆ ಆಪ; ಅಂವೊಂಡ ಪೆದತ್‍ನ ಜೀವ ಪುಸ್ತಕತ್ಂಜ ಮಾಜ್ ಪೋಪಕ್ ನಾನ್ ಬುಡುಲೆ. ನಾನ್ ನಾಡ ಅಪ್ಪಂಡ ಮಿಂಞತ್ ಪಿಂಞ ಅಂವೊಂಡ ದೂತಂಗಡ ಮಿಂಞತ್ ಅಂವೊ ನಾಡಂವೋಂದ್ ಅರಿಚಿಡುವಿ. 6 ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್. ಇನ್ನನೆ ಒಳ್‍ದ್. ಫಿಲದೆಲ್ಫಿಯ ಪಟ್ಟಣತ್‍ರ ಸಬೇಕ್ ಉಳ್ಳ ಸುದ್ದಿ 7 ಫಿಲದೆಲ್ಫಿಯ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ಪವಿತ್ರವಾನಂವೊನು, ನೇರಾನಂವೊನು, ದಾವೀದಂಡ ಬೀತ್‍ಕೈ ಉಳ್ಳಂವೊನು, ಏದು ಒರ್ ಮನುಷ್ಯನು ಮುಚ್ಚ್‌ವಕ್ ಕಯ್ಯತನೆಕೆ ತೊರ್‌ಪಂವೊನು, ಏದು ಒರ್ ಮನುಷ್ಯನು ತೊರ್‌ಪಕ್ ಕಯ್ಯತನೆಕೆ ಬೀಗ ಇಡ್‌ವಂವೊನು ಎಣ್ಣಿಯಂಡುಳ್ಳ. 8 ನೀಡ ಕ್ರಿಯೆ ನಾಕ್ ಗೊತ್ತುಂಡ್. ಇದಾ, ನಾನ್ ನೀಡ ಮಿಂಞತ್ ದಾರೂ ಮುಚ್ಚ್‌ವಕ್ ಕಯ್ಯತೆ ಒರ್ ತೊರ್‌ಂದ ಪಡಿನ ಬೆಚ್ಚಿತುಳ್ಳ. ಎನ್ನಂಗೆಣ್ಣ್‌ಚೇಂಗಿ, ನೀಕ್ ಚೆನ್ನಂಗೇ ಬಲ ಇಂಜತೇಂಗಿಯು, ನೀನ್ ನಾಡ ತಕ್ಕ್‌ಕ್ ಬಗ್ಗಿತ್, ನನ್ನ ಅಲ್ಲಗೆಳೆಯತೆ ಇಂಜಿಯ. 9 ಇದಾ, ಯೆಹೂದ್ಯ ಅಲ್ಲತಯಿಂಗಳಾಯಿತ್ ಇಂಜತೇಂಗಿಯು ಯೆಹೂದ್ಯಂಗಾಂದ್ ಪೊಟ್ಟ್ ಪರ್ಂದಂಡುಳ್ಳ ಸೈತಾನಂಡ ಸಬಾಮಂದಿರಕ್ ಕೂಡ್‍ನ ಚೆನ್ನ ಜನಳ ನೀಕ್ ತಪ್ಪಿ; ಇದಾ, ಅಯಿಂಗ ನೀಡ ಕಾಲ್‌ಕ್ ಬೂವನೆಕೆ ನಾನ್ ಮಾಡ್‌ವಿ. ನಾನ್ ನಿನ್ನ ಪ್ರೀತಿ ಮಾಡಿಯಂಡುಳ್ಳ್‍ೕಂದ್ ಗೊತ್ತಾಪನೆಕೆ ಇನ್ನನೆ ಮಾಡ್‌ವಿ. 10 ನಾನ್ ಎಣ್ಣ್‌ನ ಆಜ್ಞೇರಗುಂಡ್ ಬಂದ ಕಷ್ಟತ್‍ನ ಪೊರುಮೇಲ್ ಸಹಿಸಿಯಂಡ್ ಕಾಪಾಡಿತುಳ್ಳಿಯ. ಆನಗುಂಡ್, ಈ ಲೋಕತ್‍ಲ್ ವಾಸಮಾಡಿಯಂಡುಳ್ಳಯಿಂಗಳ ಸೋದನೆ ಮಾಡ್‌ವಕಾಯಿತ್ ಈ ಬೂಮಿಲ್ ಎಲ್ಲಾ ಜಾಗತ್‍ಲು ಬಪ್ಪಕುಳ್ಳ ಸೋದನೆರ ಕಾಲತ್‍ಲ್ ನಾನ್ ನಿನ್ನ ಕಾಪಾಡ್‍ವಿ. 11 ಇದಾ, ನಾನ್ ಬೆರಿಯ ಬಂದಂಡುಂಡ್; ದಾರೂ ನೀಡ ಕಿರೀಟತ್‍ನ ಎಡ್‌ಕತನೆಕೆ ನೀಕ್ ಉಳ್ಳದ್‍ನ ಗಟ್ಟಿಯಾಯಿತ್ ಪುಡ್‌ಚ. 12 ದಾರ್ ಗೆಲ್ಲುವ, ಅಂವೊನ ನಾನ್ ದೇವಾಲಯತ್‍ಲ್ ಕಂಬವಾಯಿತ್ ಮಾಡ್‌ವಿ, ಅದ್‍ಂಜ ಅಂವೊ ಎಕ್ಕಲೂ ಪೋಪದೇಯಿಲ್ಲೆ; ನಾಡ ದೇವಡ ಪೆದತ್‍ನ, ನಾಡ ದೇವನಗುಂಡ್ ಪರಲೋಕತ್ಂಜ ಇಳಿಂಜಿ ಬಪ್ಪ ಪುದಿಯ ಯೆರೂಸಲೇಮ್‍ೕಂದ್ ಎಣ್ಣುವ ನಾಡ ದೇವಡ ಪಟ್ಟಣತ್‍ರ ಪೆದತ್‍ನ ಪಿಂಞ ನಾಡ ಪುದಿಯ ಪೆದತ್‍ನ ಅಂವೊಂಡ ಮೇಲೆ ಒಳ್‍ದ್‍ವಿ. 13 ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್. ಇನ್ನನೆ ಒಳ್‍ದ್. ಲವೊದಿಕೀಯ ಪಟ್ಟಣತ್‍ರ ಸಬೇಕ್ ಉಳ್ಳ ಸುದ್ದಿ 14 ಲವೊದಿಕೀಯ ಪಟ್ಟಣತ್‍ಲ್ ಉಳ್ಳ ಸಬೆರ ದೂತಂಗ್ ಒಳ್‍ದ್‍ವಕುಳ್ಳದ್ ಎಂತ ಎಣ್ಣ್‌ಚೇಂಗಿ: ನಂಬಿಕಸ್ತನು, ಸತ್ಯವಂತನು, ದೇವಡ ಸೃಷ್ಟಿಕ್ ಆದ್ಯವಾಯಿತು ಉಳ್ಳ ಆಮೆನ್ ಎಣ್ಣ್‌ವಂವೊ ಎಣ್ಣಿಯಂಡುಳ್ಳ. 15 ನೀಡ ಕ್ರಿಯೆ ನಾಕ್ ಗೊತ್ತುಂಡ್; ನೀನ್ ತಂಪಾಯಿತು ಇಲ್ಲೆ, ಬಿಸಿಯಾಯಿತು ಇಲ್ಲೆ; ನೀನ್ ತಂಪಾಯಿತ್ ಇಕ್ಕಂಡು ಅಲ್ಲತಪೋಚೇಂಗಿ ಬಿಸಿಯಾಯಿತ್ ಇಕ್ಕಂಡು, ಅದ್ ನಲ್ಲದಾಯಿತ್‌ಪ್ಪ. 16 ಇನ್ನನೆ ನೀನ್ ತಂಪೂ ಇಲ್ಲತೆ ಬಿಸಿಯು ಇಲ್ಲತೆ ಎಳೆಬೆಕ್ಕೆಯಾಯಿತ್ ಉಳ್ಳಗುಂಡ್, ನಾನ್ ನಿನ್ನ ನಾಡ ಬಾಯಿಯಿಂಜ ಕಕ್ಕಿರುವಿ. 17 ನಾನ್ ಐಶ್ವರ್ಯವಂತಂವೊ, ನಾಕ್ ದುಂಬ ಸೊತ್ತ್ ಕೂಟಿ ಬೆಚ್ಚಿಯೆ, ನಾಕ್ ಒಂದು ಕಮ್ಮಿಯಿಲ್ಲೇಂದ್ ನೀನ್ ಎಣ್ಣಿಯಂಡುಳ್ಳಿಯ. ಆಚೇಂಗಿ, ನೇರಾಯಿತ್ ನೀನ್ ಒರ್ ಗತಿಯು ಇಲ್ಲತಂವೊನಾಯಿತು, ವ್ಯಸನಕಾರನಾಯಿತು, ಗರೀಬನಾಯಿತು, ಕುರ್‌ಡನಾಯಿತು, ಬೆತ್ತಲೆಯಾಯಿತು ಉಳ್ಳಿಯಾಂದ್ ನೀಕ್ ಅರ್ಥ ಆಯಂಡಿಲ್ಲೆ. 18 ನೀನ್ ಐಶ್ವರ್ಯವಂತನಾಪಕ್, ತಿತ್ತ್‌ಲ್ ಇಟ್ಟಿತ್ ಎಡ್‌ತ ಪೊನ್ನ್‌ನ ಪಿಂಞ ನೀಡ ಅವಮಾನವಾಯಿತುಳ್ಳ ಬೆತ್ತಲೇನ ಮುಚ್ಚ್‌ವಕ್ ಬೊಳ್‍ತ ಬಟ್ಟೇನ ನಾಡ ಕೈಯಿಂಜ ಕ್ರಯಕ್ ಎಡ್‌ತ ಪಿಂಞ ನೀಡ ಕಣ್ಣ್ ಕಾಂಬನೆಕೆ, ಕಣ್ಣ್‌ಕ್ ಮದ್ದ್ ಇಡ್‍ೕಂದ್ ನಾನ್ ನೀಕ್ ಬುದ್ದಿ ಎಣ್ಣ್‌ವಿ. 19 ನಾಕ್ ದಾಡ ಮೇಲೆ ಕುಶಿ ಉಂಡೋ, ಅಯಿಂಗಕ್ ಜೋರ್ ಮಾಡಿತ್, ಅಯಿಂಗಕ್ ಶಿಕ್ಷೆ ತಪ್ಪಿ. ಆನಗುಂಡ್ ನೀನ್ ಎಚ್ಚರತ್‍ಲ್ ಇಂಜಿತ್ ದೇವಡ ಪಕ್ಕ ತಿರಿತ್ ಪಶ್ಚಾತಾಪ ಪಡ್‌ವಿಯ. 20 ಇದಾ, ನಾನ್ ಪಡಿರ ಪಕ್ಕ ನಿಂದಂಡ್ ತಟ್ಟಿಯಂಡುಳ್ಳ, ದಾರೇಂಗಿ ನಾಡ ಸದ್ದ್‌ನ ಕ್‍ೕಟಿತ್, ಪಡಿನ ತೊರ್‌ಂದ್‍ತೇಂಗಿ, ನಾನ್ ಒಳ್‍ಕ್ ಬಂದಿತ್, ಅಂವೊಂಡ ಕೂಡೆ ಅಳ್‌ತಿತ್ ಉಂಬಿ, ಅಂವೊನು ನಾಡ ಕೂಡೆ ಅಳ್‌ತಿತ್ ಉಂಬ. 21 ನಾನ್ ಗೆದ್ದಿತ್ ನಾಡ ಅಪ್ಪಂಡ ಸಿಂಹಾಸನತ್‍ಲ್ ಅಳ್‍ತಂಡುಳ್ಳನೆಕೆ, ದಾರ್ ಗೆಲ್ಲುವ ಅಂವೊನು ಸಹ ನಾಡ ಸಿಂಹಾಸನತ್‍ಲ್ ಅಳ್‌ಪಕ್ ನಾನ್ ಅದಿಕಾರ ತಪ್ಪಿ. 22 ಪವಿತ್ರಾತ್ಮ ಸಬೇಕ್ ಎಣ್ಣಿಯಂಡುಳ್ಳದ್‍ನ ಕ್‍ೕಪಕ್ ಕೆಮಿ ಉಳ್ಳಂವೊ ಕ್‍ೕಕಡ್. ಇನ್ನನೆ ಒಳ್‍ದ್. |
© 2017, New Life Literature (NLL)