ಪ್ರಕಟನೆ 21 - ಕೊಡವ ಬೈಬಲ್ಪುದಿಯ ಯೆರೂಸಲೇಮ್ 1 ಅಲ್ಲಿಂಜ ಪುದಿಯ ಬಾನ ಪಿಂಞ ಪುದಿಯ ಬೂಮಿನ ಕಂಡಿಯೆ; ಮಿಂಞತ್‍ರ ಬಾನ ಮಿಂಞತ್‍ರ ಬೂಮಿ ಇಲ್ಲತೆ ಆಯಿಪೋಚಿ; ಸಮುದ್ರ ಸಹ ಇಲ್ಲತೆ ಆಯಿಪೋಚಿ 2 ಪಿಂಞ, ಪರಲೋಕತ್ಂಜ ಪವಿತ್ರ ಪಟ್ಟಣವಾನ ಪುದಿಯ ಯೆರೂಸಲೇಮ್ ದೇವಡ ಕಡೇಯಿಂಜ ಇಳಿಂಜಿ ಬಪ್ಪದ್‍ನ ನಾನ್ ಕಂಡಿಯೆ. ಅದ್ ತಾಂಡ ಮಂಗಲಕಾರಂಗಾಯಿತ್ ಅಲಂಕಾರ ಮಾಡಿತ್ಂಜ ಮಂಗಲಕರ್ತಿರನೆಕೆ ಇಂಜತ್. 3 ಸಿಂಹಾಸನತ್ಂಜ ಒರ್ ಬಲ್ಯ ಸದ್ದ್ ನಾಕ್ ಕ್‍ೕಟತ್: ನೋಟಿ, ಮನುಷ್ಯಂಡ ಮದ್ಯತ್‍ಲ್ ದೇವ ವಾಸ ಮಾಡ್‌ವ ಜಾಗ ಉಂಡ್, ಅಯಿಂಗಡಲ್ಲಿ ಅಂವೊ ವಾಸ ಮಾಡಿಯಂಡಿಪ್ಪ; ಅಯಿಂಗ ಅಂವೊಂಡ ಜನವಾಯಿತ್‌ಪ್ಪ, ದೇವ ತಾನೆ ಅಯಿಂಗಡ ಕೂಡೆ ಇಂಜಿತ್ ಅಯಿಂಗಡ ದೇವನಾಯಿತ್‌ಪ್ಪ. 4 ದೇವ ಅಯಿಂಗಡ ಕಣ್ಣೀರ್‌ನೆಲ್ಲಾ ತ್‍ೕ‍ಟ್‍ವ. ಇಂಞು ಮಿಂಞಕ್ ಚಾವ್ ಎಣ್ಣುವದ್ ಇಪ್ಪುಲೆ. ಇಂಞು ದುಃಖ, ಗೋಳಾಟ, ಕಷ್ಟ ಎಣ್ಣುವದ್ ಇಪ್ಪುಲೆ; ಮಿಂಞ ಇಂಜದೆಲ್ಲಾ ಇಲ್ಲತೆ ಆಯಿಪೋಚೀಂದ್ ಎಣ್ಣ್‌ಚಿ. 5 ಸಿಂಹಾಸನತ್‍ಲ್ ಅಳ್‌ತಿತ್ ಇಂಜಂವೊ: ನೋಟಿ, ನಾನ್ ಎಲ್ಲಾನ ಪುದಿಯದಾಯಿತ್ ಮಾಡಿಯಂಡುಳ್ಳ್‌ಂದ್ ಎಣ್ಣ್‌ಚಿ, ಪುನಃ ಅಂವೊ: ಈ ತಕ್ಕ್ ಎಲ್ಲಾ ಸತ್ಯವು ನೇರಾನದು ಆಯಿತುಳ್ಳಗುಂಡ್ ಒಳ್‌ದ್‍ೕಂದ್ ಎಣ್ಣ್‌ಚಿ. 6 ಇದ್‍ಲ್ಲತೆ, ಅಂವೊ ನನ್ನ ನೋಟಿತ್: ಎಲ್ಲಾ ತ್‍ೕಂದತ್, ನಾನ್ ಅಲ್ಫಾವಾಯಿತು ಓಮೆಗವಾಯಿತು, ಆದ್ಯವಾಯಿತು ಆಕೀರಾಯಿತು ಉಳ್ಳ. ಬಾಯರಿಕೆಲ್ ಉಳ್ಳಂವೊಂಗ್, ಜೀವತ್‍ರ ಜಲ ನೀರ್‍ಯಿಂಜ ನಾನ್ ಇನಾಮಾಯಿತ್ ನೀರ್‌ನ ಕುಡಿಪಕ್ ತಪ್ಪಿ. 7 ದಾರೆಲ್ಲಾ ಗೆಲ್ಲುವ ಅಯಿಂಗ, ಎಲ್ಲಾಂಗು ಬಾದ್ಯಕಾರಂಗಳಾಯಿತ್ ಇಪ್ಪ. ನಾನ್ ಅಂವೊಂಡ ದೇವನಾಯಿತಿಪ್ಪಿ ಅಂವೊ ನಾಡ ಮೋಂವೊನಾಯಿತ್‌ಪ್ಪ. 8 ಆಚೇಂಗಿ, ಬೊತ್ತಿಯಂಡುಳ್ಳಯಿಂಗಳು, ನಂಬಿಕೆ ಇಲ್ಲತಯಿಂಗಳು, ಅಶುದ್ದವಾಯಿತುಳ್ಳಯಿಂಗಳು, ಕೊಲೆ ಮಾಡ್‌ವಯಿಂಗಳು, ವ್ಯಬಿಚಾರ ಮಾಡ್‌ವಯಿಂಗಳು, ಮಾಟಮಂತ್ರ ಮಾಡ್‌ವಯಿಂಗಳು, ವಿಗ್ರಹ ಆರಾದನೆ ಮಾಡ್‌ವಯಿಂಗಳು, ಪೊಟ್ಟ್ ಪರಿಯುವ ಎಲ್ಲಾರು ದಂಡನೆ ಚಾವಾಯಿತುಳ್ಳ ಗಂಧಕತ್‍ಲ್ ತಿತ್ತ್ ಕತ್ತಿಯಂಡಿಪ್ಪ ಕಡಲ್‍ಲ್ ಪಾಲ್‍ದಾರಂಗಳಾಪಾಂದ್ ಎಣ್ಣ್‌ಚಿ. 9 ಪಿಂಞ ಆಕೀರ್‌ಲ್ ಏಳ್ ಬಾದೆರಗುಂಡ್ ದುಂಬಿತ್ಂಜ ಏಳ್ ಪಾತ್ರತ್‍ನ ಪುಡ್‌ಚಂಡಿಂಜ ಆ ಏಳ್ ದೇವದೂತಂಗಡಲ್ಲಿ ಒಬ್ಬ ನಾಡ ಪಕ್ಕ ಬಂದಿತ್: ಇಲ್ಲಿ ಬಾ! ನಾನ್, ಕೊರಿಕುಟ್ಟಿಯಾನವೊಂಡ ಪೊಣ್ಣಾಪಕುಳ್ಳ ಮಂಗಲಕರ್ತಿನ ನೀಕ್ ಕಾಟಿತಪ್ಪೀಂದ್ ಎಣ್ಣ್‌ಚಿ. 10 ಅಂವೊ ನನ್ನ, ಬಲ್ಯದಾಯಿತ್ಂಜ ಉದ್ದವಾಯಿತ್ಂಜ ಒರ್ ಕುಂದ್‌ಕ್ ಪವಿತ್ರಾತ್ಮತ್‍ಲ್ ಎಡ್‍ತಂಡ್ ಪೋಚಿ. ದೇವಡ ಕಡೇಯಿಂಜ ಇಳಿಂಜಿತ್ ಬಂದಂಡುಳ್ಳ ಮಹಿಮೆ ದುಂಬ್‍ನ ಪವಿತ್ರವಾನ ಯೆರೂಸಲೇಮ್ ಪಟ್ಟಣ ಪರಲೋಕತ್‌ನ ಬುಟ್ಟಿತ್ ಬಪ್ಪದ್‍ನ ನಾಕ್ ಕಾಟಿ ತಾತ್. 11 ಅದ್‍ಲ್ ದೇವಡ ಮಹಿಮೆ ಇಂಜತ್. ಆ ಪಟ್ಟಣತ್‍ರ ಬೊಳಿ, ಬಲ್ಯ ಬೆಲೆಯುಳ್ಳ ರತ್ನತ್‍ರ ಬೊಳಿ‍ರನೆಕೆಯು, ಪಳಪಳಾಂದ್ ಉಳ್ಳ ವಜ್ರತ್‍ರನೆಕೆಯು ಇಂಜತ್. 12 ಆ ಪಟ್ಟಣಕ್ ಬಲ್ಯ ಉದ್ದವಾನ ಗೋಡೆ ಇಂಜತ್. ಅದ್ಂಗ್ ಪನ್ನೆರಂಡ್ ಬಾಯಿಕಂಡಿ ಇಂಜತ್. ಕ್‍ೕಕ್ ದಿಕ್ಕ್‌ಲ್ ಮೂಂದ್, ಬಡಕ್‌ ದಿಕ್ಕ್‌ಲ್ ಮೂಂದ್, ತೆಕ್ಕ್‌ ದಿಕ್ಕ್‌ಲ್ ಮೂಂದ್ ಪಿಂಞ ಪಡ್‍ಞಾರ್ ದಿಕ್ಕ್‌ಲ್ ಮೂಂದ್ ಇಂಜತ್. 13 ಆ ಬಾಯಿಕಂಡಿರ ಪಕ್ಕ ಪನ್ನೆರಂಡ್ ದೇವದೂತಂಗ ಇಂಜತ್; ಆ ಬಾಯಿಕಂಡಿರ ಮೇಲೆ ಇಸ್ರಾಯೇಲಂಡ ಪನ್ನೆರಂಡ್ ಕುಲತ್‍ರ ಪೆದ ಒಳ್‍ದಿತ್ ಇಂಜತ್. 14 ಆ ಪಟ್ಟಣತ್‍ರ ಗೋಡೆರ ಪನ್ನೆರಂಡ್ ಅಡಿಪಾಯತ್‍ರ ಕಲ್ಲ್ ಇಂಜತ್; ಅದ್ಂಡಮೇಲೆ, ಕೊರಿಕುಟ್ಟಿಯಾನವೊಂಡ ಪನ್ನೆರಂಡ್ ಅಪೊಸ್ತಲಂಗಡ ಪನ್ನೆರಂಡ್ ಪೆದ ಇಂಜತ್. 15 ನಾಡ ಕೂಡೆ ತಕ್ಕ್ ಪರ್‌ದಂಡ್ ಇಂಜಂವೊ, ಆ ಪಟ್ಟಣತ್‍ನ, ಅದ್ಂಡ ಬಾಯಿಕಂಡಿ‍ನ ಅಳ್‌ತೆ ಮಾಡ್‌ವಕಾಯಿತ್ ಪೊನ್ನ್‌ರ ಅಳ್‌ತೆ ಕೋಲ್‍ನ ಕೈಯಿಲ್ ಪುಡ್‍ಚಂಡ್ ಇಂಜತ್. 16 ಆ ಪಟ್ಟಣ ಚದರವಾಯಿತ್ಂಜತ್. ಅದ್ಂಡ ಉದ್ದವೂ ಅಗಲವೂ ಸಮವಾಯಿತ್ಂಜತ್. ಅಂವೊ ಅಂವೊಂಡ ಕೈಯಿಲ್ ಇಂಜ ಕೋಲ್‍ಲ್ ಪಟ್ಟಣತ್‍ನ ಅಳ್‌ತೆ ಮಾಡ್‍ಚಿ. ಅಳ್‌ತೆ ದಂಡಾಯಿರತ ನಾನೂರ್ ಕಿಲೊ ಮೀಟರ್ ಇಂಜತ್. ಅದ್ಂಡ ಉದ್ದ ಅಗಲ ಎತ್ತರವೆಲ್ಲಾ ಸಮವಾಯಿತ್ಂಜತ್. 17 ಅಂವೊ ಅದ್ಂಡ ಗೋಡೆನ ಅಳ್‌ತೆ ಮಾಡ್‌ವಕ, ಮನುಷ್ಯಂಗಡ ಅಳ್‌ತೆರನೆಕೆ ದೇವದೂತ ಅದ್‍ನ ಅಳ್‌ತೆ ಮಾಡ್‌ವಕ ದಂಡ್ ನೂರ ಪದನಾರ್ ಅಡಿ ಇಂಜತ್. 18 ಅಲ್ಲಿಯತ್‍ರ ಗೋಡೆ ಸೂರ್ಯಕಾಂತ ಕಲ್ಲ್‌ಲ್ ಕೆಟ್ಟಿತ್ಂಜತ್. ಆ ಪಟ್ಟಣ ತೆಳ್ಂಗ್‍ನ ಗಾಜಿಕ್ ತಕ್ಕಂತ ಶುದ್ದವಾನ ಪೊನ್ನಾಯಿತ್ಂಜತ್. 19 ಪಟ್ಟಣತ್‍ರ ಗೋಡೆರ ಅಡಿಪಾಯ, ನಾನಾ ತರತ್‍ರ ರತ್ನತ್ಂಜ ಅಲಂಕಾರ ಮಾಡಿತ್ಂಜತ್. ಆದ್ಯತ್‍ರ ಅಡಿಪಾಯ ವಜ್ರವಾಯಿತ್ಂಜತ್. ದಂಡನೆ ಅಡಿಪಾಯ ನೀಲಮಣಿ ಆಯಿತ್ಂಜತ್. ಮೂಂದನೆ ಅಡಿಪಾಯ ಪಟ್ಟೆಕಲ್ಲ್ ಆಯಿತ್ಂಜತ್. ನಾಲನೆ ಅಡಿಪಾಯ ಪಚ್ಚೆ ಕಲ್ಲ್ ಆಯಿತ್ಂಜತ್. 20 ಅಂಜನೆ ಅಡಿಪಾಯ ಗೋಮೇದಿಕ, ಆರೆನ ಅಡಿಪಾಯ ಮಾಣಿಕ್ಯ, ಏಳನೆ ಅಡಿಪಾಯ ಪೀತರತ್ನ, ಎಟ್ಟನೆ ಅಡಿಪಾಯ ಬೇರುಲ್ಲ, ಒಯಿಂಬದನೆ ಅಡಿಪಾಯ ಪುಷ್ಯರಾಗ, ಪತ್ತನೆ ಅಡಿಪಾಯ ಗರುಡಪಚ್ಚೆ, ಪನ್ನಂದನೆ ಅಡಿಪಾಯ ಕೆಂಗಿತ್ತಳೆ, ಪನ್ನೆರಂಡನೆ ಅಡಿಪಾಯ ನೀಲಸ್ಪಟಿಕ ಇನ್ನತಾನಯಿಂಗಳೇ. 21 ಪನ್ನೆರಂಡ್ ಬಾಯಿಕಂಡಿಯು ಪನ್ನೆರಂಡ್ ಮುತ್ತಾಯಿತ್‍ಂಜತ್. ಓರೋರ್ ಬಾಯಿಕಂಡಿಯು ಓರೋರ್ ಮುತ್ತ್‌ಲ್ ಮಾಡಿತ್ಂಜತ್. ಪಟ್ಟಣತ್‍ರ ಬೀದಿ ತೆಳ್ಂಗ್‍ನ ಗಾಜಿರ ಶುದ್ದವಾನ ಪೊನ್ನ್‌ರನೆಕೆ ಇಂಜತ್. 22 ಆ ಪಟ್ಟಣತ್‍ಲ್ ನಾನ್ ದೇವಾಲಯತ್‍ನ ಕಂಡಿತ್‌ಲ್ಲೆ, ಎನ್ನಂಗೆಣ್ಣ್‌ಚೇಂಗಿ, ಸರ್ವ ಶಕ್ತಿವಂತಂವೊನಾಯಿತುಳ್ಳ ದೇವ ಪಿಂಞ ಕೊರಿಕುಟ್ಟಿಯಾಯಿತುಳ್ಳಂವೊನೇ ಅದ್ಂಗ್ ದೇವಾಲಯವಾಯಿತ್ಂಜತ್. 23 ಆ ಪಟ್ಟಣಕ್ ಬೊಳಿ ಕೊಡ್‍ಪಕ್ ಸೂರ್ಯನಾಡ್ ಚಂದ್ರನಾಡ್ ಬೋಂಡ್‍ವಕಿಂಜ್‍ಲೆ; ದೇವಡ ಮಹಿಮೆಯೇ ಅದ್ಂಗ್ ಬೊಳಿಯಾಯಿತ್ಂಜತ್. ಕೊರಿಕುಟ್ಟಿಯಾನಂವೊನೇ ಅದ್ಂಗ್ ಬೊಳಕಾಯಿತ್ಂಜತ್ 24 ರಕ್ಷಣೆ ಕ್‍ಟ್ಟ್‌ನ ಜನ ಅದ್ಂಡ ಬೊಳಿಲ್ ನಡ್‍ಪಕಿಂಜತ್. ಬೂಮಿಲ್ ಉಳ್ಳ ರಾಜಂಗ ಅಯಿಂಗಡ ಮಹಿಮೆನ, ಗನತ್‍ನ ಅದ್ಂಡ ಒಳ್‍ಕ್ ಎಡ್‌ತ ಬಪ್ಪಕಿಂಜತ್. 25 ಅಲ್ಲಿಕ್ ಬಯಿಟ್ ಎಣ್ಣ್‌ವದೇ ಇಲ್ಲತಗುಂಡ್, ಅದ್ಂಡ ಬಾಯಿಕಂಡಿ‍ನ ಮುಚ್ಚಿತ್ ಬೆಪ್ಪದೇ ಇಲ್ಲೆ, ಎಕ್ಕಾಲು ತೊರ್‌ಂದಿತೇ ಇಪ್ಪ. 26 ಲೋಕತ್ ಜನತ್‍ರ ಮಹಿಮೆನ ಗನತ್‍ನ ಅದ್ಂಡ ಒಳ್‍ಕ್ ಕೊಂಡ್ ಬಪ್ಪ. 27 ಕೊರಿಕುಟ್ಟಿಯಾನವೊಂಡ ಜೀವ ಪುಸ್ತಕತ್‍ಲ್ ಪೆದ ಒಳ್‍ದಿತುಳ್ಳಯಿಂಗ ಅಲ್ಲತೆ ಬೋರೆ ದಾರೂ ಅದ್ಂಡ ಒಳ್‍ಕ್ ಪೋಪಕ್ ಕಯ್ಯುಲೆ; ಅಶುದ್ದವಾನದ್ ಒಂದು ಅಲ್ಲಿಕ್ ಪೋಪುಲೆ, ಹೇಸಿಗೆಯಾನದ್‌ನ ಅಥವ ಕಳ್ಳತನ ಮಾಡ್‌ವ ದಾರೂ ಅಲ್ಲಿಕ್ ಎತ್ತುಲೆ. |
© 2017, New Life Literature (NLL)