ಪ್ರಕಟನೆ 17 - ಕೊಡವ ಬೈಬಲ್ಪೊಣ್ಣಾಳು ಮೃಗವು 1 ಏಳ್ ಪಾತ್ರತ್‍ನ ಪುಡ್‌ಚಂಡಿಂಜ ಆ ಏಳ್ ದೂತಂಗಡಲ್ಲಿ ಒಬ್ಬ, ನಾಡ ಪಕ್ಕ ಬಂದಿತ್ ನಾಡ ಕೂಡೆ ತಕ್ಕ್ ಪರ್ಂದತ್. ನೀನ್ ಬಾ! ದುಂಬ ನೀರ್‌ರ ಮೇಲೆ ಅಳ್‌ತಂಡ್, ಮಹಾ ವೇಶಿಯಾಯಿತಿಂಜವಕ್ ಕ್‍ಟ್ಟುವ ಶಿಕ್ಷೇರ ತೀರ್ಪ್‌ನ ನಾನ್ ನೀಕ್ ಕಾಟಿತಪ್ಪಿ. 2 ಅವಡ ಕೂಡೆ ಬೂಮಿರ ರಾಜಂಗ ವೇಶಿತನ ಮಾಡ್‍ಚಿ, ಲೋಕತ್‍ರ ಜನ ಅವಡ ವೇಶಿತನತ್‍ರ ಕಳ್ಳ್‌ನ ಕುಡಿಚಿತ್ ಕಳ್ಳ್‌ರ ಬೋಗತ್‍ಲ್ ಇಪ್ಪನೆಕೆ ಮಾಡ್‍ಚಿ. 3 ಪವಿತ್ರಾತ್ಮತ್‍ಲ್ ಅಂವೊ ನನ್ನ ಮಣಬೂಮಿಕ್ ಕಾಕಿಯಂಡ್ ಪೋಚಿ. ಅಲ್ಲಿ ನಾನ್ ಚೋಂದ ರಂಗ್‍ರ ಒರ್ ಮೃಗತ್‍ನ ಕಂಡಿಯೆ. ಆ ಮೃಗಕ್ ಏಳ್ ಮಂಡೆಯು ಪತ್ತ್ ಕೊಂಬು ಇಂಜತ್. ಅದ್ಂಡ ತಡಿ ಪೂರ್ತಿ ದೇವ ದೂಷಣೆರ ಪೆದತ್‍ರಗುಂಡ್ ಮುಚ್ಚಿತ್ಂಜತ್. ಅದ್ಂಡಮೇಲೆ ಒರ್ ಪೊಣ್ಣಾಳ್ ಅಳ್‍ತಂಡಿಂಜತ್. 4 ಆ ಪೊಣ್ಣಾಳ್ ನೀಲಿ ಪಿಂಞ ಚೋಂದ ರಂಗ್‍ರ ಬಟ್ಟೆ ಇಟ್ಟಿತ್ಂಜತ್. ಪೊನ್ನ್‌ರಗುಂಡ್, ರತ್ನತ್‍ರಗುಂಡ್, ಮಾಣಿಕ್ಯತ್‍ರಗುಂಡ್ ಅಲಂಕಾರ ಮಾಡಿತ್, ತಾಂಡ ವೇಶಿತನತ್‍ರ ಅಸಹ್ಯ ಪಿಂಞ ಅಶುದ್ದತ್‍ರಗುಂಡ್ ದುಂಬ್‍ನ ಪೊನ್ನ್‌ರ ಪಾತ್ರತ್‍ನ ತಾಂಡ ಕೈಯಿಲ್ ಪುಡ್‌ಚಂಡಿಂಜತ್. 5 ಅವಡ ನೆತ್ತಿರ ಮೇಲೆ, ಮರ್ಮ, ಮಹಾ ಬಾಬೇಲ್, ವೇಶಿಯಂಗಕ್ ಬೂಮಿಲ್ ಉಳ್ಳ ಅಶುದ್ದಕೆಲ್ಲ ಅವ್ವ ಎಣ್ಣುವ ಪೆದ ಒಳ್‍ದಿತ್ಂಜತ್. 6 ಆ ಪೊಣ್ಣಾಳ್ ದೇವಡ ಮಕ್ಕಡ ಚೋರೆನ, ಯೇಸುಕ್ ಸಾಕ್ಷಿ ಕೊಡ್‍ತ ಮಕ್ಕಡ ಚೋರೆನ ಕುಡಿಚ ಬೋಗತ್‍ಲ್ ಇಪ್ಪದ್‍ನ ಕಂಡಿಯೆ. ಅವಳ ಕಾಂಬಕ ನಾಕ್ ದುಂಬ ಆಶ್ಚರ್ಯ ಆಚಿ. 7 ಅಕ್ಕ ದೇವದೂತ: ನೀನ್ ಎನ್ನಂಗ್ ಆಶ್ಚರ್ಯ ಪಡ್‌ವಿಯಾ? ಈ ಪೊಣ್ಣಾಳ್‍ರ ಮರ್ಮತ್‍ನ, ಅವಡ ವಾಹನವಾಯಿತುಳ್ಳ ಏಳ್ ಮಂಡೆ, ಪತ್ತ್ ಕೊಂಬ್ ಉಳ್ಳ ಮೃಗತ್‍ರ ಮರ್ಮತ್‍ನ ನಾನ್ ನೀಕ್ ಎಣ್ಣಿ ತಪ್ಪೀಂದ್ ಎಣ್ಣ್‌ಚಿ. 8 ನೀನ್ ಕಂಡ ಮೃಗ ಮಿಂಞ ಇಂಜತ್, ಇಕ್ಕ ಇಲ್ಲೆ, ಅದ್ ಪಾತಾಳತ್ಂಜ ಕೊಡಿಕ್ ಪತ್ತಿತ್ ಬಂದಿತ್ ನಾಶ ಆಪ. ಲೋಕ ಸೃಷ್ಟಿ ಆನ ಕಾಲತ್ಂಜ ಜೀವ ಪುಸ್ತಕತ್‍ಲ್ ಪೆದ ಒಳ್‍ದತೆ ಬೂಮಿಲ್ ವಾಸ ಮಾಡಿಯಂಡ್ ಉಳ್ಳ ಜನ, ಮಿಂಞ ಇಂಜದು, ಇಕ್ಕ ಇಲ್ಲತೆ ಪೋನದು, ಇಂಞು ಮಿಂಞಕ್ ಇಪ್ಪ ಮೃಗತ್‍ನ ನೋಟಿತ್ ಆಶ್ಚರ್ಯಪಡುವ. 9 ಇದ್ ಜ್ಞಾನವು ಬುದ್ದಿವಂತಯಿಂಗಳಾಯಿತ್ ಉಳ್ಳಯಿಂಗಕ್ ಮಾತ್ರ ಗೊತ್ತಾಪ. ಆ ಏಳ್ ಮಂಡೆ, ಆ ಪೊಣ್ಣಾಳ್ ಅಳ್‌ತಂಡುಳ್ಳ ಏಳ್ ಕುಂದಾಯಿತುಂಡ್. 10 ಅದ್ ಏಳ್ ರಾಜಂಗಳ ಕಾಟ್‍ವ; ಅದ್‍ಲ್ ಅಂಜ್ ಜನ ಬುದ್ದ್ ಪೋಚಿ, ಒಬ್ಬ ಮಾತ್ರ ಉಂಡ್. ಇಂಞೊಬ್ಬ ಇಂಞು ಬಂದಿತ್‌ಲ್ಲೆ; ಅಂವೊ ಬಂದ ಪಿಂಞ ಚೆನ್ನ ಕಾಲ ಸ್ತಿರವಾಯಿತ್ ಇಕ್ಕಂಡು. 11 ಮಿಂಞ ಇಂಜದು, ಇಲ್ಲತ ಪೋನದುವಾಯಿತುಳ್ಳ ಆ ಮೃಗವೇ ಎಟ್ಟಣೆಂವೊನಾಯಿತುಂಡ್. ಅಂವೊ ಏಳ್ ರಾಜಂಗಡಲ್ಲಿಂಜ ಬಪ್ಪಂವೊನು, ನಾಶವಾಯಿ ಪೋಪಂವೊನು ಆಯಿತುಂಡ್. 12 ನೀನ್ ಕಂಡ ಪತ್ತ್ ಕೊಂಬ್ ಪತ್ತ್ ರಾಜಂಗ, ಅಯಿಂಗಕ್ ಇಂಞು ರಾಜ್ಯ ಕ್‍ಟ್ಟಿತ್‌ಲ್ಲೆ. ಈಂಗ ಮೃಗತ್‍ರ ಕೂಡೆ ಒರ್ ಗಂಟೆಕ್ ರಾಜಂಗಡನೆಕೆ ಅದಿಕಾರ ಪಡೆಯುವ. 13 ಅಯಿಂಗ ಒರೇ ಮನಸ್ಸ್ ಉಳ್ಳಯಿಂಗಳಾಯಿತ್, ಅಯಿಂಗಡ ಶಕ್ತಿನ ಅದಿಕಾರತ್‍ನ ಆ ಮೃಗಕ್ ಕೊಡ್‍ಪ. 14 ಈಂಗ ಕೊರಿಕುಟ್ಟಿಯಾನವೊಂಡ ಕೂಡೆ ಯುದ್ದ ಮಾಡ್‌ವ. ಆಚೇಂಗಿ ಅಂವೊ ದೇವಾದಿ ದೇವನು ರಾಜಾದಿ ರಾಜನು ಆನಗುಂಡ್ ಅಯಿಂಗಳ ಗೆಲ್ಲುವ; ಅಂವೊಂಡ ಕೂಡೆ ಉಳ್ಳಯಿಂಗಳ, ಅಂವೊ ಕಾಕ್‌ನಯಿಂಗಾಂದು, ಗೊತ್ತ್ ಮಾಡ್‍ನಯಿಂಗಾಂದು, ನಂಬಿಕಸ್ತಂಗಾಂದು ಎಣ್ಣುವಾಂದು ಎಣ್ಣ್‌ಚಿ. 15 ಪಿಂಞ ದೇವದೂತ ನಾಕ್: ವೇಶಿಯಾನ ಪೊಣ್ಣಾಳ್ ಅಳ್‍ತಂಡಿಂಜನೆಕೆ ನೀನ್ ನೋಟ್‌ನ ನೀರ್ ಎಂತ ಎಣ್ಣ್‌ಚೇಂಗಿ; ಅದ್ ಜನಳು, ಜನತ್‍ರ ಗುಂಪು, ಜಾತಿಯಳು ಬಾಷೆಕಾರಳುವಾಯಿತುಂಡ್. 16 ಆ ಮೃಗತ್‍ರ ಮೇಲೆ ನೀನ್ ನೋಟ್‌ನ ಪತ್ತ್ ಕೊಂಬ್‍ರಯಿಂಗ ಆ ವೇಶಿನ ವಿರೋದ ಮಾಡಿತ್, ಪಾಳ್ ಮಾಡಿತ್, ಅವಳ ಬೆತ್ತಲೆ ಮಾಡಿತ್, ಅವಡ ಯರ್ಚಿನ ತಿಂದಿತ್, ಅವಳ ತಿತ್ತ್‌ಲ್ ಚುಟ್ಟ್‌ರ್‍ವ. 17 ದೇವ ತಾಂಡ ತಕ್ಕ್‌ನ ನೆರೆವೇರಿಚಿಡುವಕತ್ತನೆ, ಅಯಿಂಗಡ ಯೋಚನೆ ನೆರೆವೇರುವಕ್, ಒರೇ ಮನಸ್ಸ್ ಉಳ್ಳಯಿಂಗಳಾಯಿತ್, ಅಯಿಂಗಡ ರಾಜ್ಯತ್‍ನ ಮೃಗಕ್ ಕೊಡ್‍ಪಕಾಯಿತ್ ಅಯಿಂಗಡ ಹೃದಯತ್‍ನ ಒಂದ್ ಮಾಡ್‍ಚಿ. 18 ನೀನ್ ಕಂಡ ಆ ಪೊಣ್ಣಾಳ್ ಬೂಮಿಲ್ ಉಳ್ಳ ರಾಜಂಗಡ ಮೇಲೆ ರಾಜ್ಯಬಾರ ಮಾಡ್‌ವ ಬಲ್ಯ ಪಟ್ಟಣವೇಂದ್ ಎಣ್ಣ್‌ಚಿ. |
© 2017, New Life Literature (NLL)