ಪ್ರಕಟನೆ 16 - ಕೊಡವ ಬೈಬಲ್ದೇವಡ ಬಲ್ಯ ಚೆಡಿರಗುಂಡ್ ದುಂಬಿತ್ಂಜ ಪೊನ್ನ್‌ರ ಪಾತ್ರ 1 ಆ ಸಮಯತ್‍ಲ್, ದೇವಾಲಯತ್ಂಜ ಒರ್ ಬಲ್ಯ ಸ್ವರ ಆ ಏಳ್ ದೂತಂಗಕ್: ನಿಂಗ ಪೋಯಿತ್ ದೇವಡ ಪಾತ್ರತ್‍ಲ್ ಉಳ್ಳ ಬಲ್ಯ ಚೆಡಿನ ಬೂಮಿರ ಮೇಲೆ ಬೂಕ್‌ವಿರಾಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. 2 ಮೊದಲನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಬೂಮಿರ ಮೇಲೆ ಬೂಕ್‍ಚಿ. ಅಕ್ಕ ಮೃಗತ್‍ರ ಮುದ್ರೆನ ಇಟ್ಟಯಿಂಗಳು ಅದ್ಂಡ ವಿಗ್ರಹತ್‍ನ ಆರಾದನೆ ಮಾಡ್‌ವಯಿಂಗಳು ಆನ ಮನುಷ್ಯಂಗಡ ಮೇಲ್‌ಲ್ ಬಯಂಕರವಾನ ಬಲ್ಯ ನೊಂಬಲ ತಪ್ಪ ಪುಣ್ಣ್ ಉಂಟಾಚಿ. 3 ದಂಡನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಸಮುದ್ರತ್‍ಲ್ ಬೂಕ್‍ಚಿ. ಅಕ್ಕ ಸಮುದ್ರತ್‍ರ ನೀರ್ ಚತ್ತ್ ಪೋನಂವೊಂಡ ಚೋರೆರನೆಕೆ ಆಚಿ. ಸಮುದ್ರತ್‍ಲ್ ಉಳ್ಳ ಪ್ರಾಣಿಯ ಎಲ್ಲಾ ಚತ್ತ್ ಪೋಚಿ. 4 ಮೂಂದನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಪೊಳೆಕ್ ಪಿಂಞ ನೀರ್‌ರ ಬುಗ್ಗೆಕ್ ಬೂಕ್‍ಚಿ. ಅಕ್ಕ ಅದ್ ಚೋರೆಯಾಯಿತ್ ಬದ್‍ಲ್ ಆಚಿ. 5 ಅಲ್ಲಿಂಜ ನೀರ್‌ರ ದೂತ: ಇಪ್ಪಂವೊನು, ಇಂಜಂವೊನು ಪವಿತ್ರವಾಯಿತುಳ್ಳ ದೇವನೇ, ಇನ್ನನೆ ನ್ಯಾಯತೀರ್ಪ್ ಕೊಡ್‍ಪಕ್ ನೀನ್ ನೀತಿವಂತಂವೊನಾಯಿತುಳ್ಳಿಯ. 6 ಅಯಿಂಗ ದೇವಡ ಮಕ್ಕಡ ಚೋರೆನ, ಪ್ರವಾದಿಯಡ ಚೋರೆನ ಚೆಲ್ಲ್‌ನಗುಂಡ್, ನೀನ್ ಅಯಿಂಗಕ್ ಕುಡಿಪಕಾಯಿತ್ ಚೋರೆನ ಕೊಡ್‍ತಿಯ; ಅದ್ಂಗ್ ಅಯಿಂಗ ಯೋಗ್ಯವಾಯಿತುಂಡ್‍ೕಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. 7 ಬಲಿಪೀಠತ್‍ಲ್ ಇಂಜ ಬೋರೆ ಒಬ್ಬ: ಅಕ್ಕು, ಸರ್ವ ಶಕ್ತಿವಂತಂವೊನಾಯಿತುಳ್ಳ ದೇವಾದಿ ದೇವನೇ, ನೀಡ ನ್ಯಾಯತೀರ್ಪ್ ಸತ್ಯವು ನೀತಿವಂತದೂಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. 8 ನಾಲೆನ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಸೂರ್ಯಂಡ ಮೇಲೆ ಬೂಕ್‍ಚಿ. ಅಕ್ಕ, ತಿತ್ತ್‌ರಗುಂಡ್ ಮನುಷ್ಯಂಗಳ ಬೇವಿಚಿಡ್‌ವಕ್ ಅದ್ಂಗ್ ಅದಿಕಾರ ಕ್‍ಟ್ಟ್‌ಚಿ. 9 ಅಕ್ಕ ಮನುಷ್ಯಂಗ ಬಲ್ಯ ಉರಿಲ್ ಬೆಂಜಿಪೋಪನೆಕೆ ಇಂಜತೇಂಗಿಯು, ಈ ತರ ಬಾದೇನ ಮಾಡ್‌ವಕ್ ಅದಿಕಾರ ಉಳ್ಳ ದೇವಡ ಪೆದಕ್ ದೂಷಣೆ ಎಣ್ಣ್‌ನದಲ್ಲತೆ, ಅಂವೊಂಗ್ ಮಹಿಮೆ ಕೊಡ್‍ಪನೆಕೆ ಪಶ್ಚಾತಾಪ ಪಟ್ಟಿತ್‌ಲ್ಲೆ. 10 ಅಂಜನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಮೃಗತ್‍ರ ಸಿಂಹಾಸನತ್‍ರ ಮೇಲೆ ಬೂಕ್‍ಚಿ. ಅಕ್ಕ ಅದ್ಂಡ ರಾಜ್ಯ ಇರ್‌ಟಾಯಿ ಪೋಚಿ; 11 ಅಯಿಂಗ ಕಷ್ಟತ್‍ರಗುಂಡ್ ನಾವ್‌ನ ಕಡಿಚಂಡ್, ಅಯಿಂಗಡ ಪುಣ್ಣ್‌ರ ನೊಂಬಲತ್‍ರಗುಂಡ್ ಅಯಿಂಗಕ್ ಆನ ಕಷ್ಟತ್‍ಲ್, ಪರಲೋಕತ್‍ರ ದೇವನ ದೂಷಣೆ ಮಾಡಿಯಂಡ್ ಇಂಜದಲ್ಲತೆ, ಅಯಿಂಗಡ ಕ್ರಿಯೇನ ಬುಟ್ಟಿತ್ ಪಶ್ಚಾತಾಪ ಪಟ್ಟಿತ್‌ಲ್ಲೆ. 12 ಆರನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಯೂಫ್ರೇಟೀಸ್ ಎಣ್ಣುವ ಬಲ್ಯ ಪೊಳೆರ ಮೇಲೆ ಬೂಕ್‍ಚಿ. ಅಕ್ಕ ಕ್‍ೕಕ್ ದಿಕ್ಕ್‌ಂಜ ಬಪ್ಪ ರಾಜಂಗಕ್ ಬಟ್ಟೆ ತಯಾರಾಪನೆಕೆ ಪೊಳೇಲ್ ಇಂಜ ನೀರ್ ಬತ್ತಿ ಪೋಚಿ. 13 ಆ ಸಮಯತ್‍ಲ್, ಘಟಸರ್ಪತ್‍ರ ಬಾಯಿಂಜ, ಮೃಗತ್‍ರ ಬಾಯಿಂಜ, ಪಿಂಞ ಕಳ್ಳ ಪ್ರವಾದಿಯಡ ಬಾಯಿಂಜ ಕಪ್ಪೇರನೆಕೆ ಉಳ್ಳ ಮೂಂದ್ ಕೂಳಿಯ ಪೊರಟಿತ್ ಬಪ್ಪಾನ ಕಂಡಿಯೆ. 14 ಅಯಿಂಗ ಅದ್ಬುದ ಮಾಡ್‌ವ ಕೂಳಿಯಂಗ; ಬೂಲೋಕತ್‍ಲ್ ಉಳ್ಳ ರಾಜಂಗಡ ಪಕ್ಕ ಪೋಯಿತ್ ಸರ್ವ ಶಕ್ತನಾಯಿತ್ ಉಳ್ಳ ದೇವಡ ಮಹಾ ದಿವಸತ್‍ಲ್ ಆಪ ಯುದ್ದಕ್ ಅಯಿಂಗಳ ಕೂಟ್‍ವಕಾಯಿತ್ ಪೊರಟಿತ್ ಪೋಚಿ. 15 ನೋಟಿ! ನಾನ್ ಕಳ್ಳ ಬಪ್ಪನೆಕೆ ಬಪ್ಪಿ. ಞಾಣ ಆಪನೆಕೆ, ಬೆತ್ತಲೆಯಾಯಿತ್ ಇಕ್ಕತೆ, ಎಚ್ಚರತ್‍ಲ್ ಇಂಜಂಡ್ ತಾಂಡ ಬಟ್ಟೇನ ಕಾಪಾಡ್‌ವಂವೊ ಆಶೀರ್ವಾದ ಪಡ್ಂದಂವೊ. 16 ಆ ಕೂಳಿಯ, ರಾಜಂಗಳ ಎಲ್ಲಾ ಕೂಟಿಯಂಡ್, ಇಬ್ರಿಯ ತಕ್ಕ್‌ಲ್ ಹರ್ಮಗೆದೋನ್ ಎಣ್ಣುವ ಜಾಗಕ್ ಕಾಕಿಯಂಡ್ ಪೋಚಿ. 17 ಏಳನೆ ದೂತ ತಾಂಡ ಪಾತ್ರತ್‍ಲ್ ಉಳ್ಳದ್‍ನ ಬಾನತ್‍ರ ಮೇಲೆ ಬೂಕ್‍ಚಿ. ಅಕ್ಕ ಪರಲೋಕತ್‍ಲ್ ಇಂಜ ದೇವಾಲಯತ್‍ರ ಸಿಂಹಾಸನತ್ಂಜ ತ್‍ೕಂದತ್‍ೕಂದ್ ಬಲ್ಯ ಸದ್ದ್ ಪೊರಟಿತ್ ಬಾತ್. 18 ಅದಲ್ಲತೆ ಬಲ್ಯ ವಾಣಿ, ಬಲ್ಯ ಗುಡ್‍ಗ್, ಬಲ್ಯ ಮಿಂಚ್, ಮಹಾ ಬೂಕಂಪ ಉಂಟಾಚಿ. ಮನುಷ್ಯಂಗ ಬೂಮಿಲ್ ವಾಸ ಮಾಡ್‌ವಕ್ ಸುರು ಮಾಡ್‍ನ ಕಾಲತ್ಂಜ ಇನ್ನನೆ ಒರ್ ಬೂಕಂಪವು ಆಯಿತ್‌ಲ್ಲೆ, ಅಚ್ಚಕ್ ಬಲ್ಯ ಬೂಕಂಪವಾಯಿತ್ಂಜತ್. 19 ಅಕ್ಕ, ಮಹಾ ಪಟ್ಟಣ ಮೂಂದ್ ಬಾಗವಾಯಿತ್ ಒಡಂದತ್, ದೇವಡ ಮಕ್ಕ ಅಲ್ಲತಯಿಂಗಡ ಪಟ್ಟಣವೆಲ್ಲ ಬುದ್ದತ್. ದೇವಡ ಬಲ್ಯ ಚೆಡಿರ ಕಳ್ಳ್ ದುಂಬ್‍ನ ಪಾತ್ರತ್‍ನ, ಮಹಾ ಬಾಬೆಲಂಗ್ ಕೊಡ್‍ಪಕ್ ದೇವಡ ಗೇನಕ್ ಕೊಂಡ್ ಬಾತ್. 20 ಎಲ್ಲಾ ದ್ವೀಪವು ಕಾಂಗತೆ ಆಯಿಪೋಚಿ; ಕುಂದ್ ಎಲ್ಲಾ ಕಾಂಗತೆ ಆಯಿಪೋಚಿ. 21 ಬಾನತ್ಂಜ ಮನುಷ್ಯಂಗಡ ಮೇಲೆ ಬಲ್ಯ ಬಲ್ಯ ಆಲಿಕಾಯಿ ಮಳೆ ಪೊಜ್ಜತ್. ಆ ಆಲಿಕಾಯಿರ ತೂಕ ಸುಮಾರ್ ನಾಪತ ಅಂಜ್ ಕಿಲೋಕ್ ಜಾಸ್ತಿಯಾಯಿತ್ ಇಂಜತ್. ಆ ಆಲಿಕಾಯಿರ ಮಳೇರಗುಂಡ್ ಆನ ಬಾದೆ ದುಂಬ ಬಯಂಕರವಾಯಿತ್ಂಜಗುಂಡ್ ಮನುಷ್ಯಂಗ ದೇವಕ್ ದೂಷಣೆ ಎಣ್ಣ್‌ಚಿ. |
© 2017, New Life Literature (NLL)