ಪ್ರಕಟನೆ 14 - ಕೊಡವ ಬೈಬಲ್ಕೊರಿಕುಟ್ಟಿಯು 1,44,000 ಜನಳು 1 ಪಿಂಞ ನಾನ್ ನೋಟ್‍ವಕ, ಇದಾ, ಚೀಯೋನ್‌ ಕುಂದ್‌ರ ಕೊಡಿಲ್ ಕೊರಿಕುಟ್ಟಿಯಾನಂವೊನ ಪಿಂಞ ಅಂವೊಂಡ ಕೂಡೆ ಅಂವೊಂಡ ಅಪ್ಪನಾನ ದೇವಡ ಪೆದತ್‍ನ ನೆತ್ತಿರ ಮೇಲೆ ಒಳ್‍ದಿತ್ಂಜ 1,44,000 ಜನಳ ಕಂಡಿಯೆ. 2 ಇದ್‍ಲ್ಲತೆ, ಬಲ್ಯ ನೀರ್ ಚಾಡಿತ್ ಬಪ್ಪ ಸದ್ದ್‌ರನೆಕೆ, ಬಲ್ಯ ತೆಡ್‌ರ ಸದ್ದ್‌ಲ್ ಒರ್ ವಾಣಿ ಪರಲೋಕತ್ಂಜ ಬಂದದ್ ನಾಕ್ ಕ್‍ೕಟತ್; ನಾನ್ ಕ್‍ೕಟ ಸದ್ದ್, ವೀಣೇಲ್ ಸಂಗೀತ ಮಾಡ್‌ವ ಅಯಿಂಗಡ ವೀಣೇರ ಸಂಗೀತವಾಯಿತ್ ಇಂಜತ್. 3 ಅಯಿಂಗ, ಸಿಂಹಾಸನತ್‍ರ ಮಿಂಞತ್‍ಲ್, ನಾಲ್ ಜೀವಿಯಡ ಮಿಂಞತ್‍ಲ್, ಪೆರಿಯಯಿಂಗಡ ಮಿಂಞತ್‍ಲ್ ಪುದಿಯ ಪಾಟ್‍ನ ಪಾಡ್‌ಚಿ. ಬೂಲೋಕತ್ಂಜ ವಿಮೋಚನ ಕ್‍ಟ್ಟಿತ್ ಬಂದ 1,44,000 ಜನಳ ಬುಟ್ಟಿತ್ ಆ ಪಾಟ್‍ನ ಬೋರೆ ದಾರೂ ಪಡಿಪಕ್ ಕಯ್ಯುವಕಿಂಜಿಲೆ. 4 ಈಂಗಳೇ ಪೊಣ್ಣಾಳ್‍ರಗುಂಡ್ ಅಶುದ್ದ ಆಕತ, ಕನ್ನಿ ಮೂಡಿಯರನೆಕೆ ಶುದ್ದವಾಯಿತ್ ಇಂಜಯಿಂಗ. ಕೊರಿಕುಟ್ಟಿಯಾನಂವೊ ಎಲ್ಲಿಯೆಲ್ಲಾ ಪೋಪ, ಅಂವೊಂಡ ಬಯ್ಯಕ್ ಪೋಪಯಿಂಗ ಈಂಗಳೇ. ಅಯಿಂಗ ಜನಡ ಮದ್ಯತ್ಂಜ ದೇವಕಾಯಿತ್ ಪಿಂಞ ಕೊರಿಕುಟ್ಟಿಯಾನವೊಂಗಾಯಿತ್ ಆದ್ಯ ಪಣ್ಣಾಯಿತ್ ವಿಮೋಚನ ಆನಯಿಂಗ. 5 ಅಯಿಂಗಡ ತಕ್ಕ್‌ಲ್ ಕಪಟತನ ಇಂಜಿತ್ತ್‌ಲ್ಲೆ; ದೇವಡ ಸಿಂಹಾಸನತ್‍ರ ಮಿಂಞತ್ ಒರ್ ಕುತ್ತವು ಇಲ್ಲತಯಿಂಗಳಾಯಿತುಂಡ್. 6 ಪಿಂಞ ಇಂಞೊರ್ ದೇವದೂತ ಬಾನತ್‍ರ ಮದ್ಯತ್ಂಜ ಪಾರಿತ್ ಬಪ್ಪಾನ ಕಂಡಿಯೆ; ಅಂವೊ ಬೂಮಿಲ್ ವಾಸ ಮಾಡಿಯಂಡುಳ್ಳ ಎಲ್ಲಾ ಜಾತಿಕ್, ಎಲ್ಲಾ ಕುಲಕ್, ಎಲ್ಲಾ ಬಾಷೆ ಪರಿಯುವಯಿಂಗಕ್, ಎಲ್ಲಾ ಜನಕ್ ಅರಿಚಿಡುವಕುಳ್ಳ ದೇವಡ ನಿತ್ಯವಾನ ನಲ್ಲ ಸುದ್ದಿನ ಕೊಂಡ್ ಬಾತ್. 7 ಅಂವೊ: ನಿಂಗೆಲ್ಲಾರು ದೇವಕ್ ಬೊತ್ತಿತ್, ಅಂವೊಂಗ್ ಮಹಿಮೆ ಕೊಡ್‍ಪಿರ; ಎನ್ನಂಗೆಣ್ಣ್‌ಚೇಂಗಿ ದೇವ ನ್ಯಾಯತೀರ್ಪ್ ಮಾಡ್‌ವ ಸಮಯ ಬಾತ್. ಬಾನತ್‍ನ, ಬೂಲೋಕತ್‍ನ, ಸಮುದ್ರತ್‍ನ ಪಿಂಞ ನೀರ್‌ರ ಬುಗ್ಗೆಯಳ ಸೃಷ್ಟಿ ಮಾಡ್‌ನಂವೊನ ಆರಾದನೆ ಮಾಡ್‌ವಿರಾಂದ್ ಬಲ್ಯ ಸ್ವರತ್‍ಲ್ ಕೂತ್ ಕೊಡ್‍ತತ್. 8 ದಂಡನೆರ ದೇವದೂತ ಪೋಯಿತ್: ಬಾಬೇಲ್ ಎಣ್ಣುವ ಬಲ್ಯ ಪಟ್ಟಣ ಬುದ್ದತ್! ಬುದ್ದತ್! ತಾಂಡ ವೇಶಿತನವಾಯಿತುಳ್ಳ ಗಟ್ಟಿಯಾನ ಕಳ್ಳ್‌ನ ಎಲ್ಲಾ ಜನಕ್ ಕುಡಿಪಕ್ ಕೊಡ್‍ತತ್ತಲ್ಲಾಂದ್ ಎಣ್ಣ್‌ಚಿ. 9 ಮೂಂದನೆ ದೇವದೂತ ಪೋಯಿತ್: ಬಲ್ಯ ಸ್ವರತ್‍ಲ್, ಮೃಗತ್‍ನ ಪಿಂಞ ಅಂವೊಂಡ ವಿಗ್ರಹತ್‍ನ ಆರಾದನೆ ಮಾಡಿತ್, ತಾಂಡ ನೆತ್ತಿಲ್ ಅಥವ ಕೈಯಿಲ್ ಅದ್ಂಡ ಮುದ್ರೆನ ಇಟ್ಟಿತುಳ್ಳಂವೊಂಗ್ ಇನ್ನನೆ ಆಪ. 10 ದೇವಡ ಬಲ್ಯ ಚೆಡಿರ ಪಾತ್ರತ್‍ಲ್ ಏದು ಕಲ್‍ಕ್‍ತ ದೇವಡ ಗಟ್ಟಿಯಾನ ಬಲ್ಯ ಚೆಡಿರ ಕಳ್ಳ್‌ನ ಕುಡಿಚಿತ್, ಪವಿತ್ರವಾನ ದೂತಂಗಡ ಮಿಂಞತ್, ಕೊರಿಕುಟ್ಟಿಯಾನವೊಂಡ ಮಿಂಞತ್ ತಿತ್ತ್‌ರ ಜ್ವಾಲತ್‌ರಗುಂಡ್ ಗಂಧಕತ್‍ರಗುಂಡ್ ಕಷ್ಟಪಟ್ಟಂಡ್ ಇಪ್ಪ. 11 ಅಯಿಂಗಡ ಪೊಗೆ, ಎಕ್ಕಾಲು ಕೊಡಿಕ್ ಬಂದಂಡಿಪ್ಪ; ಮೃಗತ್‍ನ ಪಿಂಞ ಅಂವೊಂಡ ವಿಗ್ರಹತ್‍ನ ಆರಾದನೆ ಮಾಡ್‌ವಯಿಂಗಳು ಅದ್ಂಡ ಪೆದತ್‍ನ ಇಟ್ಟಿತುಳ್ಳ ದಾರ್‌ಕು ಬಯಿಟ್ ಪೋಲ್ ಆರಾಮ್ ಕ್‍ಟ್ಟುಲೆ. 12 ದೇವಡ ಆಜ್ಞೆನ ಪಿಂಞ ಯೇಸುರ ಮೇಲೆ ಉಳ್ಳ ನಂಬಿಕೇನ ಕಾತಂಡ್ ಉಳ್ಳ ದೇವಡ ಮಕ್ಕಡ ಪೊರುಮೆ ಇದ್‍ಲ್ ಗೊತ್ತಾಪಾಂದ್ ಎಣ್ಣ್‌ಚಿ. 13 ಪಿಂಞ ಪರಲೋಕತ್ಂಜ ಬಪ್ಪ ಒರ್ ವಾಣಿ ನಾಕ್ ಕ್‍ೕಟತ್; ಅದ್: ಒಡೆಯಂಡಲ್ಲಿ ಚಾವಯಿಂಗ ಇಕ್ಕಯಿಂಜ ಆಶೀರ್ವಾದ ಪಡ್ಂದಯಿಂಗಾಂದ್ ಒಳ್‌ದ್‍ೕಂದ್ ಎಣ್ಣ್‌ಚಿ; ಅಯಿಂಗ ಅಯಿಂಗಡ ಪ್ರಯತ್ನತ್‌ನೆಲ್ಲ ಬುಟ್ಟಿತ್, ಆರಾಮ್ ಮಾಡ್‌ವ; ಅಯಿಂಗಡ ಕ್ರಿಯೆ ಅಯಿಂಗಡ ಕೂಡೆ ಪೋಪ; ಪವಿತ್ರಾತ್ಮ ಸಹ ಅಕ್ಕೂಂದ್ ಎಣ್ಣಿಯಂಡುಂಡ್. ಬೂಮಿರ ಕೊಯಿಪಣಿ 14 ಪಿಂಞ ನಾನ್ ನೋಟ್‍ವಕ, ಇದಾ, ಬೊಳ್‍ತ ಮೋಡತ್‍ನ, ಆ ಮೋಡತ್‍ರ ಮೇಲೆ ಮನುಷ್ಯಕುಮಾರಂಡನೆಕೆ ತಾಂಡ ಮಂಡೆಲ್ ಪೊನ್ನ್‌ರ ಕಿರೀಟತ್‍ನ ಇಟ್ಟಂಡ್, ತಾಂಡ ಕೈಯಿಲ್ ಚೂಪಾಯಿತುಳ್ಳ ಕೊಯಿಕತ್ತಿನ ಪುಡ್‍ಚಂಡ್ ಅಳ್‍ತಂಡಿಂಜ ಒಬ್ಬನ ಕಂಡಿಯೆ. 15 ಅಕ್ಕ ಇಂಞೊರ್ ದೇವದೂತ ದೇವಾಲಯತ್ಂಜ ಪೊರಟಿತ್ ಬಾತ್. ಅಂವೊ ಮೋಡತ್‍ಲ್ ಅಳ್‍ತಂಡಿಪ್ಪಂವೊನ ನೋಟಿತ್: ಕೊಯ್ಯುವ ಸಮಯ ಬಂದಗುಂಡ್ ನೀಡ ಕೊಯಿಕತ್ತಿನ ನ್‍ೕಟಿತ್ ಕೊಯಿಪಣಿ ಮಾಡ್‍ೕಂದ್ ಬಲ್ಯ ಸ್ವರತ್‍ಲ್ ಎಣ್ಣ್‌ಚಿ. 16 ಅಕ್ಕ, ಮೋಡತ್‍ಲ್ ಅಳ್‍ತಂಡಿಂಜಂವೊ, ತಾಂಡ ಕೊಯಿಕತ್ತಿನ ಬೂಮಿರ ಮೇಲೆ ಬೀಚ್‌ವಕ ಬೂಮಿರ ಕೊಯಿಪಣಿ ತ್‍ೕಂದತ್. 17 ಪಿಂಞ ಇಂಞೊರ್ ದೇವದೂತ ಪರಲೋಕತ್‍ಲ್ ಉಳ್ಳ ದೇವಾಲಯತ್ಂಜ ಪೊರಮೆ ಬಾತ್. ಅಂವೊ ಚೂಪಾಯಿತುಳ್ಳ ಕೊಯಿಕತ್ತಿನ ಪುಡ್‍ಚಂಡ್ ಇಂಜತ್. 18 ತಿತ್ತ್‌ರ ಮೇಲೆ ಅದಿಕಾರ ಉಳ್ಳ ಬೋರೆ ಒರ್ ದೇವದೂತ ಬಲಿಪೀಠತ್‍ರ ಪಕ್ಕತ್ಂಜ ಪೊರಟಿತ್ ಬಂದಿತ್, ಚೂಪಾಯಿತುಳ್ಳ ಕೊಯಿಕತ್ತಿನ ಪುಡ್‌ಚಂಡುಳ್ಳಂವೊನ ನೋಟಿತ್: ಬೂಮಿರ ದ್ರಾಕ್ಷಿ, ಪಣ್ಣಾಯಿ ಪೋಚಿ, ಚೂಪಾಯಿತುಳ್ಳ ನೀಡ ಕೊಯಿಕತ್ತಿನ ನ್‍ೕಟಿತ್, ದ್ರಾಕ್ಷಿ ಕೊಲೆನ ಕೆತ್ತುವಿಯಾಂದ್ ಬಲ್ಯ ಸ್ವರತ್‍ಲ್ ಎಣ್ಣ್‌ಚಿ. 19 ಅಕ್ಕ ಆ ದೂತ, ತಾಂಡ ಕೊಯಿಕತ್ತಿನ ಬೂಮಿರ ಮೇಲೆ ಬೀಚಿತ್, ಬೂಮಿರ ದ್ರಾಕ್ಷಿ ಪಣ್ಣ್‌ನ ಕೊಜ್ಜಿತ್, ದೇವಡ ಬಲ್ಯ ಚೆಡಿರ, ಬಲ್ಯ ದ್ರಾಕ್ಷಿ ಕುಂಡ್‍ಲ್ ಇಟ್ಟತ್. 20 ಪಟ್ಟಣತ್‍ರ ಪೊರಮೆ ಉಳ್ಳ ದ್ರಾಕ್ಷಿ ಕುಂಡ್‍ಲ್ ಅದ್‍ನ ಚೌಟ್‌ವಕಿಂಜತ್. ಆ ಕುಂಡಿಂಜ, ಚೋರೆ ಪೊರಟಿತ್, ಕುದ್‍ರೆರ ಕಡಿವಾಣತ್‍ನ ಮುಟ್ಟ್‌ವಚ್ಚಕ್ ಎತ್ತರಕ್ ಪಿಂಞ ಇರ್ ನೂಯಿಟ ಒಯಿಂಬತ್ ಆರ್ ಕಿಲೊ ಮೀಟರ್ ದೂರಕ್ ಉಕ್ಕಿ ಪೋಚಿ. |
© 2017, New Life Literature (NLL)