ಪ್ರಕಟನೆ 13 - ಕೊಡವ ಬೈಬಲ್ಸಮುದ್ರತ್ಂಜ ಬಂದ ಮೃಗ 1 ಪಿಂಞ ಸಮುದ್ರತ್‍ಂಜ ಒರ್ ಮೃಗ ಪೊರಮೆ ಪತ್ತಿತ್ ಬಪ್ಪದ್‍ನ ನೋಟಿಯೆ; ಆ ಮೃಗಕ್ ಏಳ್ ಮಂಡೆ, ಪತ್ತ್ ಕೊಂಬ್ ಇಂಜತ್. ಆ ಪತ್ತ್ ಕೊಂಬ್‍ರ ಮೇಲೆ ಪತ್ತ್ ಕಿರೀಟ ಇಂಜತ್. ಓರೋರ್ ಮಂಡೆರ ಮೇಲೆಯು ದೂಷಣೆ ಎಣ್ಣುವ ಪೆದ ಇಂಜತ್. 2 ನಾನ್ ಕಂಡ ಮೃಗ ಚಿರತೆರನೆಕೆ ಇಂಜತ್; ಅದ್ಂಡ ಕಾಲ್ ಕರಡಿರ ಕಾಲ್‍ರನೆಕೆ ಇಂಜತ್, ಅದ್ಂಡ ಬಾಯಿ ಸಿಂಹತ್‍ರ ಬಾಯಿರನೆಕೆ ಇಂಜತ್; ಅದ್ಂಗ್ ಘಟಸರ್ಪ ತಾಂಡ ಶಕ್ತಿನ, ಸಿಂಹಾಸನತ್‍ನ ಪಿಂಞ ಮಾಹಾ ಅದಿಕಾರತ್‍ನ ಕೊಡ್‍ತತ್. 3 ಅದ್ಂಡ ಏಳ್ ಮಂಡೆಲ್ ಒರ್ ಮಂಡೆಕ್ ಗಾಯ ಆಯಿತ್ ಚಾವನೆಕೆ ಇಂಜತ್; ಆಚೇಂಗಿಯು, ಚಾವನೆಕೆ ಇಂಜ ಆ ಗಾಯ ವಾಸಿ ಆಚಿ. ಬೂಲೋಕತ್‍ಲ್ ಉಳ್ಳಯಿಂಗ ಎಲ್ಲಾರು ಈ ಮೃಗತ್‍ನ ಆಶ್ಚರ್ಯತ್‍ಲ್ ನೋಟ್‌ಚಿ. 4 ಆ ಮೃಗಕ್ ಇನ್ನತಾನ ಅದಿಕಾರತ್‍ನ ಕೊಡ್‍ತ ಘಟಸರ್ಪತ್‍ನ ಆರಾದನೆ ಮಾಡ್‍ಚಿ. ಅದಲ್ಲತೆ: ಆ ಮೃಗಕ್ ತಕ್ಕ ಸಮವಾಯಿತ್ ದಾರ್ ಉಂಡ್? ಅದ್ಂಡಕೂಡೆ ಯುದ್ದ ಮಾಡ್‌ವಕ್ ದಾರ್‌ಕ್ ಆಪಾಂದ್ ಎಣ್ಣಿಯಂಡ್ ಮೃಗತ್‍ನ ಸಹ ಆರಾದನೆ ಮಾಡ್‍ಚಿ. 5 ಆ ಮೃಗಕ್ ಬಡಾಯಿ ತಕ್ಕ್ ಪರಿಯುವ ಪಿಂಞ ದೂಷಣೆ ಎಣ್ಣುವ ಬಾಯಿನ ಕೊಡ್‌ತಿತ್ಂಜತ್; ಅದಲ್ಲತೆ, ನಾಪತ ದಂಡ್ ತಿಂಗಕತ್ತನೆ ಬೋಂಡಿಯನೆಕೆ ಮಾಡ್‌ವಕ್ ಅದ್ಂಗ್ ಅದಿಕಾರ ಕೊಡ್‌ತಿತ್ಂಜತ್. 6 ಅದ್ ದೂಷಣೆ ಮಾಡ್‌ವಕಾಯಿತ್ ಬಾಯಿ ತೊರ್‌ಪಂಜಿ ದೇವಡ ಪೆದತ್‍ನ, ಅಂವೊ ವಾಸ ಮಾಡ್‌ವ ಜಾಗತ್‍ನ, ಪರಲೋಕತ್‍ಲ್ ಉಳ್ಳಯಿಂಗಳ ಎಲ್ಲಾ ದೂಷಣೆ ಮಾಡ್‍ಚಿ. 7 ಇದ್‍ಲ್ಲತೆ, ದೇವಡ ಮಕ್ಕಡ ಕೂಡೆ ಯುದ್ದ ಮಾಡಿತ್ ಅಯಿಂಗಳ ಗೆಲ್ಲುವಕ್ ಅದಿಕಾರ ಕ್‍ಟ್ಟಿತ್ಂಜತ್. ಓರೋರ್ ಜನಡಮೇಲೆ, ಕುಲತ್‍ರ ಮೇಲೆ, ಬಾಷೆಕಾರಯಿಂಗಡ ಮೇಲೆ, ಜಾತಿಯಡ ಮೇಲೆ ಸಹ ಅದ್ಂಗ್ ಅದಿಕಾರ ಕೊಡ್‌ತಿತ್ಂಜತ್. 8 ಈ ಲೋಕತ್‍ರ ಸುರುಯಿಂಜ, ಮಿಂಞಲೇ ಬಲಿಯಾಯಿತ್ ಇಂಜ ಕೊರಿಕುಟ್ಟಿಯಾನವೊಂಡ ಜೀವತ್‍ರ ಪುಸ್ತಕತ್‍ಲ್ ಪೆದ ಒಳ್‌ದಿತಿಲ್ಲತ ಎಲ್ಲಾರು ಆ ಮೃಗತ್‍ನ ಆರಾದನೆ ಮಾಡ್‌ವ. 9 ಕೆಮಿ ಉಳ್ಳಯಿಂಗ ಎಲ್ಲಾ ಕ್‍ೕಳಿ. 10 ದಾರ್ ಜನಳ ಪುಡ್‌ಚಿತ್ ಅಡಿಯಾಳಾಯಿತ್ ಕೊಂಡ್ ಪೋಪ, ಅಯಿಂಗಳ ಸಹ ಅಡಿಯಾಳಾಯಿತ್ ಪುಡ್‍ಚಂಡ್ ಪೋಪ; ಬಾಳ್‌ಯಿಂಜ ಕೊಲ್ಲ್‌ವಂವೊ ಬಾಳ್‍ರಗುಂಡ್ ಚಾವಂಡು. ಇದ್‍ಲ್ ದೇವಡ ಮಕ್ಕಡ ಪೊರುಮೆ ಪಿಂಞ ನಂಬಿಕೆ ಗೊತ್ತಾಪ. ಬೂಮಿಯಿಂಜ ಬಪ್ಪ ಮೃಗ 11 ಪಿಂಞ ಇಂಞೊರ್ ಮೃಗ ಬೂಮಿಯಿಂಜ ಬಪ್ಪದ್‍ನ ಕಂಡಿಯೆ; ಅದ್ ಒರ್ ಕೊರಿ ಕುಟ್ಟಿರನೆಕೆ ಇಂಜತ್. ಅದ್ಂಗ್ ದಂಡ್ ಕೊಂಬ್ ಇಂಜತ್. ಘಟಸರ್ಪ ಪಾಂಬ್‍ರನೆಕೆ ತಕ್ಕ್ ಪರ್ಂದತ್. 12 ಈ ಮೃಗ ಮಿಂಞತ್‍ರ ಮೃಗತ್‍ರ ಮಿಂಞತ್ ಇದ್ಂಡ ಅದಿಕಾರತ್‍ನೆಲ್ಲಾ ಕಾಂಬ್‍ಚಿಟ್ಟತ್. ಚತ್ತ್ ಪೋಪನೆಕೆ ಗಾಯ ಇಂಜಿತ್ ವಾಸಿ ಆನ ಮೃಗತ್‍ನ ಈ ಲೋಕವು ಅದ್‍ಲ್ ವಾಸಮಾಡಿಯಂಡುಳ್ಳಯಿಂಗಳು ಆರಾದನೆ ಮಾಡ್‌ವನೆಕೆ ಮಾಡ್‍ಚಿ. 13 ತಿತ್ತ್ ಬಾನತ್ಂಜ ಬೂಮಿಕ್ ಇಳ್ಂಜಿತ್ ಬಪ್ಪನೆಕೆ ಅದ್ ಬಲ್ಯ ಗುರ್‌ತ್ ಕಾರ್ಯತ್‍ನ ಜನಡ ಮಿಂಞತ್ ಕಾಂಬ್‍ಚಿಟ್ಟತ್. 14 ಮಿಂಞತ್‍ರ ಮೃಗತ್‍ರ ಎದ್‍ಕೆ ಗುರ್‌ತ್ ಕಾರ್ಯ ಕಾಂಬ್‍ಚಿಡುವಕ್ ತಾಂಗ್ ಕ್‍ಟ್ಟ್‌ನ ಅದಿಕಾರತ್‍ರಗುಂಡ್, ಬೂಲೋಕತ್‍ಲ್ ಉಳ್ಳ ಜನಳ ಮೋಸ ಮಾಡಿತ್, ಚತ್ತ್ ಪೋಪನೆಕೆ ಗಾಯ ಆಯಿತ್ ವಾಸಿಯಾನ ಮೃಗಕ್ ಒರ್ ವಿಗ್ರಹತ್‍ನ ಮಾಡಂಡೂಂದ್ ಬೂಮಿಲ್ ವಾಸಮಾಡಿಯಂಡುಳ್ಳಯಿಂಗಕ್ ಎಣ್ಣ್‌ಚಿ. 15 ಆ ಮೃಗತ್‍ರ ವಿಗ್ರಹ ತಕ್ಕ್ ಪರಿಯುವನೆಕೆಯು, ಮೃಗತ್‍ರ ವಿಗ್ರಹತ್‍ನ ಆರಾದನೆ ಮಾಡ್‌ವಕ್ ಒತ್ತತಯಿಂಗಳೆಲ್ಲ ಕೊಲ್ಲ್‌ವಕು, ಮೃಗತ್‍ರ ವಿಗ್ರಹಕ್ ಜೀವ ಕೊಡ್‌ಪಕು ಈ ದಂಡನೆ ಮೃಗಕ್ ಶಕ್ತಿ ಕೊಡ್‌ತಿತ್ಂಜತ್. 16 ಚೆರಿಯಯಿಂಗ, ಬಲ್ಯಯಿಂಗ, ಐಶ್ವರ್ಯವಂತಯಿಂಗ, ಗರೀಬಂಗ, ಸ್ವಾತಂತ್ರವಾನಯಿಂಗ, ಅಡಿಯಾಳ್‍ಂಗ, ಈಂಗೆಲ್ಲಾ ಅಯಿಂಗಡ ಬಲ್‌ತೆ ಕೈಯಿಲ್ ಅಥವ ನೆತ್ತಿರ ಮೇಲೆ ಒರ್ ಮುದ್ರೆನ ಇಡಂಡೂಂದ್ ಒತ್ತಾಯ ಮಾಡ್‍ಚಿ. 17 ಆ ಮೃಗತ್‍ರ ಮುದ್ರೆ ಇಲ್ಲತಪೋಚೇಂಗಿ, ಅದ್ಂಡ ಪೆದತ್‍ರ ಲೆಕ್ಕ ಕ್‍ಟ್ಟನಯಿಂಗಳ ಬುಟ್ಟಿತ್, ಬೋರೆ ದಾರ್‌ಕು ಎಡ್‍ಪಕು, ಮಾರ್‍ವಕೂ ಕಯ್ಯತನೆಕೆ ಮಾಡ್‍ಚಿ. 18 ಇಲ್ಲಿ ಜ್ಞಾನ ಉಂಡ್; ಆ ಮೃಗತ್‍ರ ಸಂಖ್ಯೆನ, ಬುದ್ದಿ ಉಳ್ಳಂವೊ ಲೆಕ್ಕ ಮಾಡಿತ್ ನೋಟಡ್. ಅದ್ ಮನುಷ್ಯಂಗಡ ಲೆಕ್ಕವಾಯಿತುಂಡ್; ಆ ಸಂಖ್ಯೆ ಆರ್‌ನೂಯಿಟ ಅರ್‌ವತ ಆರ್. |
© 2017, New Life Literature (NLL)