ಪ್ರಕಟನೆ 12 - ಕೊಡವ ಬೈಬಲ್ಒರ್ ಪೊಣ್ಣಾಳ್ ಪಿಂಞ ಘಟಸರ್ಪ 1 ಬಾನತ್‍ಲ್ ಒರ್ ಬಲ್ಯ ಗುರ್‍ತ್‍ನ ಕಾಂಬಕಾಚಿ; ಅದ್ ಎಂತ ಎಣ್ಣ್‌ಚೇಂಗಿ ಒರ್ ಪೊಣ್ಣಾಳ್ ಸೂರ್ಯನ ಬಟ್ಟೇಯಾಯಿತ್ ಇಟ್ಟಂಡ್ ಇಂಜತ್. ಅವಡ ಕಾಲ್‍ರ ಅಡಿಲ್ ಚಂದ್ರ ಇಂಜತ್, ಪನ್ನೆರಂಡ್ ನಕ್ಷತ್ರ ಉಳ್ಳ ಒರ್ ಕಿರೀಟತ್‍ನ ಅವಡ ಮಂಡೆಕ್ ಇಟ್ಟಿತ್ಂಜತ್. 2 ಅವ ಕೆಲಕರ್ತಿತಯಾಯಿತ್ ಇಂಜಿತ್, ಅವಕ್ ಪೆರುವ ನೊಂಬಲ ಬಂದಿತ್, ಪೆರ್‌ವಕಾಯಿತ್ ಕೂತ್ ಕೊಡ್‌ತಂಡ್ ಇಂಜತ್. 3 ಅಕ್ಕ, ಬಾನತ್‍ಲ್ ಇಂಞೊರ್ ಗುರ್‍ತ್‍ನ ಕಾಂಬಕಾಚಿ; ಅದ್ ಚೋಂದಿತ್ ಇಂಜ ಬಲ್ಯ ಘಟಸರ್ಪವಾಯಿತ್ಂಜತ್. ಅದ್ಂಗ್ ಏಳ್ ಮಂಡೆ, ಪತ್ತ್ ಕೊಂಬ್ ಪಿಂಞ ಅದ್ಂಡ ಮಂಡೆರ ಮೇಲೆ ಏಳ್ ಕಿರೀಟ ಇಂಜತ್. 4 ಆಂಡ ಬಾಲ್ ಬಾನತ್‍ಲ್ ಉಳ್ಳ ನಕ್ಷತ್ರತ್‌ಲ್ ಮೂಂದ್‍ಲ್ ಒರ್ ಬಾಗತ್‍ನ ಬಲ್‍ಚಿತ್ ಬೂಮಿಕ್ ಇಟ್ಟತ್; ಪೆರುವಕ್ ಉಳ್ಳ ಆ ಪೊಣ್ಣಾಳ್, ಪೆರುವ ಆ ಗಳಿಗೆಲೇ ಆ ಕುಂಞಿನ ಮುಗ್ಗ್‌ವಕ್ ಈ ಘಟಸರ್ಪ ಪೊಣ್ಣಾಳ್‍ರ ಮಿಂಞತ್ ನಿಂದಂಡಿಂಜತ್. 5 ಅವ ಎಲ್ಲಾ ಜನಳ, ಇರ್‍ಂಬ್ ಕೋಲ್‍ಲ್ ರಾಜ್ಯಬಾರ ಮಾಡ್‌ವಕ್ ಉಳ್ಳ ಒರ್ ಕ್‍ಣ್ಣ ಕುಂಞಿನ ಪೆತ್ತತ್; ಅವಡ ಕುಂಞಿನ ದೇವಡ ಪಕ್ಕ ಪಿಂಞ ದೇವಡ ಸಿಂಹಾಸನತ್‍ರ ಪಕ್ಕ ಬೆರಿಯ ಕೊಂಡ್ ಪೋಯಿರ್‌ತ್. 6 ಆ ಪೊಣ್ಣಾಳ್ ಮಣಬೂಮಿಕ್ ಓಡಿ ಪೋಚಿ; ಅಲ್ಲಿ ಅವಕ್ 1,260 ದಿವಸಕತ್ತನೆ ಚಾಯಿತೆ ಬದ್‌ಕುವನೆಕೆ ದೇವ ಆ ಜಾಗತ್‍ನ ತಯಾರ್ ಮಾಡಿತ್ ಬೆಚ್ಚಿತ್ಂಜತ್. 7 ಬಾನತ್‍ಲ್ ಯುದ್ದ ಉಂಟಾಚಿ. ಮಿಕಾಯೇಲ ಎಣ್ಣುವ ದೇವಡ ಸೇನೆರ ಅದಿಪತಿಯು ಅಂವೊಂಡ ದೂತಂಗಳು ಘಟಸರ್ಪತ್‍ರ ಕೂಡೆ ಯುದ್ದ ಮಾಡ್‍ಚಿ. ಫಟಸರ್ಪ ಪಿಂಞ ಅಂವೊಂಡ ಕೂಡೆ ಉಳ್ಳ ದೂತಂಗ ಯುದ್ದ ಮಾಡ್‍ಚೇಂಗಿಯು, ಗೆಲ್ಲುವಕ್ ಕಯಿಂಜಿತ್ತ್‌ಲ್ಲೆ. 8 ಬಾನತ್‍ಲ್ ಅಯಿಂಗ ಇಂಜ ಜಾಗ ಸಹ ಕಾಂಗತೆ ಆಯಿಪೋಚಿ. 9 ಬೂಲೋಕತ್‍ನ ಎಲ್ಲಾ ಮೋಸ ಮಾಡಿಯಂಡಿಂಜ, ಪಿಶಾಚೀಂದೂ ಸೈತಾನಾಂದೂ ಎಣ್ಣಿಯಂಡಿಂಜ ಪಳೆಯ ಘಟಸರ್ಪತ್‍ನ ಬೂಮಿಕ್ ಬೂವನೆಕೆ ದೂಡ್‍ಚಿ. ಅದ್ಂಡಕೂಡೆ ಇಂಜ ದೂತಂಗಳ ಸಹ ಬೂಮಿಕ್ ದೂಡಿರ್‌ತ್. 10 ಅಕ್ಕ, ಪರಲೋಕತ್‍ಲ್ ಒರ್ ಬಲ್ಯ ವಾಣಿ ಕ್‍ೕಟತ್: ಇಕ್ಕ, ರಕ್ಷಣೆಯು, ಶಕ್ತಿಯು, ನಂಗಡ ದೇವಡ ರಾಜ್ಯವು, ಅಂವೊಂಡ ಕ್ರಿಸ್ತಂಡ ಅದಿಕಾರವು ಬಂದಿತುಂಡ್; ಬಯಿಟ್ ಪೋಲ್ ನಂಗಡ ದೇವಡ ಮಿಂಞತ್, ನಂಗಡ ಅಣ್ಣತಮ್ಮಣಂಗಡ ಮೇಲೆ ಕುತ್ತ ಪರ್ಂದಂಡ್ ಇಂಜ ಅಂವೊ, ಅಡಿಕ್ ಬೂವನೆಕೆ ಮಾಡಿರ್‌ತ್. 11 ಚಾವನೆಕೆ ಕಷ್ಟ ಬಾತೇಂಗಿಯು, ಅದ್‍ಯಿಂಜ ತಪ್ಪ್‌ಚಿಡುವಕಾಯಿತ್, ಅಯಿಂಗಡ ಜೀವತ್‍ನ ಸಹ ನೋಟತೆ, ಕೊರಿಕುಟ್ಟಿರ ಚೋರೆರ ಮೂಲಕ, ಪಿಂಞ ಅಯಿಂಗಡ ಸಾಕ್ಷಿರ ವಾಕ್ಯತ್‍ರ ಮೂಲಕ ಸೈತಾನನ ಗೆದ್ದತ್. 12 ಆನಗುಂಡ್, ಪರಲೋಕವೇ, ಅದ್‍ಲ್ ವಾಸ ಮಾಡಿಯಂಡ್ ಉಳ್ಳಯಿಂಗಳೇ, ಕುಶಿ ಪಡಿರಿ. ಬೂಮಿಲ್ ಸಮುದ್ರತ್‍ಲ್ ವಾಸಮಾಡಿಯಂಡುಳ್ಳಯಿಂಗಳೇ, ನಿಂಗಕ್ ಅಯ್ಯೋ! ಸೈತಾನ ತಾಂಗ್ ಚೆನ್ನ ಸಮಯ ಮಾತ್ರ ಉಂಡ್‍ೕಂದ್ ಗೊತ್ತಾನಗುಂಡ್, ದುಂಬ ಚೆಡಿಲ್, ನಿಂಗಡ ಪಕ್ಕ ಇಳಿಂಜಗುಂಡ್, ನಿಂಗಕ್ ಬಲ್ಯ ಕಷ್ಟ ಆಪಾಂದ್ ಎಣ್ಣ್‌ನದ್ ನಾಕ್ ಕ್‍ೕಟತ್. 13 ಘಟಸರ್ಪ ಬೂಮಿಕ್ ಬುದ್ದತ್‍ೕಂದ್ ಗೊತ್ತಾನಗುಂಡ್, ಆ ಕ್‍ಣ್ಣ ಕುಂಞಿನ ಪೆತ್ತ ಪೊಣ್ಣಾಳ್‍ನ ಹಿಂಸೆಪಡ್‍ತ್‌ವಕ್ ಸುರು ಮಾಡ್‍ಚಿ. 14 ಅಕ್ಕ ಆ ಪೊಣ್ಣಾಳ್ ತಾಂಡ ಮಣಬೂಮಿರ ಜಾಗಕ್ ಪಾರಿತ್ ಪೋಪಕಾಯಿತ್ ಗರುಡಪಕ್ಷಿರ ದಂಡ್ ಬಲ್ಯ ರೆಕ್ಕೆ ಅವಕ್ ಕ್‍ಟ್ಟ್‌ಚಿ. ಅಲ್ಲಿ ಅವ ಆ ಪಾಂಬ್‍ಕ್ ಕಾಂಗತನೆಕೆ ಒರ್ ಕಾಲ, ದಂಡ್ ಕಾಲ, ಅರೆಕಾಲ, ಬದ್‍ಕಿಯಂಡ್ ಇಪ್ಪಕ್ ಮಾಡಿತ್ಂಜತ್. 15 ಆ ಪಾಂಬ್ ಆ ಪೊಣ್ಣಾಳ್‍ನ ಜಲಪ್ರಳಯ ಒಕ್ಕಿಯಂಡ್ ಪೋಂಡೂಂದ್ ತಾಂಡ ಬಾಯಿಂಜ ನೀರ್‌ರ ಪೊಳೆರನೆಕೆ ಬೂಕಿತ್ ಬುಟ್ಟತ್. 16 ಆಚೇಂಗಿ ಬೂಮಿ ಆ ಪೊಣ್ಣಾಳ್‍ರ ಸಹಾಯಕ್ ಬಂದಿತ್ ಆ ಘಟಸರ್ಪ ಬಾಯಿಂಜ ಬೂಕ್‌ನ ನೀರ್‌ನ ಕುಡ್‍ಚಿರ್‌ತ್. 17 ಅಕ್ಕ, ಆ ಘಟಸರ್ಪಕ್ ಆ ಪೊಣ್ಣಾಳ್‍ರ ಮೇಲೆ ಬಾರಿ ಚೆಡಿ ಬಂದಿತ್, ದೇವಡ ಆಜ್ಞೆಕ್ ತಗ್ಗಿತ್ ನಡ್‍ಪಯಿಂಗಳು, ಯೇಸು ಕ್ರಿಸ್ತಂಡ ಸಾಕ್ಷಿ ಉಳ್ಳಯಿಂಗಳು ಆನ ಅವಡ ಸಂತಾನಕಾರಂಗಳಾನ ಬೋರೆಯಿಂಗಡ ಕೂಡೆ ಯುದ್ದ ಮಾಡ್‌ವಕ್ ಪೋಚಿ. 18 ಸಮುದ್ರತ್‍ರ ಕೆರೆಕ್ ಪೋಯಿತ್ ಘಟಸರ್ಪ ನಿಂದಂಡಿಂಜತ್. |
© 2017, New Life Literature (NLL)