ಪ್ರಕಟನೆ 11 - ಕೊಡವ ಬೈಬಲ್ದಂಡ್ ಸಾಕ್ಷಿಯಂಗ 1 ಪಿಂಞ ನಾಕ್ ಅಳ್‌ತೆ ಮಾಡ್‌ವಂತ ಓಡೆರನೆಕೆ ಒರ್ ಕೋಲ್‍ನ ನಾಕ್ ತಾತ್. ಅಕ್ಕ ದೇವತೂತ: ನೀನ್ ಎದ್ದಿತ್, ದೇವಾಲಯತ್‍ನ, ಬಲಿಪೀಠತ್‍ನ ಪಿಂಞ ಅಲ್ಲಿ ಆರಾದನೆ ಮಾಡ್‌ವಯಿಂಗಳ ಅಳ್‌ತೆ ಮಾಡ್‍ೕಂದ್ ನಾಕ್ ಆಜ್ಞೆ ಕೊಡ್‍ತತ್. 2 ದೇವಾಲಯತ್‍ರ ಪೊರಮೆ ಬಾಗತ್‍ನ ಅಳ್‌ತೆ ಮಾಡತೆ, ಅದ್‍ನ ಯೆಹೂದ್ಯ ಅಲ್ಲತಯಿಂಗಕ್ ಕೊಡ್‌ತಿಯೆ; ಅಯಿಂಗ ಪವಿತ್ರವಾಯಿತುಳ್ಳ ಪಟ್ಟಣತ್‍ನ ನಾಪತ ದಂಡ್ ತಿಂಗ ಚೌಟ್‍ವ. 3 ನಾನ್ ನಾಡ ದಂಡ್ ಸಾಕ್ಷಿಕಾರಂಗಕ್ ಅದಿಕಾರ ಕೊಡ್‍ಪಿ. ಅಯಿಂಗ ಗೋಣಿಚೀಲತ್‍ನ ಪೊತ್ತಂಡ್ 1,260 ದಿನಕತ್ತನೆ ಪ್ರವಾದನೆ ಎಣ್ಣುವ. 4 ಬೂಲೋಕತ್‌ರ ಒಡೆಯಂಡ ಮಿಂಞತ್‍ಲ್ ನಿಂದಂಡುಳ್ಳ ಆಲಿವ್ ಮರವು, ಬೊಳ್‍ಚ ಕಂಬವು ಈಂಗಳೇ. 5 ಈಂಗಕ್ ದಾರೇಂಗಿ ಕ್‍ೕಡ್ ಮಾಡಂಡೂಂದ್ ಗೇನ ಮಾಡ್‍ಚೇಂಗಿ, ಅಯಿಂಗಡ ಬಾಯಿಂಜ ತಿತ್ತ್ ಬಂದಿತ್ ಅಯಿಂಗಡ ವಿರೋದಿಯಳ ಚುಟ್ಟ್‌ರ್‍ವ. ಈಂಗಕ್ ದಾರೇಂಗಿ ಕ್‍ೕಡ್ ಮಾಡ್‌ವಕ್ ಗೇನ ಮಾಡ್‍ಚೇಂಗಿ ಅಂವೊ ಈ ರೀತಿಲ್ ಕೊಲೆ ಆಂಡು. 6 ಈಂಗ ಪ್ರವಾದನೆ ಎಣ್ಣಿಯಂಡುಳ್ಳ ಕಾಲತ್‍ಲ್, ಬಾನತ್‍ನ ಮುಚ್ಚಿತ್ ಮಳೆ ಬಕ್ಕತನೆಕೆ ಮಾಡ್‌ವಕ್ ಈಂಗಕ್ ಅದಿಕಾರ ಉಂಡ್; ಅದಲ್ಲತೆ ಅಯಿಂಗಕ್ ನೀರ್‌ನ ಚೋರೆಯಾಯಿತ್ ಮಾಡ್‌ವಂತ ಶಕ್ತಿಯು, ಅಯಿಂಗಕ್ ಎಕ್ಕೆಕ್ಕ ಬೋಂಡ್‌ವೋ, ಅಕ್ಕ ಎಲ್ಲಾ ಬೂಮಿಕ್ ನಾನಾತರ ಬಾದೆ ಕೊಡ್‌ತಿತ್ ಅಲ್ಲಿ ಉಳ್ಳಯಿಂಗಳ ಹಿಂಸೆ ಮಾಡ್‌ವಕ್ ಅದಿಕಾರ ಉಂಡ್. 7 ಅಯಿಂಗ ಅಯಿಂಗಡ ಸಾಕ್ಷಿನ ಎಣ್ಣಿತಾನ ಪಿಂಞ, ಪಾತಾಳತ್ಂಜ ಬಪ್ಪ ಮೃಗ ಈಂಗಡ ಕೂಡೆ ಯುದ್ದ ಮಾಡಿತ್ ಈಂಗಳ ಗೆದ್ದಿತ್ ಕೊಲ್ಲುವ. 8 ಈ ಸಾಕ್ಷಿಯಡ ಚಾವ್ ತಡಿ, ಆ ಬಲ್ಯ ಪಟ್ಟಣತ್‍ರ ಬೀದಿಲ್ ಬುದ್ದಿತ್ ಇಪ್ಪ. ಆ ಪಟ್ಟಣಕ್ ಸೋದೋಮ್ಂದ್ ಪಿಂಞ ಐಗುಪ್ತಾಂದ್ ಒರ್ ಗುರ್‌ತಾಯಿತ್ ಎಣ್ಣುವ; ಇಲ್ಲಿಯೇ ನಂಗಡ ಒಡೆಯನ ಶಿಲುಬೇಲ್ ಇಟ್ಟತ್. 9 ಎಲ್ಲಾ ಜನಳು, ಎಲ್ಲಾ ಕುಲವು, ಎಲ್ಲಾ ತಕ್ಕ್‌ರ ಜನಳು, ಎಲ್ಲಾ ಜಾತಿಯಳು ಅಯಿಂಗಡ ಚಾವ್ ತಡೀನ ಮೂಂದರೆ ನಾಳ್‍ಕತ್ತನೆ ನೋಟುವ, ಅಯಿಂಗಡ ಚಾವ್ ತಡೀನ ಗೋರಿಲ್ ಇಡ್‌ವಕ್ ಒಪ್ಪ್‌ಲೆ. 10 ಈ ದಂಡ್ ಪ್ರವಾದಿಯಳು ಬೂಮಿರ ಜನತ್‍ನ ಹಿಂಸೆ ಮಾಡ್‍ನಗುಂಡ್, ಅಯಿಂಗಕಾಯಿತ್ ಬೂಮಿಲ್ ವಾಸ ಮಾಡಿಯಂಡ್ ಉಳ್ಳಯಿಂಗ ದುಂಬ ಕುಶಿಪಟ್ಟಿತ್ ಕೊಂಡಾಡಿತ್ ಒಬ್ಬೊಂಗೊಬ್ಬ ಇನಾಮ್‍ನ ಅಯಿಪ. 11 ಮೂಂದರೆ ದಿವಸ ಆನ ಪಿಂಞ, ದೇವಡ ಕಡೇಯಿಂಜ ಜೀವತ್‍ರ ಆತ್ಮ ಬಂದಿತ್ ಅಯಿಂಗಡ ಒಳ್‍ಕ್ ಪೋಪ. ಅಕ್ಕ ಅಯಿಂಗ ಕಾಲೂರಿತ್ ಎದ್ದಿತ್ ನಿಂದತ್; ಅಯಿಂಗಳ ನೋಟ್‌ನಯಿಂಗಕ್ ದುಂಬ ಪೋಡಿ ಆಚಿ. 12 ನಿಂಗ ಇಲ್ಲಿಕ್ ಪತ್ತಿತ್ ಬಾರೀಂದ್ ಒರ್ ಬಲ್ಯ ವಾಣಿ ಪರಲೋಕತ್ಂಜ ಅಯಿಂಗಕ್ ಕ್‍ೕಟತ್, ಅಕ್ಕ ಅಯಿಂಗ ಮೋಡತ್‍ಲ್ ಪತ್ತಿತ್ ಪರಲೋಕಕ್ ಪೋಚಿ; ಅಯಿಂಗಡ ವಿರೋದಿಯಂಗ ಇದ್‍ನ ನೋಟಿಯಂಡ್ ಇಂಜತ್. 13 ಅದೇ ಸಮಯತ್‍ಲ್ ಬಲ್ಯ ಬೂಕಂಪ ಆಚಿ. ಅಕ್ಕಣೆಕ್ ಆ ಪಟ್ಟಣತ್‍ರ ಪತ್ತ್ ಬಾಗತ್‍ಲ್ ಒರ್ ಬಾಗ ಪೊಳಿಂಜ್ ಬುದ್ದ್ ಪೋಚಿ; ಏಳ್ ಆಯಿರ ಜನ ಚತ್ತ್ ಪೋಚಿ, ಬಾಕಿ ಜನಕ್ ಬಲ್ಯ ಪೋಡಿಯಾಯಿತ್ ಪರಲೋಕತ್‍ಲ್ ಉಳ್ಳ ದೇವಕ್ ಮಹಿಮೆ ಕೊಡ್‍ತತ್. 14 ದಂಡನೆ ಅಪಾಯ ಕಯಿಂಜತ್, ಇದಾ ಮೂಂದನೆ ಕಷ್ಟ ಬೆರಿಯ ಬಂದಂಡುಂಡ್. 15 ಏಳನೆ ದೇವದೂತ ವಾಲಗತ್‍ರ ಕೊಂಬ್‍ನ ಊದ್‍ವಕಾಪಕ: ಲೋಕತ್‍ರ ರಾಜ್ಯಂಗ ನಂಗಡ ಒಡೆಯಂಗು, ಅಂವೊಂಡ ಕ್ರಿಸ್ತಂಡ ರಾಜ್ಯವಾಯಿತು ಆಚಿ. ಅಂವೊ ಕಾಲಕಾಲಕು ರಾಜನಾಯಿತ್ ರಾಜ್ಯಬಾರ ಮಾಡ್‌ವಾಂದ್ ಪರಲೋಕತ್ಂಜ ಒರ್ ಬಲ್ಯ ಸದ್ದ್ ಕ್‍ೕಟತ್. 16 ಅಕ್ಕ, ದೇವಡ ಮಿಂಞತ್‍ಲ್ ಅಯಿಂಗಯಿಂಗಡ ಸಿಂಹಾಸನತ್‍ಲ್ ಅಳ್‍ತಂಡಿಂಜ ಇರುವತ ನಾಲ್ ಪೆರಿಯಯಿಂಗಳು, ಅಡ್ಡ ಬುದ್ದಿತ್ ದೇವನ ಆರಾದನೆ ಮಾಡ್‍ಚಿ. 17 ಇಕ್ಕ ಇಪ್ಪಂವೊನೂ, ಮಿಂಞ ಇಂಜಂವೊನು ಸರ್ವ ಶಕ್ತಿವಂತಂವೊನು ಆಯಿತುಳ್ಳ, ಒಡೆಯನಾನ ದೇವನೇ, ನಿನ್ನ ನಂಗ ಆರಾದನೆ ಮಾಡ್‌ವ. ನೀನ್ ಬಲ್ಯ ಶಕ್ತಿರಗುಂಡ್ ರಾಜ್ಯಬಾರ ಮಾಡ್‌ವ ರಾಜನಾಯಿತುಳ್ಳಿಯ. 18 ನೀಡ ಜನ ಅಲ್ಲತಯಿಂಗಕ್ ಚೆಡಿ ಬಾತ್, ಅಕ್ಕ ನೀಕ್ ಬಲ್ಯ ಚೆಡಿ ಉಂಟಾಚಿ; ಚತ್ತಯಿಂಗಕ್ ನ್ಯಾಯತೀರ್ಪ್ ಕ್‍ಟ್ಟ್‌ವಕು, ಪ್ರವಾದಿಯಳಾನ ನೀಡ ಸೇವಕಂಗಕು, ದೇವಡ ಮಕ್ಕಕು, ನೀಡ ಪೆದತ್‍ರ ಮೇಲೆ ಬಕ್ತಿಯಾಯಿತ್ ಇಂಜ ಬಲ್ಯಯಿಂಗಕು ಚೆರಿಯಯಿಂಗಕು ಫಲ ತಪ್ಪಕು, ಬೂಮಿಕ್ ಕ್‍ೕಡ್ ಮಾಡ್‍ನಯಿಂಗಳ ಪಾಳ್ ಮಾಡ್‌ವಕು, ಸಮಯ ಬಾತ್‍ೕಂದ್ ಎಣ್ಣಿತ್ ದೇವನ ತುದಿಚತ್. 19 ಅಕ್ಕ, ಪರಲೋಕತ್‍ಲ್ ಉಳ್ಳ ದೇವಾಲಯ ತೊರ್ಂದತ್. ಅಂವೊಂಡ ಆಲಯತ್‍ಲ್ ಅಂವೊಂಡ ಒಪ್ಪಂದತ್‍ರ ಪೊಟ್ಟಿನ ಕಾಂಬಕ್ ಆಚಿ; ಅಕ್ಕಣೆಕ್ ಮಿಂಚ್, ವಾಣಿ, ಗುಡ್‍ಗ್ ಬೂಕಂಪ ಪಿಂಞ ಬಲ್ಯ ಆಲಿಕಾಯಿರ ಮಳೆ ಪೊಜ್ಜತ್. |
© 2017, New Life Literature (NLL)