ಜ್ಞಾನತ್‌ರ ಪಡಿಮ 6 - ಕೊಡವ ಬೈಬಲ್1 ನಾಡ ಮೋನೇ, ಒರ್‌ ಸಮಯ, ನೀನ್‌ ನೀಡ ಸ್ನೇಹಿತ ಎಡ್‌ತ ಸಾಲಕ್‌ ಜಾಮೀನ್‌ ಕೊಡ್‌ತಿತ್, ನೀಕ್‌ ಅರಿಯತಂವೊಂಡ ಪಕ್ಕ ತಕ್ಕ್‌ ಕೊಡ್‌ತ್ತಿಂಜತೇಂಗಿ, 2 ನೀನ್‌ ನೀಡ ತಕ್ಕ್‌ರಗುಂಡ್‌ ಕೆಣಿಂಜಿ ಪೋಯಿತುಳ್ಳಿಯ. ನೀಡ ಸ್ವಂತ ತಕ್ಕ್‌ರಗುಂಡ್‌ ನೀನ್‌ ಬಲೆಕ್‌ ಚಿಕ್ಕಿ ಪೋಯಿತುಳ್ಳಿಯ. 3 ಆನಗುಂಡ್ ಮೋನೇ, ನಿನ್‌ ನೀಡ ಸ್ನೇಹಿತಂಡ ಕೈಕ್‌ ಚಿಕ್ಕಿ ಪೊಯಿತುಳ್ಳಗುಂಡ್, ನೀಡ ಸ್ನೇಹಿತಂಡ ಕೈಯಿಂಜ ಬಚಾವ್‌ ಆಪಕಾಯಿತ್‌ ನೀನ್‌ ಒರ್‌ ಕಾರ್ಯ ಮಾಡ್. 4 ನೀಡ ಕಣ್ಣ್‌ಕ್ ವರ್‌ಕ್‌ ಬಕ್ಕತನೆಕೆ ನೋಟಿಯಂಡ್, ನೀಡ ಕಣ್ಣ್‌ರ ರೆಪ್ಪೆನ ಮುಚ್ಚತೆ, ನೀಡ ಸ್ನೇಹಿತಂಡ ಪಕ್ಕ ಪೋಯಿತ್, ನೀನ್‌ ತಗ್ಗ್‌ಚಿಟ್ಟಂಡ್, ನೀಡ ಪೆದತ್‌ನ ಅಳಿಚಿಡುವಕ್‌ ಅಂವೊನ ಬೋಡಿಯ. 5 ಒರ್‌ ಬೋಟೆಗಾರಂಡಿಂಜ ಜಿಂಕೆ ತಪ್ಪಿಪೋಪನೆಕೆಯು, ಪಕ್ಷಿ ಪುಡಿಪವಂಡಿಂಜ ಒರ್‌ ಪಕ್ಕಷಿ ಪಾರಾಪನೆಕೆಯು ನೀನ್‌ ನಿನ್ನ ಕಾಪಾಡಿಯ. 6 ಸೋಮಾರಿಯೇ, ನೀನ್‌ ಇರ್ಪುರ ಪಕ್ಕ ಪೋಯಿತ್ ಅವು ನಡ್‌ಪ ಬಟ್ಟೆನ ನೋಟಿತ್‌ ಬುದ್ದಿವಂತನಾಪಕ್‌ ಪಡ್‌ಚ. 7 ಅದ್‌ಂಗ್‌ ಕೆಲಸ ಮಾಡ್‌ಚಿಡುವಕ್‌ ಒರ್‌ ರಾಜನಾಡ್, ಅದಿಕಾರಿಯಾಡ್‌ ನಾಯಕನಾಡ್‌ ಇಲ್ಲತೆ ಪೋಚೇಂಗಿಯು, 8 ಇಡೀ ಬೇನಿ ಕಾಲತ್‌ಲ್‌ ತಾಂಡ ಆಹಾರತ್‌ನ ಕೂಟಿ ಬೆಚ್ಚಿತ್, ಕೊಯಿಪಣಿ ಕಾಲತ್‌ಲ್‌ ಅದ್‌ಂಗ್‌ ಆಹಾರ ದಾನ್ಯತ್‌ನ ಬತ್‌ರ ಮಾಡುವ. 9 ಸೋಮಾರಿಯೇ, ನೀನ್‌ ಎಚ್ಚಕ್‌ ನೇರ ವರುವಿಯಾ? ಎಕ್ಕ ನೀನ್‌ ನೀಡ ವರ್‌ಕ್‌ನ ಬುಟ್ಟಿತ್‌ ಎಚ್ಚರ ಆಪಿಯಾ? 10 ಇಂಞು ಚೆನ್ನ ನೇರ ವರ್ವಿ, ಇಂಞು ಚೆನ್ನ ನೇರ ಆರಾಮ್‌ ಮಾಡುವಿ, ಇಂಞು ಚೆನ್ನ ನೇರ ಕೈಯಿನ ಮಡ್‌ಕಿತ್‌ ವರಿಯೊವೀಂದ್‌ ಎಣ್ಣುವಿಯಾ? 11 ಅಕ್ಕ, ಬಡತನ ಕಳ್ಳಂಗ ಬಪ್ಪನೆಕೆ ಬಪ್ಪ. ಅಂವೊಂಡ ಸ್ತಿತಿಗತಿ ದರೋಡೆಕಾರ ಬಂದಿತ್‌ ಉಳ್ಳದ್‌ನೆಲ್ಲ ಎಡ್‌ತಂಡ್‌ ಪೋನನೆಕೆ ಇಪ್ಪ. 12 ಒಂದಂಗು ಪ್ರಯೋಜನ ಇಲ್ಲತ ಒರ್‌ ದುಷ್ಟಂಡ ನಡ್‌ತೆನ ನೋಟ್. ಅಂವೊ ಪೊಟ್ಟ್‌ ಪರ್‌ಂದಂಡೆ ತಿರಿಯಂಡಿಪ್ಪ. 13 ಅಂವೊ ಜನಳ ಮೋಸ ಮಾಡ್‌ವಕಾಯಿತ್‌ ತಾಂಡ ಕಣ್ಣ್‌ಂಜ, ಕಾಲ್‌ಂಜ ಕೈಬೆರತ್ತಿಂಜ ಸನ್ನೆ ಮಾಡುವ. 14 ಅಂವೊಂಡ ಕ್‍ೕಡಾನ ಮನಸ್ಸ್‌ಲ್‌ ಎಕ್ಕಾಲು ಮೋಸ ಮಾಡ್‌ವದನ್ನೇ ಗೇನ ಮಾಡಿಯಂಡಿಪ್ಪ. ಅಂವೊ ಎಕ್ಕಾಲು ಜಗಳ ಬಪ್ಪನೆಕೆ ಮಾಡ್‌ವ. 15 ಆನಗುಂಡ್, ಇಂಜನೆಕೆ ಅಂವೊಂಗ್‌ ಅಪಾಯ ಬಪ್ಪ. ಸಹಾಯ ಇಲ್ಲತೆ ಇಂಜನೆಕೆ ನಾಶ ಆಯಿ ಪೋಪ. 16 ಆರ್‌ ಕಾರ್ಯತ್‌ನ ಯೆಹೋವ ದ್ವೇಷ ಮಾಡುವ, ಅಕ್ಕು ಏಳ್‌ ಕಾರ್ಯ ಅಂವೊಂಗ್‌ ಅಸಹ್ಯವಾನದ್: 17 ಚೊಕ್ಕ್‌ಲ್‌ ನೋಟ್‌ವ ಕಣ್ಣ್, ಪೊಟ್ಟ್‌ ಪರಿಯುವ ನಾವ್, ಕುತ್ತಯಿಲ್ಲತ ಜನಳ ಕೊಲ್ಲುವ ಕೈ, 18 ಕೆಟ್ಟದ್‌ನ ಯೊಜನೆ ಮಾಡುವ ಹೃದಯ, ಕ್‍ೕಡ್‌ ಮಾಡ್‌ವಕ್‌ ಬೆರಿಯ ಓಡುವ ಕಾಲ್, 19 ಪೊಟ್ಟ್‌ನೇ ಪರಿಯುವ ಪೊಟ್ಟ್‌ ಸಾಕ್ಷಿ ಪಿಂಞ ಅಣ್ಣತಮ್ಮಣಂಗಡ ಮದ್ಯತ್‌ ಜಗಳ ಬಿತ್ತ್‌ವದ್‌ ಎಣ್ಣುವದೇ. 20 ನಾಡ ಮೋನೇ, ನೀಡ ಅಪ್ಪಂಡ ಆಜ್ಞೆನ ಪಾಲ್‌ಚಿಡ್, ನೀಡ ಅವ್ವಂಡ ಬೋದನೆನ ಕೈ ಬುಡತೆ. 21 ಅದ್‌ನೆಲ್ಲಾ ಎಕ್ಕಾಲು ನೀಡ ಹೃದಯತ್‌ ಬೆಚ್ಚಂಡ್, ನೀಡ ಬೋಳೆರ ಸುತ್ತ್‌ ಕಟ್ಟಿಯ. 22 ನೀನ್‌ ನಡ್‌ಪಕ ಅದ್‌ ನೀಕ್‌ ಬಟ್ಟೆ ಕಾಟಿತಪ್ಪ. ನೀನ್‌ ವರ್ವಕ ಅದ್‌ ನಿನ್ನ ಕಾಪಾಡುವ. ನೀನ್‌ ಪೊಲಾಕ ಏವೊಕ ಅದ್‌ ನೀಕ್‌ ಆಲೋಚನೆ ತಪ್ಪ. 23 ಎನ್ನಂಗೆಣ್ಣ್‌ಚೇಂಗಿ ಈ ಆಜ್ಞೆವೇ ನೀಕ್‌ ಬೊಳ್‌ಚವಾಯಿತು, ಈ ಬೋದನೆಯೇ ನೀಕ್‌ ಬೊಳಿಯಾಯಿತು, ಈ ಉಪದೇಶತ್‌ಂಜ ಬಪ್ಪ ತಿದ್ದುವಿಕೆಯೇ, ಬದ್‌ಕ್‌ ತಪ್ಪ ಬಟ್ಟೆಯಾಯಿತು ಇಪ್ಪ. 24 ಆ ಉಪದೇಶಯೆಲ್ಲಾ ನಿನ್ನ ಕೆಟ್ಟ ಪೊಣ್ಣಾಳಿಂಜ ಕಾಪಾಡಿತ್, ಬೋರೆ ತಪ್ಪ್‌ ಮಾಡುವ ಪೊಣ್ಣಾಳ್‌ರ ನೊಣೆ ತಕ್ಕ್‌ಯಿಂಜ ನಿನ್ನ ಬಚಾಚ್‍ ಮಾಡುವ. 25 ಅವಡ ಚಾಯಿ ಚಂದನ ನೋಟಿತ್‌ ಅವಕ್‌ ಇಚ್ಚೆ ಪಡತೆ. ಅವಡ ಕಣ್ಣ್‌ರ ರೆಪ್ಪೆಯಿಂಜ ನಿನ್ನ ವಶ ಪಡ್‌ತುವಕ್‌ ಬುಡತೆ. 26 ಎನ್ನಂಗೆಣ್ಣ್‌ಚೇಂಗಿ ವೇಶಿರಗುಂಡ್‌ ಒರ್‌ ತುಂಡ್‌ ಒಟ್ಟಿನ ಸಹ ಇಲ್ಲತನೆಕೆ ನೀನ್‌ ಕಳ್‌ಂದ್‌ರ್‌ವಿಯ. ಆಚೇಂಗಿ ಒರ್‌ ವ್ಯಬಿಚಾರಿ ಬೆಲೆ ಕೊಡ್‌ಪಕಯ್ಯತ ನೀಡ ಜೀವತ್‌ನೇ ಬೋಟೆಯಾಡುವ. 27 ತಾಂಡ ಬಟ್ಟೆನ ತಿತ್ತ್‌ ಚುಡತೆ ತೊಡೆರ ಮೇಲೆ ತಿತ್ತ್‌ನ ಬೆಪ್ಪಕಯ್ಯುವ? 28 ಕಾಲ್ ಚುಡತೆ ತಿತ್ತ್‌ರ ಕಂಡತ್‌ರ ಮೇಲೆ ನಡ್‌ಪ ಕಯ್ಯುವ? 29 ಇಂಞೊಬ್ಬಂಡ ಪೊಣ್ಣ್‌ರ ಪಕ್ಕ ಪೋಪಂವೊಂಗು ಇನ್ನನೆ ಆಪ. ಅವಳ ಮುಟ್ಟ್‌ವಂವೊನು ದಂಡನೆಯಿಂಜ ಬಚಾವ್‌ ಆಪುಲೆ. 30 ಕೆಲಪೈಚಂಡುಳ್ಳ ಕಳ್ಳ ತಾಂಡ ಕೆಲತ್‌ನ ತೃಪ್ತಿ ಪಡುತ್‌ವಕಾಯಿತ್‌ ಕದ್ದಂಡ್‌ ಪೋಚೇಂಗಿ ಒರ್‌ ಸಮಯ ಅಂವೊಂಗ್‌ ಮಾಪ್ ಕ್‌ಟ್ಟು. 31 ಆಚೇಂಗಿ ಅಂವೊ ಕ್‌ಟ್ಟಿ ಬುದ್ದತೇಂಗಿ, ಅಂವೊ ಕದ್ದಕಿಂಜಿ ಏಳ್‌ ಪಟ್ಟ್‌ರಚ್ಚಕ್‌ ತಿರಿತ್‌ ಕೊಡ್‌ಕಂಡಾಪ. ಅಂವೊಂಡ ಮನೆಲ್ ಉಳ್ಳ ವಸ್ತುನೆಲ್ಲಾ ಮಾರಿತಾಚೇಂಗಿಯು ಅಂವೊ ಕೊಡ್‌ಕಂಡು. 32 ಆಚೇಂಗಿ ಇಂಞೊಬ್ಬಂಡ ಪೊಣ್ಣಾಳ್‌ರ ಕೂಡೆ ವ್ಯಬಿಚಾರ ಮಾಡ್‌ವಂವೊ ಒರ್‌ ದಡ್ಡೆನಾಯಿತುಂಡ್. ಅನ್ನನೆ ಮಾಡ್‌ವಂವೊ ತಾಂಡ ಬದ್‌ಕ್‌ನೇ ನಾಶ ಮಾಡಿಯೊವ. 33 ಅಂವೊಂಗ್‌ ಗಾಯವು ಅವಮಾನವು ಆಪ. ಅಂವೊಂಗ್‌ ಆನ ಞಾಣಕ್‍ೕಡ್‌ ಅಂವೊನ ಬುಟ್ಟಿತ್‌ ಪೋಪದೇ ಇಲ್ಲೆ. 34 ಎನ್ನಂಗೆಣ್ಣ್‌ಚೇಂಗಿ ತಾಂಡ ಪೊಣ್ಣಾಳ್‌ರ ವಿಷಯತ್‌ ವೈರಾಗ್ಯವುಳ್ಳ ವಡಿಯಂಗ್‌ ದುಂಬ ಚೆಡಿ ಬಪ್ಪ. ಅಂವೊ ಪಗೆ ತ್‍ೕಪ ನೇರತ್‌ ಚೆನ್ನಂಗು ಕರುಣೆ ಕಾಟುಲೆ. 35 ಅಂವೊಂಗ್‌ ಎಚ್ಚಕೇ ಪಣ ಕೊಡ್‌ತತೇಂಗಿಯು ಸ್ವೀಕಾರ ಮಾಡುಲೆ, ಎಚ್ಚಕ್‌ ಇನಾಮ್‌ ಕೊಡತತೇಂಗಿಯು ಅಂವೊಂಡ ಚೆಡಿನ ತಡ್‌ಪಕಯ್ಯುಲೆ. |
© 2017, New Life Literature (NLL)