ಜ್ಞಾನತ್‌ರ ಪಡಿಮ 31 - ಕೊಡವ ಬೈಬಲ್1 ಇದ್‌ ರಾಜನಾನ ಲೆಮೂವೇಲಂಡ ಞ್ಜಾನ ತಕ್ಕ್. ಅಂವೊಂಡ ಅವ್ವ ಅಂವೊಂಗ್‌ ಮಾಡ್‌ನ ಬೋದನೆರ ತಕ್ಕ್: 2 ನಾಡ ಮೋನೇ, ನಾಡ ಕೆಲತ್‌ಲ್‌ ಪುಟ್ಟ್‌ನ ಮೋನೇ, ನಾನ್‌ ಪ್ರಾರ್ಥಿಚಿಟ್ಟಿತ್‌ ಪಡ್‌ಂದ ಮೋನೇ, 3 ನೀಡ ಬಲತ್‌ನ ಪೊಣ್ಣಾಳುವಕಾಯಿತು, ನೀಡ ಬಟ್ಟೆನ ರಾಜಂಗಳ ನಾಶ ಮಾಡುವ ಕಾರ್ಯಕು ಕೊಡ್‌ಕತೆ. 4 ಲೆಮೂವೇಲನೇ, ಕಳ್ಳ್ ಕುಡಿಪದ್‌ ರಾಜಂಗಕ್‌ ಯೋಗ್ಯವಾನದಿಲ್ಲೆ. ಅದ್‌ ಅದಿದತಿಯಂಗಕ್‌ ಯೋಗ್ಯವಾನದಿಲ್ಲೆ. 5 ಅನ್ನನೆ ಕುಡಿಚತೇಂಗಿ ದೇವಡ ಕಾನೂನ್ನ ಮರ್ಂದಿತ್ ಗರೀಬಂಗಡ ಹಕ್ಕ್‌ನೆಲ್ಲ ಬದ್‌ಲ್‌ ಮಾಡಿರುವ. 6 ಚಾವಕ್‌ ಉಳ್ಳಂವೊಂಗ್‌ ಕಳ್ಳ್‌ನ ಕೊಡ್. ಮನಸ್ಸ್‌ ಬೇಜಾರ್‌ಲ್‌ ಉಳ್ಳಯಿಂಗಕ್‌ ದ್ರಾಕ್ಷಿರಸತ್‌ನ ಕೊಡ್. 7 ಅಯಿಂಗ ಕುಡ್‌ಚಿತ್‌ ಗರೀಬತನತ್‌ನ ಮರ್ಂದಿತ್, ಅಯಿಂಗಡ ಕಷ್ಟತ್‌ನೆಲ್ಲ ಗೇನ ಮಾಡತೆ ಇರಡ್. 8 ತಾಂಗಾಯಿತ್‌ ತಕ್ಕ್ ಪರಿಯೊಕಯ್ಯತ ಜನಕಾಯಿತ್‌ ತಕ್ಕ್ ಪರಿ. ಗತಿ ಇಲ್ಲತಯಿಂಗಡ ಹಕ್ಕ್‌ಕಾಯಿತ್‌ ತಕ್ಕ್ ಪರಿ. 9 ಗರೀಂಬಂಗಕು, ಒರ್‌ ಗತಿಯಿಲ್ಲತಯಿಂಗಕಾಯಿತು ತಕ್ಕ್ ಪರಿ; ಅಯಿಂಗಕ್‌ ನ್ಯಾಯ ಕ್‌ಟ್ಟ್‌ವನೆಕೆ ಪೇಚಾಡ್. ನಲ್ಲ ಗುಣವುಳ್ಳ ಪೊಣ್ಣ್‌ 10 ನಲ್ಲ ಗುಣವುಳ್ಳ ಪೊಣ್ಣ್‌ನ ದಾರ್‌ಕ್‌ ಕಂಡ್‌ಪುಡಿಪಕಯ್ಯು? ಅವ ಮಾಣಿಕ್ಯಕಿಂಜಿ ಬಲ್ಯ ಬೆಲೆ ಉಳ್ಳವ. 11 ಅವಡ ವಡಿಯಂಗ್‌ ಅವಡ ಮೇಲೆ ಪೂರ್ತಿ ನಂಬಿಕೆ ಉಂಡ್. ಅಂವೊಂಡ ಸಂಪತ್‌ ಕಮ್ಮಿ ಆಪುಲೆ. 12 ಅವ ಬದ್‌ಕ್‌ವ ಕಾಲಯೆಲ್ಲಾ ಅಂವೊಂಗ್‌ ಕ್‍ೕಡ್‌ ಮಾಡತೆ ನಲ್ಲದ್‌ನೇ ಮಾಡುವ. 13 ಅವ ಉಣ್ಣೆಯಿಂಜ ಪಿಂಞ ಸೆಣಬ್ರ ನಾರ್‌ನ ಬಟ್ಟೆ ಪೊಲ್ಲುವಕಾಯಿತ್‌ ಎಕ್ಕಾಲು ಕುಶೀಲ್‌ ಕೂಟಿತ್‌ ಬೆಪ್ಪ 14 ಅವ ವ್ಯಾಪಾರತ್‌ರ ಹಡಗ್‌ರನೆಕೆ ದೂರತ್‌ಂಜ ಬೋಂಡಿಯಾನ ಆಹಾರತ್‌ನ ಮನೆಕ್‌ ಕೊಂಡ ಬಪ್ಪ. 15 ಇಂಞು ಇರ್‌ಟಾಯಿತಿಪ್ಪಕಲೇ ಎದ್ದಿತ್‌ ತಾಂಡ ಕುಟುಂಬಕ್‌ ಉಂಬಕ್‌ ಕೂಳ್‌ ತಯಾರ್‌ ಮಾಡಿತ್, ಪಣಿಕಾರ್ತಿಯಕ್‌ ಅಂದೇತ ದಿವಸತ್‌ರ ಪಣಿನ ಎಣ್ಣುವ. 16 ಒರ್‌ ಬೇಲ್‌ನ ವಿಚಾರ ಮಾಡಿತ್ ಕ್ರಯಕ್‌ ಎಡ್‌ಪ. ತಾನ್‌ ಸಂಪಾದನೆ ಮಾಡ್‌ನ ಪಣತ್‌ಂಜ ದ್ರಾಕ್ಷಿ ತೋಟತ್‌ನ ಮಾಡುವ. 17 ಅವ ದುಂಬ ಬಲತಿಂಜ ಕೆಲಸ ಮಾಡ್‌ವಕ್‌ ತಯಾರ್‌ ಆಯಿತ್‌ ತಾಂಡ ಕೈಯಿನ ಬಲಪಡ್‌ತುವ. 18 ಅವ ತಾಂಡ ವ್ಯಾಪಾರ ಪ್ರಯೋಜನ ಉಳ್ಳದಾಯಿತುಂಡ್‍ೕಂದ್‌ ಅವಕ್‌ ಅರ್‌ಂಜಿತ್‌ ಬೆಚ್ಚೊವ. ಬಯಿಟ್, ಸುಮಾರ್‌ ನೇರಕತ್ತನೆ ಅವ ಕೆಲಸ ಮಾಡುವ. 19 ತಾಂಡ ಕೈಯಿನ ರಾಟೆಲ್‌ ಬೆಚ್ಚಿತ್, ನೂಲ್‌ ಉಂಡೆನ ಪುಡಿಪ. 20 ಅವ ಗರೀಬಂಗ್‌ಕ್ ತಾಂಡ ಕೈಯಿನ ತೊರ್‌ಂದಿತ್, ಕಷ್ಟತ್‌ಲ್‌ ಉಳ್ಳಯಿಂಗಕ್‌ ತಾಂಡ ಕೈಯಿನ ನ್‍ೕಟ್‌ವ. 21 ತಾಂಡ ಕುಟುಂಬತ್‌ಲ್‌ ಉಳ್ಳಯಿಂಗಕೆಲ್ಲಾ ಬೆಕ್ಕನೆ ಇಪ್ಪಕ್‌ ಉಡ್‌ಪ್ ಉಳ್ಳಗುಂಡ್, ತಾಂಡ ಕುಟುಂಬತ್‌ರ ವಿಷಯತ್‌ ಕುಳುರ್‌ಕಾಲತ್‌ಲ್‌ ಅವಕ್‌ ಪೋಡಿ ಇಲ್ಲೆ. 22 ಅವ ತಾಂಗ್‌ ತಾನೆ ಮೆತ್ತೆ ಬಟ್ಟೆನ ತಯಾರ್‌ ಮಾಡುವ. ನಯವಾನ ನೂಲ್‌ಲ್‌ ಮಾಡ್‌ನ ನೀಲಿ ಅಂಗಿಯೇ ಅವಡ ಉಡ್‌ಪ್ ಆಯಿತ್‌ಂಜತ್. 23 ಅವಡ ವಡಿಯ ಪೇಟೆರ ನ್ಯಾಯಸ್ತಾನತ್‌ಲ್‌ ಅಳ್‌ತಿತ್‌ಪ್ಪಕ ಪೇಟೆರ ಪೆರಿಯಯಿಂಗಡತ್‌ಲ್‌ ಬಲ್ಯಂವೊನಾಯಿತ್‌ಪ್ಪ. 24 ಅವ ನಯವಾನ ನೂಲ್‌ಲ್‌ ಮಾಡ್‌ನ ಉಡ್‌ಪ್‌ನ ಮಾರ್ವ. ನಡುಪಟ್ಟಿನ ತಯಾರ್‌ ಮಾಡುವ ವ್ಯಾಪಾರಿಯಡ ಪಕ್ಕ ಕೊಡ್‌ಪ. 25 ಬಲವು ಗೌರವು ಅವಡ ಉಡ್‌ಪ ಆಯಿತುಂಡ್. ಮಿಂಞತ್‌ರ ಬದ್‌ಕ್‌ರ ವಿಷಯತ್‌ ಪೋಡಿಯಿಲ್ಲತೆ ಕುಶೀಲ್‌ ಇಪ್ಪ. 26 ಅವ ಜ್ಞಾನತ್‌ಂಜ ತಕ್ಕ್ ಪರಿಯುವ. ದಯೆವುಳ್ಳ ಬೋದನೆನ ಮಾಡುವ. 27 ಅವ ಸೋಮಾರಿತನತರ್‌ ಆಹಾರತ್‌ನ ಉಂಗತೆ, ತಾಂಡ ಮನೆರ ಎಲ್ಲಾ ಕಾರ್ಯತ್‌ನ ಎಚ್ಚರತ್‌ಲ್‌ ನೋಟಿಯೊವ. 28 ಅವಡ ಮಕ್ಕ ಎದ್ದ್‌ನಿಂದಿತ್‌ ಅವಳ ಆಶೀರ್ವಾದ ಪಡ್‌ಂದಂವೋಂದ್‌ ಎಣ್ಣುವ. ಅವಡ ವಡಿಯ ಸಹ ಅವಳ ನೋಟಿತ್: ಹೊಗೊಳುವ, 29 ಸುಮಾರ್‌ ಪೊಣ್ಣಾಳುವ ನಲ್ಲ ಗುಣವುಳ್ಳಯಿಂಗಳಾಯಿತ್‌ ನಡ್‌ಂದಿತ್‌ ಉಂಡ್. ಆಚೇಂಗಿ, ಅಯಿಂಗ ಎಲ್ಲಾಂಕಿಂಜಿ ನೀನೇ ಮೇಲಾನವ ಎಣ್ಣಿಯಂಡ್‌ ಅವಡ ವಡಿಯ ಅವಳ ಹೊಗಳುವ. 30 ಸೌಂದರ್ಯ ವಂಚನೆ ಉಳ್ಳದ್. ಚಾಯಿ ಕಾಂಗತೆ ಆಯಿಪೋಪ. ಆಚೇಂಗಿ ಯೆಹೋವಂಗ್‌ ಬೊತ್ತುವ ಪೊಣ್ಣಾಳೇ ಹೊಗಳಿಕೆಕ್‌ ಯೋಗ್ಯವಾನವ. 31 ಅವಡ ಎಲ್ಲಾ ಕೈಕೆಲಸಕ್‌ ಸೆರಿಯಾನ ಪ್ರತಿಫಲ ಕೊಡಿ. ಅವ ಮಾಡುವ ಕಾರ್ಯಕೆಲ್ಲಾ ಊರ್‌ರ ಜನ ಅವಳ ಕೊಂಡಾಡಡ್. |
© 2017, New Life Literature (NLL)