ಜ್ಞಾನತ್‌ರ ಪಡಿಮ 25 - ಕೊಡವ ಬೈಬಲ್1 ಇದ್‌ ಯೆಹೂದ ದೇಶತ್‌ ರಾಜನಾನ ಹಿಜ್ಕೀಯಂಡ ಒಳ್‌ತ್‌ಕಾರಂಗ, ನಕಲ್‌ ಮಾಡಿತ್‌ ಒಳ್‌ದ್‌ನ ಇಂಞು ಚೆನ್ನ ಸೊಲೊಮೋನಂಡ ಜ್ಞಾನತ್‌ರ ಪಡಿಮ. 2 ಒರ್‌ ಕಾರ್ಯತ್‌ನ ಮುಚ್ಚಿ ಬೆಪ್ಪದ್‌ ದೇವಕ್‌ ಮಹಿಮೆ. ವಿಷಯತ್‌ನ ಸೆರಿಯಾಯಿತ್‌ ಕಾಟೊದ್‌ ರಾಜಂಗ್‌ ಗೌರವ. 3 ಬಾನತ್‌ರ ಎತ್ತರ ಪಿಂಞ ಬೂಮಿರ ಆಳತ್‌ರನೆಕೆ ರಾಜಂಡ ಮನಸ್ಸ್‌ನ ದಾರ್‌ಕೂ ಅರ್ಥ ಮಾಡ್‌ವಕ್‌ ಕಯ್ಯುಲೆ. 4 ಬೊಳ್ಳಿಯಿಂಜ ಕಚ್ಚಡತ್‌ನ ನೀಕಿರ್, ಅದ್‌ಲ್ಲಿಂಜ ತಟ್ಟ ಒರ್‌ ಪಾತ್‌ರತ್‌ನ ಮಾಡುವಕಯ್ಯು. 5 ಅನ್ನನೆ ರಾಜಂಡ ಮಿಂಞತ್‌ಂಜ ದುಷ್ಟನ ನೀಕಿರ್, ಅಕ್ಕ ಅಂವೊಂಡ ಸಿಂಹಾಸನ ನೀತಿರಗುಂಡ್‌ ಸ್ತಾಪನೆ ಆಪ. 6 ರಾಜಂಡ ಪ್ರಸನ್ನತ್‌ ನಿನ್ನ ಕೊಚ್ಚಿಯೊತೆ. ಮಕ್ಯಪಟ್ಟಯಿಂಗ ನಿಪ್ಪ ಜಾಗತ್‌ ನಿಕ್ಕತೆ. 7 ನೀಡ ಕಣ್ಣ್‌ ಕಂಡ ಅದಿದತಿರ ಮಿಂಞತ್‌ ಅವಮಾನಪಡೊದ್‌ ನಲ್ಲದಿಲ್ಲೆ. ಅಂವೊ ನಿನ್ನ ನೋಟಿತ್: ಕೊಡಿಕ್‌ ಬಾಂದ್‌ ಕಾಕ್‌ವದೇ ನಲ್ಲದ್. 8 ನ್ಯಾಯಾಲಯತ್‌ ಪೋಪಕ್‌ ಆತುರ ಪಡತೆ. ಕಡೇಕ್‌ ನೀಡ ನೆರೆಮನೆಕಾರ ನೀನ್‌ ಎಣ್ಣ್‌ವದ್‌ ಪೊಟ್ಟ್‌ಂದ್‌ ಅವಮಾನ ಪಡ್‌ತ್‌ಚೇಂಗಿ ನೀನ್‌ ಎಂತ್‌ ಮಾಡುವಿಯಾ? 9 ನೀನ್‌ ನೀಡ ನೆರೆಮನೆಕಾರಂಡ ಕೂಡೆ ಮಾತ್‌ರ ನಿಂಗಡ ವಿಷಯತ್‌ ವಾದ ಮಾಡ್. ಬೋರೆ ಒಬ್ಬಂಡಪಕ್ಕ ಗುಟ್ಟ್‌ನ ಎಣ್ಣಂಡ. 10 ಇಲ್ಲತೆ ಪೋಚೇಂಗಿ ಅದ್‌ನ ಕ್‍ೕಟಯಿಂಗೆಲ್ಲ ನಿನ್ನ ಅವಮಾನಪಡ್‌ತುವ. ಆ ಕೆಟ್ಟ ಪೆದ ನಿನ್ನ ಬುಟ್ಟಿತ್‌ ಪೋಪುಲೆ. 11 ತಕ್ಕ ಸಮಯತ್‌ ಎಣ್ಣ್‌ನ ಶಬ್ದ ಬೊಳ್ಳಿರ ತಟ್ಟೆಲ್‌ ಉಳ್ಳ ಪೊನ್ನ್‌ರ ಪಣ್ಣ್‌ಕ್ ಸರಿಸಮ. 12 ಕ್‍ೕಪಕ್‌ ಕುಶಿ ಉಳ್ಳಂವೊನ ಎಚ್ಚರಿಕೆ ಮಾಡ್‌ವಂವೊ ಪೊನ್ನ್‌ರ ಓಲೆಕು, ಪೊನ್ನ್‌ರ ಮಾಲೆಕು ಸರಿಸಮ. 13 ಕೊಯ್ಯಿಪಣಿರ ಕಾಲತ್‌ ಮಂಜಿರ ತಂಪ್ ಎನ್ನನೆ ಇಪ್ಪೊ, ಅನ್ನನೆ ನಂಬಿಕಸ್ತನಾನ ದೂತನು ಇಪ್ಪ. ಅಂವೊ ತಾಂಡ ಒಡೆಯಂಡ ಆತ್ಮತ್‌ನ ತಂಪಾಯಿತ್‌ ಮಾಡುವ. 14 ಇನಾಮ್‌ ತಪ್ಪೀಂದ್‌ ಎಣ್ಣಿತ್‌ ಅದ್‌ನ ಕೊಡ್‌ಕತಂವೊ, ಮಳೆ ಇಲ್ಲತ ಮೋಡಕು ಗಾಳಿಕು ಸರಿಸಮ. 15 ದುಂಬ ತಾಳ್ಮೆಯಿಂಜ ಅದಿಪತಿನ ಸಹ ಒತ್ತೊನೆಕೆ ಮಾಡುವಕಯ್ಯು. ಮೊದ್ರವಾನ ತಕ್ಕ್‌ ಮೂಳೆನ ಸಹ ಜಜ್ಜುವ. 16 ತೇನ್‌ ಕ್‌ಟ್ಟ್‌ಚಾ? ಬೋಂಡಿಯಚ್ಚಕ್‌ ತಿನ್ನ್. ಮಿತಿಮೀರಿತ್‌ ತಿಂದತೇಂಗಿ ಕಕ್ಕ್‌ವಿಯ. 17 ನೀಡ ನೆರೆಮನೆಕಾರಂಡ ಮನೆಕ್‌ ಅಕ್ಕಕ್ಕ ಪೋಕತೆ. ಅನ್ನನೆ ಪೋಚೇಂಗಿ ಅಂವೊಂಗ್‌ ಮದಿಯಾಯಿತ್‌ ನಿನ್ನ ದ್ವೇಷ ಮಾಡುವ. 18 ನೆರೆಮನೆಕಾರಂಗ್‌ ವಿರೋದವಾಯಿತ್‌ ಪೊಟ್ಟ್‌ಸಾಕ್ಷಿ ಕೊಡ್‌ಪಂವೊ ದೊಣ್ಣೆಕು, ಕತ್ತಿಕು, ಚೂಪಾನ ಅಂಬ್‌ಕು ಸರಿಸಮ. 19 ಕಷ್ಟಕಾಲತ್‌ ದ್ರೋಹಿರ ಮೇಲೆ ನಂಬಿಕೆ ಬೆಪ್ಪದ್‌ ಒಡ್‌ಂದ ಪಲ್ಲ್‌ಲ್ ಕಡ್‌ಚಿತ್‌ ತಿಂಬನೆಕೆಯು, ಪೊಟ್ಟಿ ಪೋನ ಕಾಲ್‌ಲ್‌ ನಡ್‌ಪನೆಕೆಯು ಇಪ್ಪ. 20 ಮನಸ್ಸ್‌ ದುಃಖತ್‌ಲ್‌ ಉಳ್ಳಂವೊಂಗ್‌ ಕುಶಿರ ಪಾಟ್ ಪಾಡ್‌ವಂವೊ, ಕುಳ್‌ರ್ ಕಾಲತ್‌ಲ್‌ ಬಟ್ಟೆನ ಉತ್ತ್‌ವಂವೊನೆಕೆಯು, ಗಾಯತ್‌ರ ಮೇಲೆ ಬೂಕ್‌ನ ಪುಳಿನೀರ್‌ನೆಕೆಯು ಇಪ್ಪ. 21 ನೀಡ ವಿರೋದಿಕ್‌ ಕೆಲಪೈಚಿತ್‌ ಉಂಡೇಂಗಿ ಅಂವೊಂಗ್‌ ಉಂಬಕ್‌ ಕೂಳ್‌ ಕೊಡ್. ಅಂವೊಂಗ್‌ ಬಾಯಾರಿಕೆಯಾಯಿತ್‌ ಉಂಡೇಂಗಿ ಕುಡಿಪಕ್‌ ನೀರ್‌ ಕೊಡ್. 22 ಅನ್ನನೆ ಮಾಡ್‌ವಗುಂಡ್, ತಿತ್ತ್‌ರ ಕಂಡ ಅಂವೊಂಡ ಮಂಡೆರ ಮೇಲೆ ಇಟ್ಟನೆಕೆ ಆಪ. ಯೆಹೋವ ಅದ್‌ಂಗ್‌ ಸೆರಿಯಾನ ಪ್ರತಿಫಲ ನೀಕ್‌ ತಪ್ಪ. 23 ಬಡಕ್‌ ದಿಕ್ಕ್‌ಯಿಂಜ ಬಪ್ಪ ಗಾಳಿ ಮಳೆನ, ಚಾಡಿ ಎಣ್ಣುವ ನಾವ್‌ ಚೆಡಿನ ಬಪ್ಪ್‌ಚಿಡುವ. 24 ಜಗಳಗಂಟಿರ ಪೊಣ್ಣ್‌ರ ಕೂಡೆ ಬಲ್ಯ ಮನೆಲ್ ವಾಸ ಮಾಡೊಕಿಂಜಿ, ಮನೆರ ಕೊಡಿಲ್‌ ಒರ್‌ ಮೂಲೆಲ್‌ ವಾಸ ಮಾಡೊದೇ ಮೇಲ್. 25 ದೂರತ್ತಿಂಜ ಬಪ್ಪ ನಲ್ಲ ಸುದ್ದಿ, ಬಾಯಾರಿಕೆಯಾಯಿತ್‌ ಉಳ್ಳಂವೊಂಗ್‌ ಕ್‌ಟ್ಟುವ ಪಚ್ಚೆ ನೀರ್‌ರನೆಕೆ ಇಪ್ಪ. 26 ದುಷ್ಟಂಗ್‌ ತಗ್ಗುವ ನೀತಿವಂತ ಪಾಳಾನ ಬುಗ್ಗೆಕು, ಕಲ್‌ಂಗ್‌ನ ಕಣತೆರಕು ಸರಿಸಮ. 27 ತೇನ್ನ ಮಿತಿಮೀರಿತ್‌ ತಿಂಬದ್‌ ನಲ್ಲದಿಲ್ಲೆ. ಅನ್ನನೆ ಜನ ತನ್ನ ಮೆಚ್ಚಿಯಂಡೂಂದ್‌ ಪೇಚಾಡ್‌ವದ್‌ ನಲ್ಲದಿಲ್ಲೆ. 28 ತಾಂಡ ಆತ್ಮತ್‌ನ ಅಡಕ್‌ವಕ್‌ ಕಯ್ಯತ ಮನುಷ್ಯ ಗೋಡೆ ಬುದ್ದಿತ್‌ ಪಾಳಾನ ಪಟ್ಟಣತ್‌ರನೆಕೆ ಇಪ್ಪ. |
© 2017, New Life Literature (NLL)