ಜ್ಞಾನತ್‌ರ ಪಡಿಮ 21 - ಕೊಡವ ಬೈಬಲ್1 ರಾಜಂಡ ಹೃದಯ ಯೆಹೋವಂಡ ಕೈಯಿಲ್‌ ತೋಡುರನೆಕೆ ಉಂಡ್. ಅದ್‌ನ ಅಂವೊಂಡ ಚಿತ್ತತ್‌ರನೆಕೆ ಏದ್‌ ಬರಿಕ್‌ ಬೋಂಡಿಯೇಂಗಿಯು ತಿರ್‌ಕುವ. 2 ಒರ್‌ ಮನುಷ್ಯ ಮಾಡುವ ಕಾರ್ಯಯೆಲ್ಲ ಅಂವೊಂಡ ದೃಷ್ಟಿಕ್‌ ಸೆರಿಯಾಯಿತ್‌ ಕಾಂಗು, ಆಚೇಂಗಿ ಯೆಹೋವ ಅಂವೊಂಡ ಉದ್ದೇಶತ್‌ನ ಪರೀಕ್ಷೆ ಮಾಡುವ. 3 ಬಲಿ ಕೊಡ್‌ಪಕಿಂಜಿ ನೀತಿನ ಪಿಂಞ ನ್ಯಾಯತ್‌ನ ಮಾಡ್‌ವದೇ ಯೆಹೋವಂಗ್‌ ಕುಶಿ. 4 ಚೊಕ್ಕ್‌ಲ್‌ ನೋಟ್‌ವ ಕಣ್ಣು, ಆಂಗಾರತ್‌ರ ಹೃದಯ, ದುಷ್ಟಂಡ ಬೊಳ್‌ಚ ಎಲ್ಲಾ ಪಾಪ ಮಾಡ್‌ವಕ್‌ ಬಟ್ಟೆ ಕಾಟುವ. 5 ಕಷ್ಟಪಟ್ಟಿತ್‌ ಕೆಲಸ ಮಾಡುವಂವೊಂಡ ಯೋಜನೆ ಅಬಿವೃದಿ ಪೊಂದ್ವನೆಕೆ ಮಾಡುವ. ಆತುರತ್‌ಲ್‌ ನಡ್‌ಪಂವೊಂಡ ಯೋಜನೆ ಗರಿಬನಾಪಕ್‌ ಮಾಡುವ. 6 ಪೊಟ್ಟ್‌ ತಕ್ಕ್‌ಯಿಂಜ ಕ್‌ಟ್ಟ್‌ನ ಐಶ್ವರ್ಯ ಬೆರಿಯ ಇಲ್ಲತನೆಕೆ ಆಪ ಮಂಜ್‌ರನೆಕೆ, ಅದ್‌ ಚಾವ್‌ರ ಕೆಣಿ. 7 ದುಷ್ಟಂಗ ನ್ಯಾಯತ್‌ನ ಮಾಡ್‌ವಕ್‌ ಮನಸ್ಸಿಲ್ಲತೆ ಇಪ್ಪಗುಂಡ್, ಅಯಿಂಗ ಮಾಡುವ ಹಿಂಸೆಯಿಂಜಲೇ ಅಯಿಂಗ ನಾಶ ಆಯಿಪೋಪ. 8 ಕುತ್ತ ಉಳ್ಳಂವೊಂಡ ಬದ್‌ಕ್‌ರ ಬಟ್ಟೆ ಕ್‍ೕಡಾನದಾಯಿತ್‌ ಉಂಡ್. ಆಚೇಂಗಿ ಶುದ್ದವಾನಂವೊಂಡ ನಡ್‌ತೆ ನೇರಾನದ್. 9 ಜಗಳಗಂಟಿರ ಕೂಡೆ ಬಲ್ಯ ಮನೆಲ್ ವಾಸ ಮಾಡೊಕಿಂಜಿ, ಮನೆರ ಕೊಡಿಲ್‌ ಒರ್‌ ಮೂಲೆಲ್‌ ವಾಸ ಮಾಡೊದೇ ಮೇಲ್. 10 ದುಷ್ಟಂಡ ಮನಸ್ಸ್‌ ಕ್‍ೕಡ್‌ನ ಮಾಡೊಕ್‌ ಕುಶಿಪಡುವ. ಅಂವೊಂಡ ಕಣ್ಣ್‌ಲ್‌ ನೆರೆಮನೆಕಾರಂಗ್‌ ಕರುಣೆ ಇಲ್ಲೆ. 11 ಪರಿಹಾಸ ಮಾಡ್‌ವಂವೊನ ದಂಡ್‌ಚಿಡುವಕ ಸಾದು ಮನುಷ್ಯ ಅರಿವುನ ಪಡ್‌ಂದೊವ. ಬುದ್ದಿವಂತಂವೊನ ಬೋದನೆ ಮಾಡುವಕ ಅಂವೊ ಅರ್ಥಮಾಡಿಯೊವ. 12 ನೀತಿವಂತಂವೊನಾನ ದೇವ ದುಷ್ಟಂಗಡ ಮನೆನ ಎಚ್ಚರ ಎಡ್‌ತಿತ್‌ ನೋಟಿತ್, ಅಯಿಂಗಳ ನಾಶ ಮಾಡಿರುವ. 13 ಗರೀಬ ಕೂತ್‌ಡ್‌ವಕ ಕೆಮಿ ಕೊಡ್‌ಕತೆ ಪೋಚೇಂಗಿ, ತಾನ್‌ ಜೋರಾಯಿತ್‌ ಕೂತ್‌ಡುವಕ ದಾರು ಜವಾಬ್ ಕೊಡ್‌ಪ್‌ಲೆ. 14 ಗುಟ್ಟಾಯಿತ್‌ ಕೊಡ್‌ಪ ಇನಾಮ್‌ ಚೆಡಿನ ಶಾಂತ ಪಡ್‌ತುವ. ಮಡ್‌ಲ್‌ ಉಳ್ಳ ಲಂಚ ಬಲ್ಯ ಚೆಡಿನ ಸಮಾದಾನ ಪಡ್‌ತುವ. 15 ನ್ಯಾಯವಾನ ತೀರ್‌ಪ್‌ ನೀತಿವಂತಯಿಂಗಕ್‌ ಕುಶಿ, ಆಚೇಂಗಿ ದುಷ್ಟಂಗಕ್‌ ನಾಶ. 16 ವಿವೇಕತ್‌ರ ಬಟ್ಟೆನ ಬುಟ್ಟಿತ್‌ ಪೋನಂವೊ ಕಡೇಕ್‌ ಚತ್ತಯಿಂಗಡ ಗುಂಪ್‌ಕ್‌ ಕೂಡಿರುವ. 17 ಸುಕಬೋಗತ್‌ನ ಪ್ರೀತಿ ಮಾಡ್‌ವಂವೊ ಗರೀಬನಾಪ. ಕಳ್ಳ್‌ನೆ ಪಿಂಞ ಎಣ್ಣೆ ಪ್ರೀತಿ ಮಾಡ್‌ವಂವೊ ಐಶ್ವರ್ಯವಂತಂವೊನಾಪುಲೆ. 18 ನೀತಿವಂತಂವೊಂಗ್‌ ಬದ್‌ಲ್‌ ದುಷ್ಟನು, ಸತ್ಯವಂತಯಿಂಗಡ ಬದ್‌ಲ್‌ ದ್ರೋಹಿಯು ದಂಡನೆನ ಅನುಪವಿಚಿಡುವ. 19 ಜಗಳಗಂಟಿಯು ಮುಂಜೆಡಿಯು ಉಳ್ಳ ಪೋಣ್ಣಾಳ್‌ರ ಕೂಡೆ ವಾಸ ಮಾಡುವಕಿಂಜಿ ಮಣಬೂಮಿಲ್‌ ವಾಸ ಮಾಡೊದೇ ಮೇಲ್. 20 ಜ್ಞಾನಿಯಾನಂವೊಂಡ ಮನೆಲ್ ಬೋಂಡಿಯಾನ ಸಂಪತು ಎಣ್ಣೆಯು ಇಪ್ಪ. ಆಚೇಂಗಿ ಮೂಡನಾನಂವೊ ತಾಂಡ ಪಕ್ಕ ಉಳ್ಳ ಎಲ್ಲಾನ ಮುಗ್ಗಿರುವ. 21 ನೀತಿನ ಪಿಂಞ ಪ್ರೀತಿನ ತ್‍ೕಡ್‌ವಂವೊ, ನಲ್ಲ ಬದ್‌ಕ್‌ನ ನೀತಿನ ಪಿಂಞ ಗನತ್‌ನ ಪಡೆಯುವ. 22 ಜ್ಞಾನವುಳ್ಳಂವೊ ಶಕ್ತಿವಂತಯಿಂಗಡ ಪಟ್ಟಣತ್‌ರ ವಿರುದ್ದ ಪೋಯಿತ್‌ ಅಯಿಂಗ ನಂಬ್‌ನ ಬಲವಾನ ಕೋಟೆನ ನಾಶ ಮಾಡುವ. 23 ತಾಂಡ ಬಾಯಿನ ಪಿಂಞ ನಾವ್‌ನ ಕಾಪಂವೊ, ನಾಶತಿಂಜೆಲ್ಲ ಅಂವೊನ ಕಾಪಾಡಿಯೊವ. 24 ಬಡಾಯಿಯು ಆಂಗಾರವು ಉಳ್ಳಂವೊಂಗ್‌ ಪರಿಹಾಸಕಾರಂದ್‌ ಪೆದ. ಅಂವೊ ಗರ್ಬತ್‌ಂಜ ಬಲ್ಯ ಚೆಡಿಲ್‌ ನಡ್‌ಪ. 25 ಸೋಮಾರಿರ ದಂಡ್‌ ಕೈಯು ಕೆಲಸ ಮಾಡುವಕ್‌ ಒತ್ತತೆ ಪೋನಗುಂಡ್‌ ಅಂವೊಂಡ ಆಸೆ ಅಂವೊನ ಕೊಲ್ಲುವ. 26 ಅಂವೊ ದಿವಸಯೆಲ್ಲಾ ಕುಶಿಲ್‌ ಆಸೆಪಟ್ಟಂಡೇ ಉಂಡ್. ಆಚೇಂಗಿ ನೀತಿವಂತ ತಾಂಗಾಯಿತ್‌ ಬೆಕ್ಕತೆ ಉದಾರವಾಯಿತ್‌ ಕೊಡ್‌ಪ. 27 ದುಷ್ಟಂಗ ಕೊಡ್‌ಪ ಬಲಿ ಯೆಹೋವಂಗ್‌ ಅಸಹ್ಯವಾಯಿತುಂಡ್. ಅನ್ನನಾಚೇಂಗಿ, ಅದ್‌ನ ಕ್‍ೕಡಾನ ಯೋಜನೆಲ್‌ ಅರ್ಪಿಚಿಟ್ಟತೇಂಗಿ ಇಂಞು ಎಚ್ಚಕ್‌ ಅಸಹ್ಯವಾನದಾಯಿತ್‌ಪ್ಪ? 28 ಪೊಟ್ಟ್‌ ಸಾಕ್ಷಿ ಪರಿಯುವಂವೊ ನಾಶ ಆಯಿಪೋಪ. ಆಚೇಂಗಿ ಎಚ್ಚರಿಕೆಯಿಂಜ ಕ್‍ೕಪಂವೊ ಸಾಕ್ಷಿ ಕೊಡ್‌ತಿತ್‌ ಗೆಲ್ಲುವ. 29 ದುಷ್ಟ ತಾಂಡ ಮೂಡ್‌ನ ಶೂರಂಡನೆಕೆ ಕಾಂಬ್‌ಚಿಡುವ. ಆಚೇಂಗಿ ಸತ್ಯವಂತಂವೊ ತಾನ್‌ ಪೋಪ ಬಟ್ಟೆರ ವಿಷಯತ್‌ ಎಚ್ಚರಿಕೆಯಿಂಜ ಗೇನ ಮಾಡುವ. 30 ಮನುಷ್ಯಂಡ ಜ್ಞಾನವು, ಬುದ್ದಿಯು, ಆಲೋಚನೆಯು ಯೆಹೋವಂಡ ಮಿಂಞ ನಿಪ್ಪುಲೆ. 31 ಸೈನ್ಯ ಯುದ್ದಕಾಯಿತ್‌ ಕುದುರೆನ ತಯಾರ್‌ ಮಾಡುವಕಾಪ್ಪ, ಆಚೇಂಗಿ ಜಯ ಕ್‌ಟ್ಟೊದ್‌ ಯೆಹೋವಡಿಂಜಲೇ. |
© 2017, New Life Literature (NLL)