ಜ್ಞಾನತ್‌ರ ಪಡಿಮ 19 - ಕೊಡವ ಬೈಬಲ್1 ಕಪಟವಾಯಿತ್‌ ತಕ್ಕ್‌ ಪರಿವ ಮೂಡಕಿಂಜಿ, ಸತ್ಯತ್‌ಲ್‌ ನಡ್‌ಪ ಗರಿಬನೇ ಮೇಲ್. 2 ಮನುಷ್ಯಂಗ್‌ ಅರಿವು ಇಲ್ಲತೆ ಇಪ್ಪದ್‌ ನಲ್ಲದಿಲ್ಲೆ. ದುಡುಕುವ ಕಾಲ್‌ ಬಟ್ಟೆ ತಪ್ಪಿ ಪೋಪ. 3 ಮನುಷ್ಯ ದಡ್ಡತನತ್‌ಂಜ ತಾಂಡ ಬದ್‌ಕ್‌ರ ಬಟ್ಟೆನ ಕೆಡ್‌ತಿಯೊವ. ಅಲ್ಲಿಂಜ ಯೆಹೋವಂಡ ಮೇಲೆ ಚೆಡಿ ಮಾಡಿಯೊವ. 4 ಐಶ್ವರ್ಯ, ದುಂಬ ಸ್ನೇಹಿತಂಗಳ ಕೂಟುವ. ಆಚೇಂಗಿ ಗರಿಬಂಗ್, ಉಳ್ಳ ಸ್ನೇಹಿತನು ಬುಟ್ಟಿತ್‌ ಪೋಪ. 5 ಪೊಟ್ಟ್‌ ಸಾಕ್ಷಿ ಪರಿಯುವಂವೊಂಗ್‌ ದಂಡನೆ ಕಂಡಿತ. ಪೊಟ್ಟ್‌ ಪರಿಯುವಂವೊನು ತಪ್ಪ್‌ಚಿಡುವಕಯ್ಯುಲೆ. 6 ಗೌರವ ಉಳ್ಳ ಮನುಷ್ಯಂಡ ದಯೆ ಕ್‌ಟ್ಟ್‌ವಕ್‌ ದುಂಬ ಜನ ಪೇಚಾಡುವ. ಉದಾರಿಯಾನ ಮನುಷ್ಯಂಗ್‌ ಎಲ್ಲಾರು ಸ್ನೇಹಿತ. 7 ಗರಿಬನ ಅಂವೊಂಡ ಮನೆಕಾರ ಎಲ್ಲಾರು ವಿರೋದ ಮಾಡುವಲ್ಲ. ಅನ್ನನಾಚೇಂಗಿ ಇಂಞು ಎಚ್ಚಕ್‌ ಅಂವೊಂಡ ಸ್ನೇಹಿತಂಗ ದೂರ ಆಪ. ಅಯಿಂಗಡ ಸಹಾಯಕಾಯಿತ್‌ ಅಂವೊ ಬೋಡ್‌ಚೇಂಗಿಯು, ಅಯಿಂಗ ಅಂವೊಂಗ್‌ ಕ್‌ಟ್ಟುಲೆ. 8 ಜ್ಞಾನತ್‌ನ ಪಡೆಯುವಂವೊ ತಾಂಡ ಆತ್ಮತ್‌ನ ಪ್ರೀತಿಚಿಡುವ. ಬುದ್ದಿನ ಕಾಪಾಡ್‌ವಂವೊ ನಲ್ಲದ್‌ನ ಪಡೆಯುವ. 9 ಪೊಟ್ಟ್‌ ಸಾಕ್ಷಿ ಪರಿಯುವಂವೊಂಗ್‌ ದಂಡನೆ ಕಂಡಿತ. ಪೊಟ್ಟ್‌ ಪರಿಯುವಂವೊನು ತಪ್ಪ್‌ಚಿಡುವಕಯ್ಯುಲೆ. 10 ಕಂಡಬಟ್ಟೆರ ಬದ್‌ಕ್‌ ಮೂಡಂಗ್‌ ಸೆರಿ ಆಪುಲೆ. ಅನ್ನನಾಚೇಂಗಿ ಗುಲಾಮೆ ರಾಜನ ಆಳ್‌ವಿಕೆ ಮಾಡೊದ್‌ ಇಂಞು ಮೋಸ. 11 ಮನುಷ್ಯಂಡ ವಿವೇಕ ಅಂವೊಂಡ ಚೆಡಿನ ಅಡಕುವ. ಕುತ್ತತ್‌ನ ಮನ್ನಿಚಿಡ್‌ವದ್‌ ಅಂವೊಂಗ್‌ ಕೀರ್ತಿ. 12 ರಾಜಂಡ ಚೆಡಿ ಸಿಂಹ ಕೂತ್‌ಡ್‌ವನೆಕೆ ಇಪ್ಪ. ಆಚೇಂಗಿ ಅಂವೊಂಡ ದಯೆ ಪಿಲ್ಲ್‌ರ ಮೇಲೆ ಪೊಯ್ಯುವ ಮಂಜಿ ತುಳಿರನೆಕೆ ಇಪ್ಪ. 13 ಮೂಡನಾನ ಮೋಂವೊ ಅಪ್ಪಂಗ್‌ ನಾಶತ್‌ನ ಕೊಂಡ ಬಪ್ಪ. ಜಗಳ ಮಾಡುವ ಪೊಣ್ಣ್‌ ನಿಕ್ಕತೆ ಚೋರುವ ನೀರ್‌ರನೆಕೆ ಇಪ್ಪ. 14 ಮನೆಯು ಆಸ್ತಿಯು ಅಪ್ಪಂಗಡಕಿಂಜ ಕ್‌ಟ್ಟುವ ಬಾದ್ಯತೆ. ಆಚೇಂಗಿ ಬುದ್ದಿ ಉಳ್ಳ ಪೊಣ್ಣ್‌ನ ಯೆಹೋವ ಮಾತ್‌ರ ತಪ್ಪ ಕಯ್ಯು. 15 ಸೋಮಾರಿತನ ವರಿಪೋಯಿತ್‌ ಬುದ್ದ್ ಪೋಪಕ್‌ ಮಾಡುವ, ಆಚೇಂಗಿ ಒಂದು ಪಣಿ ಮಾಡತೆ ಉಳ್ಳಂವು ಕೆಲಪೈಪಿಂಜ ನರಳುವ. 16 ಆಜ್ಞೆಕ್‌ ತಗ್ಗಿತ್‌ ನಡ್‌ಪಂವೊ ತಾಂಡ ಜೀವತ್‌ನ ಕಾಪಾಡುವ. ಆಚೇಂಗಿ ತಾಂಡ ಬಟ್ಟೆಲ್‌ ಎಚ್ಚರಯಿಲ್ಲತೆ ನಡ್‌ಪಂವೊ ಚತ್ತ್‌ ಪೋಪ. 17 ಗರಿಬಂಗ್ ದಯೆ ಕಾಟ್‌ವಂವೊ ಯೆಹೋವಂಗ್‌ ಸಾಲ ಕೊಡ್‌ಪ. ಅಂವೊ ಮಾಡ್‌ನ ಕಾರ್ಯಕ್‌ ಯೆಹೋವ ಬಹುಮಾನತ್‌ನ ತಿರಿತ್‌ ತಪ್ಪ. 18 ಚಾಯಿಮಾಡುವಕುಳ್ಳ ಸಮಯ ಇಪ್ಪಕಲೇ ನೀಡ ಮೋಂವೊನ ಚಾಯಿಮಾಪ್ಂದುಳ್ಳ ನಂಬಿಕೇಲ್‌ ಶಿಕ್ಷೆ ಕೊಡ್; ಇಲ್ಲತಪೋಚೇಂಗಿ ಅಂವೊಂಡ ನಾಶಕ್‌ ನೀನ್‌ ಕಾರಣ ಆಪಿಯ. 19 ಮುಂಜೆಡಿ ಉಳ್ಳಂವೊ ದಂಡನೆನ ಅನುಬವಿಚಿಡಂಡು. ಒಮ್ಮ ನೀನ್‌ ಅಂವೊನ ತಪ್ಪುಚಿಡುವಕ್‌ ಮಾಡ್‌ಚೇಂಗಿ, ಪ್ರತಿಕುರಿಯು ನೀನ್‌ ಅನ್ನನೆ ಮಾಡ್‌ವನೆಕೆ ಆಪ. 20 ಆಲೋಚೆನೆಕ್‌ ಕೆಮಿಕೊಡ್‌ತಿತ್, ಬುದ್ದಿತಕ್ಕ್‌ನ ಸ್ವೀಕಾರ ಮಾಡ್. ಅಕ್ಕ ಕಡೇ ಕಾಲತ್‌ಲ್‌ ನೀನ್‌ ಜ್ಞಾನಿ ಆಪಿಯ. 21 ಮನುಷ್ಯಂಡ ಮನಸ್ಸ್‌ಲ್‌ ಅನೇಕ ಯೋಜನೆ, ಆಚೇಂಗಿಯು ಯೆಹೋವಂಡ ಚಿತ್ತವೇ ನೆರವೇರುವ. 22 ತನ್ನ ಎಕ್ಕಾಲು ಪ್ರೀತಿಚಿಡಂಡೂಂದೇ ಮನುಷ್ಯ ಆಸೆ ಪಡುವ. ಪೊಟ್ಟ್‌ ಪರಿಯುವಕಿಂಜಿ ಗರೀಬನಾಯಿತ್‌ ಇಪ್ಪದೇ ಮೇಲ್. 23 ಯೆಹೋವಂಗ್‌ ಬೊತ್ತಿತ್‌ ನಡ್‌ಪಯಿಂಗ ದುಂಬ ಕಾಲ ಬದ್‌ಕುವ. ಅದ್‌ನ ಪಡ್‌ಂದಂವೊ ತೃಪ್ತಿ ಆಯಿತ್‌ ನೆಲೆನಿಪ್ಪ. ಕ್‍ೕಡ್‌ ಅಂವೊಂಡ ಪಕ್ಕ ಬಪ್ಪುಲೆ. 24 ಸೋಮಾರಿ ತಾಂಡ ಕೈಯಿನ ತಟ್ಟೆಲ್‌ ಬೆಚ್ಚಿತ್, ಅದ್‌ನ ಪುನಃ ತಾಂಡ ಬಾಯಿಕ್‌ ಸಹ ಎಡ್‌ತಂಡ್‌ ಪೋಪುಲೆ. 25 ಪರಿಹಾಸ ಮಾಡ್‌ವಂವೊನ ದಂಡ್‌ಚಿಡ್, ಅಕ್ಕ ಸಾದು ಮನುಷ್ಯ ಬುದ್ದಿವಂತನಾಪ. ವಿವೇಕವುಳ್ಳಂವೊನ ಎಚ್ಚರ ಮಾಡ್‌ಚೇಂಗಿ ಅಂವೊ ಅರಿವುನ ಅರ್ಥಮಾಡಿಯೊವ. 26 ಅಪ್ಪನ ಹಿಂಸೆಪಡುತಿತ್‌ ಅವ್ವನ ಓಡ್‌ಚಿಡುವಂವೊ ಞಾಣಕ್‍ೕಡ್‌ನ ಪಿಂಞ ಅವಮಾನತ್‌ನ ಕೊಂಡಬಪ್ಪ. 27 ನಾಡ ಮೋನೇ, ನೀನ್‌ ಬುದ್ದಿತಕ್ಕ್‌ಕ್‌ ಕೆಮಿ ಕೊಡ್‌ಕತೆ ಪೋಚೇಂಗಿ, ಅರಿವ್‌ನ ತಪ್ಪ ತಕ್ಕ್‌ಯಿಂಜ ದೂರ ಪೋಪಿಯ. 28 ಅನ್ಯಾಯ ಸಾಕ್ಷಿ ನ್ಯಾಯತ್‌ನ ಪರಿಹಾಸ ಮಾಡುವ. ದುಷ್ಟಂಡ ಬಾಯಿ ಕ್‍ೕಡ್‌ನ ಮುಗ್ಗಿರುವ. 29 ಪರಿಹಾಸ ಮಾಡ್‌ವಯಿಂಗಕ್‌ ದಂಡನೆಯು, ಮೂಡಂಗಡ ಬೆನ್ನ್‌ಕ್ ಪೊಯ್ತು ತಯಾರಾಯಿತ್ ಉಂಡ್. |
© 2017, New Life Literature (NLL)