ಜ್ಞಾನತ್‌ರ ಪಡಿಮ 17 - ಕೊಡವ ಬೈಬಲ್1 ಜಗಳ ದುಂಬ್‌ನ ಮನೆಲ್ ಬಲ್ಯ ಊಟ ಉಂಬಕಿಂಜಿ ಸಮಾದಾನತ್‌ ತಿಂಬ ಚೆರಿಯ ತುಂಡ್‌ ಒಟ್ಟಿಯೇ ಮೇಲ್. 2 ಬುದ್ದಿವಂತ ಅಡಿಯಾಳ್, ಅವಮಾನತ್‌ಲ್‌ ಬಡುಕ್ಕುವ ಮೋಂವೊನ ಆಳುವ. ಅಂವೊಂಡ ಅಣ್ಣತಮ್ಮಣಂಗಡ ಆಸ್ತಿಲ್‌ ಇಂವೊಂಗು ಪಾಲ್‌ ಕ್‌ಟ್ಟುವ. 3 ಜನ ಬೊಳ್ಳಿನ ತಿತ್‌ ಬೂಕ್ಕು ಪಾತ್‌ರತ್‌ಲು ಪೊನ್ನ್‌ನ ತಿತ್ತ್‌ ತೊಳೆಯಿಲು ಇಟ್ಟಿತ್‌ ಪರೀಕ್ಷೆ ಮಾಡುವ, ಆಚೇಂಗಿ ಜನಡ ಹೃದಯತ್‌ನ ಪರೀಕ್ಷೆ ಮಾಡ್‌ವಂವೊ ಯೆಹೋವನೇ. 4 ದುಷ್ಟ ಮೋಸಕಾರಂಗಡ ತಕ್ಕ್‌ಕ್‌ ಕೆಮಿ ಕೊಡ್‌ಪ. ಪೊಟ್ಟ್‌ಮಾರಿ ನಾಶ ಮಾಡುವಂಡ ತಕ್ಕ್‌ಕ್‌ ಕೆಮಿ ಕೊಡ್‌ಪ. 5 ಗರೀಬನ ಪರಿಹಾಸ ಮಾಡ್‌ವಂವೊ ಅಂವೊನ ಸೃಷ್ಟಿ ಮಾಡ್‌ನಂವೊನ ಅವಮಾನ ಮಾಡ್‌ವ. ಬೋರೆ ಒಬ್ಬ ಅಪಾಯತ್‌ಲ್‌ ಇಪ್ಪದ್‌ನ ಕಂಡಿತ್‌ ಕುಶಿಪಡ್‌ವಂವೊಂಗ್‌ ಶಿಕ್ಷೆ ಕಂಡಿತ. 6 ಕ್‌ರ್‌ಮಕ್ಕ ವಯಸ್ಸಾನಯಿಂಗಕ್‌ ಕಿರೀಟ. ಮಕ್ಕಡ ಕೀರ್ತಿ ಅಯಿಂಗಳ ಪೆತ್ತಯಿಂಗಳೇ 7 ಉತ್ತಮವಾನ ತಕ್ಕ್‌ ಮೂಡಂಗ್‌ ಸೆರಿ ಆಪುಲೆ. ಅನ್ನನಾಚೇಂಗಿ ಪೊಟ್ಟ್‌ ಪರಿಯುವದ್‌ ಅದಿಪತಿಯಂಗಕ್‌ ಚೆನ್ನಂಗೂ ಸೆರಿ ಆಪುಲೆ. 8 ಲಂಚ ಕೊಡ್‌ಪಂವೊಂಡ ದೃಷ್ಟಿಲ್‌ ಅದ್‌ ಮಂತೃತ್‌ರ ಕಲ್ಲುರನೆಕೆ ಇಪ್ಪ; ಅದಂಡ ಮೂಲಕ ಅಯಿಂಗಕ್‌ ಬೋಮಡಿಯಾನ ಎಲ್ಲ ಸಾತ್ಯಮಾಡುವ. 9 ಕುತ್ತತ್‌ನ ಮನ್ನಿಚಿಡುವಂವೊ ಸ್ನೇಹತ್‌ನ ಕುಶಿ ಪಟ್ಟಂಡುಂಡ್. ಆಚೇಂಗಿ ಆ ವಿಷಯತ್‌ನ ಎಣ್ಣಿಯಂಡೇ ಇಂಜತೇಂಗಿ ಸ್ನೇಹಿತಂಗಳ ಸಹ ಬೋರೆ ಮಾಡಿರುವ. 10 ಮೂಡನ ಅರ್ಥ ಮಾಡ್‌ಚಿಡೊಕ್‌ ನೂರ್‌ ಪೊಯ್ಯಿತ್‌ ಕೊಡ್‌ಪಕಿಂಜಿ ಬುದ್ದಿವಂತಂವೊಂಗ್‌ ಒಮ್ಮ ಚೂಕ್‌ಚಿಟ್ಟತೇಂಗಿ ಮದಿ ಆಪ. 11 ದುಷ್ಟ ದಂಗೆ ಏವೊಕೇ ಕುಶಿ ಪಡುವ; ಆಚೇಂಗಿ ಅಯಿಂಗಕ್‌ ಕಠಿಣ ದಂಡನೆ ಕ್‌ಟ್ಟುವನೆಕೆ ಕ್ರೂರದೂತನ ಅಂವೊಂಗ್‌ ವಿರೋದವಾಯಿತ್‌ ಅಯಿಪ. 12 ತಾಂಡ ದಡ್ಡತನಲ್‌ ಕಳಿಚಂಡುಳ್ಳ ದಡ್ಡನ ಎದಿಕೆ ಕ್‌ಟ್ಟೊಕಿಂಜಿ ತಾಂಡ ಕುಟ್ಟಿಯಳ ಕಳ್‌ಂದಂಡ ಚೆಡಿಲ್‌ ಉಳ್ಳ ಕರಡಿನ ಎದಿಕೆ ಕ್‌ಟ್ಟೊದೇ ನಲ್ಲದ್. 13 ನಲ್ಲದ್ ಮಾಡ್‌ನವೊಂಗ್‌ ಕ್‍ೕಡ್‌ ಮಾಡ್‌ನಂವೊಂಡ ಮನೆನ, ಕ್‍ೕಡ್‌ ಬುಟ್ಟಿತ್‌ ಪೋಪುಲೆ. 14 ವಿವಾದತ್‌ನ ಸುರುಮಾಡ್‌ವದ್‌ ನೀರ್‌ಕಟ್ಟೆನ ತೊರ್‌ಂದನೆಕೆ. ಆನಗುಂಡ್‌ ಅದ್‌ ಬಲ್ಯದಾಪಕ್‌ ಮಿಂಞಲೇ ನಿಪ್ಪ್‌ಚಿಡ್. 15 ಅಪರಾದಿನ ಕುತ್ತಯಿಲ್ಲತಂವೊಂದ್‌ ಎಣ್ಣುವಂವೊನ ಪಿಂಞ ನೀತಿವಂತಂವೊನ ಅಪರಾದೀಂದ್‌ ಎಣ್ಣುವ ದಂಡಾಳ್‌ನೂ ಯೆಹೋವಂಗ್‌ ಅಸಹ್ಯವಾನಯಿಂಗ. 16 ಜ್ಞಾನತ್‌ನ ಕ್ರಯಕ್‌ ಎಡ್‌ಪಕಾಯಿತ್‌ ಮೂಡಂಡ ಕೈಯಿಲ್‌ ದುಡ್ಡ್ ಎನ್ನಂಗ್? ಅದ್‌ಂಡ ವಿಷಯತ್‌ ಅಂವೊಂಗ್‌ ಮನಸ್ಸ್‌ ಇಲ್ಲೆಲ್ಲಾ. 17 ಸ್ನೇಹಿತ ಎಲ್ಲಾ ಸಮಯತ್‌ಲು ಪ್ರೀತಿ ಮಾಡುವ. ಇಕ್ಕಟ್‌ರ ಸಮಯತ್‌ ಸಹಾಯ ಮಾಡುವಕೇ ಅಣ್ಣತಮ್ಮಣಂಗ ಪುಟ್ಟಿತುಂಡ್. 18 ಬುದ್ದಿಯಿಲ್ಲತ ಮನುಷ್ಯನೇ ತಾಂಡ ಸ್ನೇಹಿತ ಎಡ್‌ತ ಸಾಲಕ್‌ ಜಾಮೀನ್‌ ಕೊಡ್‌ಪ. 19 ಜಗಳತ್‌ನ ಕುಶಿ ಪಡುವಂವೊ ಪಾಪತ್‌ನ ಕುಶಿ ಪಡುವ. ತಾಂಡ ಪಡಿನ ಎತ್ತರತ್‌ಲ್‌ ಕಟ್ಟ್‌ವಂವೊ ಕ್‍ೕಡ್‌ನ ಬಪ್ಪ್‌ಚಿಡುವ. 20 ಕಪಟ ಹೃದಯ ಉಳ್ಳಯಿಂಗ ನಲ್ಲದ್‌ನ ಕಾಂಬುಲೆ. ಪೊಟ್ಟ್‌ ಪರಿಯುವಂವೊಂಗ್‌ ತೊಂದರೆಯೇ ಗತಿ. 21 ಮೂಡನ ಪೆತ್ತಂವೊಂಗ್‌ ದುಂಬ ದುಃಖ. ಅಂವೊಂಡ ಅಪ್ಪಂಗ್‌ ಕುಶಿ ಇಪ್ಪುಲೆ. 22 ಮನಸ್ಸ್‌ರ ಸಂತೋಷ ಒರ್‌ ನಲ್ಲ ಮದ್ದ್. ಆಚೇಂಗಿ ಆತ್ಮತ್‌ರ ದುಃಖ ಮೂಳೆನ ಕೀವ್‌ಚಿಡುವ. 23 ದುಷ್ಟ, ನ್ಯಾಯತ್‌ನ ಬದ್‌ಲ್‌ ಮಾಡ್‌ವಕ್‌ ಮಡ್‌ಲ್‌ ಉಳ್ಳ ಲಂಚತ್‌ನ ಸ್ವೀಕಾರ ಮಾಡಿಯೊವ. 24 ಬುದ್ದಿವಂತಂವೊಂಡ ಮಿಂಞ ಜ್ಞಾನವೇ ಇಪ್ಪ. ಆಚೇಂಗಿ ಮೂಡಂಡ ಕಣ್ಣ್‌ ಈ ಬೂಮಿರ ಕಡೇಕತ್ತನೆ ತಿರ್‌ಗಿಯಂಡಿಪ್ಪ. 25 ಮೂಡನಾನ ಮೋಂವೊ ತಾಂಡ ಅಪ್ಪಂಗ್‌ ಬೇಸರ, ಪೆತ್ತ ಅವ್ವೊಂಗ್‌ ಕಯಿಪು ಆಯಿತ್‌ಪ್ಪ. 26 ಕುತ್ತಯಿಲ್ಲತಂವೊಂಗ್‌ ದಂಡನೆ ಕೊಡ್‌ಪದು ಗೌರವ ಉಳ್ಳ ಮನುಷ್ಯನ ಪೊಯ್ಯೊದು ನಲ್ಲದಿಲ್ಲೆ. 27 ಬುದ್ದಿವುಳ್ಳಂವೊ ತಾಂಡ ಬಾಯಿನ ಅಡಕ್‌ವ. ವಿವೇಕ ಉಳ್ಳಂವೊ ಶಾಂತ ಮನಸ್ಸ್‌ ಉಳ್ಳಂವೊ. 28 ಮೌನವಾಯಿತ್‌ ಇಂಜತೇಂಗಿ ಮೂಡನ ಸಹ ಜ್ಞಾನಿರನೆಕೆ ಕಾಂಬ. ತಕ್ಕ್‌ ಪರಿಯತೆ ಪೋಚೇಂಗಿ ವಿವೇಕೀಂದ್‌ ಎಣ್ಣುವ. |
© 2017, New Life Literature (NLL)