ಜ್ಞಾನತ್‌ರ ಪಡಿಮ 16 - ಕೊಡವ ಬೈಬಲ್1 ಮನಸ್ಸ್‌ರ ಯೋಜನೆ ಮನುಷ್ಯಂಗಡದ್. ನಾವ್‌ಕ್‌ ಸೆರಿಯಾನ ಜವಾಬ್ ಕೊಡ್‌ಪಂವೊ ಯೆಹೋವನೇ. 2 ಒರ್‌ ಮನುಷ್ಯ ಮಾಡುವ ಕಾರ್ಯಯೆಲ್ಲ ಅಂವೊಂಡ ದೃಷ್ಟಿಕ್‌ ಸೆರಿಯಾಯಿತ್‌ ಕಾಂಗು, ಆಚೇಂಗಿ ಯೆಹೋವ ಅಂವೊಂಡ ಉದ್ದೇಶತ್‌ನ ಪರೀಕ್ಷೆ ಮಾಡುವ. 3 ನೀಡ ಕಾರ್ಯತ್‌ನೆಲ್ಲ ಯೆಹೋವಂಗ್‌ ಒಪ್ಪ್‌ಚಿಡ್. ಅಕ್ಕ ನೀಡ ಯೋಜನೆಯೆಲ್ಲ ನೆರವೇರುವ. 4 ಯೆಹೋವ ಎಲ್ಲಾನ ತಾಂಗಾಯಿತ್‌ ಸೃಷ್ಟಿ ಮಾಡ್‌ಚಿ. ದುಷ್ಟನ ಸಹ ಕ್‍ೕಡ್‌ರ ದಿವಸಕಾಯಿತ್‌ ಉಂಟ್‌ಮಾಡ್‌ಚಿ. 5 ಆಂಗಾರಿಯ ಎಲ್ಲಾ ಯೆಹೋವಂಗ್‌ ಅಸಹ್ಯ. ಅಯಿಂಗಕ್‌ ಶಿಕ್ಷೆ ಕಂಡಿತ. 6 ಕೃಪೆಯಿಂಜಲು ಸತ್ಯತ್‌ಂಜಲು, ಪಾಪಕ್‌ ಮನ್ನಿಪ್ ಕ್‌ಟ್ಟು. ಯೆಹೋವಂಗ್‌ ಬೊತ್ತಿತ್‌ ನಡ್‌ಂದತೇಂಗಿ ಜನ ಕ್‍ೕಡ್‌ಂಜ ತಪ್ಪುವ. 7 ಒಬ್ಬಂಡ ನಡ್‌ತೆ ಯೆಹೋವ ಮೆಚ್ಚುವನೆಕೆ ಇಂಜತೇಂಗಿ, ಅಂವೊಂಡ ವಿರೋದಿಯಳ ಸಹ ಅಂವೊಂಡ ಕೂಡೆ ಸಮಾದಾನ ಆಪನೆಕೆ ಮಾಡುವ. 8 ಅನ್ಯಾಯತ್‌ಲ್‌ ಕ್‌ಟ್ಟ್‌ನ ಬಲ್ಯ ಐಶ್ವರ್ಯಕಿಂಜಿ, ನ್ಯಾಯವಾಯಿತ್‌ ಸಂಪಾದನೆ ಮಾಡ್‌ನ ಚೆನ್ನಂಗೇ ಮೇಲ್. 9 ಮನುಷ್ಯಂಡ ಮನಸ್ಸ್‌ ಅಂವೊಂಡ ಕಾರ್ಯತ್‌ನ ಗೇನ ಮಾಡುವ. ಆಚೇಂಗಿ ಅಂವೊಂಡ ಬದ್‌ಕ್‌ರ ಬಟ್ಟೆನ ತೀರ್ಮಾನ ಮಾಡ್‌ವಂವೊ ಯೆಹೋವನೇ. 10 ರಾಜ ದೇವಡ ಜ್ಞಾನತಿಂಜ ತಕ್ಕ್‌ ಪರಿಯುವ. ನ್ಯಾಯ ತ್‍ೕಪಕ ಅಂವೊ ಸರಿಯಾನದ್‌ನೇ ಎಣ್ಣುವ. 11 ನ್ಯಾಯವಾನ ಅಳತೆ ಪಿಂಞ ತಕ್ಕಡಿ ಯೆಹೋವಂಡದ್. ಚೀಲತ್‌ಲ್‌ ಉಳ್ಳ ತೂಕತ್‌ರ ಕಲ್ಲೆಲ್ಲಾ ಅಂವೊಂಡ ಕೆಲಸವೇ. 12 ಅನ್ಯಾಯ ಮಾಡುವದ್‌ ರಾಜಂಗಕ್‌ ಅಸಹ್ಯವಾನದ್, ಎನ್ನಂಗೆಣ್ಣ್‌ಚೇಂಗಿ ಅಂವೊಂಡ ಸಿಂಹಾಸನ ನೀತಿರಗುಂಡ್‌ ಸ್ತಾಪನೆ ಮಾಡ್‌ನದ್. 13 ನೀತಿರ ತಕ್ಕ್‌ನ ರಾಜಂಗ ಮೆಚ್ಚುವ. ಸತ್ಯ ಪರಿಯುವಂವೊನ ಅಯಿಂಗಕ್‌ ಕುಶಿ. 14 ರಾಜಂಡ ಬಲ್ಯ ಚೆಡಿ ಒಬ್ಬನ ಕೊಲ್ಲು. ಆಚೇಂಗಿ ಜ್ಞಾನವುಳ್ಳಂವೊ ಅದ್‌ನ ಶಾಂತ ಪಡ್‌ತುವ. 15 ರಾಜಂಡ ಮೂಡ್‌ರ ತೆಳಿಲ್‌ ಜೀವ ಉಂಡ್; ಅಂವೊಂಡ ದಯೆ ಮೋಡ ಸುರಿಯುವ ಮುಂಗಾರ್‌ ಮಳೆರನೆಕೆ. 16 ಪೊನ್ನ್‌ನ ಸಂಪಾದನೆ ಮಾಡ್‌ವಕಿಂಜಿ ಜ್ಞಾನತ್‌ನ ಸಂಪಾದನೆ ಮಾಡ್‌ವದ್‌ ಎಚ್ಚಕ್‌ ನಲ್ಲದ್! ಬೊಳ್ಳಿನ ಸಂಪಾದನೆ ಮಾಡ್‌ವಕಿಂಜಿ ಬುದ್ದಿನ ಸಂಪಾದನೆ ಮಾಡ್‌ವದ್‌ ನಲ್ಲದ್! 17 ಸತ್ಯವಂತಯಿಂಗಡ ಬದ್‌ಕ್‌ರ ಬಟ್ಟೆ ಅಯಿಂಗಳ ಕ್‍ೕಡಿಂಜ ದೂರ ಬೆಪ್ಪ. ತಾಂಡ ಬಟ್ಟೆನ ಎಚ್ಚರಿಕೆಲ್‌ ನಡ್‌ತ್‌ವಂವೊ ತಾಂಡ ಆತ್ಮತ್‌ನ ಕಾಪಾಡಿಯೊವ. 18 ನಾಶಕ್‌ ಮಿಂತ ಆಂಗಾರ ಬಪ್ಪ, ಬುದ್ದ್‌ಪೋಪಕ್‌ ಮಿಂಞ ಪೆರುಮೆ ಬಪ್ಪ. 19 ಆಂಗಾರಿಯಡ ಕೂಡೆ ಲೂಟಿನ ಪಾಲ್‌ ಮಾಡಿಯೊಕಿಂಜಿ, ಗರೀಬಂಡ ಕೂಡೆ ತಗ್ಗಿತ್‌ ಇಪ್ಪದೇ ನಲ್ಲದ್. 20 ವಿವೇಕತ್‌ಂಜ ಕಾರ್ಯತ್‌ನ ನಡ್‌ತ್‌ವಂವೊ ನಂದಾಪ. ಯೆಹೋವನ ನಂಬುವಂವೊ ಆಶೀರ್ವಾದ ಪಡ್‌ಂದಂವೊನಾಯಿತ್‌ಪ್ಪ. 21 ಹೃದಯತ್‌ಲ್‌ ಜ್ಞಾನ ಉಳ್ಳಂವೊನ ವಿವೇಕ ಉಳ್ಳಂವೊ ಎಣ್ಣಿಯಂಡ್‌ ಗುರುತ್‌ಚಿಡುವ. ಮೊದರ್ವಾನ ತಕ್ಕ್‌ಯಿಂಜ ಅರಿವು ಜಾಸ್ತಿ ಆಪ. 22 ವಿವೇಕ ಉಳ್ಳಂವೊಂಗ್‌ ವಿವೇಕವೇ ಜೀವತ್‌ರ ಬುಗ್ಗೆ ಆಯಿತ್‌ಪ್ಪ. ಆಚೇಂಗಿ ಮೂಡಂಗಕ್‌ ಅಯಿಂಗಡ ಮೂಡತನತಿಂಜಲೇ ಶಿಕ್ಷೆ ಕ್‌ಟ್ಟುವ. 23 ಜ್ಞಾನಿರ ಹೃದಯ ಅಂವೊಂಡ ಬಾಯಿಕ್‌ ವಿವೇಕತ್‌ನ ಪಡಿಪ್‌ಚಿಡುವ. ಅಯಿಂಗಡ ತಕ್ಕ್‌ ಅರಿವುನ ಜಾಸ್ತಿ ಮಾಡುವ. 24 ಮೊದ್ರವಾನ ತಕ್ಕ್‌ ತೇನೆರಿನೆಕೆ ಆತ್ಮಕ್‌ ಮೊದ್ರವಾಯಿತು, ಮೂಳೆಕ್‌ ಆರೋಗ್ಯವಾಯಿತು ಇಪ್ಪ. 25 ಮನುಷ್ಯಂಗ್‌ ಸೆರೀಂದ್‌ ಕಾಂಬ ಒರ್‌ ಬಟ್ಟೆ ಉಂಡ್, ಆಚೇಂಗಿ ಕಡೇಕ್‌ ಅದ್‌ ಚಾವ್‌ಕ್‌ ಕೊಂಡ ಪೋಪ. 26 ನಯಿಪಂವೊ ತಾಂಗಾಯಿತೇ ನಯಿಪ. ಅಂವೊಂಡ ಬಾಯಿ ಅದ್‌ನ ಮಾಡುವಕ್‌ ಒತ್ತಾಯ ಮಾಡುವ. 27 ಒಂದಂಗು ಪ್ರಯೋಜನ ಇಲ್ಲತ ಒರ್‌ ದುಷ್ಟ ಕ್‍ೕಡ್‌ನ ಕಳ್‌ಪ. ಅಂವೊಂಡ ತಕ್ಕ್‌ ಚುಡುವ ತಿತ್ತ್‌ರನೆಕೆ ಇಪ್ಪ. 28 ಕಪಟಿ ಜಗಳತ್‌ನ ಬಿತ್ತುವ. ಕುತ್ತ ಪರಿವಂವೊ ನಲ್ಲ ಸ್ನೇಹಿತಂಗಳ ಸಹ ಬೋರೆ ಮಾಡಿರುವ. 29 ಹಿಂಸೆ ಪಡುತ್‌ವಂವೊ ತಾಂಡ ನೆರಮನೆಕಾರನ ಚದಿಪ, ಅಂವೊನ ಕ್‍ೕಡಾನ ಬಟ್ಟೆಲ್‌ ಸಹ ನಡ್‌ತುವ. 30 ಕಣ್ಣ್‌ಲ್‌ ಸನ್ನ ಮಾಡುವಂವೊ ಕಪಟತ್‌ನ ಗೇನ ಮಾಡ್‌ವಕಾಯಿತ್‌ ಮುಚ್ಚ್‌ವ, ಕಿರಿನ ಕಡಿಪಂವೊ ಕ್‍ೕಡ್‌ನ ಮಾಡ್‌ವಕಾಯಿತ್‌ ಕಡಿಪ. 31 ನೀತಿರ ಬಟ್ಟೆಲ್‌ ಬಪ್ಪ ನೆರೆ ತೆಲ್‌ಮಿ ಕೀರ್ತಿರ ಕಿರೀಟ. 32 ಶಕ್ತಿವಂತಂವೊಕಿಂಜಿ ಬಲ್ಯ ತಾಳ್ಮೆ ಉಳ್ಳಂವೊ ಮೇಲಾನಂವೊ. ಒರ್‌ ಪಟ್ಟಣತ್‌ನ ಗೆಲ್ಲ್‌ವಂವೊಕಿಂಜಿ ತಾಂಡ ಚೆಡಿನ ಅಡ್‌ಕ್‌ವಂವೊ ಮೇಲಾನಂವೊ. 33 ಚೀಟಿನ ಮಡ್‌ಲ್‌ ಇಡ್‌ವಕಯ್ಯು, ಆಚೇಂಗಿ ಎಲ್ಲಾ ಕಾರ್ಯತ್‌ರ ತೀರ್ಮಾನವು ಯೆಹೋವಯಿಂಡಿಂಜಲೇ ಬಪ್ಪ. |
© 2017, New Life Literature (NLL)