ಜ್ಞಾನತ್‌ರ ಪಡಿಮ 14 - ಕೊಡವ ಬೈಬಲ್1 ಜ್ಞಾನವುಳ್ಳವ ತಾಂಡ ಮನೆನ ಕೆಟ್ಟುವ. ಆಚೇಂಗಿ ಜ್ಞಾನಯಿಲ್ಲತವ ತಾಂಡ ಕೈಯಿಂಜ ಅದ್‌ನ ನಾಶ ಮಾಡುವ. 2 ನೀತಿರ ಬಟ್ಟೆಲ್‌ ನಡ್‌ಪಂವೊ ಯೆಹೋವಂಗ್‌ ಬೊತ್ತಿತ್‌ ನಡ್‌ಪ. ಆಚೇಂಗಿ ಕ್‍ೕಡಾನ ಬಟ್ಟೆಲ್‌ ಪೋಪಂವೊ ಅಂವೊನ ತ್‌ಕ್ಕಾರ ಮಾಡುವ. 3 ಮೂಡಂಡ ಬಡಾಯಿ ತಕ್ಕ್‌ ಅಂವೊಂಗ್‌ ಪೊಯ್ಯಿತ್‌ ಕ್‌ಟ್ಟ್‌ವಕ್‌ ಕಾರಣ ಆಪ. ಆಚೇಂಗಿ ಜ್ಞಾನಿರ ತಕ್ಕ್‌ ಅಂವೊನ ಕಾಪಾಡುವ. 4 ಎತ್ತುವ ಇಲ್ಲತ ಕೊಟ್ಟ್‌ ಶುದ್ದ ಆಯಿತ್‌ಪ್ಪ. ಆಚೇಂಗಿ ಎತ್ತ್‌ರ ಶಕ್ತಿಯಿಂಜಲೇ ಬಲ್ಯ ಬೊಳೆ ಇಪ್ಪ. 5 ಸತ್ಯಸಾಕ್ಷಿ ಪೊಟ್ಟ್‌ ಪರಿಯುಲೆ. ಆಚೇಂಗಿ ಪೊಟ್ಟ್‌ಸಾಕ್ಷಿ ಪರಿಯುವಂವೊ ಪೊಟ್ಟೇ ಪರಿಯುವ. 6 ಪರಿಹಾಸ ಮಾಡ್‌ವಂವೊ ಜ್ಞಾನತ್‌ನ ತ್‍ೕಡ್‌ಚೇಂಗಿಯು ಅಂವೊಂಗ್‌ ಕ್‌ಟ್ಟುಲೆ, ಆಚೇಂಗಿ ವಿವೇಕ ಉಳ್ಳಂವೊಂಗ್‌ ಅರಿವು ಸುಲಭವಾಯಿತ್‌ ಕ್‌ಟ್ಟುವ. 7 ಮೂಡಡಿಂಜ ದೂರ ಇರ್. ಉಪದೇಶ ತಪ್ಪಕ್‌ ಅಂವೊಂಡ ಪಕ್ಕ ಬುದ್ದಿ ಇಲ್ಲೆ. 8 ತಾಂಡ ಬಟ್ಟೆನ ಅರ್ಥ ಮಾಡಿಯೊದ್‌ ವಿವೇಕ ಉಳ್ಳಂವೊಂಡ ಜ್ಞಾನ. ಆಚೇಂಗಿ ಮೂಡಂಗ ದಡ್ಡತನತಿಂಜ ಅಯಿಂಗಳ ವಂಚನೆ ಮಾಡಿಯೊವ. 9 ಮೂಡಂಗ ಪಾಪ ಮಾಡಿತ್‌ ಪರಿಹಾಸ ಮಾಡ್‌ವ; ಆಚೇಂಗಿ ಸತ್ಯತ್‌ಲ್‌ ನಡ್‌ಪಯಿಂಗಕ್‌ ದಯೆ ಕ್‌ಟ್ಟು. 10 ಪ್ರತಿ ಒಬ್ಬೊಂಡ ದುಃಖ ಅಂವೊಂಗೇ ಗೊತ್ತಾಪ್ಪ. ಬೋರೆ ದಾರುಕ್‌ ಅಂವೊಂಡ ಕುಶಿಲ್‌ ಪಾಲ್ದಾರನಾಪಕ್‌ ಕಯ್ಯುಲೆ. 11 ದುಷ್ಟಂಡ ಮನೆ ನಾಶ ಆಪ, ಆಚೇಂಗಿ ಸತ್ಯವಂತಂವೊಂಡ ಮನೆ ಅಬಿವೃದ್ದಿ ಆಪ. 12 ಮನುಷ್ಯಂಗ್‌ ಸೆರೀಂದ್‌ ಕಾಂಬ ಒರ್‌ ಬಟ್ಟೆ ಉಂಡ್, ಆಚೇಂಗಿ ಕಡೇಕ್‌ ಅದ್‌ ಚಾವ್‌ಕ್‌ ಕೊಂಡ ಪೋಪ 13 ಒಬ್ಬ ತೆಳ್‌ಚಂಡಿಪ್ಪಕಲು ಮನಸ್ಸ್‌ ದುಃಖತ್‌ ಇಪ್ಪ; ಆ ಕುಶೀರ ಆಕೀರ್‌ ಬೇಜಾರ್‌ ಆಯಿತ್‌ಪ್ಪ. 14 ನಂಬಿಕೆಯಿಂಜ ದೂರ ಪೋನ ಮನುಷ್ಯ ಅಂವೊ ಮಾಡ್‌ನ ಕಾರ್ಯಕ್‌ ತಕ್ಕಂತ ದಂಡನೆನ ಅನುಬವಿಚಿಡುವ. ಒರ್‌ ನಲ್ಲ ಮನುಷ್ಯ ಅಂವೊ ಮಾಡ್‌ನ ನಲ್ಲ ಕಾರ್ಯಕ್‌ ತಕ್ಕಂತ ಪ್ರತಿಫಲತ್‌ಲ್‌ ತೃಪ್ತಿಯಾಪ. 15 ಸಾದು ಮನುಷ್ಯ ಅಂವೊಂಗ್‌ ಎಣ್ಣ್‌ನ ಎಲ್ಲಾ ತಕ್ಕ್‌ನ ನಂಬುವ! ಆಚೇಂಗಿ ವಿವೇಕ ಉಳ್ಳಂವೊ ತಾಂಡ ನಡತೆಲ್‌ ಎಚ್ಚರಿಕೆಲ್‌ ಇಪ್ಪ. 16 ಜ್ಞಾನಿಯಾನಂವೊ ಪೋಡಿಚಿಟ್ಟಂಡ್‌ ಕ್‍ೕಡ್‌ಂಜ ದೂರ ಇಪ್ಪ. ಆಚೇಂಗಿ ದಡ್ಡ ಎಚ್ಚರಿಕೆ ಇಲ್ಲತೆ ದುಡುಕಿತ್‌ ಕಾರ್ಯ ಮಾಡುವ. 17 ಮುಂಜೆಡಿ ಉಳ್ಳಂವೊ ದಡ್ಡ ಕಾರ್ಯತ್‌ನ ಮಾಡುವ. ಕ್‍ೕಡ್‌ನ ಗೇನ ಮಾಡ್‌ವಂವೊನ ದ್ವೇಷ ಮಾಡುವ. 18 ಸಾದು ಮನುಷ್ಯಂಗಡ ಪಾಲ್‌ಕ್‌ ಕ್‌ಟ್ಟೊದ್‌ ದಡ್ಡತನವೇ. ಆಚೇಂಗಿ ವಿವೇಕ ಉಳ್ಳಯಿಂಗಕ್‌ ಅರಿವು ಕಿರೀಟವಾಯಿತ್‌ ಕ್‌ಟ್ಟು. 19 ಕೆಟ್ಟ ಜನ ನಲ್ಲಯಿಂಗಡ ಮಿಂಞತು, ದುಷ್ಟ ಜನ ನೀತಿವಂತಯಿಂಗಡ ಪಡಿರ ಪಕ್ಕತು ಮಂಡೆ ಬಗ್ಗ್‌ಚಿಡುವ. 20 ಗರೀಬನ ನೆರೆಮನೆಕಾರ ಸಹ ದ್ವೇಷ ಮಾಡುವ. ಆಚೇಂಗಿ ಪಣಕಾರಂಗಡ ಕೂಡೆ ದುಂಬ ಜನ ಸಹವಾಸ ಬೆಚ್ಚೊವ. 21 ನೆರೆಮನೆಕಾರನ ಮರ್ಯಾದಿಯಿಲ್ಲತೆ ನಡ್‌ತ್‌ವಂವೊ ಪಾಪ ಮಾಡಿಯಂಡುಂಡ್. ಆಚೇಂಗಿ ಗರೀಬಂಗಕ್‌ ಕರುಣೆ ಕಾಟ್‌ವಂವೊ ಆಶೀರ್ವಾದ ಪಡೆಯುವ. 22 ಕ್‍ೕಡ್‌ನ ಯೋಚನೆ ಮಾಡ್‌ವಂವೊ ಬಟ್ಟೆ ತಪ್ಪಿ ಪೋಪಲ್ಲಾ? ಆಚೇಂಗಿ ನಲ್ಲದ್‌ ಮಾಡಂಡೂಂದ್‌ ಗೇನ ಮಾಡ್‌ವೊಂವೊಂಗ್‌ ಕೃಪೆಯು ಸತ್ಯವು ಉಂಡ್. 23 ಕಷ್ಟಪಟ್ಟಿತ್‌ ನಯಿಚತೇಂಗಿ ಲಾಬ ಉಂಡ್; ಬರೀ ತಕ್ಕ್‌ ಪರ್‌ಂದಂಡ್‌ ಉಂಡೇಂಗಿ ಬಡತನ ಬಪ್ಪ. 24 ಜ್ಞಾನಿಯಡ ಕಿರೀಟ ಅಯಿಂಗಡ ಐಶ್ವರ್ಯ. ಆಚೇಂಗಿ ಮೂಡಂಗಡ ದಡ್ಡತನತಿಂಜ ಮೂಡತನವೇ ಕ್‌ಟ್ಟುವ. 25 ಸತ್ಯಸಾಕ್ಷಿ ಎಣ್ಣುವಂವೊ ಜೀವತ್‌ನ ಕಾಪಾಡುವ. ಆಚೇಂಗಿ ಪೊಟ್ಟ್‌ಸಾಕ್ಷಿ ತಪ್ಪಂವೊ ಪೊಟ್ಟ್‌ನೇ ಪರಿಯುವ. 26 ಯೆಹೋವಂಗ್‌ ಬೊತ್ತ್‌ವಂವೊ ದೈರ್ಯತ್‌ಲ್‌ ಸೌಕ್ಯವಾಯಿತ್‌ ಇಪ್ಪ. ಅಂವೊಂಡ ಮಕ್ಕಕ್‌ ಸಹ ನೆಲೆ ಕ್‌ಟ್ಟ್‌ವ. 27 ಯೆಹೋವಂಗ್‌ ಬೊತ್ತ್‌ವದ್‌ ಜೀವತ್‌ರ ಬುಗ್ಗೆರನೆಕೆ. ಅದ್‌ ಚಾವ್‌ರ ಬಲೆಯಿಂಜ ಕಾಪ. 28 ಬಲ್ಯ ಜನಸಂಖ್ಯೆ ರಾಜಂಡ ಮಹಿಮೆಯಾಯಿತ್‌ಪ್ಪ. ಜನಳೇ ಇಲ್ಲತೆ ಪೋಚೇಂಗಿ ರಾಜ ನಾಶ ಆಯಿ ಪೋಪ. 29 ದುಂಬ ತಾಳ್ಮೆ ಉಳ್ಳಂವೊ ಬಲ್ಯ ಬುದ್ದಿವಂತ. ಮುಂಜೆಡಿ ಉಳ್ಳಂವೊ ತಾನ್‌ ಮೂಡ ಎಣ್ಣಿಯಂಡ್‌ ಕಾಟಿಯೊವ. 30 ನೆಮ್ಮದಿ ಉಳ್ಳ ಮನಸ್ಸ್‌ ತಡಿಕ್‌ ಸೌಕ್ಯ ತಪ್ಪ. ಆಚೇಂಗಿ ಹೊಟ್ಟೆಕಿಚ್ಚ್‌ಲ್‌ ಮೂಳೆ ಕೀವ. 31 ಗರೀಬನ ಹಿಂಸೆಪಡ್‌ತವಂವೊ ಅಂವೊನ ಸೃಷ್ಟಿ ಮಾಡನಂವೊನ ಕಮ್ಮಿಯಾಯಿತ್‌ ನೋಟಿಯಂಡುಂಡ್. ಗರೀಬಂಗ್‌ ಕರುಣೆ ಕಾಟ್‌ವಂವೊ ಅಂವೊನ ಗನಪಡ್‌ತುವ. 32 ದುಷ್ಟ ತಾನ್‌ ಮಾಡುವ ಕ್‍ೕಡ್‌ಯಿಂಜಲೇ ನಾಶ ಆಯಿ ಪೋಪ. ಆಚೇಂಗಿ ನೀತಿವಂತಂವೊಂಗ್‌ ಚಾವ್‌ರ ನೇರತು ನಂಬಿಕೇಲ್‌ ಇಪ್ಪ. 33 ಬುದ್ದಿವಂತಂವೊಂಡ ಹೃದಯತ್‌ಲ್‌ ಜ್ಞಾನ ವಾಸ ಮಾಡುವ. ಆಚೇಂಗಿ ಮೂಡಂಗಡ ಹೃದಯತ್‌ಲ್‌ ಜ್ಞಾನ ವಾಸ ಮಾಡುವಕ್‌ ಕೈಯುಲೆ. 34 ನೀತಿ ದೇಶತ್‌ನ ಗೌರವ ಪಡ್‌ತುವ; ಆಚೇಂಗಿ ಪಾಪತ್‌ರಗುಂಡ್‌ ಏದ್‌ ಜನಕು ಅವಮಾನ ಆಪ. 35 ವಿವೇಕವುಳ್ಳ ಸೇವಕ ರಾಜಂಗ್‌ ಕುಶಿಯಾಯಿತಿಪ್ಪ. ಆಚೇಂಗಿ ಅವಮಾನಪಡ್‌ತುವ ಸೇವಕಂಡ ಮೇಲೆ ರಾಜಂಡ ಬಲ್ಯ ಚೆಡಿ ಇಪ್ಪ. |
© 2017, New Life Literature (NLL)