ಜ್ಞಾನತ್‌ರ ಪಡಿಮ 13 - ಕೊಡವ ಬೈಬಲ್1 ಜ್ಞಾನವುಳ್ಳ ಮೋಂವೊ ತಾಂಡ ಅಪ್ಪಂಡ ಬೋದನೆನ ಕ್‍ೕಪ. ಆಚೇಂಗಿ ಪರಿಹಾಸ ಮಾಡ್‌ವಂವೊನ ಚೂಕ್‌ಚೇಂಗಿ ಅಂವೊ ಕೆಮಿ ಕೊಡ್‌ಪ್‌ಲೆ 2 ಒರ್‌ ಮನುಷ್ಯ ತಾಂಡ ನಲ್ಲ ತಕ್ಕ್‌ರ ಫಲತ್‌ರಗುಂಡ್‌ ನಲ್ಲದ್‌ನ ಅನುಬವಿಚಿಡುವ. ಆಚೇಂಗಿ ದ್ರೋಹಿಯ ಕ್ರೂರವಾಯಿತ್‌ ಇಪ್ಪಕೇ ಕುಶಿ ಪಡುವ. 3 ತಾಂಡ ಬಾಯಿನ ಕಾಪಂವೊ ತಾಂಡ ಜೀವತ್‌ನ ಕಾಪಾಡಿಯೊವ. ಆಚೇಂಗಿ ಎಚ್ಚರ ಇಲ್ಲತೆ ತಕ್ಕ್‌ ಪರಿಯುವಂವೊ ನಾಶ ಆಯಿಪೋಪ. 4 ಸೋಮಾರಿ ಕುಶಿಪಡುವ ಏದು ಅಂವೊಂಗ್‌ ಕ್‌ಟ್ಟುಲೆ. ಎಚ್ಚರತ್‌ಲ್‌ ಬದ್‌ಕ್ಕುವಯಿಂಗ ಅಬಿವೃದ್ದಿ ಪೊಂದುವ. 5 ನೀತಿವಂತಂವೊ ಪೊಟ್ಟ್‌ ತಕ್ಕ್‌ನ ದ್ವೇಷ ಮಾಡುವ. ಆಚೇಂಗಿ ದುಷ್ಟ ಜನ ಞಾಣಕ್‍ೕಡ್‌ ಪಿಂಞ ಅವಮಾನತ್‌ನ ಕೊಂಡಬಪ್ಪ. 6 ನೀತಿರ ಬದ್‌ಕ್‌ ಸತ್ಯವಂತಂವೊನ ಕಾಪಾಡುವ. ಆಚೇಂಗಿ ದುಷ್ಟತನ ಪಾಪಿನ ನಾಶ ಮಾಡಿರುವ. 7 ಒಂದು ಇಲ್ಲತಂವೊ ತನ್ನ ಐಶ್ವರ್ಯವಂತಂವೊನಾಯಿತ್‌ ಕಾಂಬ್‌ಚಿಡುವಂವೊನು ಉಂಡ್; ದುಂಬ ಐಶ್ವರ್ಯವ ಉಳ್ಳಂವೊ ತನ್ನ ಗರಿಬಂಡನೆಕೆ ಕಾಂಬ್‌ಚಿಡುವಂವೊನು ಉಂಡ್. 8 ಒರ್‌ ಐಶ್ವರ್ಯವಂತಂವೊಂಡ ಪಣ ಅಂವೊಂಡ ಜೀವತ್‌ನ ಕಾಪಾಡ್‌ವಕಾಯಿತ್‌ ಪ್ರಯೋಜನ ಆಪ. ಆಚೇಂಗಿ ಗರಿಬನ ದಾರ್‌ ಪೋಡಿಚ್ಚಿಟತೇಂಗಿಯು ಅಂವೊಂಗ್‌ ಪೋಡಿ ಇಲ್ಲೆ. 9 ನೀತಿವಂತಂವೊಂಡ ಬೊಳಿ ಪ್ರಕಾಶವಾಯಿತ್‌ ಮಿನ್ನ್‌ವ. ಆಚೇಂಗಿ ದುಷ್ಟಂಡ ಬೊಳ್‌ಚ ಆರಿಪೋಪ. 10 ಆಂಗಾರ ಮಾತ್‌ರ ಜಗಳಕ್‌ ಕಾರಣ ಆಪ. ಆಲೋಚನೆಕ್‌ ಕೆಮಿ ಕೊಡ್‌ಪಂವೊಂಡ ಪಕ್ಕ ಜ್ಞಾನ ಇಪ್ಪ. 11 ಬಿಟ್ಟಿಲ್‌ ಕ್‌ಟ್ಟ್‌ನ ಐಶ್ವರ್ಯ ಬೆರಿಯ ಕಾಂಗತೆ ಆಯಿಪೋಪ. ಆಚೇಂಗಿ ಕಷ್ಟಪಟ್ಟಿತ್‌ ಕೂಟಿ ಬೆಪ್ಪಂವೊ ಅಬಿವೃದ್ದಿ ಆಯಂಡೇ ಪೋಪ. 12 ನಿರೀಕ್ಷೆ ಮಾಡ್‌ನದ್‌ ನೆರವೇರುವಕ್‌ ದುಂಬ ತಡೆ ಆಚೇಂಗಿ ಮನಸ್ಸ್‌ ಕುಂದಿ ಪೋಪ. ಆಚೇಂಗಿ ಆಸೆಪಟ್ಟದ್‌ ಕ್‌ಟ್ಟ್‌ವಕ ಜೀವ ತಪ್ಪ ಮರತ್‌ರನೆಕೆ ಇಪ್ಪ. 13 ಬೋದನೇನ ಅಲ್ಲಗೆಳೆಯುವಂವೊ ನಾಶ ಆಯಿಪೋಪ. ಆಚೇಂಗಿ ಆಜ್ಞೆಕ್‌ ತಗ್ಗಿತ್‌ ನಡ್‌ಪಂವೊಂಗ್‌ ಬಹುಮಾನ ಕ್‌ಟ್ಟುವ. 14 ಜ್ಞಾನಿರ ಬೋದನೆ ಜೀವತ್‌ರ ಬುಗ್ಗೆರನೆಕೆ. ಅದ್‌ ಚಾವ್‌ರ ಬಲೆಕ್‌ ಚಿಕ್ಕಿ ಪೋಕತನೆಕೆ ಕಾಪ. 15 ನಲ್ಲ ಬುದ್ದಿ ದಯೆ ಕ್‌ಟ್ಟುವನೆಕೆ ಮಾಡುವ. ಆಚೇಂಗಿ ದ್ರೋಹಿಯ ಪೋಪ ಬಟ್ಟೆ ಒರಟಾನದಾಯಿತ್‌ಪ್ಪ. 16 ವಿವೇಕ ಉಳ್ಳ ಒಬ್ಬೊಬ್ಬನು ಗೇನ ಮಾಡಿತ್‌ ಕಾರ್ಯ ಮಾಡುವ. ಆಚೇಂಗಿ, ಮೂಡ ತಾಂಡ ಮೂಡತನತ್‌ನ ಪೊರಮೆ ಕಾಟಿರ್ವ. 17 ದುಷಟನಾನ ದೂತ ಕ್‍ೕಡ್‌ಲ್‌ ಚಿಕ್ಕಿ ಪೋಪ. ಆಚೇಂಗಿ ನಂಬಿಕಸ್ತನಾನ ದೂತ ಸುಕ ಕೊಂಡ್‌ ಬಪ್ಪ. 18 ಬುದ್ದಿತಕ್ಕ್‌ನ ಕಡೆಗಣಿಚಿಡ್‌ವಂವೊಂಗ್‌ ಬಡತನ ಪಿಂಞ ಅವಮಾನ ಆಪ. ಎಚ್ಚರ ತಕ್ಕ್‌ನ ಸ್ವೀಕಾರ ಮಾಡ್‌ವಂವೊಂಗ್‌ ಮರ್ಯಾದಿ ಕ್‌ಟ್ಟುವ. 19 ಆಸೆಪಟ್ಟದ್‌ ನೆರವೇರ್ವಕ ಆತ್ಮಕ್‌ ಸುಕ. ಪಾಳ್‌ ಬಟ್ಟೆನ ಬುಟ್ಟಿತ್‌ ಬಪ್ಪದ್‌ ಮೂಡಂಗಕ್‌ ಅಸಹ್ಯ. 20 ಜ್ಞಾನಿಯಡ ಸಹವಾಸಿ ಜ್ಞಾನವುಳ್ಳಂವೊನಾಪ; ಮೂಡಂಗಡ ಕೂಟಾಳಿ ಕಷ್ಟಪಡುವ. 21 ಕ್‍ೕಡ್‌ ಪಾಪಿಯಡ ಬಯ್ಯತ್‌ ಪೋಯಂಡೇ ಇಪ್ಪ. ಆಚೇಂಗಿ ನೀತಿವಂತಂಯಿಂಗಕ್‌ ನಲ್ಲದ್‌ ಫಲವಾಯಿತ್‌ ಕ್‌ಟ್ಟು. 22 ಒರ್‌ ನಲ್ಲ ಮನುಷ್ಯ ತಾಂಡ ಕ್‌ರ್‌ಮಕ್ಕಕ್‌ ಬಾದ್ಯತೆನ ಬೆಚ್ಚಿತ್‌ ಪೋಪ. ಆಚೇಂಗಿ ಪಾಪಿಯಡ ಐಶ್ವರ್ಯ ನೀತಿವಂತಯಿಂಗಕಾಯಿತ್‌ ಕೂಟಿಬೆಚ್ಚನೆಕೆ ಆಪ. 23 ಗರೀಬಂಡ ಉಪ್ಪತ ಬೇಲ್‌ ಬಲ್ಯ ಬೊಳೆ ತಪ್ಪ, ಆಚೇಂಗಿ ಅನ್ಯಾಯ ಅದ್‌ನ ಕೊಚ್ಚಿಯಂಡ್‌ ಪೋಪ. 24 ಕೋಲ್‌ನ ಉಪಯೋಗಿಚಿಡತಂವೊ ತಾಂಡ ಮೋಂವೊನ ದ್ವೇಷ ಮಾಡುವ; ಆಚೇಂಗಿ ಅಂವೊನ ಪ್ರೀತಿಚಿಡುವಂವೊ ಅಂವೊಂಗ್‌ ಶಿಕ್ಷೆ ಕೊಡ್‌ಪಕ್‌ ಎಚ್ಚರ ಎಡ್‌ತೊವ. 25 ನೀತಿವಂತಂವೊ ತಾಂಗ್‌ ತೃಪ್ತಿ ಆಪಚ್ಚಕ್‌ ಉಂಬ; ಆಚೇಂಗಿ ದುಷ್ಟಂಗಕ್‌ ಎಕ್ಕಾಲೂ ಕೆಲಪೈಪ. |
© 2017, New Life Literature (NLL)