ಜ್ಞಾನತ್‌ರ ಪಡಿಮ 1 - ಕೊಡವ ಬೈಬಲ್1 ದಾವೀದಂಡ ಮೋಂವೊನಾನ ಇಸ್ರಾಯೇಲ್‌ ದೇಶತ್‌ರ ರಾಜನಾಯಿತಿಂಜ ಸೊಲೊಮೋನಂಡ ಜ್ಞಾನತ್‌ರ ಪಡಿಮ. 2 ಈ ಜ್ಞಾನತ್‌ರ ಪಡಿಮರ ಮೂಲಕ ಜ್ಞಾನತ್‌ನ, ಬೋದನೆನ ಅರ್‌ಂಜಂಡ್, ಬುದ್ದಿನ ಅರ್ಥ ಮಾಡುವಕ್‌ ಆಪ. 3 ಅದ್‌ಲ್ಲತೆ, ವಿವೇಕ, ನೀತಿ, ನ್ಯಾಯ ಪಿಂಞ ನಿದಾನತ್‌ನ ಪಡೆಯುವಕ್‌ ಕಯ್ಯು. 4 ಈ ಜ್ಞಾನತ್‌ರ ಪಡಿಮ ಸಾದು ಮನುಷ್ಯಂಗಕ್‌ ಬುದ್ದಿನ, ಬಾಲೆಕಾರಂಗಕ್‌ ಅರಿವ್‌ನ ಪಿಂಞ ವಿವೇಕತ್‌ನ ತಪ್ಪ. 5 ಬುದ್ದಿವಂತಂವೊ ಈ ಜ್ಞಾನತ್‌ರ ಪಡಿಮನ ಕ್‍ೕಟಿತ್‌ ಇಂಞು ಬುದ್ದಿವಂತಂವೊನಾಪ. ವಿವೇಕ ಉಳ್ಳಂವೊಂಗ್‌ ಇಂಞು ಆಲೋಚನೆ ಕ್‌ಟ್ಟ್‌ವ. 6 ಇದೆಲ್ಲಾ ಜ್ಞಾನತ್‌ರ ಪಡಿಮೆನ, ಆಂಡ ಅರ್ಥತ್‌ನ, ಜ್ಞಾನಿಯಡ ವಾಕ್ಯತ್‌ನ ಪಿಂಞ ಅಯಿಂಗ ಎಣ್ಣ್‌ನ ಒಡ್‌ಪ ಗಾದೆನೆಲ್ಲಾ ಅರ್ಥ ಮಾಡಿಯೊಕ್‌ ಸಹಾಯ ಮಾಡುವ. ಆ 7 ಯೆಹೋವಂಗ್‌ ಬೊತ್ತಿತ್‌ ನಡ್‌ಪದೇ ಜ್ಞಾನತ್‌ರ ತೊಡಕ; ಆಚೇಂಗಿ ಮೂಡಂಗ ಜ್ಞಾನತ್‌ನ ಪಿಂಞ ಬೋದನೇನ ಕಡೆಗಟ್ಟ್‌ವ. ಅಪ್ಪಂಡ ಬುದ್ದಿತಕ್ಕ್‌ 8 ನಾಡ ಮೋನೇ, ನೀಡ ಅಪ್ಪಂಡ ಬುದ್ದಿ ತಕ್ಕ್‌ನ ಕ್‍ೕಳ್. ನೀಡ ಅವ್ವಂಡ ಬೋದನೆನ ಕೈ ಬುಡತೆ. 9 ಅದ್‌ ನೀಡ ಮಂಡೆಕ್‌ ಅಲಂಗಾರವಾನ ಕಿರೀಟವಾಯಿತು, ಬೋಳೆಕ್‌ ಪದಕನೆಕೆಯ ಇಪ್ಪ. 10 ನಾಡ ಮೋನೇ, ಪಾಪಿಯ ನೀಕ್‌ ಸನ್ನ ಕಾಟ್‌ಚೇಂಗಿಯು ಅದಂಗ್‌ ನೀನ್‌ ಒತ್ತೊತೆ. 11 ಅಯಿಂಗ: ನಂಗಡ ಕೂಡೆ ಬಾ, ಕೊಲ್ಲುವಕಾಯಿತ್‌ ನಂಗ ಒಳ್ಚಿತ್, ಸಾದು ಮನುಷ್ಯಳ ಪುಡಿಪಕ್‌ ಕಾರಣಯಿಲ್ಲತೆ ಇಂಜತೇಂಗಿಯು ಪಾರಕಾತ್ತಂಡ್‌ ಇಂಜಿತ್‌ ಪುಡಿಕನ. 12 ಪಾತಾಳ ತಾಂಡ ಒಳ್‌ಕ್‌ ಇಳಿಯುವಯಿಂಗಳ ಮುಗ್ಗ್‌ವನೆಕೆ, ನಂಗ ಇಯಿಂಗಳ ಜೀವಂತವಾಯಿತ್‌ ಮುಗ್ಗನ. ಕುಂಡ್‌ಕ್‌ ಇಳಿಯುವಯಿಂಗಳ ಮುಗ್ಗ್‌ವನೆಕೆ ಪೂರ್ತಿಯಾಯಿತ್‌ ಮುಗ್ಗನ. 13 ಬೆಲೆಯುಳ್ಳ ಎಲ್ಲಾ ತರ ವಸ್ತುನ ಕಂಡ್‌ಪುಡಿಕನ, ಲೂಟಿ ಮಾಡಿತ್ ಕ್‌ಟ್ಟ್‌ವ ಐಶ್ವರ್ಯತ್‌ಂಜ ನಂಗಡ ಮನೆನ ದುಂಬ್‌ಚಿಟ್ಟೊನ. 14 ನೀನ್‌ ನಂಗಡ ಕೂಡೆ ಪಾಲ್ದಾರನಾಯಿತ್‌ರ್, ನಂಗ ಎಲ್ಲಾರ್‌ಕು ಒರೇ ಪಣಚೀಲ ಇಪ್ಪಾಂದ್‌ ಅಯಿಂಗ ಎಣ್ಣ್‌ಚೇಂಗಿ, 15 ನಾಡ ಮೋನೇ, ಅಯಿಂಗಡ ಬಟ್ಟೆಲ್‌ ಪೋಕತೆ. ಅಯಿಂಗ ಪೋಪ ಬಟ್ಟೆಯಿಂಜ ನೀಡ ಕಾಲ್‌ನ ದೂರ ಬೆಚ್ಚ. 16 ಅಯಿಂಗಡ ಕಾಲ್‌ ಕ್‍ೕಡ್‌ ಮಾಡ್‌ವಕ್‌ ಅವಸರತ್‌ಲ್‌ ಇಪ್ಪ. ಅಯಿಂಗ ಜನಡ ಚೋರೆನ ಚೆಲ್ಲ್‌ವಕ್‌ ಅವಸರ ಪಡುವ. 17 ಏದ್‌ ತರತ್‌ರ ಪಕ್ಷಿಯಾಚೇಂಗಿಯು ಸೆರಿ ಅದ್‌ಂಡ ಕಣ್ಣ್‌ ಮಿಂಞಲೇ ಬಲೆನೆ ಬೀಜ್‌ತೇಂಗಿ ಅದ್‌ಂಡಗುಂಡ್‌ ಒರ್‌ ಪ್ರಯೋಜನವು ಇಲ್ಲೆ, (ಅದ್‌ಂಜ ದೂರ ಇಪ್ಪಕ್‌ ಅಯಿಂಗಕ್‌ ಗೊತ್ತುಂಡ್). 18 ಆಚೇಂಗಿ ಇಯಿಂಗ ಅನ್ನನೆ ಇಲ್ಲೆ! ಅಯಿಂಗಡೆ ಚೋರೆನೆ ಚೆಲ್ಲುವಕಾಯಿತೇ ಒಳ್ಚಿತ್ ಪಾರಕಾತಂಡುಂಡ್, ಅಯಿಂಗಡ ಜೀವಕ್‌ ಅಯಿಂಗಳೇ ಕೆಣಿ ಇಟ್ಟೋಂಡುಂಡ್. 19 ಐಷ್ವರ್ಯತ್‌ರ ಮೇಲೆ ಬೋಂಡತ ಆಸೆ ಬೆಚ್ಚಿತುಳ್ಳಯಿಂಗಡ ಗತಿ ಇನ್ನನೆ ಇಪ್ಪ; ಅಯಿಂಗಡ ಜೀವತ್‌ನ ಅದೇ ಎಡ್‌ತ್‌ರ್‌ವ. ಜ್ಞಾನತ್‌ನ ತ್‌ಕ್ಕಾರ ಮಾಡ್‌ವಂವೊಂಗ್‌ ಎಚ್ಚರಿಕೆ 20 ಜ್ಞಾನ, ಬೀದೀಲ್‌ ನಿಂದಂಡ್‌ ಕಾಕಿಯಂಡುಂಡ್, ಚತ್ತೇಲ್‌ ಜೋರಾಯಿತ್‌ ಕೂತ್‌ ಕೊಡ್‌ತಂಡುಂಡ್. 21 ಅದ್‌ ಜನ ದುಂಬಿತುಳ್ಳ ರಸ್ತೆಲ್‌ ಪಿಂಞ ಪಟ್ಟಣತ್‌ರ ಮುಕ್ಯಪಟ್ಟ ಕಂಡಿಲ್‌ ನಿಂದಂಡ್‌ ಕೂತ್ತ್‌ ಕೊಡ್‌ತಿತ್‌ ತಾಂಡ ತಕ್ಕ್‌ನ ವಿವರಿಚಿಟ್ಟಂಡುಂಡ್. 22 ಸಾದು ಜನಳೇ, ಇಂಞು ಎಚ್ಚಕ್‌ ಕಾಲ ನಿಂಗ ಮೂಡತನತ್‌ಲ್‌ ಕುಶಿಪಡುವಿರಾ? ಪರಿಹಾಸ ಮಾಡ್‌ವಯಿಂಗಳೇ, ಇಂಞು ಎಚ್ಚಕ್‌ ಕಾಲ ನಿಂಗ ಪರಿಹಾಸ ಮಾಡ್‌ವದ್‌ಲ್‌ ಕುಶಿಪಡುವಿರಾ? ಮೂಡಂಗಳೇ, ಇಂಞು ಎಚ್ಚಕ್‌ ಕಾಲ ನಿಂಗ ಅರಿವ್‌ನ ದ್ವೇಷ ಮಾಡುವಿರ? 23 ನಾಡ ಎಚ್ಚರ ತಕ್ಕ್‌ಕ್‌ ಕೆಮಿ ಕೊಡಿ; ಇದಾ, ನಾಡ ಆತ್ಮತ್‌ನ ನಾನ್‌ ನಿಂಗಡ ಮೇಲೆ ಬೂಕಿತ್, ನಾಡ ತಕ್ಕ್‌ ನಿಂಗಕ್‌ ಗೊತ್ತಾಪನೆಕೆ ಮಾಡುವಿ. 24 ನಾನ್‌ ನಿಂಗಳ ಕಾಕ್‌ಚೇಂಗಿಯು ನಿಂಗ ನನ್ನ ತ್‌ಕ್ಕಾರ ಮಾಡುವಿರ; ನಾನ್‌ ನಾಡ ಕೈಯಿನ ನಿಂಗಡ ಪಕ್ಕ ನ್‍ೕಟ್‌ಚೇಂಗಿಯು, ಅದ್‌ಂಗ್‌ ಎಚ್ಚರ ಎಡ್‌ಪಂವೊ ಒಬ್ಬನು ಇಲ್ಲೆ. 25 ನಾಡ ಆಲೋಚನೆನೆಲ್ಲಾ ಎಡ್‌ಕತೆ, ನಾಡ ಚೂಕ್‌ ತಕ್ಕ್‌ನ ತ್‌ಕ್ಕಾರ ಮಾಡಿರ. 26 ಆಂಗಾಯಿತ್, ನಾನ್‌ ಸಹ ನಿಂಗಡ ಅಪಾಯತ್‌ರ ನೇರತ್‌ಲ್‌ ನಿಂಗಳ ನೋಟಿತ್‌ ತೆಳಿಪಿ, ನಿಂಗಕ್‌ ಕ್‍ೕಡ್‌ ಬಪ್ಪಕ ನಿಂಗಳ ಪರಿಹಾಸ ಮಾಡುವಿ. 27 ಬಲ್ಯ ಕ್‍ೕಡ್‌ ನಿಂಗಕ್‌ ಬಿರುಗಾಳಿರನೆಕೆ ಬಪ್ಪಕ, ಅಪಾಯ ಸುಳಿಗಾಳಿರನೆಕೆ ನಿಂಗಳ ಬಡಿಪಕ, ಕಷ್ಟ ಪಿಂಞ ದುಃಖ ನಿಂಗಡ ಮೇಲೆ ಬಲ್ಯ ಬಾರವಾಯಿತಿಪ್ಪಕ, ನಾನ್‌ ಪರಿಹಾಸ ಮಾಡುವಿ. 28 ಇದೆಲ್ಲಾ ಆಪಕ, ಅಯಿಂಗ ನನ್ನ ಕಾಕುವ; ಆಚೇಂಗಿ ನಾನ್‌ ಅಯಿಂಗಕ್‌ ಜವಾಬ್ ಕೊಡ್‌ಪುಲೆ; ಅಯಿಂಗ ನನ್ನ ಎಚ್ಚರತ್‌ಲ್‌ ತ್‍ೕಡುವ, ಆಚೇಂಗಿ ಅಯಿಂಗ ನನ್ನ ಕನ್ಡ್ ಪುಡಿಪ್‌ಲೆ. 29 ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ಅರಿವ್‌ನ ದ್ವೇಷ ಮಾಡಿತ್, ಯೆಹೋವಂಡಲ್ಲಿ ಪೋಡಿಲ್‌ ಇಪ್ಪಕ್‌ ಆರಿಚಿಟ್ಟಂಡಿತ್‌ಲ್ಲೆ. 30 ನಾಡ ಆಲೋಚನೇಲ್‌ ಅಯಿಂಗ ಕುಶಿಪಟ್ಟಿತ್‌ಲ್ಲೆ; ನಾಡ ಚೂಕ್‌ ತಕ್ಕ್‌ನ ಅಯಿಂಗ ತ್‌ಕ್ಕಾರ ಮಾಡಿರ್‌ತ್. 31 ಆನಗುಂಡ್, ಅಯಿಂಗ ಅಯಿಂಗಡ ನಡತೆರ ಫಲತ್‌ನ ಅನುಬವಿಚಿಡುವ; ಅಯಿಂಗಡ ಯೋಚನೇಲ್‌ ತೃಪ್ತಿಯಾಪ. 32 ಪಾಪ ಜನತ್‌ನ (ಸಾದು ಜನತ್‌ನ) ಅಯಿಂಗಡ ಮೂಡತನವೇ ಕೊಂದ್‌ರ್‌ವ, ಮೂಡಂಗ ಅಯಿಂಗಡ ಎಚ್ಚರಯಿಲ್ಲತ ನಡತೆಯಿಂಜ ನಾಶ ಆಯಿಪೋಪ. 33 ಆಚೇಂಗಿ ನಾಡ ತಕ್ಕ್‌ಕ್‌ ಕೆಮಿ ಕೊಡ್‌ಪಂವೊ ಪೋಡಿ ಇಲ್ಲತೆ, ಕ್‍ೕಡ್‌ಕ್‌ ಬೊತ್ತತೆ, ಸಮಾದಾನತ್‌ಲ್‌ ಬದ್‌ಕ್‌ವ. |
© 2017, New Life Literature (NLL)