ಮಾರ್ಕ 7 - ಕೊಡವ ಬೈಬಲ್ಪದ್ದತಿ ಪಿಂಞ ಆಜ್ಞೆರ ವಿಷಯತ್ ಯೇಸುರ ಬೋದನೆ ( ಮತ್ತಾಯ 15.1–20 ) 1 ಯೆರೂಸಲೇಮ್ಂಜ ಚೆನ್ನ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗೆಲ್ಲ ಯೇಸುರ ಪಕ್ಕ ಬಂತ್ ಸುತ್ತ್ ಕೆಟ್ಟ್‌ಚಿ. 2 ಅಕ್ಕ ಯೇಸುರ ಚೆನ್ನ ಶಿಷ್ಯಂಗ, ಪದ್ದತಿರ ಪ್ರಕಾರ ಕೈಯಿನ ಕತ್ತತೆ ಉಂಬದ್‌ನ ಕಂಡಿತ್ ತಪ್ಪ್ ಕಂಡ್‌ಪುಡ್‌ಚತ್. 3 ಎನ್ನಂಗೆಣ್ಣ್‌ಚೇಂಗಿ ಫರಿಸಾಯಂಗ ಪಿಂಞ ಯೆಹೂದ್ಯಂಗೆಲ್ಲರು, ಪೂರ್ವ ಕಾಲತ್‍ರ ಪೆರಿಯಯಿಂಗ ಎಣ್ಣ್‌ನ ಪದ್ದತಿರ ಪ್ರಕಾರ ಕೈಯಿನ ಕತ್ತತೆ ಉಂಬಕಿಂಜಿಲೆ. 4 ಅದ್ ಅಲ್ಲತೆ ಪೇಟೇಯಿಂಜ ಬಂದ ಪಿಂಞ ಕುಳಿಕತೆ ಉಂಬಕಿಂಜಿಲೆ. ಅನ್ನನೆ ಕುಡಿಪ ಕಪ್ಪ್‌ನ, ಕುಡಿಕೆನ, ಚೆಂಬ್ ಪಾತ್ರತ್‍ನ ಚಾಯಿತೆ ಕತ್ತತೆ ಉಪಯೋಗಿಚಿಡುವಕಿಂಜಿಲೆ. 5 ಅದ್ಂಗ್ ಫರಿಸಾಯಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಅಂವೊನ ನೋಟಿತ್: ಎನ್ನಂಗ್ ನೀಡ ಶಿಷ್ಯಂಗ ಪೂರ್ವ ಕಾಲತ್‍ರ ಪೆರಿಯಯಿಂಗ ಎಣ್ಣ್‌ನ ಪದ್ದತಿರ ಪ್ರಕಾರ ಮಾಡತೆ, ಕೈಯಿನ ಕತ್ತತೆ ಉಂಬಾಂದ್ ಯೇಸುನ ಕ್‍ೕಟತ್. 6 ಅದ್ಂಗ್ ಯೇಸು ಇನ್ನನೆ ಜವಾಬ್ ಕೊಡ್‍ತತ್: ಈ ಜನ ಬರಿ ತಕ್ಕ್‌ಲ್ ನನ್ನ ತುದಿಪ, ಆಚೇಂಗಿ, ಅಯಿಂಗಡ ಹೃದಯ ನೇರಾಯಿತು ನನ್ನಿಂಜ ದೂರ ಉಂಡ್. 7 ಅಯಿಂಗ ನನ್ನ ಆರಾದನೆ ಮಾಡ್‌ವ ಆಚೇಂಗಿ ಪ್ರಯೋಜನ ಇಲ್ಲೆ. ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಜನ ಎಣ್ಣ್‌ನ ಕಾನೂನ್‌ನ, ನ್ಯಾಯಪ್ರಮಾಣವಾಯಿತ್ ಉಪದೇಶ ಮಾಡಿಯಂಡುಂಡ್‍ೕಂದ್, ಕಪಟಿಯಾನ ನಿಂಗಡ ವಿಷಯತ್ ಯೆಶಾಯ ಪ್ರವಾದಿ ಚಾಯಿತೆ ಎಣ್ಣಿತುಂಡ್. 8 ನಿಂಗ ದೇವಡ ವಾಕ್ಯತ್‍ನ ತ್‍ಕ್ಕಾರ ಮಾಡಿತ್, ಮನುಷ್ಯಂಡ ಉಪದೇಶ ಪ್ರಕಾರ ನಡ್‍ಪಿರ. 9 ಇಂಞು ಯೇಸು, ನಿಂಗ ನಿಂಗಡ ಆಚಾರತ್‍ನ ಮಿಂಞಕ್ ನಡ್‍ತಿಯಂಡ್ ಪೋಪಕಾಯಿತ್ ಎಚ್ಚಕ್ ಹುಶಾರ್‌ಲ್ ದೇವಡ ವಾಕ್ಯತ್‍ನ ತ್‍ಕ್ಕಾರ ಮಾಡಿಯಂಡುಂಡ್‍ೕಂದ್ ಎಣ್ಣ್‌ಚಿ. 10 ಮೋಶೆ ಆಜ್ಞೆ ಮಾಡ್‍ನ ಪ್ರಕಾರ, ನಿಂಗ ನಿಂಗಡ ಅಪ್ಪವ್ವಂಗಕ್ ಮರ್ಯಾದೆ ಕೊಡಿ, ದಾರ್ ಅಪ್ಪವ್ವನ ದೂಷಣೆ ಮಾಡ್‌ವ ಅಂವೊನ ಕೊಲ್ಲಂಡು. 11 ಆಚೇಂಗಿ ನಿಂಗ ದಾರಾಚೇಂಗಿಯು ನಿಂಗಡ ಅಪ್ಪವ್ವಂಡ ಪಕ್ಕ ನಾಕ್ ಇಕ್ಕ ಸಹಾಯ ಮಾಡ್‌ವಕ್ ಕಯ್ಯುಲೆ, ನಾನ್ ನಿಂಗಕ್ ತಪ್ಪಕುಳ್ಳಾನ ನಾನ್ ಕೊರ್ಬಾನಾಯಿತ್, ಎಣ್ಣ್‌ಚೇಂಗಿ ದೇವಕ್ ಕಾಣಿಕೆ ಕೊಡ್‍ಪ ವಸ್ತುವಾಯಿತ್ ಕೊಡ್‌ಪೀಂದ್ ಎಣ್ಣ್‌ಚೇಂಗಿ ನಿಂಗಡ ಜವಾಬ್ದಾರಿ ತ್‍ೕಂದತ್‍ೕಂದ್ ಎಣ್ಣುವಿರ. 12 ಇಂಞು ಮಿಂಞಕ್ ಅಂವೊ ಅಂವೊಂಡ ಅಪ್ಪವ್ವಂಗಕ್ ಒರ್ ಸಹಾಯವು ಮಾಡ್‌ವಕ್ ಅವಸ್ಯ ಇಲ್ಲೆ. 13 ಇನ್ನನೆ ನಿಂಗಡ ಆಚಾರತ್‍ರಗುಂಡ್ ದೇವಡ ವಾಕ್ಯತ್‍ನ ಅವಮಾನಮಾಡ್‌ವಿರ. ಅನ್ನನೆ ನಿಂಗ ಬೋರೆ ವಿಷಯತತ್‌ಲ್ ಸಹ ಮಾಡಿಯಂಡುಂಡ್. ಶುದ್ದ ಪಿಂಞ ಅಶುದ್ದ ( ಮತ್ತಾಯ 15.10–20 ) 14 ಇಂಞೊಮ್ಮ ಅಂವೊ ಜನಡ ಗುಂಪ್‍ನ ಕಾಕುವಂಜಿ, ಅಯಿಂಗಳ ನೋಟಿತ್: ನಿಂಗ ಇದ್‍ನ ಚಾಯಿ ಕ್‍ೕಳಿ, ನಾಡ ತಕ್ಕ್‌ನ, ಕ್‍ೕಟಂಡ್ ಅರ್ಥ ಮಾಡಿಯೊಳಿ. 15 ಪೊರಮೆಯಿಂಜ ಮನುಷ್ಯಂಡ ಬಾಯಿರೊಳ್‌ಕ್ ಪೋಪದ್ ಒಂದು ಅಂವೊನ ಅಶುದ್ದ ಮಾಡುಲೆ. ಆಚೇಂಗಿ ಮನುಷ್ಯಂಡ ಒಳ್‌ಳಿಂಜ ಪೊರಮೆ ಬಪ್ಪದೇ, ಅಂವೊನ ಅಶುದ್ದ ಮಾಡ್‌ವ. 16 ದಾರ್‌ಕೇಂಗಿ ಕ್‍ೕಪಕ್ ಕುಶಿ ಉಂಡೇಂಗಿ ಕ್‍ೕಟಿತ್ ಅರ್ಥ ಮಾಡಿಯೊಳಿ. 17 ಯೇಸು ಜನಡ ಗುಂಪ್‍ನ ಬುಟ್ಟಿತ್ ಮನೆರ ಒಳ್‍ಲ್ ಪೋಪಕ, ಅಂವೊಂಡ ಶಿಷ್ಯಂಗ ನೀನ್ ಇಕ್ಕ ಎಣ್ಣ್‌ನ ತಕ್ಕ್‌ನ ಅರ್ಥ ಮಾಡಿತ್ ಬುಡ್‌ತಿತ್ ಎಣ್ಣಿತಾಂದ್ ಎಣ್ಣ್‌ಚಿ. 18 ಅದ್ಂಗ್ ಯೇಸು: ನಿಂಗಕ್ ಕೂಡೆ ಈ ತಕ್ಕ್ ಅರ್ಥ ಆಯಿತಿಲ್ಲೆಯಾ? ಮನುಷ್ಯಂಡ ಬಾಯಿರೊಳ್‌ಕ್ ಪೊರಮೆಯಿಂಜ ಪೋಪದ್ ಅಂವೊನ ಅಶುದ್ದ ಮಾಡುಲೆ, 19 ಎನ್ನಂಗೆಣ್ಣ್‌ಚೇಂಗಿ ನಂಗ ಪೊರಮೆಯಿಂಜ ಏದ್ ತಿಂಬ ಅದ್ ಕೆಲತ್‍ರ ಒಳ್‍ಕ್ ಪೋಪದಲ್ಲತೆ ಹೃದಯಕ್ ಪೋಪುಲೆ. ಕೆಲತ್‍ರ ಒಳ್‍ಕ್ ಪೋಯಿತ್ ಅರ್‌ಗಣೆ ಆಯಿತ್ ಅದ್ ಪೊರಮೆ ಬಪ್ಪ. ಆನಗುಂಡ್ ಎಲ್ಲಾನ ತಿಂಗಲೂಂದ್ ಯೇಸು ಎಣ್ಣ್‌ಚಿ. 20 ಏದೆಲ್ಲಾ ಮನುಷ್ಯಂಡ ಹೃದಯತ್ಂಜ ಪೊರಮೆ ಬಪ್ಪ, ಅದೇ ಮನುಷ್ಯನ ಅಶುದ್ದ ಮಾಡ್‌ವ. 21 ಎನ್ನಂಗೆಣ್ಣ್‌ಚೇಂಗಿ ನಾನಾತರ ಕೆಟ್ಟ ಗೇನ, ನೀತಿ ಇಲ್ಲತ ಕೆಲಸ, ದರೋಡೆ, ಕೊಲೆ, ವ್ಯಬಿಚಾರ, 22 ಬೋಂಡತಾಸೆ, ಎಲ್ಲಾ ಕೆಟ್ಟ ಕೆಲಸ, ಮೋಸ, ಅಯೋಗ್ಯತನ, ಒಟ್ಟೆಕಿಚ್ಚ್, ಬೈಗಳ, ಹಮ್ಮ್, ಬುದ್ದಿ ಕೆಟ್ಟ ಗುಣ ಎಲ್ಲಾ ಮನುಷ್ಯಂಗಡ ಹೃದಯತ್ಂಜೆ ಬಪ್ಪ. 23 ಇದೆಲ್ಲಾ ಮನುಷ್ಯಂಡ ಹೃದಯತ್ಂಜ ಬಪ್ಪಂಜಿ ಅಂವೊನ ಅಶುದ್ದ ಮಾಡ್‌ವ. ಒರ್ ಪೊಣ್ಣಾಳ್‍ರ ನಂಬಿಕೆ ( ಮತ್ತಾಯ 15.21–28 ) 24 ಪಿಂಞ ಯೇಸು ಆ ಜಾಗತ್‍ನ ಬುಟ್ಟಿತ್ ತೀರ್ ಎಣ್ಣುವ ಒರ್ ಪಟ್ಟಣಕ್ ಪೋಚಿ. ಅಲ್ಲಿ ಅಂವೊ ಒರ್ ಮನೇರೊಳ್‌ಕ್ ಪೋಚಿ. ನಾನ್ ಇಲ್ಲಿ ಉಳ್ಳದ್ ದಾರ್‌ಕು ಗೊತ್ತಾಪನೆಕೆ ಇರಡ್‍ೕಂದ್ ಇಷ್ಟಪಟ್ಟತ್, ಆಚೇಂಗಿ ಅಂವೊ ಅನ್ನನೆ ಇಪ್ಪಕಯಿಂಜಿತ್‌ಲ್ಲೆ. 25 ಒರ್ ಪೊಣ್ಣಾಳ್‍ರ ಮೋವಕ್ ಕೂಳಿ ಪುಡ್‌ಚಿತ್ಂಜತ್. ಅವಕ್ ಯೇಸು ಇಲ್ಲಿ ಉಂಡ್‍ೕಂದ್ ಗೊತ್ತಾನಗುಂಡ್ ಅವ ಯೇಸುರ ಪಕ್ಕ ಬಂದಿತ್ ಅಂವೊಂಡ ಕಾಲ್‌ಕ್ ಬುದ್ದತ್. 26 ಅವ ಸಿರಿಯ ದೇಶತ್‍ರ ಪೊಯಿನಿಕ ಪ್ರಾಂತ್ಯತ್‌ಳುಲ್ಲ ಗ್ರೀಕ್ ತಕ್ಕ್ ಪರಿಯುವ ಪೊಣ್ಣಾಳಾಯಿತ್ಂಜತ್. ಅವ, ನಾಡ ಮೋವಳ ಪುಡ್‌ಚಿತುಳ್ಳ ಕೂಳಿನ ಬುಡ್‍ತಿ ಎಣ್ಣಿಯಂಡ್ ಬೋಡಿಯಂಡತ್. 27 ಅವಕ್ ಯೇಸು: ನಂಗಡ ಮಕ್ಕ ಮಿಂಞ ತಿಂದಿತ್ ತೃಪ್ತಿಯಾಡ್. ಚೆರಿಯ ಮಕ್ಕಡ ಆಹಾರತ್‍ನ ಎಡ್‍ತಿತ್ ನಾಯಿಕ್ ಕನಿಪದ್ ಸರಿಯಲ್ಲಾಂದ್ ಎಣ್ಣ್‌ಚಿ. 28 ಅದ್ಂಗ್ ಅವ: ಅಕ್ಕು ಒಡೆಯನೇ, ಮೇಜಿರ ಅಡಿಲಿಪ್ಪ ನಾಯಿಯು, ಮಕ್ಕ ತಿಂಬಕ ಅಡಿಕ್ ಬುದ್ದಾನ ತಿಂಬಾಂದ್ ಎಣ್ಣ್‌ಚಿ. 29 ಅಕ್ಕ ಯೇಸು: ನೀನ್ ಈ ತರ ಉತ್ತರ ಕೊಡ್‍ತಾಂಗ್ ನೀನ್ ಮನೆಕ್ ಪೋ, ನೀಡ ಮೋವಡ ಕೂಳಿ ಅವಳ ಬುಟ್ಟ್ ಪೋಯಿತಿಪ್ಪಾಂದ್ ಎಣ್ಣ್‌ಚಿ. 30 ಅವ ಮನೆಕ್ ಪೋಯಿತ್ ನೋಟುವಕ ಕುಂಞಿರ ಮೇಲ್‍ಲುಳ್ಳ ಕೂಳಿ ಬುಟ್ಟ್ ಪೋಯಿತ್ ಕುಂಞಿ ಬುದ್ದಂಡ್ ಇಂಜಾನ ಕಂಡತ್. ಯೇಸು ಒರ್ ಮೂಗನ ಚಾಯಿಮಾಡ್‌ನದ್ 31 ಯೇಸು ಪುನಃ ತೀರ್ ಸೀದೋನ್ ಪಟ್ಟಣತ್‍ರ ಪ್ರಾಂತ್ಯತ್‍ನ ಬುಟ್ಟಿತ್ ದೆಕಪೊಲಿ ಪ್ರಾಂತ್ಯತ್‍ರ ಬಟ್ಟೆ ಮೂಲಕ ಗಲಿಲಾಯ ಕೆರೆರ ಕರೆಕ್ ಎತ್ತ್‌ಚಿ. 32 ಚೆನ್ನ ಜನ, ಕೆಮಿ ಕೇಕತ ಪಿಂಞ ಬಾಯಿ ಬರತ ಒರ್ ಮನುಷ್ಯನ ಯೇಸುರ ಪಕ್ಕ ಕಾಕಿಯಂಡ್ ಬಂತ್ ನೀಡ ಕೈಯಿನ ಇಂವೊಂಡ ಮೇಲೆ ಬೆಯ್ಯ್ಂದ್ ಬೋಡಿಯಂಡತ್. 33 ಯೇಸು ಜನಡ ಗುಂಪ್‌ಂಜ ಅಂವೊನ ದೂರ ಕಾಕಿಯಂಡ್ ಪೋಯಿತ್ ಅಂವೊಂಡ ಕೆಮಿರ ಮೇಲೆ ಬೆರತ್‌ನ ಬೆಚ್ಚಿತ್, ತುಪ್ಪಿತ್ ಅಂವೊಂಡ ನಾವ್‌ನ ತೊಟ್ಟತ್. 34 ಅಂವೊ ಕೊಡಿಕ್ ಪರಲೋಕತ್‌ನ ನೋಟ್‌ವಂಜಿ, ನಿಟ್ಟುಸಿರ್ ಬುಟ್ಟಿತ್, ಎಪ್ಫಥಾಂದ್ ಎಣ್ಣ್‌ಚಿ. ಅದ್ಂಗ್ ತೊರಕ್‌ಡ್‍ೕಂದ್ ಅರ್ಥ. 35 ಅಚ್ಚಕ್ ಬೆರಿಯ ಆ ಮನುಷ್ಯಂಡ ಕೆಮಿ ಕ್‍ೕಟಿತ್, ಅಂವೊಂಡ ನಾವ್‌ಡ ಕೆಟ್ಟ್ ಅಯಿಂಜಿತ್, ಒರ್ ತೊಂದರೆಯು ಇಲ್ಲತೆ ತಕ್ಕ ಪರಿಯುವಕ್ ಸುರು ಮಾಡ್‍ಚಿ. 36 ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಯೇಸು ಜನಕೆಲ್ಲಾ ಎಣ್ಣ್‌ಚಿ. ಅಂವೊ ದಾರ್‌ಕು ಎಣ್ಣ್‌ವಕ್ಕಾಗಾಂದ್ ಎಚ್ಚಕ್ ಎಣ್ಣ್‌ಚೋ, ಅಚ್ಚಕ್ ಈ ನಲ್ಲ ಸುದ್ದಿನ ಜನ ಪ್ರಚಾರ ಮಾಡಿಯಂಡ್ ಇಂಜತ್. 37 ಯೇಸುರ ವಿಷಯತ್ ಜನಕೆಲ್ಲಾ: ಅಂವೊ ಎಲ್ಲಾ ಚಾಯಿತೆ ಮಾಡ್‍ಚಿ, ಕೆಮಿ ಕೇಕತಯಿಂಗಳ ಕ್‍ೕಪನೆಕೆ, ಬಾಯಿ ಬಕ್ಕತಯಿಂಗಳ ತಕ್ಕ ಪರಿಯುವನೆಕೆ ಮಾಡ್‍ಚೀಂದ್ ದುಂಬ ಆಶ್ಚರ್ಯ ಆಚಿ. |
© 2017, New Life Literature (NLL)