ಮಾರ್ಕ 14 - ಕೊಡವ ಬೈಬಲ್ಅದಿಕಾರಿಯಂಗ ಯೇಸುನ ಕೊಲ್ಲ್‌ವಕ್ ಉಪಾಯ ಮಾಡ್‍ನದ್ ( ಮತ್ತಾಯ 26.1–5 ; ಲೂಕ 22.1 , 2 ; ಯೋಹಾನ 11.45–53 ) 1 ಇಂಞು ದಂಡ್ ದಿವಸ ಆಪಕ ಪಸ್ಕ ಪಿಂಞ ಪುಳಿಯಿಲ್ಲತ ಒಟ್ಟಿ ತಿಂಬ ನಮ್ಮೆ ಬಪ್ಪ. ಅಕ್ಕ ಮುಕ್ಯ ಯಾಜಕಂಗ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಯೇಸುನ ಗುಟ್ಟಾಯಿತ್ ಪುಡ್‌ಚಿತ್ ಕೊಲ್ಲ್‌ವಕ್ ನೋಟಿಯಂಡ್ ಇಂಜತ್. 2 ನಂಗ ಈ ನಮ್ಮೆರ ದಿವಸತ್‍ಲ್ ಮಾಡ್‌ವಕ್ಕಾಗ, ಅನ್ನನೆ ಮಾಡ್‍ಚೇಂಗಿ ಜನ ಅಯಿಂಗಯಿಂಗಳೇ ಜಗಳ ಮಾಡ್‌ವಾಂದ್ ಎಣ್ಣಿಯಂಡಿಂಜತ್. ಒರ್ ಪೊಣ್ಣಾಳ್ ಸುಗಂದ ತೈಲತ್‌ನ ಅಂವೊಂಡ ಮೇಲೆ ಬೂಕ್‌ನದ್ ( ಮತ್ತಾಯ 26.6–13 ; ಯೋಹಾನ 12.1–8 ) 3 ಯೇಸು ಬೇಥಾನ್ಯತ್‍ಲ್ ಕುಷ್ಟರೋಗಿಯಾಯಿತ್ಂಜ ಸೀಮೋನಂಡ ಮನೆಲ್ ಉಂಬಕ್ ಅಳ್‌ತಂಡಿಪ್ಪಕ, ಒರ್ ಪೊಣ್ಣಾಳ್ ದುಂಬ ಬೆಲೆಯುಳ್ಳ ಸುಗಂದ ತೈಲತ್‌ನ ಅಲಬಸ್ಟರ್ ಎಣ್ಣುವ ಕುಪ್ಪಿಲ್ ಕೊಂಡ್ ಬಾತ್. ಆ ಕುಪ್ಪಿನ ಒಡ್‌ಪಂಜಿ ತೊರ್‌ಪಂಜಿ ಯೇಸುರ ಮಂಡೆರ ಮೇಲೆ ಬೂಕ್‍ಚಿ. 4 ಅಲ್ಲಿ ಉಳ್ಳ ಚೆನ್ನ ಜನಕ್ ದುಂಬ ಚೆಡಿ ಬಾತ್; ಎನ್ನಂಗ್ ಇವ ಇಚ್ಚಕ್ ಬೆಲೆಯುಳ್ಳ ಸುಗಂದ ತೈಲತ್‌ನ ಇನ್ನನೆ ಪಾಳ್ ಮಾಡಿಯೆ? 5 ಈ ತೈಲತ್‌ನ ಮುನ್ನೂರ್ ಬೊಳ್ಳಿರ ದುಡ್ಡ್‌ಕಿಂಜ ಜಾಸ್ತಿಕ್ ಮಾರಿತ್, ಆ ದುಡ್ಡ್‌ನ ಗರೀಬಂಗಕ್ ಕೊಡಕಲಿಂಜತಲ್ಲ ಎಣ್ಣಿಯಂಡ್ ಅವಳ ಅಯಿಂಗಯಿಂಗಳೇ ಗೊಣಗಿಯಂಡಿಂಜತ್. ಅದ್ಂಗ್ ಯೇಸು: ಅವಳ ತೊಂದರೆ ಮಾಡತಿ. 6 ಅವಳ ಮುಂಡತೆ ಬುಟ್ಟ್‌ರಿ: ನಿಂಗ ಅವಳ ಎನ್ನಂಗ್ ತೊಂದರೆ ಮಾಡ್‌ವಿರ? ಅವ ನಾಕ್ ನಲ್ಲ ಕಾರ್ಯತ್‍ನ ಮಾಡ್‍ಚಿ. 7 ಗರೀಬಂಗ ಎಕ್ಕಾಲು ನಿಂಗಡ ಕೂಡೆ ಇಪ್ಪ. ಎಕ್ಕ ಬೋಂಡೇಂಗಿಯು ನಿಂಗ ಗರೀಬಂಗಕ್ ಸಹಾಯ ಮಾಡಲು, ಆಚೇಂಗಿ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪುಲೆ. 8 ಅವಕ್ ಎಂತ ಕಯ್ಯುವ ಅದ್‍ನ ಅವ ಮಾಡ್‍ಚಿ. ನನ್ನ ಪೂಪಂಗ್ ಮಿಂಞಲೇ ಅವ ಈ ತರ ಸುಗಂದ ತೈಲತ್‌ನ ಬೂಕಿತ್ ನನ್ನ ತಯಾರ್ ಮಾಡ್‍ಚಿ. 9 ಬೂಲೋಕತ್‍ಲ್ ಎಲ್ಲೆಲ್ಲಾ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‌ವ ಅಲ್ಲಿ ಎಲ್ಲಾ ಇವ ಮಾಡ್‌ನದು ಇವಡ ನೆನಪ್‍ಲ್ ಎಣ್ಣುವಾಂದ್ ನಿಂಗಕ್ ನಾನ್ ನೇರಾಯಿತು ಎಣ್ಣುವೀಂದ್ ಎಣ್ಣ್‌ಚಿ. ಇಸ್ಕರಿಯೋತ ಯೂದ ಯೇಸುನ ಪುಡ್‍ಚಿ ಕೊಡ್‍ಪಕ್ ಒತ್ತತ್ ( ಮತ್ತಾಯ 26.14–16 ; ಲೂಕ 22.3–6 ) 10 ಅಲ್ಲಿಂಜ ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಉಳ್ಳ ಇಸ್ಕರಿಯೋತ ಯೂದ ಎಣ್ಣ್‌ವಂವೊ ಯೇಸುನ ಪುಡ್‍ಚಿ ಕೊಡ್‍ಪಕ್ ಏರ್ಪಾಡ್ ಮಾಡ್‌ವಕಾಯಿತ್ ಮುಕ್ಯ ಯಾಜಕಂಗಡ ಪಕ್ಕ ಪೋಚಿ. 11 ಅಯಿಂಗ ಯೂದಂಡ ತಕ್ಕ್ ಕ್‍ೕಪಂಜಿ ಬಾರಿ ಕುಶಿಪಟ್ಟತ್. ಅಯಿಂಗ ನೀಕ್ ನಂಗ ದುಡ್ಡ್ ತಪ್ಪಾಂದ್ ತಕ್ಕ್ ಕೊಡ್‍ತತ್. ಅಲ್ಲಿಂಜ ಯೂದ ಯೇಸುನ ಕಾಟಿ ಕೊಡ್‍ಪಕ್ ಸರಿಯಾನ ಸಮಯ ನೋಟಿಯಂಡ್ ಇಂಜತ್. ಒಡೆಯಂಡ ಕಡೆ ಗದ್ದಾಳ ( ಮತ್ತಾಯ 26.17–25 ; ಲೂಕ 22.7–14 , 21–23 ; ಯೋಹಾನ 13.21–30 ) 12 ಪಸ್ಕ ನಮ್ಮೆಕಾಯಿತ್ ಕೊರಿಕುಟ್ಟಿ ಬಲಿ ಮಾಡಿ ಪುಳಿಯಿಲ್ಲತೆ ಒಟ್ಟಿ ತಿಂಬ ನಮ್ಮೆರ ಆದ್ಯ ದಿವಸ, ಯೇಸುರ ಶಿಷ್ಯಂಗ ಅಂವೊಂಡ ಪಕ್ಕ ಬಂದಿತ್; ನಿಂಗ ಪಸ್ಕ ತಿಂಬಕ್ ನಂಗ ಎಲ್ಲಿ ಪೋಯಿತ್ ತಯಾರ್ ಮಾಡ್‌ವಕ್ ನೀಕ್ ಕುಶಿಯುಂಡ್‍ೕಂದ್ ಕ್‍ೕಟತ್. 13 ಯೇಸು ತಾಂಡ ಶಿಷ್ಯಂಗಡಡೆಲ್ ದಂಡಾಳ್‌ನ ನೋಟಿತ್: ಪಟ್ಟಣತ್‍ಲ್ ಒರ್ ಮನುಷ್ಯಂಡ ಪಕ್ಕ ಪೋಯಿ, ಅಕ್ಕ ಒರ್ ಮನುಷ್ಯ ಕುಡಿಕೆಲ್ ನೀರ್ ಎಡ್‍ತಂಡ್ ಬಂದಂಡಿಪ್ಪ. ಅಂವೊಂಡ ಬಯ್ಯಕ್ ಪೋಯಿ. 14 ಅಂವೊ ಪೋಪ ಮನೆರ ಒಳ್‍ಕ್ ಅಂವೊಂಡ ಬಯ್ಯಕ್ ಪೋಯಿತ್, ಆ ಮನೆರ ಎಜಮಾನನ ನೋಟಿತ್: ನಾನ್ ನಾಡ ಶಿಷ್ಯಂಗಡ ಕೂಡೆ ಪಸ್ಕ ತಿಂಬಕುಳ್ಳ ಜಾಗ ಎಲ್ಲೀಂದ್ ಉಪಾದ್ಯ ಕ್‍ೕಟತ್‍ೕಂದ್ ಎಣ್ಣುವಿರ. 15 ಅಕ್ಕ ಅಂವೊ ಮನೆರ ಕೊಡಿಲ್ ಉಳ್ಳ ಬಲ್ಯೊರ್ ತಯಾರ್ ಮಾಡ್‍ನ ಕೋಂಬರೆನ ಕಾಟಿತಪ್ಪ. ಅಲ್ಲಿ ನಂಗಕಾಯಿತ್ ಎಲ್ಲಾ ತಯಾರ್ ಮಾಡೀಂದ್ ಎಣ್ಣ್‌ಚಿ. 16 ಯೇಸು ಎಣ್ಣ್‌ನನೆಕೆ ಶಿಷ್ಯಂಗ ಪಟ್ಟಣಕ್ ಪೋಪಕ, ಅಂವೊ ಎಣ್ಣ್‌ನನೆಕೆ ಎಲ್ಲಾ ಇಂಜತ್, ಅಯಿಂಗ ಪಸ್ಕಕುಳ್ಳ ಅಡಿಗೆ ತಯಾರ್ ಮಾಡ್‍ಚಿ. 17 ಬೈಟಾಪಕ ಪನ್ನೆರಂಡ್ ಶಿಷ್ಯಂಗಡ ಕೂಡೆ ಯೇಸು ಅಲ್ಲಿಕ್ ಬಾತ್. 18 ಅಯಿಂಗೆಲ್ಲಾರು ಅಳ್‌ತಿತ್ ಉಂಬಕಾಪಕ, ಯೇಸು ಎಣ್ಣ್‌ಚಿ; ನಿಂಗಡ ಕೂಟ್‌ಲ್ ಒಬ್ಬ ನನ್ನ ಪುಡ್‌ಚಿತ್ ಕೊಡ್‍ಪಾಂದ್ ನೇರಾಯಿತು ನಾನ್ ಎಣ್ಣ್‌ವಿ. 19 ಶಿಷ್ಯಂಗಕೆಲ್ಲ ಬೇಜಾರಾಯಿತ್: ಒಬ್ಬೊಬ್ಬನು, ನಾನಾ ನಾನಾಂದ್ ಯೇಸುನ ಕ್‍ೕಟತ್. 20 ಅದ್ಂಗ್ ಯೇಸು: ಈ ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಉಳ್ಳ ಒಬ್ಬನೇಂದ್ ಎಣ್ಣಿತ್, ನಾಡ ಕೂಡೆ ಒಟ್ಟಿನ ಪಾತ್ರತ್‍ಲ್ ಮುಳುಕುವಂವೋನೇ ಅಂವೋಂದ್ ಎಣ್ಣ್‌ಚಿ; 21 ಮನುಷ್ಯಕುಮಾರ ದೇವಡ ವಾಕ್ಯತ್‍ಲ್ ಒಳ್‌ದ್‌ನನೆಕೆ ಚಾವ. ಆಚೇಂಗಿ ಮನುಷ್ಯಕುಮಾರನ, ಏದ್ ಮನುಷ್ಯ ಪುಡ್‍ಚಿ ಕೊಡ್‍ಪ ಅಂವೊಂಗ್ ಅಯ್ಯೋ. ಆ ಮನುಷ್ಯ ಪುಟ್ಟತೆ ಇಂಜತೇಂಗಿ ಅಂವೊಂಗ್ ನಲ್ಲದಾಯಿತ್ಂಜತ್‍ೕಂದ್ ಎಣ್ಣ್‌ಚಿ. ಒಡೆಯಂಡ ಆಕೀರ್ ಗದ್ದಾಳ ( ಮತ್ತಾಯ 26.26–30 ; ಲೂಕ 22.14–20 ; 1 ಕೊರಿಂಥ 11.23–25 ) 22 ಅಯಿಂಗೆಲ್ಲಾರು ಉಂಬಕಾಪಕ ಯೇಸು ಒಟ್ಟಿನ ಎಡ್‌ಪಂಜಿ, ದೇವನ ತುದಿಚಿತ್ ಪೊಳಿಪಂಜಿ ಶಿಷ್ಯಂಗಕೆಲ್ಲ ಕೊಡ್‍ತತ್: ಇದ್‍ನ ಎಡ್‌ತ್‌ ತಿನ್ನಿ, ಇದ್ ನಾಡ ತಡೀಂದ್ ಎಣ್ಣ್‌ಚಿ. 23 ಅಲ್ಲಿಂಜ ಅಂವೊ ದ್ರಾಕ್ಷಿರಸ ಉಳ್ಳ ಪಾತ್ರತ್‍ನ ಎಡ್‌ಪಂಜಿ ದೇವನ ತುದಿಚಿತ್ ಅಯಿಂಗಕ್ ಕುಡಿಪಕ್ ಕೊಡ್‍ತತ್. ಅಯಿಂಗೆಲ್ಲ ಕುಡಿಚತ್. 24 ಅಕ್ಕ ಅಂವೊ ಅಯಿಂಗಳ ನೋಟಿತ್: ಇದ್ ದುಂಬ ಜನಕಾಯಿತ್ ಬೂಕ್‌ವ ಪುದಿಯ ಒಪ್ಪಂದತ್‍ರ ನಾಡ ಚೋರೆ, 25 ನಾನ್ ದೇವಡ ರಾಜ್ಯತ್‍ಲ್ ಪುದಿಯ ರಸತ್‌ನ ಕುಡಿಪಕತ್ತನೆ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ. 26 ಅಯಿಂಗೆಲ್ಲಾರು ದೇವಡ ಪಾಟ್ ಪಾಡಿಯಂಡೇ ಆಲಿವ್ ಎಣ್ಣುವ ಕುಂದ್‌ಕ್ ಪೋಚಿ. ಯೇಸು ಗೆತ್ಸೇಮನೆ ತೋಟಕ್ ಪೋಯಿತ್ ಪ್ರಾರ್ಥನೆ ಮಾಡ್‍ನದ್ ( ಮತ್ತಾಯ 26.31–35 ; ಲೂಕ 22.31–34 ; ಯೋಹಾನ 13.36–38 ) 27 ಅಕ್ಕ ಯೇಸು ಅಯಿಂಗಳ ನೋಟಿತ್: ಕೊರಿ ಕಾಪಂವೊನ ಕೊಲ್ಲುವಿ, ಕೊರಿಯೆಲ್ಲ ಚದ್‌ರಿ ಪೋಪಾಂದ್ ಪುಸ್ತಕತ್‍ಲ್ ಒಳ್‌ದ್‌ನನೆಕೆ ನಿಂಗೆಲ್ಲಾರು ಇಂದ್ ಬಯಿಟ್ ನನ್ನ ಬುಟ್ಟಿತ್ ಓಡಿ ಪೋಪಿರ. 28 ಆಚೇಂಗಿಯು, ನಾನ್ ಚತ್ತಿತ್, ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಂದ ಪಿಂಞ, ನಿಂಗಕ್ ಮಿಂಞ ಗಲಿಲಾಯಕ್ ಪೋಪೀಂದ್ ಎಣ್ಣ್‌ಚಿ. 29 ಅದ್ಂಗ್ ಪೇತ್ರ: ನಿನ್ನ ಎಲ್ಲಾರು ಬುಟ್ಟಿತ್ ಪೋಚೇಂಗಿಯು ನಾನ್ ನಿನ್ನ ಬುಟ್ಟಿತ್ ಪೋಪುಲೇಂದ್ ಎಣ್ಣ್‌ಚಿ. 30 ಇಂದ್ ಬಯಿಟ್ ನೇರತೆ ದಂಡ್ ಕುರಿ ಮಲ್ಲಂಗೋಳಿ ಕೂವಾಂಗಿಂಜ ಮಿಂಞ ನೀನ್ ನನ್ನ ಮೂಂದ್ ಕುರಿ ಗೊತ್ತಿಲ್ಲೇಂದ್ ಎಣ್ಣುವಿಯಾಂದ್ ಯೇಸು ಎಣ್ಣ್‌ಚಿ. 31 ಅದ್ಂಗ್ ಪೇತ್ರ: ನಾನ್ ನೀಡ ಕೂಡೆ ಚತ್ತ್ ಪೋಂಡೂಂದ್ ಇಂಜತೇಂಗಿಯು, ನಾನ್ ಅನ್ನನೆ ಎಣ್ಣುಲೇಂದ್ ಎಣ್ಣ್‌ಚಿ. ಎಲ್ಲಾ ಶಿಷ್ಯಂಗಳು ಅಂವೊ ಎಣ್ಣ್‌ನನೆಕೆ ಎಣ್ಣ್‌ಚಿ. ಗೆತ್ಸೇಮನೆಲ್ ಯೇಸುರ ಪ್ರಾರ್ಥನೆ ( ಮತ್ತಾಯ 26.36–46 ; ಲೂಕ 22.39–46 ) 32 ಅಯಿಂಗೆಲ್ಲಾ ಗೆತ್ಸೇಮನೆ ಎಣ್ಣುವ ಜಾಗಕ್ ಬಾತ್. ಯೇಸು ಅಂವೊಂಡ ಶಿಷ್ಯಂಗಕ್: ನಾನ್ ಪ್ರಾರ್ಥನೆ ಮಾಡಿತ್ ಬಪ್ಪಕತ್ತನೆ ಇಲ್ಲಿ ಅಳ್‌ತಿತ್ ಇರೀಂದ್ ಎಣ್ಣ್‌ಚಿ. 33 ಪೇತ್ರ, ಯೋಹಾನ ಪಿಂಞ ಯಾಕೋಬನ ಅಂವೊಂಡ ಕೂಡೆ ಕಾಕಿಯಂಡ್ ಪೋಚಿ, ಅಂವೊಂಗ್ ವ್ಯಸನವು ಗಾಬರಿಯು ಆಪಕ್ ಸುರು ಆಚಿ. 34 ಅಕ್ಕ ಅಂವೊ: ನಾನ್ ಚಾವ್‍ರ ನೊಂಬಲತ್‍ರಚ್ಚಕ್ ನಾಡ ಆತ್ಮ ದುಃಖಪಟ್ಟಂಡುಂಡ್. ನಿಂಗ ಇಲ್ಲೇ ಇಂಜಿತ್ ವರಿಯತೆ ಎಚ್ಚರವಾಯಿತಿರೀಂದ್ ಎಣ್ಣಿತ್, 35 ಚೆನ್ನ ದೂರ ಪೋಪಂಜಿ ನೆಲಕ್ ಬೂವಂಜಿ: ಅಪ್ಪಾ ದೇವ ಈ ಕಷ್ಟತ್‍ರ ಸಮಯ ನನ್ನ ಬುಟ್ಟಿತ್ ಪೋಪಕಾಚೇಂಗಿ ಪೋಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ. 36 ನಾಡ ಅಪ್ಪ, ನೀಕ್ ಎಲ್ಲಾ ಮಾಡ್‌ವಕ್ ಕಯ್ಯು. ಈ ಪಾತ್ರತ್‍ನ ನಾಡ ಪಕ್ಕತ್ಂಜ ನೀಕಿರ್, ಆಚೇಂಗಿಯು ನಾಡ ಚಿತ್ತ ಅಲ್ಲ ನೀಡ ಚಿತ್ತವೇ ಆಡ್‍ೕಂದ್ ಎಣ್ಣ್‌ಚಿ. 37 ಯೇಸು ಇನ್ನನೆ ಪ್ರಾರ್ಥನೆ ಮಾಡ್‌ವಂಜಿ ಅಲ್ಲಿಂಜ ಅಂವೊ ಶಿಷ್ಯಂಗಡ ಪಕ್ಕ ಬಾತ್. ಅಯಿಂಗ ವರಿಯಂಡಿಂಜಾನ ಕಂಡತ್; ಪೇತ್ರನ ನೋಟಿತ್, ಸೀಮೋನನೇ, ನಾಕಾಯಿತ್ ಒರ್ ಗಂಟೆ ವರಿಯತೆ ಇಪ್ಪಕ್ ಕಯ್ಯುಲೆಯಾಂದ್ ಎಣ್ಣ್‌ಚಿ. 38 ನಿಂಗ ಪರಿಕ್ಷೇಕ್ ಒಳಪಡತನೆಕೆ ಎಚ್ಚರ ಎಡ್‍ತಂಡ್ ಪ್ರಾರ್ಥನೆ ಮಾಡಿ; ಆತ್ಮಕ್ ಕುಶಿ ಉಂಡ್ ಆಚೇಂಗಿ ತಡಿ ತಳ್ಂದಿತ್ ಉಂಡ್‍ೕಂದ್ ಯೇಸು ಎಣ್ಣ್‌ಚಿ. 39 ಅಂವೊ ಪುನಃ ಪೋಯಿತ್ ಇಂಞೊಮ್ಮ ಇದೇ ತರ ತಕ್ಕ್ ಪರಿಯುವಂಜಿ ಪ್ರಾರ್ಥನೆ ಮಾಡ್‍ಚಿ. 40 ಅದೇ ತರ ಪ್ರಾರ್ಥನೆ ಮಾಡಿತ್, ಬಯ್ಯ ಬಂತ್ ನೋಟ್‌ವಕ, ಅಯಿಂಗ ಪುನಃ ವರಿಯಂಡಿಂಜಾನ ಕಂಡತ್. ಅಯಿಂಗಕ್ ಕಣ್ಣ್ ತೊರ್‌ಪಕ್ ಕಯ್ಯತಚ್ಚಕ್ ವರ್‌ಕ್ ಇಂಜತ್. ಪಿಂಞ ಅಂವೊಂಗ್ ಎಂತ ಎಣ್ಣಂಡೂಂದ್ ಗೊತ್ತಿಲ್ಲತೆ ಇಂಜತ್. 41 ಮೂಂದನೆ ಕುರಿಯು ಪ್ರಾರ್ಥನೆ ಮಾಡಿತ್ ಬಯ್ಯಕ್ ಬಪ್ಪಕ ಅಯಿಂಗಳ ನೋಟಿತ್: ಇಂಞು ನಿಂಗ ವರಿಯಂಡ್, ಆರಾಮಾಯಿತ್ ಉಳ್ಳಿರ? ಇದ್ ಮದಿ, ಸಮಯ ಬಂದ್‌ರ್‌ತ್, ಏಳೀ, ಅದ! ಮನುಷ್ಯಕುಮಾರನ, ಪಾಪಿ ಮನುಷ್ಯಂಗಡ ಕೈಕ್ ಒಪ್ಪ್‌ಚಿಡ್‌ವ ನೇರ ಬಂದ್‌ರ್‌ತ್. 42 ಏಳೀ, ನಂಗ ಪೋಕ, ನೋಟಿ ನನ್ನ ಪುಡ್‌ಚಿತ್ ಕೊಡ್‍ಪಂವೊ ಇಕ್ಕಲೆ ಬಾತ್‍ೕಂದ್ ಎಣ್ಣ್‌ಚಿ. ಯೇಸುನ ಪುಡ್‍ಚಂಡ್ ಪೋಪದ್ ( ಮತ್ತಾಯ 26.47–56 ; ಲೂಕ 22.47–53 ; ಯೋಹಾನ 18.3–12 ) 43 ಪನ್ನೆರಂಡ್ ಶಿಷ್ಯಂಗಡ ಕೂಟ್‌ಲ್ ಉಳ್ಳ ಯೂದ ಎಣ್ಣ್‌ವಂವೊ ಯೇಸು ತಕ್ಕ್ ಪರ್‌ದಂಡ್ ಇಪ್ಪಕಾಪಕ ಬಾತ್. ಅಂವೊಂಡ ಕೂಡೆ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ, ಮುಕ್ಯ ಯಾಜಕಂಗ, ಪೆರಿಯಯಿಂಗ ಅಯಿಚ ಒರ್ ಬಲ್ಯ ಗುಂಪ್ ಕತ್ತಿ, ಕಂಬ್ ಎಡ್‍ತಂಡ್ ಅಂವೊಂಡ ಪಕ್ಕ ಬಾತ್. 44 ಯೇಸುನ ಪುಡ್‌ಚಿತ್ ಕೊಡ್‍ಪಂವೊ: ನಾನ್ ದಾರ್‌ಕ್ ಮುತ್ತ್ ಕೊಡ್‍ಪಿ, ಅಂವೊನೇಂದ್ ಆ ಜನಡ ಗುಂಪ್‌ಕ್ ಸನ್ನೆ ಕೊಡ್‌ತಿತ್ಂಜತ್. 45 ಯೂದ ಬಂದನೆಕೆ ನೇರ ಯೇಸುರ ಪಕ್ಕ ಪೋಯಿತ್, ಉಪಾದ್ಯಾಂದ್ ಎಣ್ಣಿತ್ ಮುತ್ತ್ ಕೊಡ್‍ತತ್. 46 ಅಕ್ಕ ಅಯಿಂಗ ಬಂತ್ ಯೇಸುನ ಬಂದನೆ ಮಾಡ್‍ಚಿ. 47 ಅಲ್ಲಿ ನಿಂದಂಡ್ ಇಂಜ ಒಬ್ಬ ಅಂವೊಂಡ ಕತ್ತಿನ ಎಡ್‌ಪಂಜಿ ಮಹಾ ಯಜಕಂಡ ಆಳ್‍ರ ಕೆಮಿನ ಕೆತ್ತಿರ್‌ತ್. 48 ಯೇಸು ಅಯಿಂಗಳ ನೋಟಿತ್; ಕಳ್ಳನ ಪುಡಿಪಕ್ ಬಂದನೆಕೆ ಕತ್ತಿ ಪಿಂಞ ದೊಣ್ಣೆನೆಲ್ಲ ಎಡ್‌ತ ಬಂದಿತುಳ್ಳಿರಲ್ಲಾ? 49 ನಾನ್ ದಿನಾಲು ನಿಂಗಡ ಕೂಡೆ ದೇವಾಲಯತ್‍ಲ್ ಬೋದನೆ ಮಾಡಿಯಂಡಿಂಜ್, ಅಕ್ಕ ನಿಂಗ ಪುಡ್‌ಚಿತ್‌ಲ್ಲೆ. ಆಚೇಂಗಿ ದೇವಡ ವಾಕ್ಯತ್‍ಲ್ ಎಂತ ಒಳ್‍ದಿತುಂಡೋ ಅದ್ ನೆರವೇರಂಡೂಂದ್ ಎಣ್ಣ್‌ಚಿ. 50 ಅಕ್ಕ ಎಲ್ಲಾ ಶಿಷ್ಯಂಗಳು ಯೇಸುನ ಬುಟ್ಟಿತ್ ಓಡಿ ಪೋಚಿ. 51 ಒರ್ ಬಾಲೆಕಾರ ಒರ್ ನಾರ್ ಬಟ್ಟೆ ಮಾತ್ರ ಪೊತ್ತಿತ್ ಯೇಸುರ ಬೆಂಬರತ್‌ಲ್ ಬಂದಡಿಂಜತ್. ಅಂವೊನ ಅಯಿಂಗ ಪುಡಿಪಕ, 52 ಅಂವೊ ಅಂವೊಂಡ ಬಟ್ಟೇನ ಉತ್ತಿರುವಂಜಿ ಬೆತ್ತಲೆಯಾಯಿತ್ ಓಡಿ ಪೋಚಿ. ಪೆರಿಯಯಿಂಗಡ ಸಬೆರ ಮಿಂಞತ್ ಯೇಸು ( ಮತ್ತಾಯ 26.57–68 ; ಲೂಕ 22.54 , 55 ; 22.63–71 ; ಯೋಹಾನ 18.13 , 14 ; 18.9–24 ) 53 ಯೇಸುನ ಅಯಿಂಗ ಮಹಾ ಯಾಜಕಂಡ ಪಕ್ಕ ಕೊಂಡ್ ಪೋಚಿ. ಅಲ್ಲಿ ಮುಕ್ಯ ಯಾಜಕಂಗ, ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಪೆರಿಯಯಿಂಗ ಎಲ್ಲಾರು ಕೂಡಿಯಾಡಿತ್ಂಜತ್. 54 ಪೇತ್ರ ದೂರತ್‍ಲ್ ಯೇಸುರ ಬಯ್ಯಕ್ ಪೋಯಿತ್, ಮಹಾ ಯಾಜಕಂಡ ಅರಮನೆರ ಕಯ್ಯಾಲೆಕತ್ತನೆ ಬಂತ್, ಒಳ್‍ಕ್ ಪೋಯಿತ್, ಸಿಪಾಯಿಯಡ ಕೂಡೆ ಅಳ್‌ತಂಡ್, ತಿತ್ತ್ ಕಾಂಜಂಡ್ ಇಂಜತ್. 55 ಯೇಸುನ ಕೊಲ್ಲ್‌ವಕಾಯಿತ್ ಮುಕ್ಯ ಯಾಜಕಂಗಳು, ಯೆಹೂದ್ಯಂಗಡ ಆಲೋಚನೆ ಸಬೆರ ಜನಳು ಅಂವೊಂಡ ಮೇಲೆ ಪೊಟ್ಟ್ ಸಾಕ್ಷಿ ಕಂಡ್‌ಪುಡಿಪಕಾಯಿತ್ ಗೇನ ಮಾಡಿಯಂಡ್ ಇಂಜತ್. ಆಚೇಂಗಿ ಯೇಸುರ ಮೇಲೆ ಒರ್ ತಪ್ಪು ಕಂಡ್‌ಪುಡಿಪಕ್ ಕಯಿಂಜಿತ್‌ಲ್ಲೆ. 56 ದುಂಬ ಜನ ಪೊಟ್ಟ್ ಸಾಕ್ಷಿನ ಯೇಸುಕ್ ವಿರೋದವಾಯಿತ್ ಎಣ್ಣ್‌ಚಿ, ಆಚೇಂಗಿ ಅಯಿಂಗ ಪರಿಯುವ ಪೊಟ್ಟ್ ಸಾಕ್ಷಿ ಸರಿ ಬಂತ್‌ಲೆ. 57-58 ಪಿಂಞ ಚೆನ್ನ ಜನ ಎದ್ದಿತ್ ಮನುಷ್ಯಂಗ ಕೆಟ್ಟ್‌ನ ಈ ದೇವಾಲಯತ್‍ನ ನಾನ್ ಪೊಳಿಪಂಜಿ, ಮನುಷ್ಯಂಗಡ ಕೆಲಸ ಇಲ್ಲತೆ ಇಂಞೊರ್ ದೇವಾಲಯತ್‍ನ ಮೂಂದ್ ದಿವಸತ್‍ಲ್ ಕೆಟ್ಟುವೀಂದ್ ಇಂವೊ ಎಣ್ಣ್‌ನದ್ ನಂಗ ಕ್‍ೕಟತ್‍ೕಂದ್ ಯೇಸುಕ್ ವಿರೋದವಾಯಿತ್ ಪೊಟ್ಟ್ ಸಾಕ್ಷಿ ಎಣ್ಣ್‌ಚಿ. 59 ಇನ್ನನೆ ಎಣ್ಣ್‌ನ ಸಾಕ್ಷಿಯು ಸಹ ಒತ್ತಂಡಿತ್‌ಲ್ಲೆ. 60 ಮಹಾ ಯಾಜಕ ಏವಂಜಿ; ನೀಡ ಮೇಲೆ ಇದ್‍ನೆಲ್ಲಾ ನೀಕ್ ವಿರೋದವಾಯಿತ್ ಎಣ್ಣುವ, ಇದ್ಂಗ್ ನೀನ್ ಜವಾಬ್ ಕೊಡ್‍ಪ್‌ಲೆಯಾಂದ್ ಕ್‍ೕಟತ್. 61 ಆಚೇಂಗಿ ಯೇಸು ಒರ್ ತಕ್ಕ್ ಪರಿಯತೆ ಮುಂಡತೆ ಇಂಜತ್. ಪುನಃ ಮಹಾ ಯಾಜಕ ನೀನ್ ದೇವಾದಿ ದೇವಡ ಮೋಂವೊನಾನ ಕ್ರಿಸ್ತನಾ ಎಣ್ಣಿಯಂಡ್ ಕ್‍ೕಟತ್? 62 ಅದ್ಂಗ್ ಯೇಸು: ಅಕ್ಕು, ನಾನ್ ಅಂವೊನೇ; ಮನುಷ್ಯಕುಮಾರ ಸರ್ವ ಶಕ್ತಿಯುಳ್ಳಂವೊಂಡ ಬಲ್‌ತೆ ಬರಿಲ್ ಅಳ್‌ತಿತ್, ಬಾನತ್‍ರ ಮೋಡತ್‍ಲ್ ಬಪ್ಪದ್‍ನ ನಿಂಗೆಲ್ಲಾರು ಕಾಂಬಿರಾಂದ್ ಎಣ್ಣ್‌ಚಿ. 63 ಮಹಾ ಯಾಜಕ ಇದ್‍ನ ಕ್‍ೕಟದು, ತಾಂಡ ಬಟ್ಟೇನ ಕೀತಿತ್: ನಂಗಕ್ ಇಂಞು ಏದ್ ಸಾಕ್ಷಿ ಬೋಂಡು. 64 ದೇವ ದೂಷಣೆನ ನಿಂಗೆಲ್ಲಾರು ಕ್‍ೕಟಿರಲ್ಲ! ನಿಂಗ ಎಂತ ತೀರ್ಮಾನ ಮಾಡ್‌ವಿರಾಂದ್ ಕ್‍ೕಟತ್, ಅಲ್ಲಿ ಉಳ್ಳಯಿಂಗೆಲ್ಲಾರೂ ಯೇಸು ತಪ್ಪ್ ಮಾಡ್‌ನಂವು ಅಂವೊಂಗ್ ಮರಣ ಶಿಕ್ಷೆ ಕೊಡ್‍ಕಂಡೂಂದ್ ತೀರ್ಮಾನ ಮಾಡ್‍ಚಿ. 65 ಚೆನ್ನ ಜನ ಯೇಸುರ ಮೂಡ್‍ಕ್ ತುಪ್ಪ್‌ವಕ್ ಸುರು ಮಾಡ್‍ಚಿ. ಅಂವೊಂಡ ಮೂಡ್ ಕೆಟ್ಟುವಂಜಿ ಗುದ್ದಿರ್‌ವಂಜ ನೀಕ್ ದಾರ್ ಗುದ್ದಿಯೇಂದ್ ಪ್ರವಾದೆನ ಎಣ್ಣೀಂದ್ ಎಣ್ಣಿಯಂಡಿಂಜತ್. ಪಿಂಞ ಪಡೆಯಾಳಿಯಂಗ ಅಂವೊನ ಪೊಜ್ಜತ್. ಪೇತ್ರ ಯೇಸುನ ಗೊತ್ತಿಲ್ಲೇಂದ್ ಎಣ್ಣ್‌ವದ್ ( ಮತ್ತಾಯ 26.69–75 ; ಲೂಕ 22.56–62 ; ಯೋಹಾನ 18.15–18 , 25–27 ) 66 ಅಕ್ಕಣೆಕ್ ಪೇತ್ರ ಅರಮನೆರ ಅಡಿಲ್ ಕಯ್ಯಾಲೆಲ್ ಇಪ್ಪಕ, ಮಹಾ ಯಾಜಕಂಡ ಪಣಿಕರ್ತಿ ಬಂತ್, 67 ಅಂವೊ ತಿತ್ತ್ ಕಾಂಜಂಡ್ ಇಪ್ಪಕಾಪಕ, ಆ ಮೂಡಿ ಪೇತ್ರನ ನೇರೆ ನೋಟುವಂಜಿ ನೀನ್ ಸಹ ನಜರೇತ್‍ರ ಯೇಸುರ ಕೂಡೆ ಇಂಜಲ್ಲಾಂದ್ ಕ್‍ೕಟತ್. 68 ಅಂವೊ ಆ ತಕ್ಕ್‌ಕ್ ಒತ್ತತೆ: ನಾಕ್ ಗೊತ್ತ್‌ಲ್ಲೆ. ನೀನ್ ಎಂತ ಎಣ್ಣ್‌ವಿಯಾ, ಅದ್ ನಾಕ್ ಅರ್ಥ ಆಪುಲೇಂದ್ ಒತ್ತತೆ ಪೊರಮೆ ಉಳ್ಳ ಪಡಿ ಮಂಟಪಕ್ ಪೋಚಿ. ಅಕ್ಕಣೆಕೆ ಮಲ್ಲಂಗೋಳಿ ಕೂಂದತ್. 69 ಪಣಿಕರ್ತಿ ಅಂವೊನ ಅಲ್ಲಿ ಪುನಃ ನೋಟಿತ್: ಅಲ್ಲಿ ನಿಂದಿತ್ ಉಳ್ಳಯಿಂಗಕ್ ಇಂವೊ ಅಯಿಂಗಡ ಕೂಟ್‌ಲ್ ಒಬ್ಬಾಂದ್ ಎಣ್ಣ್‌ಚಿ. 70 ಅನ್ನನೆ ಪುನಃ ಪೇತ್ರ ಒತ್ತತೆಯಿಂಜತ್. ಚೆನ್ನ ನೇರ ಕಯಿಂಜ ಪಿಂಞ ಅಲ್ಲಿ ನಿಂದಿತುಳ್ಳಯಿಂಗ ನೀನ್ ನೇರಾಯಿತ್ ಅಯಿಂಗಡಲ್ಲಿ ಒಬ್ಬೊನಾಯಿತ್ ಇಕ್ಕು, ನೀನ್ ಗಲಿಲಾಯ ಜಾಗತ್‍ಲ್ ಉಳ್ಳಂವೊ, ನೀಡ ತಕ್ಕ್ ಅಯಿಂಗಡ ತಕ್ಕ್‌ರನೆಕೆ ಉಂಡ್‍ೕಂದ್ ಎಣ್ಣ್‌ಚಿ. 71 ಅದ್ಂಗ್ ಅಂವೊ: ನಾನ್ ಸತ್ಯ ಪರಿಯುವಿ, ನಿಂಗ ತಕ್ಕ್ ಪರಿಯುವ ಮನುಷ್ಯನ ನಾಕ್ ಗೊತ್ತ್‌ಲ್ಲೆ, ನಾನ್ ಪೊಟ್ಟ್‌ಪರಿಯುವೇಂಗಿ ನಾಡ ಮೇಲೆ ಶಾಪ ಬರಡ್‍ೕಂದ್ ಎಣ್ಣ್‌ಚಿ. 72 ಅಕ್ಕಣೆಕೆ ಮಲ್ಲಂಗೋಳಿ ದಂಡನೆ ಕುರಿ ಕೂಂದತ್. ಮಲ್ಲಂಗೋಳಿ ದಂಡ್ ಕುರಿ ಕೂವಾಂಗ್ ಮಿಂಞ ನನ್ನ ಮೂಂದ್ ಕುರಿ ಗೊತ್ತಿಲ್ಲೇಂದ್ ಎಣ್ಣುವಿಯಾಂದ್ ಯೇಸು ಎಣ್ಣ್‌ನದ್ ಪೇತ್ರಂಗ್ ಗೇನ ಬಂತ್ ದುಃಖಿಚಿಟ್ಟಂಡ್ ಮೊರಟತ್. |
© 2017, New Life Literature (NLL)