ಮಾರ್ಕ 1 - ಕೊಡವ ಬೈಬಲ್ದೀಕ್ಷಾಸ್ನಾನ ತಪ್ಪ ಯೋಹಾನಂಡ ವಿಷಯ ( ಮತ್ತಾಯ 3.1–12 ; ಲೂಕ 3.1–18 ; ಯೋಹಾನ 1.19–28 ) 1 ಇದ್ ದೇವಡ ಮೋಂವೊನಾನ ಯೇಸು ಕ್ರಿಸ್ತಂಡ ನಲ್ಲ ಸುದ್ದಿರ ತೊಡಕ. 2 ನೋಟಿ, ನಾನ್ ನಾಡ ದೂತನ ನಿಂಗಕ್ಂಜ ಮಿಂಞ ಅಯಿಪಿ; ಅಂವೊ ನೀಕ್ ಮಿಂಞ ಪೋಯಿತ್, ನೀಡ ಬಟ್ಟೇನ ತಯಾರ್ ಮಾಡ್‌ವಾಂದ್; 3 ದಾರೋ ಮಣಬೂಮಿಲ್, ಒಡೆಯ ಬಂದಂಡ್ ಉಂಡ್ ಅದ್ಂಗಾಯಿತ್ ದೇವ ಬಪ್ಪಕ್ ಉಳ್ಳ ಬಟ್ಟೇನ ನೇರೆ ಮಾಡಿತ್ ಚಾಯಿಮಾಡ್‍ೕಂದ್, ಯೆಶಾಯ ಎಣ್ಣುವ ಪ್ರವಾದಿ ಒಳ್‌ದ್‌ನನೆಕೆ; 4 ಯೋಹಾನ: ನಿಂಗಡ ಪಾಪಕ್ ಮನ್ನಿಪ್ ಕ್‍ಟ್ಟ್‌ವಕಾಯಿತ್ ದೇವಡ ಪಕ್ಕ ತಿರಿತ್ ದೀಕ್ಷಾಸ್ನಾನ ಎಡ್‌ಕೊಂಡು, ದೇವ ನಿಂಗಡ ಪಾಪತ್‍ನ ಮನ್ನಿಪ್ಪಾಂದ್ ಜನಕ್ ಮಣಬೂಮಿಲ್ ಬೋದನೆ ಮಾಡಿಯಂಡಿಂಜತ್. 5 ಅಕ್ಕ ದುಂಬ ಜನ ಯೂದಾಯ ಎಣ್ಣುವ ನಾಡಿಂಜ, ಯೆರೂಸಲೇಮ್ಂಜ ದೀಕ್ಷಾಸ್ನಾನ ತಪ್ಪ ಯೋಹಾನಂಡ ಪಕ್ಕ ಪೋಯಿತ್ ಅಯಿಂಗ ಅಯಿಂಗಡ ಪಾಪತ್‍ನ ಎಣ್ಣ್‌ಚಿ. ಯೋಹಾನ ಅಯಿಂಗಕ್ ಯೊರ್ದನ್ ಎಣ್ಣುವ ಪೊಳೆಲ್ ದೀಕ್ಷಾಸ್ನಾನ ಕೊಡ್‍ತತ್. 6 ಯೋಹಾನ ಒಂಟೆರ ರೋಮತ್‍ಲ್ ಮಾಡ್‍ನ ಬಟ್ಟೆ ಇಟ್ಟಂಡ್, ತಾಂಡ ಸೊಂಟಕ್ ಚರ್ಮತ್‌ರ ಪಟ್ಟಿ ಕೆಟ್ಟಿಯಂಡಿಂಜತ್. ಅಂವೊಂಡ ಆಹಾರ ಪಚ್ಚೆ ಪುಕ್ಕ ಪಿಂಞ ಕಾಡ್‍ಲ್ ಕ್‍ಟ್ಟುವ ತೇನ್ ಆಯಿತಿಂಜತ್. 7 ಅಂವೊ: ನಾಡ ಬಯ್ಯ ನಾಕಿಂಜ ಬಲ್ಯಂವೊ ಒಬ್ಬ ಬಂದಂಡುಂಡ್. ನಾನ್ ಬಗ್ಗಿತ್ ಅಂವೊಂಡ ಕಾಲ್‍ರ ಎಕ್ಕಡತ್‌ನ ಉತ್ತ್‌ವಕ್ ಸಹ ನಾಕ್ ಯೋಗ್ಯತೆ ಇಲ್ಲೆ. 8 ನಾನ್ ನಿಂಗಕ್ ನೀರ್‌ಲ್ ದೀಕ್ಷಾಸ್ನಾನ ತಪ್ಪಿ, ಆಚೇಂಗಿ ಅಂವೊ ನಿಂಗಳ ಪವಿತ್ರಾತ್ಮತ್‍ಲ್ ದೀಕ್ಷಾಸ್ನಾನ ಮಾಡ್‌ವಾಂದ್ ಬೋದನೆ ಮಾಡ್‍ಚಿ. ಯೇಸುರ ದೀಕ್ಷಾಸ್ನಾನ ಪಿಂಞ ಪರೀಕ್ಷೆ ( ಮತ್ತಾಯ 3.13–4.11 ; ಲೂಕ 3.21 , 22 ; 4.1–13 ) 9 ಆ ಸಮಯತ್‍ಲ್ ಗಲಿಲಾಯ ನಾಡ್‍ಲ್ ಉಳ್ಳ ನಜರೇತ್ ಊರಿಂಜ ಯೇಸು ಬಂದಿತ್ ಯೊರ್ದನ್ ಪೊಳೆಕ್ ಪೋಚಿ. ಅಲ್ಲಿ ಯೋಹಾನ ಅಂವೊಂಗ್ ದೀಕ್ಷಾಸ್ನಾನ ಕೊಡ್‍ತತ್. 10 ಯೇಸು ಪೊಳೆರ ನೀರಿಂಜ ಪೊರಮೆ ಬಪ್ಪಕ, ಪರಲೋಕ ತೊರಂದಿತ್ ಒರ್ ಪಾರಿವಾಳ ರೂಪತ್‌ಲ್ ಪವಿತ್ರಾತ್ಮ ಬಪ್ಪದ್‍ನ ಅಂವೊ ಕಂಡತ್. 11 ನೀನ್ ನಾಡ ಕೊದಿರ ಮೋಂವೊ, ನೀಡ ಮೇಲೆ ನಾಕ್ ದುಂಬ ಕುಶಿ ಉಂಡ್‍ೕಂದ್ ಪರಲೋಕತ್ಂಜ ಒರ್ ವಾಣಿ ಬಾತ್. 12 ಅಚ್ಚಕ್ ಬೆರಿಯ ಪವಿತ್ರಾತ್ಮ ಅಂವೊನ ಮರುಬೂಮಿಕ್ ಪೋಪನೆಕೆ ಮಾಡ್‍ಚಿ. 13 ಅಲ್ಲಿ ಅಂವೊ ನಾಪದ್ ದಿವಸ ಕಾಡ್ ಪ್ರಾಣಿಯಡ ಕೂಡೆ ಇಂಜತ್. ಅಲ್ಲಿ ಸೈತಾನ ಅಂವೊನ ಸೋದನೆ ಮಾಡ್‍ಚಿ. ದೇವದೂತಂಗ ಅಂವೊಂಗ್ ಸೇವೆ ಮಾಡಿಯಂಡ್ ಇಂಜತ್. ಯೇಸು ಶಿಷ್ಯಂಗಳ ಗೊತ್ತ್ ಮಾಡ್‍ನದ್ ( ಮತ್ತಾಯ 4.12–22 ; ಲೂಕ 4.14 , 15 ; 5.1–11 ) 14 ಯೋಹಾನನ ಜೈಲ್‌ಕ್ ಇಟ್ಟ ಪಿಂಞ ಯೇಸು ಗಲಿಲಾಯಕ್ ಪೋಯಿತ್, ಅಲ್ಲಿ ಜನಕ್ ದೇವಡ ನಲ್ಲ ಸುದ್ದಿನ ಪ್ರಚಾರ ಮಾಡ್‍ಚಿ. 15 ಕಾಲ ಪೂರ್ತಿ ಆಚಿ, ದೇವಡ ರಾಜ್ಯ ಬೆರಿಯ ಬಪ್ಪ. ನಿಂಗಡ ಪಾಪಕಾಯಿತ್ ಪಶ್ಚಾತಾಪ ಪಟ್ಟಿತ್, ದೇವಡ ನಲ್ಲ ಸುದ್ದಿನ ನಂಬೀಂದ್ ಎಣ್ಣ್‌ಚಿ. 16 ಯೇಸು ಗಲಿಲಾಯತ್‍ರ ಕೆರೆರ ಬರಿಲ್ ನಡ್ಂದ್ ಪೋಯಂಡಿಪ್ಪಕ, ಸೀಮೋನ ಪಿಂಞ ಅಂದ್ರೆಯ ಎಣ್ಣ್‌ವ ಅಣ್ಣತಮ್ಮಣಂಗ ದಂಡಾಳು ಬಲೆನ ಬೀಜಿತ್ ಮೀನ್ ಪುಡ್‍ಚಂಡ್ ಇಂಜದ್‍ನ ಯೇಸು ಕಂಡತ್. ಅಯಿಂಗ ಬೆಸ್ತಂಗಳಾಯಿತ್‌ಂಜತ್. 17 ಯೇಸು ಅಯಿಂಗಳ ನೋಟಿತ್: ನಾಡ ಕೂಡೆ ಬಾರಿ, ನಾನ್ ನಿಂಗಕ್ ಮನುಷ್ಯಂಗಳ ನಾಡ ಶಿಷ್ಯಂಗಳಾಯಿತ್ ಮಾಡ್‌ವಕ್ ಎಣ್ಣಿ ತಪ್ಪೀಂದ್ ಎಣ್ಣ್‌ಚಿ. 18 ಅಯಿಂಗ ಒಮ್ಮಕೆ ಅಯಿಂಗಡ ಬಲೆನ ಬುಟ್ಟಿತ್ ಯೇಸುರ ಕೂಡೆ ಪೋಚಿ. 19 ಯೇಸು ಇಂಞು ಚೆನ್ನ ಮಿಂಞಕ್ ಪೋಯಂಡಿಪ್ಪಕ, ಅಲ್ಲಿ ಜೆಬೆದಾಯಂಡ ಮಕ್ಕಳಾನ ಯಾಕೋಬ ಪಿಂಞ ಯೋಹಾನ ದೋಣಿಲ್ ಅಳ್‌ತಂಡ್ ಮೀನ್ ಪುಡಿಪಕ್ ಬಲೆನ ಸರಿ ಮಾಡಿಯಂಡ್ ಇಂಜಾನ ಕಂಡತ್. 20 ಅಯಿಂಗಳ ಸಹ ಯೇಸು ಕಾಕ್‍ಚಿ; ಅಕ್ಕಣೆಕೆ ಅಯಿಂಗ ತಾಂಡ ಅಪ್ಪನಾನ ಜೆಬೆದಾಯ ಪಿಂಞ ಪಣಿಕಾರಳ ಬುಟ್ಟಿತ್ ಯೇಸುರ ಕೂಡೆ ಪೋಚಿ. ಯೇಸು ಉಪದೇಶ ಮಾಡಿತ್ ಕೂಳಿಯಳ ಬುಡ್‌ತಿತ್ ರೋಗಿಯಳ ಚಾಯಿ ಮಾಡಿತ್ ಪೆದ ಎಡ್‍ತಂಡದ್ ( ಲೂಕ 4.31–37 ) 21 ಯೇಸು ಪಿಂಞ ಅಂವೊಂಡ ಶಿಷ್ಯಂಗ ಕಪೆರ್ನೌಮ್ ಎಣ್ಣ್‌ವ ಪಟ್ಟಣಕ್ ಪೋಚಿ. ಸಬ್ಬತ್ ದಿವಸ ಬಪ್ಪಕ ಅಂವೊ ಸಬಾಮಂದಿರತ್‍ಲ್ ಪ್ರವೇಶ ಮಾಡಿತ್, ಬೋದನೆ ಮಾಡ್‌ವಕ್ ಸುರು ಮಾಡ್‍ಚಿ. 22 ಜನ ಅಂವೊ ಮಾಡ್‌ವ ಬೋದನೆನ ಕ್‍ೕಟಿತ್, ಆಶ್ಚರ್ಯ ಪಟ್ಟತ್. ಇಂವೊ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡನೆಕೆ ಬೋದನೆ ಮಾಡತೆ, ಅದಿಕಾರ ಉಳ್ಳಯಿಂಗಡನೆಕೆ ಬೋದನೆ ಮಾಡ್‌ವಾಂದ್ ಎಣ್ಣ್‌ಚಿ. 23 ಅಕ್ಕಣೆಕ್ ಒರ್ ಕೂಳಿ ಪುಡ್‌ಚ ಮನುಷ್ಯ ಸಬಾಮಂದಿರತ್‍ಲ್ ಇಂಜತ್. 24 ಅಂವೊ ಯೇಸುನ ಕಾಂಬಕ: ಅಯ್ಯೋ! ನಜರೇತಿನ ಯೇಸುವೇ, ನೀಕ್ ನಂಗಡಗುಂಡ್ ಎಂತ ಆಂಡು? ನಂಗಳ ಪಾಳ್ ಮಾಡ್‌ವಕಾಯಿತ್ ಬಂದಿತುಳ್ಳಿಯ? ನೀನ್ ದಾರ್‍ೕಂದ್ ನಾಕ್ ಗೊತ್ತುಂಡ್. ನೀನ್ ದೇವಡ ಪವಿತ್ರವಾನಂವೋಂದ್ ಕೂತ್ ಕೊಡ್‍ತತ್. 25 ಅದ್ಂಗ್ ಯೇಸು: ಮುಂಡತೆ ಇರ್, ಈ ಮನುಷ್ಯನ ಬುಟ್ಟಿತ್ ಪೋಂದ್ ಹುಕುಮ್ ಕೊಡ್‍ತತ್. 26 ಅಕ್ಕ ಆ ಕೂಳಿ ಆ ಮನುಷ್ಯಂಡ ತಡೀನ ಜೋರಾಯಿತ್ ಕುಲ್‍ಕಿತ್, ಜೋರಾಯಿತ್ ಕೂತ್ ಕೊಡ್‌ತಿತ್ ಅಂವೊನ ಬುಟ್ಟಿತ್ ಪೋಚಿ. 27 ಅಲ್ಲಿ ಇಂಜ ಎಲ್ಲಾ ಜನಳು ಆಶ್ಚರ್ಯಪಟ್ಟಿತ್: ಇದ್ ಎಂತ? ಈ ಪುದಿಯ ಬೋದನೆ ಎಂತದ್? ಅಂವೊ ಅದಿಕಾರತ್‍ಲ್ ಕೂಳಿಯಳ ಪೊರಮೆ ಪೋಪಕ್ ಆಜ್ಞೆ ಮಾಡ್‌ವ, ಅದೂ ಅಂವೊಂಡ ತಕ್ಕ್‌ನ ಕ್‍ೕಪಲ್ಲಾಂದ್ ಅಯಿಂಗಡ ಒಳ್‌ಲೇ ತಕ್ಕ್ ಪರ್‌ದಂಡ್ ಇಂಜತ್. 28 ಆನಗುಂಡ್, ಯೇಸುರ ಕ್‍ೕಳಿ ಗಲಿಲಾಯ ನಾಡೆಲ್ಲಾ ಹರಡ್‍ಚಿ. 29 ಪಿಂಞ ಯೇಸು ಸಬಾಮಂದಿರತ್‌ನ ಬುಟ್ಟಿತ್ ಯಾಕೋಬ, ಯೋಹಾನ ಪಿಂಞ ಬಾಕಿ ಶಿಷ್ಯಂಗಡ ಕೂಡೆ ಸೀಮೋನ ಪಿಂಞ ಅಂದ್ರೆಯ ಎಣ್ಣುವಯಿಂಗಡ ಮನೆಕ್ ಪೋಚಿ. 30 ಅಲ್ಲಿ ಸೀಮೋನಂಡ ಮಾಂವಿಕ್ ಪನಿ ಬಂದಿತ್ ಬುದ್ದಂಡ್ ಇಂಜತ್. ಬಂದನೆಕೆ ಅವಡ ವಿಷಯತ್‍ನ ಅಯಿಂಗ ಯೇಸುಕ್ ಎಣ್ಣ್‌ಚಿ. 31 ಯೇಸು ಅವಡ ಪಕ್ಕ ಪೋಯಿತ್ ಅವಡ ಕೈ ಪುಡ್‌ಚಿತ್, ಅವಳ ಎಪ್ಪ್‌ಚಿ. ಅಕ್ಕಣೆ ಅವಡ ಪನಿ ವಾಸಿ ಆಯಿತ್, ಪನಿ ಬುಟ್ಟ್ ಪೋಚಿ. ಅವ ಎದ್ದಿತ್ ಅಯಿಂಗಕ್ ಸೇವೆ ಮಾಡ್‍ಚಿ. 32 ಸೂರ್ಯ ಮುಳ್‌ಗ್‌ನ ಪಿಂಞ ಬೈಟಾಪಕ, ಜನ ರೋಗ ಉಳ್ಳಯಿಂಗಳ, ಕೂಳಿ ಪುಡ್‌ಚಯಿಂಗಳ ಯೇಸುರ ಪಕ್ಕ ಕಾಕಿಯಂಡ್ ಬಾತ್. 33 ಆ ಊರ್‌ಲ್ ಉಳ್ಳ ಎಲ್ಲಾ ಜನಳು ಆ ಮನೆರ ಕಯ್ಯಾಲೆರ ಮಿಂಞ ಕೂಡಿತ್ಂಜತ್. 34 ಯೇಸು ಎಲ್ಲಾ ತರತ್‍ರ ಕಾಯಿಲೆ ಉಳ್ಳಯಿಂಗಳ ಪಿಂಞ ಕೂಳಿ ಪುಡ್‌ಚ ಮನುಷ್ಯಂಗಳ ವಾಸಿ ಮಾಡ್‍ಚಿ. ಪಿಂಞ ತಾನ್ ದಾರ್‍ೕಂದ್ ಕೂಳಿಯಕ್ ಗೊತ್ತಾನಗುಂಡ್ ಅಂವೊ ಅಯಿಂಗಳ ತಕ್ಕ್‌ಪರಿವಕ್ ಬುಟ್ಟಿತ್‌ಲ್ಲೆ. ಗಲಿಲಾಯ ಪಟ್ಟಣತ್‍ಲ್ ಯೇಸು ಪ್ರಚಾರ ಮಾಡ್‌ವ ( ಲೂಕ 4.42–44 ) 35 ಪಿತ್ಯಾಂದ್ ಬೊಳಿ ಬುಡ್‌ವಕ್ ಮಿಂಞಲೇ ಯೇಸು ಎದ್ದಿತ್, ದಾರೂ ಇಲ್ಲತ ಮಣಬೂಮಿಕ್ ಪೋಯಿತ್ ದೇವನ ಪ್ರಾರ್ಥನೆ ಮಾಡಿಯಂಡಿಂಜತ್. 36 ಸೀಮೋನ ಪಿಂಞ ಅಂವೊಂಡ ಕೂಟಾಳಿಯಂಗ ಯೇಸುನ ತ್‍ೕಡಿಯಂಡ್ ಇಂಜತ್. 37 ಅಯಿಂಗ ಯೇಸುನ ಕಂಡ ಪಿಂಞ ನಿನ್ನ ಜನ ತ್‍ೕಡಿಯಂಡ್ ಉಂಡ್‍ೕಂದ್ ಎಣ್ಣ್‌ಚಿ. 38 ಆಚೇಂಗಿ ಯೇಸು: ನಂಗ ಇಲ್ಲಿ ಉಳ್ಳ ಬೋರೆ ಬೋರೆ ಪಟ್ಟಣಕ್ ಪೋಕಂಡು, ನಾನ್ ಅಲ್ಲಿಯು ದೇವಡ ವಿಷಯತ್‍ನ ಪ್ರಚಾರ ಮಾಡಂಡು, ಅದ್ಂಗಾಯಿತೇ ನಾನ್ ಬಂದಿಯೇಂದ್ ಎಣ್ಣ್‌ಚಿ. 39 ಅನ್ನನೆ ಅಂವೊ ಗಲಿಲಾಯ ನಾಡ್‍ಕೆಲ್ಲಾ ಪೋಯಿತ್, ಅಯಿಂಗಡ ಸಬಾಮಂದಿರತ್‍ಲ್ ದೇವಡ ವಿಷಯತ್‍ನ ಬೋದನೆ ಮಾಡಿಯಂಡ್, ಕೂಳಿನ ಪುಡ್‌ಚಯಿಂಗಕ್ ಕೂಳಿನ ಬುಡ್‌ತಿತ್ ಜನಳ ವಾಸಿ ಮಾಡ್‍ಚಿ. ಯೇಸು ಒರ್ ಕುಷ್ಟರೋಗಿನ ವಾಸಿ ಮಾಡ್‍ವದ್ ( ಮತ್ತಾಯ 8.1–4 ; ಲೂಕ 5.12–16 ) 40 ಒರ್ ಕುಷ್ಟರೋಗಿ ಯೇಸುರ ಪಕ್ಕ ಬಂದಿತ್ ಮೊಣಕಾಲ್ ಊರಿತ್: ನೀಕ್ ಕುಶಿ ಉಂಡೇಂಗಿ ನನ್ನ ಶುದ್ದ ಮಾಡ್‌ವಕ್ ನೀಕ್ ಕಯ್ಯೂಂದ್ ಬೋಡಿಯಂಡತ್. 41 ಯೇಸುಕ್ ದುಂಬ ಕನಿಕರ ಆಯಿತ್, ಯೇಸು ಅಂವೊಂಡ ಕೈಯಿನ ನೀಟುವಂಜಿ ಅಂವೊನ ಮುಟ್ಟಿತ್: ನಾಕ್ ಕುಶಿ ಉಂಡ್, ಶುದ್ದ ಆಡ್‍ೕಂದ್ ಎಣ್ಣ್‌ಚಿ. 42 ಅಚ್ಚಕ್ ಬೆರಿಯ ಅಂವೊಂಡ ಕಾಯಿಲೆ ವಾಸಿ ಆಯಿತ್, ಅಂವೊ ಶುದ್ದ ಆಚಿ. 43 ಯೇಸು: ಈ ವಿಷಯತ್‍ನ ದಾರ್‌ಕು ಎಣ್ಣತೇಂದ್ ಎಚ್ಚರ ಮಾಡ್‍ಚಿ. 44 ಆಚೇಂಗಿಯು, ನೀನ್ ನೇರೆ ಯಾಜಕಂಡ ಪಕ್ಕ ಪೋಯಿತ್ ನಿನ್ನ ಕಾಂಬ್‍ಚಿಡ್; ಅಂವೊ ನಿನ್ನ ಪರೀಕ್ಷೆ ಮಾಡಡ್; ಪಿಂಞ ನೀನ್ ವಾಸಿ ಆಯಿತುಳ್ಳಾಂಗ್ ಎಲ್ಲಾರ್‌ಕು ಸಾಕ್ಷಿಯಾಯಿತ್ ಮೋಶೇರ ನ್ಯಾಯಪ್ರಮಾಣತ್‍ಲ್ ಎಣ್ಣಿತ್ತುಳ್ಳ ಕಾಣಿಕೆನ ಕೊಡ್‍ೕಂದ್ ಎಣ್ಣ್‌ಚಿ. 45 ಆಚೇಂಗಿ ಯೇಸು ಎಣ್ಣ್‌ನ ಪ್ರಕಾರ ಅಂವೊಂಡ ತಕ್ಕ್ ಕ್‍ೕಕತೆ ಈ ನಲ್ಲ ವಿಷಯತ್‍ನ ಎಲ್ಲಾ ಜಾಗತ್‍ಲು ಎಣ್ಣಿಯಂಡ್ ಪೋಚಿ. ಅದ್ಂಗಾಯಿತ್ ಯೇಸುಕ್ ಪೊರಮೆ ಪೋಪಕ್ ಕಯ್ಯತಾಚಿ. ಆನಗುಂಡ್ ಯೇಸು ದಾರೂ ಇಲ್ಲತ ಜಾಗತ್‍ಲ್ ಇಂಜತ್. ಆಚೇಂಗಿಯು ಯೇಸುರ ಪಕ್ಕ ದುಂಬ ಜನ ಬಾತ್. |
© 2017, New Life Literature (NLL)