ಮತ್ತಾಯ 24 - ಕೊಡವ ಬೈಬಲ್ಕಡೆ ಕಾಲತ್‍ರ ಗುರ್‌ತ್ ( ಮಾರ್ಕ 13.1 , 2 ; ಲೂಕ 21.5 , 6 ) 1 ಯೇಸು ದೇವಾಲಯತ್ಂಜ ಪೊರಮೆ ಪೋಪಕಾಪಕ ಅಂವೊಂಡ ಶಿಷ್ಯಂಗ ದೇವಲಾಯತ್‌ರ ಕಟ್ಟಡತ್‌ನ ಅಂವೊಂಗ್ ಕಾಟ್‍ವಕ್ ಪಕ್ಕ ಬಾತ್. 2 ಅಕ್ಕ ಯೇಸು ಅಯಿಂಗಳ ನೋಟಿತ್, ಇದ್‍ನೆಲ್ಲ ನೋಟ್‌ವಿರಲ್ಲ, ಈ ಜಾಗತ್‍ಲ್ ಒರ್ ಕಲ್ಲ್‌ರ ಮೇಲೆ ಇಂಞ್ಞೊರ್ ಕಲ್ಲ್ ಇಲ್ಲತನೆಕೆ ಎಲ್ಲಾನ ಪೊಳಿಚಿಡ್‍ವಾಂದ್ ನೇರಾಯಿತು ನಿಂಗಕ್ ಎಣ್ಣುವೀಂದ್ ಎಣ್ಣ್‌ಚಿ. ಹಿಂಸೆ ಪಿಂಞ ಕಷ್ಟ ( ಮಾರ್ಕ 13.3–13 ; ಲೂಕ 21.7–19 ) 3 ಯೇಸು ಆಲಿವ್ ಕುಂದ್‌ರ ಕೊಡಿಲ್ ಅಳ್‌ತಿತಿಪ್ಪಕ, ಅಂವೊಂಡ ಶಿಷ್ಯಂಗ ಯೇಸುರ ಪಕ್ಕ ಬೋರೆಯಾಯಿತ್ ಬಂತ್: ಇದೆಲ್ಲಾ ಎಕ್ಕ ಆಪಾಂದ್ ಗುಟ್ಟಾಯಿತ್ ಕ್‍ೕಟತ್. ನೀನ್ ಇಂಞೊಮ್ಮ ಬಪ್ಪಕೂ, ಈ ಯುಗತ್‌ರ ಅಂತ್ಯಕೂ ಗುರ್‌ತ್ ಎಂತ್‍ೕಂದ್ ನಂಗಕ್ ಎಣ್ಣಂಡೂಂದ್ ಕ್‍ೕಟತ್. 4 ಅದ್ಂಗ್ ಯೇಸು: ನಿಂಗಳ ದಾರೂ ವಂಚನೆ ಮಾಡತನೆಕೆ ಎಚ್ಚರತ್ ಇರಿ. 5 ಎನ್ನಂಗೆಣ್ಣ್‌ಚೇಂಗಿ ನಾಡ ಪೆದ ಎಣ್ಣಿಯಂಡ್, ನಾನೇ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತಾಂದ್ ದುಂಬ ಜನ ಬಂತ್ ಜನಳ ವಂಚನೆ ಮಾಡ್‌ವ. 6 ಯುದ್ದತ್‍ನ ಪಿಂಞ ಯುದ್ದತ್‍ರ ಸುದ್ದಿನ ಕ್‍ೕಪಿರ. ಆಚೇಂಗಿ ನಿಂಗ ಬೊತ್ತತನೆಕೆ ಎಚ್ಚರತ್ ಇರಿ. ಎನ್ನಂಗೆಣ್ಣ್‌ಚೇಂಗಿ ಇನ್ನನೆ ಎಲ್ಲಾ ನಡ್‌ಕಂಡು. ಆಚೇಂಗಿಯು ಅದ್ ಅಂತ್ಯ ಕಾಲವಾಯಿತ್‌ಪ್ಪುಲೆ. 7 ಜನಕ್ ವಿರೋದವಾಯಿತ್ ಜನಳು, ರಾಜ್ಯಕ್ ವಿರೋದವಾಯಿತ್ ರಾಜ್ಯವು ಯುದ್ದ ಮಾಡ್‌ವ; ದುಂಬ ಜಾಗತ್‍ಲ್ ಬಲ್ಯ ಬೂಕಂಪ ಆಪ, ಬರಗಾಲ ಬಪ್ಪ. 8 ಇದೆಲ್ಲ, ಪೊಣ್ಣಾಳ್‌ಕ್ ಪೆರುವ ನೊಂಬಲ ಸುರು ಆಪನೆಕೆ. 9 ಅಕ್ಕ ನಿಂಗಳ ಹಿಂಸೆ ಮಾಡ್‌ವಕಾಯಿತ್ ಒಪ್ಪ್‌ಚಿಟ್ಟಿತ್, ನಿಂಗಳ ಕೊಲ್ಲ್‌ಚಿಡುವ. ನಾಡ ಪೆದತ್‍ನಗುಂಡ್ ಎಲ್ಲಾ ದೇಶತ್‍ರ ಜನ ನಿಂಗಳ ದ್ವೇಶ ಮಾಡ್‌ವ. 10 ಆ ಸಮಯತ್‍ಲ್ ದುಂಬ ಜನ ನಂಬಿಕೆಯಿಂಜ ದೂರ ಪೋಯಿತ್, ಒಬ್ಬಂಗ್ ಒಬ್ಬ ಮೋಸ ಮಾಡಿತ್, ಒಬ್ಬಂಡ ಮೇಲೆ ಒಬ್ಬ ದ್ವೇಶ ಮಾಡ್‌ವ. 11 ದುಂಬ ಕಳ್ಳ ಪ್ರವಾದಿಯಂಗಡ ಕೂಟ ಬೊಳ್ಂದಿತ್ ದುಂಬ ಜನಳ ಮೋಸ ಮಾಡ್‌ವ. 12 ಇದ್‍ಲ್ಲತೆ ಪಾಪ ದುಂಬಿತ್, ದುಂಬ ಜನಡ ಪ್ರೀತಿ ತಣ್ಂಜ್ ಪೋಪ. 13 ಆಚೇಂಗಿ ಕಡೇಕತ್ತನೆ ಸ್ತಿರವಾಯಿತ್ ನಿಪ್ಪಂವೊಂಗ್ ರಕ್ಷಣೆ ಕ್‍ಟ್ಟುವ. 14 ದೇವಡ ರಾಜ್ಯತ್‍ರ ಈ ನಲ್ಲ ಸುದ್ದಿ ಎಲ್ಲಾ ಜನಕು ಸಾಕ್ಷಿಯಾಯಿತ್ ಪ್ರಚಾರ ಆಯಿತ್‌ಪ್ಪ. ಅಕ್ಕ ಅಂತ್ಯ ಬಪ್ಪ. ಪಾಳಾಯಿತುಳ್ಳ ಹೇಸಿಗೆ ( ಮಾರ್ಕ 13.14–23 ; ಲೂಕ 21.20–24 ) 15 ಇಂಞು ಎಣ್ಣಕ, ಪ್ರವಾದಿಯಾನ ದಾನಿಯೇಲ ಎಣ್ಣ್‌ನನೆಕೆ: ಇದ್‍ನ ಓದ್‍ವಂವೊ, ಅರ್ಥ ಮಾಡಿಯಡ್, ಪಾಳ್ ಮಾಡ್‌ವ ಅಸಹ್ಯ ವಸ್ತು, ಪವಿತ್ರ ಜಾಗತ್‍ಲ್ ನಿಪ್ಪದ್‌ನ ನಿಂಗ ಕಾಂಬಕ, 16 ಯೂದಾಯ ದೇಶತ್‍ಲ್ ಉಳ್ಳಯಿಂಗ ಕುಂದ್‌ರ ಕೊಡಿಕ್ ಓಡಡ್; 17 ಮನೆರ ಕೊಡಿಲ್ ಉಳ್ಳಂವೊ, ಮನೇರೊಳ್‌ಕ್ ಪೋಯಿತ್ ಏದ್ ಒರ್ ಸಾಮಾನ್‌ನ ಎಡ್‌ತ ಬಪ್ಪಕ್ ಪೋಕತೆ ಇರಂಡು. ಬೇಲ್‌ಲ್ ಇಪ್ಪ ಮನುಷ್ಯಂಗ ಅಂವೊಂಡ ಬಟ್ಟೇನ ಎಡ್‌ತ ಬಪ್ಪಕ್ ಪೋಪಕ್ಕಾಗ. 18 ಬೇಲ್‌ಲ್ ಉಳ್ಳಂವೊ ತಾಂಡ ಬಟ್ಟೇನ ಎಡ್‌ತ ಬಪ್ಪಕ್ ಪೋಕತೆ ಇರಡ್. 19 ಆ ದಿವಸತ್‍ಲ್ ಕೆಲಕರ್ತಿಯಂಗಕೂ, ಕುಂಞಿಕ್ ಪಾಲ್ ಕೊಡ್‍ಪ ಅವ್ವಂಗಕೂ ಅಯ್ಯೋ! 20 ನಿಂಗ ತಪ್ಪ್‌ಚಿಟ್ಟಂಟ್ ಪೋಪ ದಿವಸ ಕುಳ್‌ರ್ ಕಾಲವಾಯಿತ್ ಅಥವ ಸಬ್ಬತ್ ದಿವಸವಾಯಿತ್ ಇಪ್ಪದ್ ಬೋಂಡಾಂದ್ ದೇವನ ಪ್ರಾರ್ಥನೆ ಮಾಡಿಯೊಳಿ. 21 ಎನ್ನಂಗೆಣ್ಣ್‌ಚೇಂಗಿ, ಈ ಲೋಕತ್‍ನ ಸೃಷ್ಟಿ ಮಾಡ್‍ನ ಸಮಯತ್ಂಜ ಇಲ್ಲಿಕತ್ತನೆ ಆಯಿತಿಲ್ಲತ, ಇಂಞು ಮಿಂಞಕು ಆಕತ, ದುಂಬ ಹಿಂಸೆ ಅಕ್ಕ ಆಪ. 22 ಆ ದಿವಸತ್‍ನ ದೇವ ಕಮ್ಮಿ ಮಾಡತೆ ಇಂಜತೇಂಗಿ ದಾರೂ ಬದ್‌ಕ್‌ಲೆ. ಆಚೇಂಗಿ, ದೇವ ಗೊತ್ತ್ ಮಾಡಿತುಳ್ಳ ಮಕ್ಕಕಾಯಿತ್ ಆ ದಿವಸತ್‍ನ ಕಮ್ಮಿ ಮಾಡ್‌ವ. 23 ಅಕ್ಕ, ನೋಟಿ! ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ ಇಲ್ಲಿ ಉಂಡ್, ಅಲ್ಲಿ ಉಂಡ್‍ೕಂದ್ ಎಣ್ಣ್‌ಚೇಂಗಿ, ನಂಬತಿ. 24 ಎನ್ನಂಗೆಣ್ಣ್‌ಚೇಂಗಿ, ಕಳ್ಳ ಕ್ರಿಸ್ತಂಗ ಪಿಂಞ ಕಳ್ಳ ಪ್ರವಾದಿಯಂಗ ಬಂದಿತ್, ಕಯ್ಯುವೇಂಗಿ ದೇವ ಗೊತ್ತ್ ಮಾಡಿತುಳ್ಳಯಿಂಗಡ ನಂಬಿಕೇನ ಕೆಡ್‍ತ್‌ವಕ್ ವಂಚನೆ ಮಾಡ್‌ವನೆಕೆ ಗುರ್‌ತ್ ಕಾಟಿತ್ ಆಶ್ಚರ್ಯ ಕಾರ್ಯತ್‍ನ ಮಾಡ್‌ವ. 25 ಆಚೇಂಗಿ, ನಾನ್ ಇದ್‍ನೆಲ್ಲ ಆಪಕ್ ಮಿಂಞಲೇ ಎಣ್ಣಿ ತಂದಿಯೆ. 26 ಆಂಗ್, ಜನ ನೋಟಿ ಅಂವೊ ಮಣಬೂಮಿಲ್ ಉಂಡ್‍ೕಂದ್ ಎಣ್ಣ್‌ಚೇಂಗಿ, ನಿಂಗ ಅಲ್ಲಿಕ್ ಪೋಕತಿ; ಇಲ್ಲಿ ನೋಟಿ ಕೋಂಬರೆ ಒಳ್‍ಕ್ ಉಂಡ್‍ೕಂದ್ ಎಣ್ಣ್‌ಚೇಂಗಿ ಅದ್‍ನ ನಂಬತಿ. 27 ಮಿನ್ನಲ್ ಕ್‍ೕಕ್ ದಿಕ್ಕ್‌ಲ್ ಪುಟ್ಟಿತ್ ಮೇಕ್ ದಿಕ್ಕ್‌ಕತ್ತನೆ ಪ್ರಕಾಶ ಆಪನೆಕೆ ಮನುಷ್ಯಕುಮಾರ ಬಪ್ಪದ್ ಇನ್ನನೆ ಇಪ್ಪ. 28 ಚಾವ್ ತಡಿ ಎಲ್ಲಿ ಉಂಡೋ ಅಲ್ಲಿ ಅಡ್‍ಪದ್ದ್ ಬಂತ್ ಕೂಡ್‍ವ. ಮನುಷ್ಯಕುಮಾರ ಪುನಃ ಬಪ್ಪದ್ ( ಮಾರ್ಕ 13.24–27 ; ಲೂಕ 21.25–28 ) 29 ಅಂದತ ಕಾಲತ್‍ಲ್, ಅಂತ ಸಂಕಟ ಕಾಲ ಆನ ಪಿಂಞ, ಸೂರ್ಯ ಇರ್‌ಟ್ ಆಪ, ಚಂದ್ರ ಬೊಳಿ ಕೊಡ್‍ಪ್‍ಲೆ. ಬಾನತ್‍ರ ಮೀನ್ ಅಡಿಕ್ ಬೂವ. ಬಾನತ್‍ರ ಪ್ರತಿಯೊರ್ ಶಕ್ತಿಯು ನಡ್‌ಗುವ. 30 ಅಕ್ಕ ಮನುಷ್ಯಕುಮಾರಂಡ ಗುರ್‌ತ್ ಬಾನತ್‍ಲ್ ಕಾಂಬ. ಮನುಷ್ಯಕುಮಾರ ದುಂಬ ಶಕ್ತಿಲ್, ದುಂಬ ಮಹಿಮೆಲ್ ಮೋಡತ್‍ಲ್ ಬಾನತ್‍ಲ್ ಬಪ್ಪದ್‍ನ ಈ ಲೋಕತ್‍ಲ್ ಉಳ್ಳ ಎಲ್ಲಾ ಜನಳು ಕಂಡಿತ್ ಮೊರಡ್‍ವ. 31 ವಾಲಗತ್‍ರ ಬಲ್ಯ ಸದ್ದ್‌ರ ಕೂಡೆ ಅಂವೊ ತಾಂಡ ದೇವದೂತಂಗಳ ಅಯಿಪ. ಅಯಿಂಗ ಅಂವೊ ಗೊತ್ತ್ ಮಾಡಿತುಳ್ಳಯಿಂಗಳ ಬಾನತ್‍ರ ಒರ್ ಮೂಲೆಯಿಂಜ ಇಂಞೊರ್ ಮೂಲೆಕತ್ತನೆ ನಾಲ್ ದಿಕ್ಕ್‌ಯಿಂಜಲೂ ಕೂಟ್‌ವ. ಅತ್ತಿ ಮರತ್‍ರ ವಿಷಯ ( ಮಾರ್ಕ 13.28–31 ; ಲೂಕ 21.29–33 ) 32 ಅತ್ತಿ ಮರ ನಿಂಗಕ್ ಒರ್ ಪಾಠ ಪಡಿಪ್‌ಚಿಡಡ್. ಆ ಮರತ್‍ರ ಕೊಂಬ್ ಪಚ್ಚೆ ಆಯಿತ್, ಚಿಗ್‌ರ್ ಎಲೆ ಬಪ್ಪಕ, ನಿಂಗಕ್ ಬೇನಿಕಾಲ ಬಪ್ಪಕಾಚೀಂದ್ ಗೊತ್ತಾಪ. 33 ಅನ್ನನೆ ಈ ತರತ್‍ರ ಘಟನೆಯೆಲ್ಲ ನಿಂಗ ಕಾಂಬಕಾಪಕ, ಆ ದಿನ ದುಂಬ ಪಕ್ಕ ಉಂಡ್, ಅಂವೊ ಪಡಿರ ಪಕ್ಕತ್ ಬಂದಿತುಂಡ್‍ೕಂದ್ ನಿಂಗಕ್ ಗೊತ್ತಿರಡ್. 34 ಈ ಘಟನೆಯೆಲ್ಲ ಆಪಕ್ ಮಿಂಞ ಈ ಸಂತಾನ ಪಾಳಾಯಿ ಪೋಪುಲೇಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 35 ಬಾನ ಬೂಮಿ ಎಲ್ಲಾ ನಾಶ ಆಪ, ಆಚೇಂಗಿ ನಾಡ ತಕ್ಕ್ ನಾಶ ಆಪುಲೆ. ಆ ದಿನವು, ಸಮಯವು ( ಮಾರ್ಕ 13.32–37 ; ಲೂಕ 17.26–30 , 34–36 ) 36 ಆ ದಿನವು, ಆ ಸಮಯವು ನಾಡ ಅಪ್ಪನಾನ ದೇವ ಒಬ್ಬನ ಬುಟ್ಟಿತ್ ಬೋರೆ ದಾರ್‌ಕು ಗೊತ್ತ್‌ಲ್ಲೆ. ಪರಲೋಕತ್‍ಲ್ ಉಳ್ಳ ದೇವದೂತಂಗಕೂ ಪಿಂಞ ಅಂವೊಂಡ ಮೋಂವೊಂಗೂ ಸಹ ಗೊತ್ತಿಪ್ಪುಲೆ. 37 ನೋಹಂಡ ದಿವಸತ್‍ಲ್ ಎನ್ನನೆ ನಡ್ಂದತೋ, ಅನ್ನನೆ ಮನುಷ್ಯಕುಮಾರ ಬಪ್ಪ ಕಾಲತ್‍ಲು ನಡ್‍ಪ. 38 ಎನ್ನನೆ ಎಣ್ಣ್‌ಚೇಂಗಿ ಜಲಪ್ರಳಯ ಬಪ್ಪಕ್ ಮಿಂಞ, ನೋಹ ಕಪ್ಪಲ್‍ರ ಒಳ್‍ಕ್ ಪೋಪಕತ್ತನೆ ಜನ ಉಂಡಿತ್, ಕುಡಿಚಿತ್ ಮಂಗಲ ಕಯಿಚಂಡ್ ಮಂಗಲ ಮಾಡಿ ಕೊಡ್‌ತಂಡ್ ಇಂಜತ್. 39 ಜಲಪ್ರಳಯ ಬಂತ್ ಎಲ್ಲಾ ಜನಳ ಒಕ್ಕಿಯಂಡ್ ಪೋಪಕತ್ತನೆ ಅಯಿಂಗ ಅರ್ಥ ಮಾಡತೆ ಇಂಜತ್. ಅನ್ನನೆ ಮನುಷ್ಯಕುಮಾರ ಬಪ್ಪ ಕಾಲತ್‍ಲು ಇಪ್ಪ. 40 ಅಕ್ಕ ದಂಡ್ ಜನ ಬೇಲ್‌ಲ್ ಕೆಲಸ ಮಾಡಿಯಂಡ್ ಇಪ್ಪ; ಒಬ್ಬನ ಕೊಡಿಕ್ ಎಡ್‌ತ್‌ರ್‌ವ, ಒಬ್ಬನ ಬುಟ್ಟ್‌ರ್‌ವ. 41 ದಂಡ್ ಪೊಣ್ಣಾಳುವ ಅರ್‍ಪ ಕಲ್ಲ್‌ಲ್ ಬೀಜಿಯಂಡ್ ಇಪ್ಪಕ, ಒಬ್ಬಳ ಎಡ್‌ತ್‌ರ್‌ವ ಇಂಞೊಬ್ಬಳ ಬುಟ್ಟ್‌ರ್‌ವ. 42 ನಿಂಗಡ ಒಡೆಯ ಎಕ್ಕ ಬಪ್ಪಾಂದ್ ಗೊತ್ತಿಲ್ಲತಗುಂಡ್, ಎಚ್ಚರವಾಯಿತಿರಿ. 43 ಒರ್ ಮನೆರ ಎಜಮಾನಂಗ್ ಕಳ್ಳ ಎಕ್ಕ ಬಪ್ಪಾಂದ್ ಗೊತ್ತ್‌ಂಜತೇಂಗಿ ಅಂವೊ ವರಿಯತೆ, ಕಳ್ಳ ಮನೆರ ಒಳ್‍ಕ್ ನುಗ್ಗತನೆಕೆ ಮನೆನ ಕಾತಂಡಿಪ್ಪಾಂದ್ ನಿಂಗಕ್ ಗೊತ್ತುಂಡ್. 44 ಆನಗುಂಡ್ ನಿಂಗಳು ತಯಾರಾಯಿತಿರಿ. ಎನ್ನಂಗೆಣ್ಣ್‌ಚೇಂಗಿ ನಿಂಗ ಗೇನ ಮಾಡತ ಸಮಯತ್‍ಲ್ ಮನುಷ್ಯಕುಮಾರ ಬಪ್ಪ. ನಂಬಿಕಸ್ತನಾನ ಪಿಂಞ ನಂಬಿಕಸ್ತನಲ್ಲತ ಅದಿಕಾರಿ ( ಲೂಕ 12.41–48 ) 45 ಅನ್ನನಾಚೇಂಗಿ ತಾಂಡ ಮನೆಕಾರಂಗಕ್ ಸರಿಯಾನ ಸಮಯತ್‍ಲ್ ಉಂಬಕ್ ಕೂಳ್ ಕೊಡ್‍ಪನೆಕೆ, ಅಯಿಂಗಡ ಮೇಲೆ ಎಜಮಾನ ನೇಮಿಚಿಟ್ಟ ಅದಿಕಾರಿಯಾಯಿತುಳ್ಳ ನಂಬಿಕಸ್ತನು, ಜ್ಞಾನಿಯೂ ಆನ ಸೇವಕ ದಾರ್? 46 ಎಜಮಾನ ಬಪ್ಪಕ ಏದ್ ಒರ್ ಆಳ್ ಇನ್ನನೆ ಮಾಡ್‌ವಾನ ಅಂವೊ ಕಾಂಬ, ಆ ಆಳ್‍ಕಾರನೇ ಆಶೀರ್ವಾದ ಪಡ್ಂದಂವೊ. 47 ಅಂವೊನ ಆ ಎಜಮಾನ ತಾಂಡ ಎಲ್ಲಾ ಆಸ್ತಿಕೂ ಜವಾಬ್ದಾರನಾಯಿತ್ ನೇಮಿಚಿಡ್‍ವಾಂದ್ ನೇರಾಯಿತು ನಿಂಗಕ್ ಎಣ್ಣ್‌ವಿ. 48 ಆಚೇಂಗಿ, ಆ ಆಳ್‍ಕಾರ ಕೆಟ್ಟಂವೊನಾಯಿತ್ಂಜಿತ್, ನಾಡ ಎಜಮಾನ ಚೆನ್ನ ತಡೆಯಾಯಿತ್ ಬಪ್ಪಾಂದ್ ಗೇನ ಮಾಡಿತ್, 49 ತಾಂಡಕೂಡೆ ಕೆಲಸ ಮಾಡ್‌ವಯಿಂಗಳ ಪೊಜ್ಜಿಯಂಡ್, ಕುಡ್‍ಕಂಗಡ ಕೂಡೆ ಉಂಬಕ್, ಕುಡಿಪಕ್ ಸುರು ಮಾಡ್‍ಚೇಂಗಿ 50 ಅಕ್ಕ ಆ ಆಳ್‍ರ ಎಜಮಾನ ಗೇನ ಮಾಡತ ದಿವಸ ಗೊತ್ತಿಲ್ಲತೆ ಗಳಿಗೆಲ್ ಬಂದ್‍ರ್‍ವ. 51 ಬಂದಿತ್ ಆ ಆಳ್‍ಕ್ ಕಠಿಣವಾಯಿತ್ ಶಿಕ್ಷೆ ಕೊಡ್‌ತಿತ್, ಕಪಟಿಯಂಗ ಉಳ್ಳ ಜಾಗತ್‍ಲ್ ಅಂವೊನ ಸಹ ಇಟ್ಟ್‌ರ್‍ವ. ಅಲ್ಲಿ ಮೊರಟಂಡ್ ಪಲ್ಲ್ ಕಡಿಚಂಡ್ ಇಪ್ಪ. |
© 2017, New Life Literature (NLL)