ಮತ್ತಾಯ 18 - ಕೊಡವ ಬೈಬಲ್ಪರಲೋಕ ರಾಜ್ಯತ್‍ಲ್ ದಾರ್ ಬಲ್ಯಂವೊ? ( ಮಾರ್ಕ 9.33–37 ; ಲೂಕ 9.46–48 ) 1 ಅದೇ ಸಮಯತ್‍ಲ್ ಯೇಸುರ ಶಿಷ್ಯಂಗ ಯೇಸುರ ಪಕ್ಕ ಬಂದಿತ್: ಪರಲೋಕ ರಾಜ್ಯತ್‍ಲ್ ದಾರ್ ದುಂಬ ಬಲ್ಯಂವೊ ಎಣ್ಣಿಯಂಡ್ ಕ್‍ೕಟತ್? 2 ಯೇಸು ಒರ್ ಚೆರಿಯ ಕುಂಞಿನ ಕಾಕುವಂಜಿ ಅಯಿಂಗಡ ಮಿಂಞತ್‍ ನಿಪ್ಪ್‌ಚಿಟ್ಟತ್. 3 ನಾನ್ ನಿಂಗಕ್ ನೇರಾಯಿತು ಎಣ್ಣ್‌ವಿ: ನಿಂಗಡ ಮನಸ್ಸ್ ಬದ್‍ಲಾಯಿತ್ ಈ ಕುಂಞಿರನೆಕೆ ಆಕತಪೋನಕ ನಿಂಗ ಪರಲೋಕ ರಾಜ್ಯಕ್ ಪೋಪಕ್ ಕಯ್ಯುಲೆ. 4 ಆನಗುಂಡ್ ಒರ್ ಚೆರಿಯ ಕುಂಞಿರನೆಕೆ ದಾರ್ ಒಬ್ಬ ಅಂವೊನ ತಗ್ಗ್‌ಚಿಡ್‌ವ, ಅಂವೊನೇ ಪರಲೋಕ ರಾಜ್ಯತ್‍ಲ್ ಎಲ್ಲಾಕಿಂಜ ಬಲ್ಯಂವೋಂದ್ ಎಣ್ಣ್‌ಚಿ. 5 ಇನ್ನನೆ ಒರ್ ಕುಂಞಿನ ದಾರ್ ನಾಕಾಯಿತ್ ಸ್ವೀಕಾರ ಮಾಡ್‌ವ, ಅಂವೊ ನನ್ನ ಸ್ವೀಕಾರ ಮಾಡ್‍ನನೆಕೆ. ಪಾಪತ್‍ರ ಸೋದನೆ ( ಮಾರ್ಕ 9.42–48 ; ಲೂಕ 17.1 , 2 ) 6 ಆಚೇಂಗಿ ನಾಡ ಮೇಲೆ ನಂಬಿಕೆಯುಳ್ಳ ಈ ಚೆರಿಯಯಿಂಗಳ ದಾರ್ ನಾಡ ಮೇಲೆ ನಂಬಿಕೆ ಇಲ್ಲತ್ತನೆಕೆ ಮಾಡ್‌ವ, ಅಯಿಂಗಡ ಬೋಳೆಕ್ ಬಲ್ಯೊರ್ ಬೀಜುವ ಕಲ್ಲ್‌ನ ಕೆಟ್ಟಿತ್ ಸಮುದ್ರತ್‍ರ ಆಳತ್‍ಲ್ ಅಂವೊನ ಮುಳ್‍ಕ್‍ವದ್ ಅಂವೊಂಗ್ ನಲ್ಲದಾಯಿತ್‌ಪ್ಪ. 7 ನಾಡ ಮೇಲೆ ನಂಬಿಕೆ ಬೆಕ್ಕತನೆಕೆ ಮಾಡ್‌ವಯಿಂಗಕ್ ಅಯ್ಯೋ! ಅನ್ನನೆ ಬಪ್ಪ ಸೋದನೆನ ದಾರೂ ತಡ್‍ಪಕ್ ಕಯ್ಯುಲೆ. ಆಚೇಂಗಿ ಅನ್ನನೆ ಮಾಡ್‌ವಯಿಂಗಕ್ ಅಯ್ಯೋ! 8 ನೀಡ ಕೈ ಅಥವ ಕಾಲ್ ಪಾಪ ಮಾಡ್‌ವಕ್ ಕಾರಣವಾಯಿತ್ ಇಂಜತೇಂಗಿ, ಅದ್‍ನ ಕೆತ್ತಿತ್ ಚಾಡಿರ್. ದಂಡ್ ಕೈ ದಂಡ್ ಕಾಲ್ ಉಳ್ಳಂವೊನಾಯಿತ್ ನಿನ್ನ ನಿತ್ಯ ತಿತ್ತ್‌ಕ್ ತಳ್ಳ್‌ವಕಿಂಜ, ಒರ್ ಕೈ ಒರ್ ಕಾಲ್ ಉಳ್ಳಂವೊನಾಯಿತ್ ನಿತ್ಯ ಜೀವಕ್ ಪ್ರವೇಶ ಮಾಡ್‍ವದ್ ನಲ್ಲದ್. 9 ನೀಡ ಕಣ್ಣ್ ಪಾಪ ಮಾಡ್‌ವಕ್ ಕಾರಣವಾಯಿತ್ ಇಂಜತೇಂಗಿ ಅದ್‍ನ ಬಲ್‍ಚಿತ್ ಚಾಡಿರ್. ದಂಡ್ ಕಣ್ಣ್ ಉಳ್ಳಂವೊನಾಯಿತ್ ನಿತ್ಯ ತಿತ್ತ್‌ಕ್ ತಳ್ಳ್‌ವಕಿಂಜ, ಒರ್ ಕಣ್ಣ್ ಉಳ್ಳಂವೊನಾಯಿತ್ ನಿತ್ಯ ಜೀವಕ್ ಪ್ರವೇಶ ಮಾಡ್‍ವದ್ ನಲ್ಲದ್. 10 ಈ ಚೆರಿಯಯಿಂಗಡಡೆಲ್ ಒಬ್ಬನನೂ ಕಮ್ಮಿಯಾಯಿತ್ ನೋಟತೆ ಇಪ್ಪಕ್ ಎಚ್ಚರತ್‍ಲ್ ಇರಿ. ಅಯಿಂಗಡ ದೇವದೂತಂಗ ನಾಡ ಪರಲೋಕತುಲುಳ್ಳ ಅಪ್ಪಂಡ ಮೂಡ್‍ನ ಎಕ್ಕಲೂ ಅಯಿಂಗಕಾಯಿತ್ ನೋಟಿಯಂಡ್ ಇಪ್ಪ. ತಪ್ಪಿ ಪೋನ ಕೊರಿ ( ಲೂಕ 15.3–7 ) 11 ಪಾಪತ್‍ರಗುಂಡ್ ದೇವಡಯಿಂಜ ಕಳೆಂದ್ ಪೋನ ಜನಳ ಕಾಪಾಡ್‌ವಕಾಯಿತ್ ಮನುಷ್ಯಕುಮಾರ ಬಾತ್. 12 ಒರ್ ಮನುಷ್ಯಂಗ್ ನೂರ್ ಕೊರಿಯ ಇಪ್ಪಕ, ಅದ್‍ಲ್ ಒರ್ ಕೊರಿ ತಪ್ಪ್‌ಚಿಟ್ಟಂಡ್ ಪೋಚೇಂಗಿ, ಅಕ್ಕ ಅಂವೊ ಬಾಕಿ ತೊಂಬತೊಯಿಂಬದ್ ಕೊರಿಯಳ ಕುಂದ್‌ರ ಪಕ್ಕ ಬುಟ್ಟಿತ್, ತಪ್ಪ್‌ಚಿಟ್ಟ್ ಪೋನ ಒರ್ ಕೊರಿನ ತ್‍ೕಡ್‌ವಕ್ ಪೋಪ್‍ಲೆಯಾ? ನಿಂಗ ಎಂತ ಗೇನ ಮಾಡ್‌ವಿರ? 13 ಅದ್‍ನ ಅಂವೊ ಕಂಡ್‌ಪುಡ್‌ಚತೇಂಗಿ, ಅಂವೊಂಡ ಪಕ್ಕ ಉಳ್ಳ ಬೋರೆ ತೊಂಬತೊಯಿಂಬದ್ ಕೊರಿಕಿಂಜ, ಕ್‍ಟ್ಟಿಪೋನ ಕೊರಿಕಾಯಿತ್ ದುಂಬ ಕುಶಿಪಡ್‌ವಾಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 14 ಅನ್ನನೆ, ಈ ಚೆರಿಯಯಿಂಗಡಡೆಲ್ ಒಬ್ಬ ಕೂಡೆ ಬಟ್ಟೆ ತಪ್ಪಿ ಪೋಪದ್ ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪಂಡ ಚಿತ್ತ ಅಲ್ಲ. ನೀಕ್ ವಿರೋದವಾಯಿತ್ ತಪ್ಪ್ ಮಾಡ್‌ವ ಅಣ್ಣತಮ್ಮಣ 15 ನೀಡ ಅಣ್ಣತಮ್ಮಣಂಡಡೆಲ್ ದಾರೇಂಗಿ ತಪ್ಪ್ ಮಾಡ್‍ಚೇಂಗಿ ನೀನ್ ಅಂವೊಂಡ ಪಕ್ಕ ಪೋಯಿತ್, ನಿಂಗ ದಂಡಾಳ್ ಮಾತ್ರ ಇಪ್ಪಕಾಪಕ ಅಂವೊಂಡ ತಪ್ಪ್‌ನ ಎಣ್ಣಿ ಕೊಡ್, ಅಕ್ಕ ಅಂವೊ ಅಂವೊಂಡ ತಪ್ಪ್‌ನ ಒತ್ತತೇಂಗಿ, ನೀನ್ ಅಂವೊನ ನೀಡ ಬಟ್ಟೇಕ್ ಕೊಂಡ್ ಬಂದಿಯ. 16 ಅಂವೊ ನೀಕ್ ಒತ್ತತೆ ಪೋನಕ, ಬೋರೆ ದಂಡ್ ಮೂಂದಾಳ್‍ನ ಕಾಕಿಯಂಡ್ ಪೋ. ಅಕ್ಕ ಅಂವೊ ಮಾಡ್‍ನ ವಿಷಯತ್‍ನ ದಂಡ್ ಅಲ್ಲ ಮೂಂದ್ ಸಾಕ್ಷಿರಗುಂಡ್ ನಿರೂಬಿಚಿಡ್‌ವಕ್ ಆಪ. 17 ಅಯಿಂಗಕ್ ಸಹ ಅಂವೊ ಒತ್ತತೆ ಪೋನಕ, ಅಂವೊಂಡ ವಿಷಯತ್‍ನ ಸಬೇಕ್ ಎಣ್ಣ್. ಆ ಸಬೇಕ್ ಒತ್ತತೆ ಪೋನಕ, ಅಂವೊನ ದೇವನ ನಂಬತಂವೊಂಡನೆಕೆ ಕಾಂಗಂಡು, ಅಥವ ಒರ್ ಪಾಪಿರನೆಕೆ ನೋಟಂಡು. 18 ನಿಂಗ ಈ ಲೋಕತ್‍ಲ್ ಎಂತಾನ ಕೆಟ್ಟ್‌ವಿರೋ ಅದ್ ಪರಲೋಕತ್‌ಲೂ ಕೆಟ್ಟಿತ್‌ಪ್ಪ. ನಿಂಗ ಈ ಲೋಕತ್‍ಲ್ ಎಂತಾನ ಉತ್ತ್‌ವಿರೋ ಅದ್ ಪರಲೋಕತ್‍ಲ್ ಸಹ ಉತ್ತಿತಿಪ್ಪಾಂದ್ ನೇರಾಯಿತು ನಾನ್ ನಿಂಗಕ್ ಎಣ್ಣ್‌ವಿ. 19 ಇದ್‍ಲ್ಲತೆ ಬೂಲೋಕತ್‍ಲ್ ದಂಡಾಳ್ ಕೂಡಿಯಂಡ್ ಒರ್ ವಿಷಯಕಾಯಿತ್ ಒರೇ ಮನಸ್ಸ್‌ಲ್ ದೇವಡ ಪಕ್ಕ ಬೋಡ್‌ನಕ, ಪರಲೋಕತ್‍ಲ್ ಉಳ್ಳ ನಾಡ ಅಪ್ಪ ಅದ್‍ನ ಅನ್ನನೆ ಮಾಡ್‌ವಾಂದ್ ನಿಂಗಕ್ ಎಣ್ಣ್‌ವಿ. 20 ಎನ್ನಂಗೆಣ್ಣ್‌ಚೇಂಗಿ, ಎಲ್ಲಿ ದಂಡ್‍ಮೂಂದಾಳ್ ನಾಡ ಪೆದತ್‍ಲ್ ಕೂಡಿ ಬಪ್ಪ, ಅಲ್ಲಿ ಅಯಿಂಗಡ ಮದ್ಯತ್‍ಲ್ ನಾನ್ ಇಪ್ಪೀಂದ್ ಎಣ್ಣ್‌ಚಿ. ಮನ್ನಿಚಿಡತ ಆಳ್ 21 ಅಕ್ಕ ಪೇತ್ರ ಯೇಸುರ ಪಕ್ಕ ಬಪ್ಪಂಜಿ: ನಾಡ ಅಣ್ಣತಮ್ಮಣಂಗಡಡೆಲ್ ದಾರೇಂಗಿ ನಾಕ್ ವಿರೋದವಾಯಿತ್ ತಪ್ಪ್ ಮಾಡಿಯಂಡ್ ಉಂಡೇಂಗಿ, ನಾನ್ ಅಂವೊನ ಎಚ್ಚಕ್ ಕುರಿ ಮನ್ನಿಚಿಡಡ್? ಏಳ್ ಕುರಿ ಮನ್ನಿಚಿಟ್ಟತೇಂಗಿ ಮದಿಯಾಂದ್ ಕ್‍ೕಟತ್. 22 ಅಕ್ಕ ಯೇಸು: ಏಳ್ ಕುರಿ ಅಲ್ಲ, ಏಳ್ ಎಳ್‌ವದ್ ಕುರಿ ಅಂವೊನ ಮನ್ನಿಚಿಡಂಡು. 23 ಎನ್ನನೆ ಎಣ್ಣ್‌ಚೇಂಗಿ, ಪರಲೋಕ ರಾಜ್ಯತ್‍ರ ವಿಷಯ ಇನ್ನನೆ ಉಂಡ್. ಒರ್ ರಾಜ ತಾಂಡ ಆಳ್‍ವಳ ಕಾಕಿತ್ ಅಯಿಂಗಡ ಲೆಕ್ಕಚಾರ ನೋಟ್‍ವಕ್ ಸುರು ಮಾಡ್‍ಚಿ. 24 ಒಬ್ಬ ಪತ್ತಾಯಿರ ಬೊಳ್ಳಿ ನಾಣ್ಯ ಸಾಲ ಮಾಡ್‌ನಂವೊನ ಕಾಕಿಯಂಡ್ ಬಾತ್. 25 ಆ ಮನುಷ್ಯಂಗ್ ಸಾಲ ತ್‍ೕಪಕ್ ಅಂವೊಂಡ ಪಕ್ಕ ಒಂದು ಇಲ್ಲೆ. ಅಕ್ಕ ಅಂವೊಂಡ ಎಜಮಾನ ನೀಡ ಪೊಣ್ಣ್ ಮಕ್ಕ ಪಿಂಞ ಸೊತ್ತ್‌ನೆಲ್ಲ ಮಾರಿತ್ ನಾಡ ಸಾಲ ತ್‍ೕಕಂಡೂಂದ್ ಹುಕುಮ್ ಕೊಡ್‍ತತ್. 26 ಅಕ್ಕ ಅಂವೊ ಎಜಮಾನಂಡ ಕಾಲ್‌ಕ್ ಬೂವಂಜಿ: ಚೆನ್ನ ಸಮಾದಾನ ಎಡ್‌ತ, ನೀಡ ಸಾಲತನೆಲ್ಲ ನಾನ್ ತ್‍ೕಪೀಂದ್ ಎಣ್ಣ್‌ಚಿ. 27 ಅಕ್ಕ ಎಜಮಾನಂಗ್ ಅಂವೊಂಡ ಮೇಲೆ ಕನಿಕರ ಆಯಿತ್ ಅಂವೊ ಮಾಡ್‍ನ ಸಾಲತನೆಲ್ಲ ತಪ್ಪದ್ ಬೋಂಡಾಂದ್ ಎಣ್ಣಿತ್, ಮನ್ನಿಚಿಟ್ಟ್‌ರ್‌ತ್. 28 ಆ ಮನುಷ್ಯ ಪೊರಮೆ ಪೋಚಿ. ಆ ರಾಜಂಡ ಬೋರೆ ಒರ್ ಆಳ್, ಇಂವೊಂಡ ಪಕ್ಕ ನೂರ್ ಬೊಳ್ಳಿರ ಸಾಲ ಮಾಡಿತ್ಂಜತ್. ಈ ಮನುಷ್ಯ ಅಂವೊನ ಪುಡ್‌ಚಿತ್ ಬಲಿಪಂಜಿ, ಅಂವೊಂಗ್ ಪೊಜ್ಜಿತ್, ಅಂವೊಂಡ ತೊಂಡೆನ ಪುಡ್‍ಚತ್. ನೀನ್ ನಾಕ್ ತಪ್ಪಕುಳ್ಳ ದುಡ್ಡ್‌ನ ಇಕ್ಕಲೆ ತಾಂದ್ ಕ್‍ೕಟತ್. 29 ಅದ್ಂಗ್ ಅಂವೊ, ಅಂವೊಂಡ ಕಾಲ್‌ಕ್ ಬೂವಂಜಿ: ಚೆನ್ನ ಸಮಾದಾನ ಎಡ್‌ತ, ನಾನ್ ನೀಡ ಸಾಲತ್‍ನ ತ್‍ೕಪೀಂದ್ ಬೋಡ್‍ಚಿ. 30 ಅಂವೊ ಅಂವೊಂಡ ತಕ್ಕ್‌ನ ಕ್‍ೕಕತೆ, ಅಂವೊಂಡ ದುಡ್ಡ್ ಕೊಡ್‌ಪಕತ್ತನೆ ಜೈಲ್‌ಕ್ ಇಟ್ಟತ್. 31 ರಾಜಂಡ ಬೋರೆ ಆಳ್‍ವ ಇಂವೊ ಮಾಡ್‌ನಾನ ಕಾಂಬಕ, ಅಯಿಂಗಕ್ ಬೇಜಾರ್ ಆಚಿ. ಅಯಿಂಗ ಪೋಯಿತ್ ರಾಜಂಗ್ ಎಣ್ಣ್‌ಚಿ. 32 ಅಕ್ಕ ರಾಜ ಆ ಆಳ್‌ನ ಕಾಕುವಂಜಿ: ಎಚ್ಚಕ್ ಮೋಸವಾನ ಆಳ್ ನೀನ್. ನೀನ್ ನಾಡ ಕಾಲ್ ಪುಡಿಪಕ, ನಾಕ್ ತಪ್ಪಕುಳ್ಳ ದುಡ್ಡ್‌ನ, ತಪ್ಪದ್ ಬೋಂಡಾಂದ್ ಮನ್ನಿಚಿಟ್ಟಿಯೆ, ನೀನ್ ಕ್‍ೕಟಾಂಗ್ ನಾನ್ ಅನ್ನನೆ ಮಾಡಿಯೆ. 33 ನಾನ್ ನೀಕ್ ಕನಿಕರ ಕಾಟ್‍ನನೆಕೆ, ನೀನ್ ಅಂವೊಂಡ ಮೇಲೆ ಕನಿಕರ ಕಾಟ್‍ವಕಿಂಜತಲ್ಲ. 34 ರಾಜಂಗ್ ಚೆಡಿ ಬಾತ್, ನೀನ್ ನಾಡ ಸಾಲನೆಲ್ಲ ತ್‍ೕಪಕತ್ತನೆ ಜೈಲ್‍ಲ್ ಇರಂಡೂಂದ್ ಎಣ್ಣ್‌ಚಿ. 35 ಇನ್ನನೆ ನಿಂಗಳು ಸಹ, ನಿಂಗಡ ಅಣ್ಣತಮ್ಮಣಂಗ ಮಾಡ್‍ನ ಪಾಪತ್‍ನ ನೇರಾಯಿತ್ ಮನ್ನಿಚಿಡತ ಪೋನಕ, ಪರಲೋಕತ್‍ಲ್ ಉಳ್ಳ ನಾಡ ಅಪ್ಪ ಇನ್ನನೆ ನಿಂಗಕ್ ಸಹ ಮಾಡ್‌ವಾಂದ್ ಯೇಸು ಎಣ್ಣ್‌ಚಿ. |
© 2017, New Life Literature (NLL)