ಮಲಾಕಿ 4 - ಕೊಡವ ಬೈಬಲ್1 ಇದಾ, ಕಡಾಯ ತೊಲೆ ತಿತ್ತ್‌ಲ್‌ ಕತ್ತ್‌ವನೆಕೆ ಒರ್‌ ದಿವಸ ಬಪ್ಪ. ಅಕ್ಕ ಆಂಗಾರಿಯ ಎಲ್ಲಾರು, ವಂಚನೆ ಮಾಡುವಯಿಂಗ ಎಲ್ಲಾರು ಒಣಂಗ್‌ನ ಎಲ್ಕಂಡರನೆಕೆ ಇಪ್ಪ. ಬಪ್ಪ ಆ ದಿವಸ ಅಯಿಂಗಳ ಚುಟ್ಟ್‌ರ್‌ವ. ಅದ್‌ ಬೇರ್‌ ಪಿಂಞ ಕೊಂಬ್‌ನ ಸತ ಅಯಿಂಗಕ್‌ ಉಳಿಕೆ ಮಾಡುಲೆ. 2 ಆಚೇಂಗಿ, ನಾಡ ಪೆದಕ್‌ ಬೊತ್ತುವ ನಿಂಗಡ ಮೇಲೆ ನೀತಿರ ಸೂರ್ಯ ಉದಿಪ. ಅದ್‌ಂಡ ರೆಕ್ಕೆರ ಅಡಿಲ್‌ ಆರೋಗ್ಯ ಇಪ್ಪ. ನಿಂಗ ಕೊಟ್ಟ್‌ಯಿಂಜ ಪೊರ್ಮೆ ಪೋನ ಕಡಚಿಯರನೆಕೆ ಕುಶೀಲ್‌ ತುಳ್ಳಿಯಂಡಿಪ್ಪಿರ 3 ಮೋಸ ಮಾಡುವಯಿಂಗಳ ಚೌಟ್‌ವಿರ. ನಾನ್‌ ಇದ್‌ನ ಮಾಡುವ ಆ ದಿವಸತ್‌ಲ್‌ ಅಯಿಂಗ ನಿಂಗಡ ಅಂಗಾಲ್‌ರ ಅಡಿಲ್‌ ಬೂದಿ ಆಯಿತ್‌ಪ್ಪಾಂದ್‌ ಸೇನೆರ ಯೆಹೋವ ಎಣ್ಣಿಯಂಡುಂಡ್. 4 ನಾಡ ಸೇವಕನಾನ ಮೋಶೆರ ಕಾನೂನ್‌ರ ಪ್ರಕಾರ ನಡ್‌ಪಕ್‌ ಗೇನ ಬೆಚ್ಚೊಳಿ. ಅಂವೊಂಗ್‌ ಹೋರೇಬ್ ಕುಂದ್‌ಲ್‌ ಇಸ್ರಾಯೇಲ್‌ ಜನ ಎಲ್ಲಾರ್‌ಕು ಕೊಡ್‌ತ ನೇಮ ಪಿಂಞ ಆಜ್ಞೆನ ಗೇನ ಬೆಚ್ಚೊಳಿ. 5 ಇದಾ, ಯೆಹೋವಂಡ ಬಲ್ಯ ಪಿಂಞ ಬಯಂಗರವಾನ ದಿವಸ ಬಪ್ಪಕ್‌ ಮಿಂಞ ನಾನ್‌ ನಿಂಗಡ ಪಕ್ಕ ಎಲೀಯ ಪ್ರವಾದಿನ ಅಯಿಚಂಡುಳ್ಳ. 6 ನಾನ್‌ ಬಂತ್‌ ಶಾಪ ಇಟ್ಟಿತ್‌ ಬೂಮಿನ ಪಾಳ್‌ ಮಾಡತನೆಕೆ ಇಪ್ಪಕಾಯಿತ್‌ ಎಲೀಯ ಬಂತ್‌ ಅಪ್ಪಂಗಡ ಮನಸ್ಸ್‌ನ ಮೋನೀಯಂಗಡ ಕಡೆಯು, ಮೋನಿಯಂಗಡ ಮನಸ್ಸ್‌ನ ಅಪ್ಪಂಗಡ ಕಡೆಯು ತಿರ್‌ಕಿರುವ. |
© 2017, New Life Literature (NLL)