ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 22 - ಕೊಡವ ಬೈಬಲ್ಯೂದ ಯೇಸುನ ಚದಿಪಕ್ ಒತ್ತತ್ ( ಮತ್ತಾಯ 26.1–5 ; ಮಾರ್ಕ 14.1 , 2 ; ಯೋಹಾನ 11.45–53 ) 1 ಪುಳಿಯಿಲ್ಲತ ಒಟ್ಟಿ ತಿಂಬ ಪಸ್ಕ ಎಣ್ಣುವ ನಮ್ಮೆ ಬಪ್ಪಕ್ ಇಂಞು ಚೆನ್ನ ದಿವಸ ಮಾತ್ರ ಇಂಜತ್. 2 ಅಕ್ಕ ಮುಕ್ಯ ಯಾಜಕಂಗ, ನ್ಯಾಯಪ್ರಮಾಣನತ್‍ರ ಉಪಾದ್ಯಂಗ ಯೇಸುನ ಪುಡ್‌ಚಿತ್ ಕೊಲ್ಲ್‌ವಕ್ ನೋಟಿಯಂಡ್ ಇಂಜತ್, ಆಚೇಂಗಿಯು ಜನಕ್ ಬೊತ್ತಿಯಂಡಿಂಜತ್. ಇಸ್ಕರಿಯೋತ ಯೂದ ಯೇಸುನ ಪುಡ್‌ಚಿತ್ ಕೊಡ್‍ಪಕ್ ಒತ್ತತ್ ( ಮತ್ತಾಯ 26.14–16 ; ಮಾರ್ಕ 14.10 , 11 ) 3 ಅಕ್ಕ ಸೈತಾನ, ಯೇಸುರ ಪನ್ನೆರಂಡ್ ಶಿಷ್ಯಂಗಡಲ್ಲಿ ಇಸ್ಕರಿಯೋತ ಎಣ್ಣುವ ಯೂದಂಡ ಮೇಲ್‌ಕ್ ಕೂಡ್‍ಚಿ. 4 ಅಂವೊ ಮುಕ್ಯ ಯಾಜಕಂಗ ಪಿಂಞ ದೇವಾಲಯತ್‍ರ ಸೇನೆರ ಅದಿಕಾರಿಯಡ ಪಕ್ಕ ಪೋಯಿತ್ ಎನ್ನನೆ ಯೇಸುನ ಕಾಟಿ ಕೊಡುಕಂಡೂಂದ್ ಚರ್ಚೆ ಮಾಡ್‍ಚಿ. 5 ಅಯಿಂಗ ಕುಶಿಪಟ್ಟಿತ್, ನೀಕ್ ನಂಗ ದುಡ್ಡ್ ತಪ್ಪಾಂದ್ ಎಣ್ಣ್‌ಚಿ. 6 ಇದ್ಂಗ್ ಇಸ್ಕರಿಯೋತ ಒತ್ತಂಡ್ ಜನಡ ಗುಂಪ್ ಇಲ್ಲತ ಸಮಯತ್‍ಲ್ ಯೇಸುನ ಅಯಿಂಗಕ್ ಕಾಟಿ ಕೊಡ್‍ಪಕುಳ್ಳ ಸಮಯ ನೋಟಿಯಂಡ್ ಇಂಜತ್. ಒಡೆಯಂಡ ಕಡೆ ಗದ್ದಾಳ ( ಮತ್ತಾಯ 26.17–25 ; ಮಾರ್ಕ 14.12–21 ; ಯೋಹಾನ 13.21–30 ) 7 ಕೊರಿಕುಟ್ಟಿನ ಬಲಿ ಕೊಡ್‌ತಿತ್, ಪುಳಿ ಇಲ್ಲತ ಒಟ್ಟಿ ತಿಂಬ ಪಸ್ಕ ನಮ್ಮೆರ ದಿವಸ ಬಾತ್. 8 ಅಕ್ಕ ಯೇಸು, ಪೇತ್ರ ಪಿಂಞ ಯೋಹಾನನ ಕಾಕುವಂಜಿ: ನಂಗ ತಿಂಬಕಾಯಿತ್ ಪಸ್ಕ ನಮ್ಮೆಕ್ ಉಂಬಕುಳ್ಳದ್‍ನ ತಯಾರ್ ಮಾಡೀಂದ್ ಎಣ್ಣ್‌ಚಿ. 9 ಅದ್ಂಗ್ ಅಯಿಂಗ: ನಂಗ ಎಲ್ಲಿ ತಯಾರ್ ಮಾಡಂಡೂಂದ್ ನೀಕ್ ಕುಶಿಯುಂಡ್‍ೕಂದ್ ಯೇಸುನ ಕ್‍ೕಟತ್. 10 ಯೇಸು ಅಯಿಂಗಕ್: ನಿಂಗ ಯೆರೂಸಲೇಮ್ ಪಟ್ಟಣಕ್ ಪೋಪಕ ಒರ್ ಮನುಷ್ಯ ಕುಡಿಕೆಲ್ ನೀರ್ ಎಡ್‍ತಂಡ್ ಬಂದಂಡಿಪ್ಪ. ಅಂವೊ ಪೋಪ ಮನೆರ ಒಳ್‍ಕ್ ಅಂವೊಂಡ ಬಯ್ಯಕ್ ಪೋಯಿತ್, 11 ಆ ಮನೆರ ಎಜಮಾನನ ನೋಟಿತ್: ನಾನ್ ನಾಡ ಶಿಷ್ಯಂಗಡ ಕೂಡೆ ಪಸ್ಕ ತಿಂಬಕುಳ್ಳ ಜಾಗ ಎಲ್ಲೀಂದ್ ಉಪಾದ್ಯ ಕ್‍ೕಟತ್‍ೕಂದ್ ಎಣ್ಣಿ. 12 ಅಂವೊ, ನಿಂಗಕ್ ಕೊಡಿಲ್ ಒರ್ ಬಲ್ಯೊರ್ ಎಲ್ಲಾ ಕ್ರಮವಾಯಿತುಳ್ಳ ಕೋಂಬರೆನ ಕಾಟಿತಪ್ಪ; ಅಲ್ಲಿ ನಿಂಗ ತಯಾರ್ ಮಾಡೀಂದ್ ಎಣ್ಣ್‌ಚಿ. 13 ಅಯಿಂಗ ಪೋಯಿತ್ ಯೇಸು ಎಣ್ಣ್‌ನನೆಕೆ ಎಲ್ಲಾ ಕಾಂಬಂಜಿ ಪಸ್ಕತ್‍ನ ತಯಾರ್ ಮಾಡ್‍ಚಿ. ಒಡೆಯಂಡ ಗದ್ದಾಳ ( ಮತ್ತಾಯ 26.26–30 ; ಮಾರ್ಕ 14.22–26 ; 1 ಕೊರಿಂಥ 11.23–25 ) 14 ಆ ಸಮಯ ಬಪ್ಪಕ, ಯೇಸು ಪಿಂಞ ಅಂವೊಂಡ ಪನ್ನೆರಂಡ್ ಅಪೊಸ್ತಲಂಗ ಉಂಬಕ್ ಅಳ್‌ತತ್. 15 ಅಕ್ಕ ಅಂವೊ ಅಯಿಂಗಳ ನೋಟಿತ್: ನಾನ್ ಮರಣತ್‌ರ ಕಷ್ಟ ಅನುಬವಿಚಿಡುವಕ್ ಮಿಂಞ ನಿಂಗಡ ಕೂಡೆ ಈ ಗದ್ದಾಳತ್‍ಲ್ ಉಂಗಂಡೂಂದ್ ದುಂಬ ಕುಶಿಪಟ್ಟಂಡಿಂಜ್. 16 ಈ ಪಸ್ಕತ್‍ರ ಅರ್ಥ ದೇವಡ ರಾಜ್ಯತ್‍ಲ್ ಪೂರ್ತಿ ಆಪಕ್ ಮಿಂಞ, ನಾನ್ ಇದ್‍ನ ಪುನಃ ಉಂಬ್‍ಲೇಂದ್ ಎಣ್ಣ್‌ಚಿ. 17 ಯೇಸು ದ್ರಾಕ್ಷಿರಸತ್‍ರ ಕಪ್ಪ್‌ನ ಎಡ್‌ಪಂಜಿ ದೇವನ ತುದಿಚಿತ್, ಶಿಷ್ಯಂಗಕ್ ಕೊಡ್‌ಪಂಜಿ: ನಿಂಗ ಇದ್‍ನ ಎಡ್‍ತಂಡ್, ನಿಂಗಡಲ್ಲಿ ಪಾಲ್ ಮಾಡಿಯೊಳಿ. 18 ನಾನ್ ದೇವಡ ರಾಜ್ಯತ್‍ಲ್ ಪುದಿಯ ರಸತ್‌ನ ಕುಡಿಪಕತ್ತನೆ ಈ ದ್ರಾಕ್ಷಿರಸತ್‍ನ ಕುಡಿಪ್‌ಲೇಂದ್ ನಾನ್ ನಿಂಗಕ್ ಎಣ್ಣ್‌ವೀಂದ್ ಎಣ್ಣ್‌ಚಿ. 19 ಪಿಂಞ ಯೇಸು ಒಟ್ಟಿನ ಎಡ್‌ಪಂಜಿ ದೇವನ ತುದಿಚಿತ್, ಶಿಷ್ಯಂಗಕ್ ಪೊಳ್‌ಚಿತ್ ಕೊಡ್‌ತಿತ್: ಇದ್ ನಿಂಗಕಾಯಿತ್ ತಪ್ಪ ನಾಡ ತಡಿ, ನನ್ನ ಗೇನ ಮಾಡ್‌ವಕಾಯಿತ್ ಇದ್‍ನ ತಿಂಗಂಡೂಂದ್ ಎಣ್ಣ್‌ಚಿ. 20 ಉಂಡಿತ್ ಆನ ಪಿಂಞ, ಅಂವೊ ಅನ್ನನೆ ದ್ರಾಕ್ಷಿರಸತ್‍ರ ಕಪ್ಪ್‌ನ ಎಡ್‍ತಂಡ್: ಇದ್ ನಿಂಗಕಾಯಿತ್ ಬೂಕ್‌ವ ನಾಡ ಚೋರೆನಗುಂಡ್ ಮಾಡ್‍ನ ದೇವಡ ಪುದಿಯ ಒಪ್ಪಂದಾಂದ್ ಎಣ್ಣಿತ್ ಅಯಿಂಗಕ್ ಕೊಡ್‍ತತ್. 21 ಇಕ್ಕ ನೋಟಿ! ನನ್ನ ಕೊಲ್ಲ್‌ವಕ್ ಕಾಟಿ ಕೊಡ್‍ಪಂವೊ ಈ ಕೂಟ್‌ಲ್ ಉಂಡ್. 22 ಮನುಷ್ಯಕುಮಾರ ದೇವ ತೀರ್ಮಾನ ಮಾಡ್‍ನನೆಕೆ ಚತ್ತ್ ಪೋಪ, ಆಚೇಂಗಿ ಅಂವೊನ ಕಾಟಿ ಕೊಡ್‌ಪಂವೊಂಗ್ ಅಯ್ಯೋಂದ್ ಯೇಸು ಎಣ್ಣ್‌ಚಿ. 23 ಇಂತ ಕೆಲಸ ಮಾಡ್‌ವಂವೊ ನಂಗಡ ಕೂಟ್‌ಲ್ ದಾರಾಯಿತಿಕ್ಕೂಂದ್ ಅಯಿಂಗಯಿಂಗಳೇ ತಕ್ಕ್ ಪರಿಯುವಕ್ ಸುರು ಮಾಡ್‍ಚಿ. ದಾರ್ ಬಲ್ಯಂವೋಂದ್ ಉಳ್ಳ ತರ್ಕ 24 ಇದ್‍ಲ್ಲತೆ ದಾರ್ ನಂಗಡ ಕೂಟ್‌ಲ್ ಬಲ್ಯಂವೋಂದ್ ಚರ್ಚೆ ಮಾಡ್‌ವಕ್ ಸುರು ಮಾಡ್‍ಚಿ. 25 ಯೇಸು ಅಯಿಂಗಳ ನೋಟಿತ್: ಈ ಲೋಕತ್‍ರ ರಾಜಂಗ ಅಯಿಂಗಡ ಜನಡಮೇಲೆ ಅದಿಕಾರ ಮಾಡ್‌ವ; ಅನ್ನನೆ ಆಚೇಂಗಿಯು, ಅಯಿಂಗಳ ಜನಡ ಕೂಟ್‍ಕಾರಾಂದ್ ಕಾಕುವ. 26 ನಿಂಗಡಲ್ಲಿ ಅನ್ನನೆ ಇಪ್ಪಕ್ಕಾಗ; ನಿಂಗಡಲ್ಲಿ ಬಲ್ಯಂವೊ ಚೆರಿಯಂವೊನಾಯಿತು, ಅದಿಕಾರ ಉಳ್ಳಂವೊ ಪಣಿಕಾರನಾಯಿತು ಇರಂಡು. 27 ದಾರ್ ಬಲ್ಯಂವೊ? ಉಂಬಕ್ ಅಳ್‍ಪಂವೊನಾ ಅಥವ ಸೇವ ಮಾಡ್‍ವಂವೊನಾ? ಉಂಬಕ್ ಅಳ್‍ಪಂವೊ ತಾನೆ! ಅನ್ನನೆ ಇಂಜಿತು ನಾನ್ ನಿಂಗಡ ಮದ್ಯತ್‍ಲ್ ಪಣಿಕಾರನಾಯಿತ್ ಉಂಡಲ್ಲ! 28 ನಿಂಗ ಮಾತ್ರ ನಾಡ ಕಷ್ಟತ್‍ಲ್ ನಾಡ ಕೂಡೆ ಎಕ್ಕಾಲು ಇಂಜಯಿಂಗ. 29 ಆನಗುಂಡ್, ನಾಡ ಅಪ್ಪ ನಾಕ್ ಒರ್ ರಾಜ್ಯತ್‍ನ ತಂದನೆಕೆ, ನಾನ್ ನಿಂಗಕು ತಪ್ಪಿ. 30 ನಾಡ ರಾಜ್ಯತ್‍ಲ್ ನಾಡ ಕೂಡೆ ನಿಂಗ ಉಂಬಿರ, ಕುಡಿಪಿರ. ಇಸ್ರಾಯೇಲ್‍ರ ಪನ್ನೆರಂಡ್ ಕುಲತ್‍ನ ನ್ಯಾಯತೀರ್ಪ್ ಕೊಡ್‍ಪಕ್ ಪನ್ನೆರಂಡ್ ಸಿಂಹಾಸನತ್‍ರ ಮೇಲೆ ಒಬ್ಬೊಬ್ಬನು ಅಳ್‌ಪಿರಾಂದ್ ಅಯಿಂಗಕ್ ಎಣ್ಣ್‌ಚಿ. ಪೇತ್ರ ಯೇಸುನ ಗೊತ್ತ್‌ಲ್ಲೇಂದ್ ಎಣ್ಣುವದ್‍ನ ಮಿಂಞಲೇ ಎಣ್ಣ್‌ನದ್ ( ಮತ್ತಾಯ 26.31–35 ; ಮಾರ್ಕ 14.27–31 ; ಯೋಹಾನ 13.36–38 ) 31 ಪಿಂಞ ಅಂವೊ ಸೀಮೋನನ ನೋಟಿತ್: ಸೀಮೋನನೇ, ಒರು ಬೂಮಿಕಾರ, ಗೋದಿನ ತವುಡ್ಂಜ ಬೋರೆ ಮಾಡ್‌ವನೆಕೆ ನಿಂಗಳ ಪರೀಕ್ಷೆ ಮಾಡ್‌ವಕ್ ಸೈತಾನ ಅನುಮತಿ ಕ್‍ೕಟಿಯತ್. 32 ಆಚೇಂಗಿ ನೀಕ್ ನಾಡ ಮೇಲೆ ಉಳ್ಳ ನಂಬಿಕೆ ಪಾಳಾಯಿ ಪೋಕತನೆಕೆ ನಾನ್ ನೀಕಾಯಿತ್ ಪ್ರಾರ್ಥನೆ ಮಾಡಿಯೆ. ನೀನ್ ಪಶ್ಚಾತಾಪ ಪಟ್ಟಿತ್ ಪುನಃ ನಾಡ ಪಕ್ಕ ಬಪ್ಪಕ ನೀಡ ಅಣ್ಣತಮ್ಮಣಂಗಳ ಸ್ತಿರಪಡ್‍ತ್‍ೕಂದ್ ಎಣ್ಣ್‌ಚಿ. 33 ಅದ್ಂಗ್ ಪೇತ್ರ: ಆಚೇಂಗಿ ಒಡೆಯನೇ, ನಾನ್ ನೀಡ ಕೂಡೆ ಜೈಲ್‌ಕ್ ಪೋಪಕು, ಚತ್ತ್ ಪೋಪಕು ತಯಾರಾಯಿತ್ ಉಳ್ಳ್‌ಂದ್ ಎಣ್ಣ್‌ಚಿ. 34 ಅದ್ಂಗ್ ಯೇಸು: ಪೇತ್ರ, ನಾನ್ ಒಂದ್ ಎಣ್ಣ್‌ವಿ, ಇಂದ್ ಮಲ್ಲಂಗೋಳಿ ಕೂವಕ್ ಮಿಂಞ, ನಾಡ ವಿಷಯತ್‍ಲ್ ನೀನ್ ಮೂಂದ್ ಕುರಿ ಇಂವೊನ ನಾಕ್ ಗೊತ್ತಿಲ್ಲೇಂದ್ ಎಣ್ಣುವಿಯಾಂದ್ ಎಣ್ಣ್‌ಚಿ. ಕಷ್ಟಪಡ್‌ವಕ್ ತಯಾರಾಯಿತಿರಿ 35 ಇಂಞು ಅಂವೊ ಅಯಿಂಗಕ್: ನಿಂಗಳ ನಾನ್ ಪಣ ಚೀಲ, ಸಾಮಾನ್‍ರ ಚೀಲ ಪಿಂಞ ಕಾಲ್‌ಕ್ ಎಕ್ಕಡ ಇಲ್ಲತೆ ಅಯಿಚಿತ್ ಇಪ್ಪಕ, ನಿಂಗಕ್ ಎಂತಾಚೇಂಗಿ ಕಮ್ಮಿಯಾಚಾಂದ್ ಯೇಸು ಕ್‍ೕಟತ್. ಅದ್ಂಗ್: ಒಂದು ಕಮ್ಮಿಯಾಯಿತ್‌ಲ್ಲೇಂದ್ ಅಯಿಂಗ ಎಣ್ಣ್‌ಚಿ. 36 ಅದ್ಂಗ್ ಯೇಸು: ಆಚೇಂಗಿ ಇಕ್ಕ, ನಿಂಗಕ್ ಪಣ ಚೀಲ ಇಂಜತೇಂಗಿ ಅದ್‍ನ ಎಡ್‌ತೊಳಿ, ಸಾಮಾನ್‍ರ ಚೀಲತ್‍ನ ಎಡ್‌ತೊಳಿ. ದಾರ್‌ಕ್ ಕತ್ತಿ ಇಲ್ಲೆ ಅಯಿಂಗ ಅಯಿಂಗಡ ಪಕ್ಕ ಉಳ್ಳ ಒರ್ ಕೋಟ್‍ನ ಮಾರಿತ್ ಒರ್ ಕತ್ತಿನ ಎಡ್‌ತೊಳಿ. 37 ಎನ್ನಂಗ್ ಎಣ್ಣ್‌ಚೇಂಗಿ, ಅಂವೊ ಕ್ರೂರ ಪಾಪ ಮಾಡ್‍ನ ಕಳ್ಳಂಗಡ ಕೂಟ್‌ಲ್ ಒಬ್ಬನಾಯಿತ್ ಕಾಕ್‍ವಾಂದ್ ಒಳ್‍ದಿತುಳ್ಳ ದೇವಡ ವಾಕ್ಯ ಪೂರ್ತಿ ಆಂಡೂಂದ್ ಎಣ್ಣ್‌ವಿ. ನಾಡ ವಿಷಯವೆಲ್ಲ ಪೂರ್ತಿಯಾಪ ಕಾಲ ಬಾತ್‍ೕಂದ್ ಎಣ್ಣ್‌ಚಿ. 38 ಅದ್ಂಗ್ ಅಂವೊಂಡ ಶಿಷ್ಯಂಗ: ಒಡೆಯನೇ, ಇಲ್ಲಿ ಇಕ್ಕ ದಂಡ್ ಕತ್ತಿ ಉಂಡ್‍ೕಂದ್ ಎಣ್ಣುವಕ, ಅಂವೊ: ಅದ್ ಮದೀಂದ್ ಯೇಸು ಎಣ್ಣ್‌ಚಿ. ಆಲಿವ್ ಕುಂದ್‍ಲ್ ಯೇಸುರ ಪ್ರಾರ್ಥನೆ ( ಮತ್ತಾಯ 26.36–46 ; ಮಾರ್ಕ 14.32–42 ) 39 ಪಿಂಞ ಯೇಸು ಎದ್ದಿತ್, ಅಂವೊ ಎಕ್ಕಾಲು ಮಾಡ್‌ವ ಪದ್ದತಿರ ಪ್ರಕಾರ ಆಲಿವ್ ಕುಂದ್‌ಕ್ ಪೋಚಿ. ಅಂವೊಂಡ ಶಿಷ್ಯಂಗಳು ಬಯ್ಯಕ್ ಪೋಚಿ. 40 ಅಲ್ಲಿ ಎತ್ತ್‌ವಕ, ಯೇಸು ಅಯಿಂಗಳ ನೋಟಿತ್: ಸೋದನೆಲ್ ಬೂವತನೆಕೆ ಪ್ರಾರ್ಥನೆ ಮಾಡಿಯಂಡಿರೀಂದ್ ಎಣ್ಣ್‌ಚಿ. 41 ಯೇಸು, ಒರ್ ಕಲ್ಲ್ ಎರಿವ ದೂರಕ್ ಅಪ್ಪರ ಪೋಯಿತ್, ಮೊಣಕಾಲ್ ಇಟ್ಟಿತ್: 42 ಅಪ್ಪ, ನೀಕ್ ಚಿತ್ತ ಉಂಡೇಂಗಿ ಈ ಕಷ್ಟತ್‍ರ ಪಾತ್ರ ನನ್ನ ಬುಟ್ಟಿತ್ ಪೋಪಕ್ ಮಾಡ್; ಆಚೇಂಗಿಯು ನಾಡ ಚಿತ್ತ ಅಲ್ಲ ನೀಡ ಚಿತ್ತವೇ ಆಡ್‍ೕಂದ್ ಪ್ರಾರ್ಥನೆ ಮಾಡ್‍ಚಿ. 43 ಅಕ್ಕ ಒರ್ ದೇವದೂತ ಬಂದಿತ್ ಅಂವೊನ ಬಲಪಡ್‍ತ್‍ಚಿ. 44 ಅಂವೊ ದುಂಬ ಮನಸ್ಸ್ ಕಷ್ಟಪಟ್ಟಿತ್ ಬೇಜಾರತ್‍ಲ್ ಪ್ರಾರ್ಥನೆ ಮಾಡ್‌ವಕಾಪಕ, ಯೇಸುರ ಬೆವರ್ ಚೋರೆರ ತುಳಿಯಾಯಿತ್ ನೆಲಕ್ ಬುದ್ದಂಡಿಂಜತ್. 45 ಅಂವೊ ಪ್ರಾರ್ಥನೆ ಮಾಡಿತ್ ಆನ ಪಿಂಞ ಎದ್ದಿತ್, ತಾಂಡ ಶಿಷ್ಯಂಗಡ ಪಕ್ಕ ಬಪ್ಪಕ, ಅಯಿಂಗೆಲ್ಲ ವೇದನೆಲ್ ಚೋತ್ ಪೋಯಿತ್ ವರಿಯಂಡಿಪ್ಪದ್‍ನ ಕಂಡಿತ್: 46 ನಿಂಗ ಎನ್ನಂಗ್ ವರಿಯಂಡುಳ್ಳಿರ? ಸೋದನೆಲ್ ಬೂವತನೆಕೆ ಎದ್ದಿತ್ ಪ್ರಾರ್ಥನೆ ಮಾಡೀಂದ್ ಎಣ್ಣ್‌ಚಿ. ಯೇಸುನ ಪುಡ್‌ಚದ್ ( ಮತ್ತಾಯ 26.47–56 ; ಮಾರ್ಕ 14.43–50 ; ಯೋಹಾನ 18.3–11 ) 47 ಅಂವೊ ತಕ್ಕ್ ಪರ್‌ದಂಡ್ ಇಪ್ಪಕಾಪಕ ಜನಡ ಗುಂಪ್ ಬಾತ್. ಪನ್ನೆರಂಡ್ ಶಿಷ್ಯಂಗಡಲ್ಲಿ ಒಬ್ಬನಾನ ಯೂದ ಆ ಗುಂಪ್‍ರ ಮಿಂಞತ್‍ಲ್ ಇಂಜತ್. ಅಂವೊ ಯೇಸುಕ್ ಮುತ್ತ್‌ಕೊಡ್‌ಪಕ್ ಯೇಸುರ ಪಕ್ಕ ಪೋಚಿ. 48 ಅಕ್ಕ ಯೇಸು: ಯೂದ, ನೀನ್ ಮುತ್ತ್ ತಂದಿತ್ ಮನುಷ್ಯಕುಮಾರನ ಎನ್ನನೆ ಕಾಟಿ ಕೊಡ್‍ಪಿಯಾಂದ್ ಕ್‍ೕಟತ್. 49 ಅಂವೊಂಡ ಬಯ್ಯ ನಿಂದಂಡಿಂಜ ಶಿಷ್ಯಂಗಕ್, ಎಂತಾಪಾಂದ್ ಗೊತ್ತಾನಗುಂಡ್: ಕತ್ತಿಲ್ ಪೊಯ್ಯುವದಾಂದ್ ಯೇಸುನ ಕ್‍ೕಟತ್. 50 ಅನ್ನನೆ ಯೇಸುರ ಕೂಟ್‌ಲ್ ಒಬ್ಬ, ಕತ್ತಿ ಎಡ್‌ಪಂಜಿ ಮಹಾ ಯಜಕಂಡ ಆಳ್‍ರ ಕೆಮಿನ ಕೆತ್ತಿರ್‌ತ್. 51 ಅಕ್ಕ ಯೇಸು: ಇಚ್ಚಕ್‌ ಮದಿ, ನಿಪ್ಪ್‌ಚಿಡೀಂದ್ ಎಣ್ಣಿತ್, ಅಂವೊಂಡ ಕೆಮಿನ ಮುಟ್ಟುವಂಜಿ ಅಂವೊನ ವಾಸಿ ಮಾಡ್‍ಚಿ. 52 ಅಲ್ಲಿಂಜ ಯೇಸು ಅಂವೊನ ಪುಡಿಪಕ್ ಬಂದ ಮುಕ್ಯ ಯಾಜಕಂಗಕು, ದೇವಾಲಯತ್‍ರ ಸೇನೆರ ಅದಿಪತಿಯಂಗಕು ಪಿಂಞ ಯೆಹೂದ್ಯಂಗಡ ಬಲ್ಯಯಿಂಗಕು: ಒರ್ ಕಳ್ಳನ ಪುಡಿಪಕ್ ಬಂದನೆಕೆ ಕತ್ತಿ ಪಿಂಞ ಕೋಲ್‍ನ ಎಡ್‍ತಂಡ್ ನನ್ನ ಪುಡಿಪಕ್ ಬಂದಿತುಳ್ಳಿರಲ್ಲ. 53 ನಾನ್ ದಿನಾಲು ದೇವಾಲಯತ್‍ಲ್ ಇಂಜಲ್ಲ, ಅಕ್ಕ ನಿಂಗ ನನ್ನ ಪುಡಿಪಕ್ ಕಯಿಂಜಿತ್‌ಲ್ಲೆ; ಆಚೇಂಗಿ, ಇರ್‌ಟ್ ಆಳಿಯಂಡುಳ್ಳಗುಂಡ್, ಇದ್ ನಿಂಗ ಕ್ರಿಯೆ ಮಾಡ್‌ವಕುಳ್ಳ ಕಾಲಾಂದ್ ಯೇಸು ಎಣ್ಣ್‌ಚಿ. ಪೇತ್ರ ಯೇಸುನ ಗೊತ್ತ್‌ಲ್ಲೇಂದ್ ಎಣ್ಣ್‌ವದ್ ( ಮತ್ತಾಯ 26.57 , 58 ; 26.69–75 ; ಮಾರ್ಕ 14.53 , 54 ; 14.66–72 ; ಯೋಹಾನ 18.12–18 , 25–27 ) 54 ಅಯಿಂಗ ಯೇಸುನ ಪುಡ್‍ಚಂಡ್ ಮಹಾ ಯಾಜಕಂಡ ಮನೆಕ್ ಕೊಂಡ್ ಪೋಚಿ. ಪೇತ್ರ ದೂರತ್‍ಲ್ ಅಯಿಂಗಡ ಬಯ್ಯತ್ ಪೋಚಿ. 55 ಚೆನ್ನ ಜನ ಆ ಮುಂದ್ ಕಯ್ಯಾಲೆರ ಮದ್ಯತ್‍ಲ್ ತಿತ್ತ್ ಗುಡ್ಡೆ ಇಟ್ಟಿತ್ಂಜತ್. ಅದ್ಂಡ ಸುತ್ತ್ ಅಳ್‍ತಂಡಿಂಜ ಆ ಜನಡ ಗುಂಪ್‌ಲ್ ಪೋಯಿತ್ ಅಯಿಂಗಡ ಕೂಡೆ ಪೇತ್ರನು ಅಳ್‌ತತ್. 56 ಅಕ್ಕ ಒರ್ ಪಣಿಕರ್ತಿ ಆ ತಿತ್ತ್ ಗುಡ್ಡೆರ ಗುಂಪ್‌ಲ್ ಪೇತ್ರ ಅಳ್‌ತಂಡಿಪ್ಪಾನ ಕಂಡಿತ್, ಅಂವೊಂಡ ಮೂಡ್‍ನ ಚಾಯಿ ನೋಟ್‌ವಂಜಿ: ಈ ಮನುಷ್ಯ ಯೇಸುರ ಕೂಡೆ ಇಂಜಂವೋಂದ್ ಎಣ್ಣ್‌ಚಿ. 57 ಅದ್ಂಗ್ ಪೇತ್ರ: ಮೂಡಿ, ನಾಕ್ ಅಂವೊನ ಗೊತ್ತ್‌ಲ್ಲೇಂದ್ ಎಣ್ಣ್‌ಚಿ. 58 ಚೆನ್ನ ನೇರ ಕಯಿಂಜ ಪಿಂಞ ಇಂಞೊಬ್ಬ ಬಂದಿತ್: ನೀನ್ ಕೂಡೆ ಅಂವೊಂಡ ಕೂಟ್‌ಲ್ ಒಬ್ಬನೇಂದ್ ಎಣ್ಣ್‌ಚಿ. ಅದ್ಂಗ್ ಪೇತ್ರ: ಮನುಷ್ಯನೇ, ನಾನ್ ಅಲ್ಲಾಂದ್ ಎಣ್ಣ್‌ಚಿ. 59 ಸುಮಾರ್ ಒರ್ ಮಣಿ ನೇರ ಕಯಿಂಜ ಪಿಂಞ, ಇಂಞೊಬ್ಬ ಪೇತ್ರನ ನೋಟಿತ್: ನೇರಾಯಿತ್ ಇಂವೊನು ಅಯಿಂಗಡ ಕೂಟ್‌ಲ್ ಇಂಜತ್, ಎನ್ನಂಗೆಣ್ಣ್‌ಚೇಂಗಿ ಇಂವೊ ಗಲಿಲಾಯಕ್ ಕೂಡ್‍ನಂವೊನೇಂದ್ ಎಣ್ಣ್‌ಚಿ. 60 ಅಕ್ಕ ಪೇತ್ರ: ಮನುಷ್ಯನೇ, ನೀನ್ ಎಂತ ತಕ್ಕ್ ಪರ್‌ದಂಡುಳ್ಳಿಯಾಂದ್ ನಾಕ್ ಗೊತ್ತಿಲ್ಲೇಂದ್ ಎಣ್ಣುವಕ ಮಲ್ಲಂಗೋಳಿ ಕೂಂದತ್. 61 ಆ ಸಮಯತ್‍ಲ್ ಒಡೆಯ ತಿರ್‌ಗಿತ್ ಪೇತ್ರನ ನೇರೆ ನೋಟ್‌ಚಿ. ಮಲ್ಲಂಗೋಳಿ ಕೂವಕ್ ಮಿಂಞ ನೀನ್ ಮೂಂದ್ ಕುರಿ ನನ್ನ ಗೊತ್ತ್‌ಲ್ಲೇಂದ್ ಎಣ್ಣುವಿಯಾಂದ್ ಒಡೆಯ ಎಣ್ಣ್‌ನದ್ ಅಕ್ಕಲೆ ಗೇನ ಬಾತ್. 62 ಪೇತ್ರ ಪೊರಮೆ ಪೋಪಂಜಿ ದುಃಖಿಚಿಟ್ಟಂಡ್ ಮೊರಟತ್. ಪೆರಿಯಯಿಂಗಡ ಸಬೆರ ಮಿಂಞತ್ ಯೇಸುನ ಹಿಯಾಳ್‍ಚಿಟ್ಟದ್ ( ಮತ್ತಾಯ 26.67 , 68 ; ಮಾರ್ಕ 14.65 ) 63-64 ಯೇಸುನ ನೋಟಿಯಂಡಿಂಜ ಸಿಪಾಯಿಯಂಗ ಯೇಸುನ ಪೊಜ್ಜಿತ್, ಹಿಯಾಳ್‌ಚಿಟ್ಟತ್. ಅಂವೊಂಡ ಕಣ್ಣ್‌ನ ಕೆಟ್ಟಿತ್ ಪೊಜ್ಜಿತ್, ದಾರ್ ನಿನ್ನ ಪೊಜ್ಜತ್? ಅದ್‍ನ ನಂಗಕ್ ಪ್ರವಾದನೆಯಾಯಿತ್ ಎಣ್ಣ್‍ೕಂದ್ ಕ್‍ೕಪಕಿಂಜತ್. 65 ಅದಲ್ಲತೆ ಇಂಞು ದುಂಬ ದೂಷಣೆ ತಕ್ಕ್ ಪರ್ಂದಂಡ್ ಇಂಜತ್. ಯೇಸು ಹೆರೋದಂಡ ಮಿಂಞ ನಿಪ್ಪದ್ ( ಮತ್ತಾಯ 26.59–66 ; ಮಾರ್ಕ 14.55–64 ; ಯೋಹಾನ 18.19–24 ) 66 ಪೊಲಾಕ ಆಪಕ ಯೆಹೂದ್ಯಂಗಡ ಪೆರಿಯಯಿಂಗಳು, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು, ಮುಕ್ಯ ಯಾಜಕಂಗಳು ಒಕ್ಕಚೆ ಕೂಡಿತ್ ಯೇಸುನ ಅಯಿಂಗಡ ಆಲೋಚನೆ ಸಬೇಕ್ ಕಾಕಿಯಂಡ್ ಪೋಯಿತ್ ನಿಪ್ಪ್‌ಚಿಟ್ಟಿತ್: 67 ನೀನ್ ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತನಾಂದ್ ನಂಗಕ್ ಎಣ್ಣ್‍ೕಂದ್ ಎಣ್ಣ್‌ಚಿ. ಅದ್ಂಗ್ ಯೇಸು: ನಾನ್ ನಿಂಗಕ್ ಎಂತ ಎಣ್ಣ್‌ಚೇಂಗಿಯು ನಿಂಗ ನಂಬುಲೆ. 68 ಇದ್‍ಲ್ಲತೆ, ನಾನ್ ನಿಂಗಳ ಎಂತಾಚೇಂಗಿ ಕ್‍ೕಟತೇಂಗಿಯು ನಿಂಗ ನಾಕ್ ಉತ್ತರ ತಪ್ಪುಲೆ. 69 ಆಚೇಂಗಿ ಇಕ್ಕಯಿಂಜ ಈ ಮನುಷ್ಯಕುಮಾರ ಸರ್ವಶಕ್ತನಾನ ದೇವಡ ಬಲ್‌ತೆ ಬರಿಲ್ ಅಳ್‌ಪಾಂದ್ ಎಣ್ಣ್‌ಚಿ. 70 ಅಕ್ಕ: ನೀನ್ ನೇರಾಯಿತು ದೇವಡ ಮೋಂವೊನಾಂದ್ ಕ್‍ೕಟತ್; ಅದ್ಂಗ್ ಅಂವೊ: ನಿಂಗ ಎಣ್ಣ್‌ನನೆಕೇಂದ್ ಎಣ್ಣ್‌ಚಿ. 71 ಅಯಿಂಗ: ನಂಗಕ್ ಇಂಞು ಬೋರೆ ಸಾಕ್ಷಿ ಏದ್ ಬೋಂಡು? ಇಂವೊಂಡ ಬಾಯಿಂಜೆಲೇ ನಂಗೆಲ್ಲ ಕ್‍ೕಟತಲ್ಲಾಂದ್ ಅಯಿಂಗ ಎಣ್ಣ್‌ಚಿ. |
© 2017, New Life Literature (NLL)