ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 20 - ಕೊಡವ ಬೈಬಲ್ಯೇಸುರ ಅದಿಕಾರತ್‍ನ ಪ್ರಶ್ನೆ ಇಟ್ಟದ್ ( ಮತ್ತಾಯ 21.23–27 ; ಮಾರ್ಕ 11.27–33 ) 1 ಒರ್ ದಿವಸ ಯೇಸು ದೇವಾಲಯತ್‍ಲ್ ಜನಕ್ ಬೋದನೆ ಕೊಡ್‌ತಂಡ್, ನಲ್ಲ ಸುದ್ದಿನ ಪ್ರಚಾರ ಮಾಡಿಯಂಡಿಪ್ಪಕ, ಮುಕ್ಯ ಯಾಜಕಂಗಳು, ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳು ಪಿಂಞ ಪೆರಿಯಯಿಂಗಳು ಕೂಡಿಯಂಡ್ ಯೇಸುರ ಪಕ್ಕ ಬಂದಿತ್: 2 ಇದ್‍ನೆಲ್ಲ ನೀನ್ ಏದ್ ಅದಿಕಾರತ್‍ಲ್ ಮಾಡಿಯಂಡುಳ್ಳಿಯಾ? ದಾರ್ ನೀಕ್ ಈ ಅದಿಕಾರತ್‍ನ ಕೊಡ್‌ತತ್‍ೕಂದ್ ಕ್‍ೕಟತ್? 3 ಅದ್ಂಗ್ ಯೇಸು: ನಾನ್ ನಿಂಗಕ್ ಒರ್ ಪ್ರಶ್ನೆ ಇಡ್‌ವಿ. 4 ಯೋಹಾನ ದೀಕ್ಷಾಸ್ನಾನ ಕೊಡ್‍ಪಕ್ ದಾರ್ ಅದಿಕಾರ ಕೊಡ್‍ತತ್? ಪರಲೋಕತ್ಂಜ ಕ್‍ಟ್ಟ್‌ನದಾ? ಅಥವ ಮನುಷ್ಯಡಿಂಜ ಕ್‍ಟ್ಟನದಾಂದ್ ಕ್‍ೕಟತ್. 5 ಅಕ್ಕ ಅಯಿಂಗ: ನಂಗ ಇಕ್ಕ ಪರಲೋಕತ್ಂಜ ಬಾತ್‍ೕಂದ್ ಎಣ್ಣ್‌ಚೇಂಗಿ ನಿಂಗ ಎನ್ನಂಗ್ ಯೋಹಾನನ ನಂಬುಲೇಂದ್ ಕ್‍ೕಪ, 6 ಆಚೇಂಗಿ ಇದ್ ಮನುಷ್ಯಂಡಲ್ಲಿಂಜ ಬಾತ್‍ೕಂದ್ ಎಣ್ಣ್‌ಚೇಂಗಿ, ಜನ ಯೋಹಾನನ ಪ್ರವಾದೀಂದ್ ನಂಬಿತ್ಂಜಗುಂಡ್ ನಂಗಳ ಕೊಲ್ಲ್‌ವಕ್ ಕಲ್ಲ್ ಕನಿಪಾಂದ್ ಅಯಿಂಗಯಿಂಗಳೇ ತಕ್ಕ್ ಪರ್ಂದತ್. 7 ಆನಗುಂಡ್ ಆ ಅದಿಕಾರ ದಾರ್‍ೕಂಜ ಬಾತ್‍ೕಂದ್ ನಂಗಕ್ ಗೊತ್ತ್‌ಲ್ಲೇಂದ್ ಅಯಿಂಗೆಲ್ಲ ಎಣ್ಣ್‌ಚಿ. 8 ಅಕ್ಕ ಯೇಸು: ಅನ್ನನಾಚೇಂಗಿ ನಾನು ಇದ್‍ನೆಲ್ಲ ಏದ್ ಅದಿಕಾರತ್‍ಲ್ ಮಾಡಿಯಂಡುಳ್ಳ್‌ಂದ್ ನಿಂಗಕ್ ಎಣ್ಣುಲೇಂದ್ ಎಣ್ಣ್‌ಚಿ. ದ್ರಾಕ್ಷಿ ತೋಟತ್‍ರ ವಾರಕಾರಂಗಡ ಕಥೇರ ರೂಪ ( ಮತ್ತಾಯ 21.33–46 ; ಮಾರ್ಕ 12.1–12 ) 9 ಯೇಸು ಒರ್ ಕಥೇರ ರೂಪ ಎಣ್ಣ್‌ಚಿ. ಒರ್ ಮನುಷ್ಯ ದ್ರಾಕ್ಷಿ ತೋಟ ಮಾಡ್‍ಚಿ. ಅದ್‍ನ ನೋಟ್‍ವಕ್ ವಾರಕಾರಂಗಳ ಗೊತ್ತ್ ಮಾಡಿತ್, ಸುಮಾರ್ ದಿವಸ ಮನೆ ಬುಟ್ಟಿತ್ ಪೋಚಿ. 10 ದ್ರಾಕ್ಷಿ ಪಣ್ಣ್‌ ಕೊಯ್ಯುವಕ್ಕ್ ಸಮಯ ಬಾತ್. ಆ ತೋಟತ್‍ರ ಎಜಮಾನ, ಅಂವೊಂಡ ಪಾಲ್‍ಕ್ ಬಂದ ದ್ರಾಕ್ಷಿ ಪಣ್ಣ್‌ನ ಎಡ್‌ತ ಬಪ್ಪಕ್ ಒರ್ ಆಳ್‌ನ ಅಯಿಚತ್. ವಾರಕಾರಂಗ ಆ ಆಳ್‌ನ ಪೊಯ್ಯುವಂಜಿ ಒಂದು ಕೊಡ್‍ಕತೆ ಬಯ್ಯಕ್ ಅಯಿಚತ್. 11 ಇಂಞೊರ್ ಆಳ್‌ನ ಅಯಿಚತ್. ಆಚೇಂಗಿ ಆ ವಾರಕಾರಂಗ, ಅಂವೊನ ಸಹ ಪೊಯ್ಯುವಂಜಿ, ಅಂವೊನ ಮೋಸವಾಯಿತ್ ಞಾಣಪಡ್‍ತಿತ್ ಅಂವೊಂಗ್ ಸಹ ಒಂದು ಕೊಡ್‍ಕತೆ ಬಯ್ಯಕ್ ಅಯಿಚತ್. 12 ಆ ಎಜಮಾನ ಮೂಂದನೆ ಆಳ್‌ನ ಅಯಿಚತ್. ಆ ಆಳ್‌ನ ಸಹ ವಾರಕಾರಂಗ ಗಾಯಮಾಡ್‌ವಂಜಿ ಅಂವೊನ ತೋಟತ್ಂಜ ಪೊರಮೆ ಚಾಡಿರ್‌ತ್. 13 ಅಕ್ಕ ದ್ರಾಕ್ಷಿ ತೋಟತ್‍ರ ಎಜಮಾನ: ನಾನ್ ಎಂತ ಮಾಡಡ್? ನಾಡ ಕೊದಿರ ಮೋಂವೊನ ಅಯಿಪಿ. ಅಂವೊನ ಅಯಿಚತೇಂಗಿ ಅಂವೊಂಗ್ ಕಂಡಿತವಾಯಿತ್ ಮರ್ಯಾದೆ ಕೊಡ್‍ಪಾಂದ್ ಗೇನ ಮಾಡಿತ್, ಅಂವೊಂಡ ಮೋಂವೊನ ಅಯಿಚತ್. 14 ಆಚೇಂಗಿ ವಾರಕಾರಂಗ ಎಜಮಾನಂಡ ಮೋಂವೊ ಬಪ್ಪದ್‍ನ ಕಂಡದು ಅಯಿಂಗಯಿಂಗಳೇ ತಕ್ಕ್ ಪರ್ಂದಿತ್: ತೋಟತ್‍ರ ಹಕ್ಕ್‌ದಾರ ಆಪಕುಳ್ಳ ನಂಗಡ ಎಜಮಾನಂಡ ಮೋಂವೊ ಬಂದಂಡುಂಡ್, ಬಾರಿ, ನಂಗ ಅಂವೊನ ಕೊಲೆ ಮಾಡ್‍ನ. ಅಕ್ಕ ಈ ಸೊತ್ತ್ ನಂಗಡದಾಪಾಂದ್ ಎಣ್ಣಿಯಂಡ್, 15 ಅಂವೊನ ದ್ರಾಕ್ಷಿ ತೋಟತ್‍ರ ಪೊರಮೆ ಚಾಡ್‍ವಂಜಿ, ಮೋಂವೊನ ಕೊಂದ್‍ರ್‌ತ್. ಅನ್ನನಾಚೇಂಗಿ ವಾರಕಾರಂಗಕ್ ದ್ರಾಕ್ಷಿ ತೋಟತ್‍ರ ಎಜಮಾನ ಎಂತ ಮಾಡ್‌ವ? 16 ಅಂವೊ ಅಯಿಂಗಳ ಕೊಂದ್‍ರ್‍ವಂಜಿ ಬೋರೆ ವಾರಕಾರಂಗಕ್ ತೋಟತ್‍ನ ಕೊಡ್‍ಪಾಂದ್ ಯೇಸು ಎಣ್ಣ್‌ಚಿ. ಜನ ಈ ತಕ್ಕ್‌ನ ಕ್‍ೕಪದು: ಆಚೇಂಗಿ, ಅನ್ನನೆ ಆಕತೆ ಇರಡ್‍ೕಂದ್ ಎಣ್ಣ್‌ಚಿ. 17 ಯೇಸು ಅಯಿಂಗಳ ನೋಟುವಂಜಿ: ಮನೆ ಕೆಟ್ಟ್‌ವಂವೊ ಲಾಯಕಾಯಿತ್‌ಲ್ಲೇಂದ್ ತ್‍ಕ್ಕಾರ ಮಾಡ್‍ನ ಕಲ್ಲೇ ಮುಕ್ಯವಾನ ಮೂಲೆಕಲ್ಲಾಚೀಂದ್ ದೇವಡ ವಾಕ್ಯತ್‍ಲ್ ಒಳ್‍ದಿತುಳ್ಳಾಂಗ್ ಅರ್ಥ ಎಂತ? 18 ಆ ಕಲ್ಲ್‌ರ ಮೇಲೆ ಬೂವಯಿಂಗ ತುಂಡ್ ತುಂಡಾಯಿಪೋಪ. ಆ ಕಲ್ಲ್ ದಾಡ ಮೇಲಾಚೇಂಗಿ ಬುದ್ದತೇಂಗಿ ಅಂವೊ ಪೊಡಿ ಪೊಡಿ ಆಯಿಪೋಪ. ಕಂದಾಯ ಕೊಡ್‍ಪದ್ ( ಮತ್ತಾಯ 22.15–22 ; ಮಾರ್ಕ 12.13–17 ) 19 ಯೇಸು ಎಣ್ಣ್‌ನ ಕಥೇರ ರೂಪತ್‌ಲ್ ಅಯಿಂಗಡ ವಿಷಯತ್‍ನ ಎಣ್ಣ್‌ಚೀಂದ್ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಮುಕ್ಯ ಯಾಜಕಂಗಕ್ ಗೊತ್ತಾಯಿತ್, ಯೇಸುನ ಪುಡಿಪಕ್ ಒರ್ ಸಮಯ ನೋಟಿಯಂಡಿಂಜತ್. ಆಚೇಂಗಿ ಈ ಬಲ್ಯ ಜನಡ ಕೂಟತ್‌ನ ಕಂಡಿತ್ ಅಯಿಂಗಕ್ ಪೋಡಿ ಆಚಿ. 20 ರೋಮ್ ರಾಜ್ಯತ್‍ರ ಅದಿಕಾರಿಯಾನ ಅದಿಪತಿಕ್ ಯೇಸುನ ಪುಡ್‍ಚಿ ಕೊಡ್‍ಪಕಾಯಿತ್, ನೀತಿಲ್ ನಡ್‍ಪ ಜನಡನೆಕೆ ನಾಟಕ ಮಾಡ್‌ವ ದಂಡ್ ಗೂಡಚಾರಂಗಳ, ಯೆಹೂದ್ಯಂಗಡ ಅದಿಕಾರಿಯಂಗ ಯೇಸುರ ಪಕ್ಕ ಅಯಿಚತ್. ಯೇಸು ಪರಿಯುವ ತಕ್ಕಿಂಜಿಲೇ ಅಂವೊನ ಪುಡಿಪ ಸಮಯಕಾಯಿತ್ ನೋಟಿಯಂಡ್ ಇಂಜತ್. 21 ಅಯಿಂಗ ಯೇಸುರ ಪಕ್ಕ ಬಂತ್: ಉಪಾದ್ಯನೇ, ನೀನ್ ಪರಿಯುವ ತಕ್ಕ್ ಪಿಂಞ ಮಾಡ್‌ವ ಬೋದನೆ ಸತ್ಯಾಂದ್ ನಂಗಕ್ ಗೊತ್ತುಂಡ್. ಏದ್ ತರತ್‍ರ ಜನ ಆಯಿತುಂಡೇಂಗಿಯು, ನೀನ್ ಅಯಿಂಗಳ ಒರೇ ತರತ್‍ಲ್ ನೋಟಿತ್ ದೇವಡ ವಿಷಯತ್‍ನ ಸತ್ಯವಾಯಿತ್ ಬೋದನೆ ಮಾಡ್‌ವಿಯ. 22 ಕೈಸರಂಗ್ ಕಂದಾಯ ಕೊಡ್‍ಪದ್ ಸರಿಯಾ ಅಥವ ತಪ್ಪಾಂದ್ ಕ್‍ೕಟತ್. 23 ಆಚೇಂಗಿ ಅಯಿಂಗಡ ಕಪಟ ಕಳಿ ಯೇಸುಕ್ ಗೊತ್ತಾನಗುಂಡ್, 24 ಒರ್ ಬೊಳ್ಳಿರ ನಾಣ್ಯತ್‌ನ ನಾಕ್ ಕಾಟಿ. ಇದ್‍ಲ್ ದಾಡ ಮೂಡ್ ಪಿಂಞ ದಾಡ ಪೆದ ಉಂಡ್ ಎಣ್ಣೀಂದ್ ಯೇಸು ಕ್‍ೕಟತ್. ಅದ್ಂಗ್ ಅಯಿಂಗ: ಇದ್‍ಲ್ ಕೈಸರಂಡ ಮೂಡ್ ಪಿಂಞ ಅಂವೊಂಡ ಪೆದ ಉಂಡ್‍ೕಂದ್ ಎಣ್ಣ್‌ಚಿ. 25 ಅಕ್ಕ ಅಂವೊ: ಅಕ್ಕುವ, ಅನ್ನನಾಚೇಂಗಿ, ಕೈಸರಂಡದ್‌ನ ಕೈಸರಂಗ್ ಕೊಡಿ, ದೇವಡದ್‌ನ ದೇವಕ್ ಕೊಡೀಂದ್ ಉತ್ತರ ಕೊಡ್‍ತತ್. 26 ಆನಗುಂಡ್ ಅಯಿಂಗಕ್ ಯೇಸುನ ಜನಡ ಮಿಂಞತ್‍ಲ್ ಪುಡಿಪಕ್ ಕಯಿಂಜಿತ್‌ಲ್ಲೆ. ಅದ್ಂಗ್ ಬದ್‍ಲ್, ಯೇಸುರ ತಕ್ಕ್ ಕ್‍ೕಪದು ಅಯಿಂಗಕ್ ಆಶ್ಚರ್ಯ ಆಯಿತ್ ಒಂದು ಪರಿವಕ್ ಕಯಿಂಜಿತ್‌ಲ್ಲೆ. ಚಾವ್‍ಯಿಂಜ ಜೀವವಾಯಿತ್ ಏವ ವಿಷಯತ್‍ರ ಪ್ರಶ್ನೆ ( ಮತ್ತಾಯ 22.23–33 ; ಮಾರ್ಕ 12.18–27 ) 27 ಚತ್ತ್ ಪೋನಯಿಂಗ ದಾರೂ ಜೀವವಾಯಿತ್ ಏವುಲೇಂದ್ ವಾದ ಮಾಡ್‌ವ ಸದ್ದುಕಾಯಂಗಡಲ್ಲಿ ಚೆನ್ನ ಜನ ಯೇಸುರ ಪಕ್ಕ ಬಂತ್ ಒರ್ ಪ್ರಶ್ನೆ ಇಟ್ಟತ್. 28 ಉಪಾದ್ಯನೇ, ಒರ್ ಮನುಷ್ಯ ಮಕ್ಕ ಇಲ್ಲತೆ ಪೊಣ್ಣ್‌ನ ಬುಟ್ಟಿತ್ ಚತ್ತ್ ಪೋಚೇಂಗಿ, ಚತ್ತ್ ಪೋನಂವೊಂಡ ತಮ್ಮಣ ಅಂವೊಂಡ ಅಣ್ಣಂಡ ಪೊಣ್ಣ್‌ನ ಮಂಗಲ ಕಯಿಕಲು. ಅಕ್ಕ ಅಯಿಂಗಕ್ ಮಕ್ಕ ಆನಕ ಆ ಮಕ್ಕ ಚತ್ತ್ ಪೋನಂವೊಂಡ ಪೆದತ್‍ನ ಎಡ್‍ತವಾಂದ್ ಮೋಶೆ ನಂಗಕ್ ಈ ಕಾನೂನ್‌ನ ಒಳ್‍ದಿ ಬೆಚ್ಚಿತುಂಡ್. 29 ಒಮ್ಮ ಏಳ್ ಅಣ್ಣತಮ್ಮಣಂಗ ಇಂಜತ್. ಪೆರಿಯಂವೊಂಗ್ ಮಂಗಲ ಆಚಿ ಅಂವೊಂಗ್ ಮಕ್ಕ ಇಲ್ಲತೆ ಅಂವೊ ಚತ್ತ್ ಪೋಚಿ. 30 ದಂಡನೆಯಂವೊ ಅವಳ ಮಂಗಲ ಕಯಿಚತ್ ಅಂವೊಂಗು ಮಕ್ಕ ಆಯಿತ್‌ಲ್ಲೆ, ಅಂವೊ ಸಹ ಚತ್ತ್ ಪೋಚಿ. 31 ಅನ್ನನೆ ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚಿತ್, ಏಳಾಳು ಮಕ್ಕ ಇಲ್ಲತೆ ಚತ್ತ್ ಪೋಚಿ. 32 ಆಕೀರ್‌ಕ್ ಆ ಪೊಣ್ಣಾಳು ಚತ್ತ್ ಪೋಚಿ. 33 ಅಂದಕ, ಎಲ್ಲಾ ಮನುಷ್ಯಂಗ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪ ಆ ದಿವಸತ್‍ಲ್ ಈ ಪೊಣ್ಣಾಳ್ ಏದ್ ಆಣಾಳ್‌ರ ಪೊಣ್ಣಾಯಿತಿಪ್ಪ? ಎಲ್ಲಾ ಏಳ್ ಅಣ್ಣತಮ್ಮಣಂಗಳು ಅವಳ ಮಂಗಲ ಕಯಿಚಿತಲ್ಲಾಂದ್ ಎಣ್ಣ್‌ಚಿ. 34 ಅದ್ಂಗ್ ಯೇಸು: ಈ ಲೋಕತ್‍ಲ್ ಉಳ್ಳಯಿಂಗ ಮಂಗಲ ಕಯಿಪ. 35 ಆಚೇಂಗಿ ಬಪ್ಪಕುಳ್ಳ ಲೋಕತ್‍ಲ್ ಚಾವ್‍ಯಿಂಜ ಜೀವವಾಯಿತ್ ಎದ್ದಿತ್ ಬಪ್ಪಕ್ ಯೋಗ್ಯತೆ ಉಳ್ಳಯಿಂಗ ಮಂಗಲ ಕಯಿಪದೂ ಇಲ್ಲೆ ಮಂಗಲ ಮಾಡ್‍ಚಿಡ್‌ವದೂ ಇಲ್ಲೆ; 36 ಚತ್ತ್ ಪೋಪದು ಇಲ್ಲೆ, ಎನ್ನಂಗೆಣ್ಣ್‌ಚೇಂಗಿ ಅಯಿಂಗ ಚಾವ್‍ಯಿಂಜ ಜೀವವಾಯಿತ್ ಏವ ಮಕ್ಕಳಾಯಿತ್ ದೇವದೂತಂಗಡನೆಕೆ ದೇವಡ ಮಕ್ಕಳಾಯಿತ್‌ಪ್ಪ. 37 ಚತ್ತ್ ಪೋನಯಿಂಗ ಜೀವವಾಯಿತ್ ಎದ್ದಿತ್ ಬದ್‍ಕಾವಾಂದ್ ಕತ್ತಿಯಂಡಿಂಜ ಪೊದರ್‌ರ ವಿಷಯತ್‍ನ ಎಣ್ಣುವ ಮೋಶೇರ ಗ್ರಂಥತ್‌ರ ಜಾಗತ್‍ಲ್ ಚಾಯಿತೆ ಎಣ್ಣಿತುಂಡ್. ಎನ್ನನೆ ಎಣ್ಣ್‌ಚೇಂಗಿ, ಅಂವೊ ಒಡೆಯನ, ಅಬ್ರಹಾಮಂಡ ದೇವ, ಇಸಾಕಂಡ ದೇವ, ಯಾಕೋಬಂಡ ದೇವಾಂದ್ ಎಣ್ಣಿತುಂಡ್. 38 ಆನಗುಂಡ್, ಅಂವೊ ಚತ್ತಪೋನಯಿಂಗಕ್ ದೇವ ಅಲ್ಲ ಆಚೇಂಗಿ ಜೀವತ್‍ಲ್ ಉಳ್ಳಯಿಂಗಕ್ ದೇವ. ದೇವಕ್ ಎಲ್ಲಾರು ಬದ್‍ಕಿತುಳ್ಳಯಿಂಗಳೇಂದ್ ಎಣ್ಣ್‌ಚಿ. 39 ಅದ್‍ನ ಕ್‍ೕಟಿತ್ ನ್ಯಾಯಪ್ರಮಾಣತ್‍ರ ಚೆನ್ನ ಉಪಾದ್ಯಂಗ, ನೀನ್ ಚಾಯಿತೆ ಜವಾಬ್ ಕೊಡ್‍ತಿಯಾಂದ್ ಯೇಸುಕ್ ಎಣ್ಣ್‌ಚಿ. 40 ಅಲ್ಲಿಂಜಪ್ಪರ ದಾರ್‌ಕು ಯೇಸುನ ಪ್ರಶ್ನೆ ಕ್‍ೕಪಕ್ ದೈರ್ಯ ಇಂಜಿತ್ತ್‌ಲ್ಲೆ. ರಾಜನಾನ ಕ್ರಿಸ್ತ ದಾಡ ಮೋಂವೊ? ( ಮತ್ತಾಯ 22.41–46 ; ಮಾರ್ಕ 12.35–37 ) 41 ಪಿಂಞ ಯೇಸು ಅಯಿಂಗಳ ನೋಟಿತ್: ದೇವ ಗೊತ್ತ್ ಮಾಡಿತ್ ಅಯಿಚ ಕ್ರಿಸ್ತ, ದಾವೀದಂಡ ಮೋಂವೋಂದ್ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಎಣ್ಣುವದ್ ಎನ್ನನೇಂದ್ ಕ್‍ೕಟತ್? 42-43 ನಾನ್ ನೀಡ ಶತ್ರುವಳ ನೀಡ ಕಾಲ್‍ರ ಅಡಿಕ್ ಇಡ್‍ವಕತ್ತನೆ ನೀನ್ ನಾಡ ಬಲ್‌ತೆ ಬರಿಲ್ ಅಳೆಂದ್, ದೇವ ನಾಡ ಒಡೆಯಂಗ್ ಎಣ್ಣ್‌ಚೀಂದ್ ದಾವೀದ ಪವಿತ್ರಾತ್ಮನಗುಂಡ್ ಎಣ್ಣಿತಲ್ಲ. 44 ದಾವೀದನೇ, ಅಂವೊನ ಒಡೆಯಾಂದ್ ಕಾಕ್‍ವಕ, ಕ್ರಿಸ್ತ, ಅಂವೊಂಡ ಮೋಂವೊನಾಯಿತ್‌ಪ್ಪದ್ ಎನ್ನನೇಂದ್ ಕ್‍ೕಟತ್. ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳ ಯೇಸು ಎಚ್ಚರ ಮಾಡ್‍ವದ್ ( ಮತ್ತಾಯ 23.1–36 ; ಮಾರ್ಕ 12.38–40 ) 45 ಎಲ್ಲಾ ಜನಳು ಯೇಸು ತಕ್ಕ್ ಪರಿವಾನ ಕ್‍ೕಟಂಡ್ ಇಪ್ಪಕ, ಯೇಸು ಶಿಷ್ಯಂಗಳ ನೋಟಿತ್: 46 ಉದ್ದ ಬಟ್ಟೇನ ಇಟ್ಟಂಡ್, ಚತ್ತೆಲ್ ಎಲ್ಲಾರು ಮರ್ಯಾದೆ ಕೊಡ್‌ಕಡ್ ಎಣ್ಣಿಯಂಡ್, ಸಬಾಮಂದಿರತ್‍ಲ್ ಮುಕ್ಯಪಟ್ಟ ಕುರ್ಚಿಲ್ ಅಳ್‌ಪಕ್, ಗದ್ದಾಳತ್‍ಲ್ ಗನಪಟ್ಟ ಜಾಗತ್‍ಲ್ ಇಪ್ಪಕ್ ಕುಶಿಪಟ್ಟಂಡುಂಡ್ ಉಳ್ಳ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಡ ವಿಷಯತ್ ನಿಂಗ ಎಚ್ಚರತ್ ಇರಿ. 47 ಅಯಿಂಗ ವಿದವೆಯಂಗಡ ಮನೆನ ಚದಿ ಮಾಡಿತ್ ಮುಗ್ಗಿತ್, ಎಲ್ಲಾರು ಕಾಂಬನೆಕೆ ಉದ್ದವಾಯಿತ್ ಪ್ರಾರ್ಥನೆ ಮಾಡ್‌ವ. ಅಯಿಂಗಕ್ ದೇವಡ ಶಿಕ್ಷೆ ದುಂಬ ಕಠಿಣವಾಯಿತ್‌ಪ್ಪಾಂದ್ ಎಣ್ಣ್‌ಚಿ. |
© 2017, New Life Literature (NLL)