ಲೂಕ ಒಳ್‍ದ್‍ನ ಯೇಸುರ ನಲ್ಲ ಸುದ್ದಿ 11 - ಕೊಡವ ಬೈಬಲ್ಯೇಸು ಪ್ರಾರ್ಥನೆ ಮಾಡ್‌ವಕ್ ಎಣ್ಣಿ ಕೊಡ್‍ಪದ್ ( ಮತ್ತಾಯ 6.9–13 ; 7.7–11 ) 1 ಯೇಸು ಒರ್ ಜಾಗತ್‍ಲ್ ಪ್ರಾರ್ಥನೆ ಮಾಡಿತಾನ ಪಿಂಞ, ಅಂವೊಂಡ ಒರ್ ಶಿಷ್ಯ: ಒಡೆಯನೇ, ಯೋಹಾನ ಅಂವೊಂಡ ಶಿಷ್ಯಂಗಕ್ ಪ್ರಾರ್ಥನೆ ಮಾಡ್‌ವಕ್ ಎಣ್ಣಿ ಕೊಡ್‍ತನೆಕೆ ನಂಗಕ್ ಸಹ ಎಣ್ಣಿತಾಂದ್ ಕ್‍ೕಟತ್. 2 ಅದ್ಂಗ್ ಅಂವೊ: ನಿಂಗ ಪ್ರಾರ್ಥನೆ ಮಾಡ್‌ವಕ: ಪರಲೋಕತ್‍ಲ್ ಉಳ್ಳ ನಂಗಡ ಅಪ್ಪನೇ, ನೀಡ ಪೆದ ಎಕ್ಕಾಲು ಪವಿತ್ರವಾಯಿತಿರಡ್; ನೀಡ ರಾಜ್ಯ ಬೂಲೋಕಕ್ ಬರಡ್; 3 ದಿನಾಲು ಬೋಂಡಿಯಾನ ಕೂಳ್‌ನ ನಂಗಕ್ ತಾ; 4 ನಂಗಕ್ ವಿರೋದವಾಯಿತ್ ತಪ್ಪ್ ಮಾಡ್‍ನಯಿಂಗಳ ನಂಗ ಮನ್ನಿಚಿಡ್‌ವನೆಕೆ, ನಂಗಡ ಪಾಪತ್‍ನ ಮನ್ನಿಚಿಡ್; ನಂಗ ಸೋದನೆಕ್ ಒಳಪಡತನೆಕೆ ನಂಗಳ ಕ್‍ೕಡ್‌ಂಜ ಕಾಪಾಡ್‍ೕಂದ್ ಪ್ರಾರ್ಥನೆ ಮಾಡ್‌ವಕ್ ಎಣ್ಣಿ ಕೊಡ್‍ತತ್. 5 ಇಂಞು ಅಯಿಂಗಳ ನೋಟಿತ್: ನಿಂಗಡಲ್ಲಿ ಒಬ್ಬ ತಾಂಡ ಸ್ನೇಹಿತಂಡ ಮನೆಕ್ ನಡ್‌ಪಾದ್ರೆ ನೇರ‌ಕ್ ಪೋಯಿತ್: 6 ನಾಡ ಸ್ನೇಹಿತನೇ: ಪ್ರಯಾಣ ಮಾಡಿಯಂಡಿಂಜ ನಾಡ ಒರ್ ಸ್ನೇಹಿತ ಮನೆಕ್ ಬಂದಿತುಂಡ್, ಅಂವೊಂಗ್ ತಿಂಬಕ್ ಕೊಡ್‍ಪಕ್ ನಾಡ ಪಕ್ಕ ಒಂದು ಇಲ್ಲೇಂದ್ ಎಣ್ಣುವಕ, 7 ಮನೆರ ಒಳ್‍ಲ್ ಇಂಜಂವೊ: ಸ್ನೇಹಿತನೇ, ನನ್ನ ತೊಂದರೆ ಮಾಡತೆ, ನಾನ್ ಪಡಿಕ್ ಬೀಗ ಇಟ್ಟಿತುಳ್ಳ, ನಾಡ ಮಕ್ಕಳು ನಾನು, ಬುದ್ದಂಡ್ ಉಂಡ್, ನಾನ್ ಎದ್ದಿತ್ ನೀಕ್ ಒಂದು ತಪ್ಪಕ್ ಕಯ್ಯುಲೇಂದ್ ಎಣ್ಣುವ. 8 ಆಚೇಂಗಿ, ಅಂವೊ ಅಂವೊಂಡ ಸ್ನೇಹಿತನಾಯಿತ್ ಉಳ್ಳಗುಂಡ್ ಎದ್ದಿತ್ ಕೊಡ್‍ಕತೆ ಪೋಚೇಂಗಿಯು, ಅಂವೊ ಅಚ್ಚಕ್ ಒತ್ತಾಯ ಮಾಡ್‌ವಗುಂಡ್ ಅಂವೊಂಗ್ ಬೋಂಡಿಯಾನದ್‍ನ ಕೊಡ್‍ಪಾಂದ್ ನಿಂಗಕ್ ನಾನ್ ಎಣ್ಣ್‌ವಿ. 9 ಆನಗುಂಡ್, ಇಂಞು ನಾನ್ ನಿಂಗಕ್ ಎಣ್ಣುವದ್‍ನ ಎಂತ ಎಣ್ಣ್‌ಚೇಂಗಿ: ಕ್‍ೕಳಿ, ಅಕ್ಕ ನಿಂಗಕ್ ತಪ್ಪ. ತ್‍ೕಡಿ ನಿಂಗಕ್ ಕ್‍ಟ್ಟುವ. ಪಡಿನ ತಟ್ಟಿ, ಅಕ್ಕ ನಿಂಗಕ್ ಪಡಿ ತೊರ್‌ಪ. 10 ಎನ್ನಂಗೆಣ್ಣ್‌ಚೇಂಗಿ ದಾರೆಲ್ಲಾ ಕ್‍ೕಪ ಅಯಿಂಗಕ್ ಕ್‍ಟ್ಟುವ; ದಾರೆಲ್ಲ ತ್‍ೕಡ್‌ವ, ಅಯಿಂಗಕ್ ಕಾಂಬ; ದಾರೆಲ್ಲ ತಟ್ಟ್‌ವ, ಅಯಿಂಗಕ್ ಪಡಿ ತೊರ್‌ಪ. 11 ನಿಂಗಡಲ್ಲಿ, ಅಪ್ಪನಾಯಿತುಳ್ಳ ಒಬ್ಬ, ತಾಂಡ ಮೋಂವೊ ಮೀನ್‌ನ ಕ್‍ೕಪಕ ಪಾಂಬ್‍ನ ತಪ್ಪ? 12 ಅಲ್ಲತೆ, ಮೊಟ್ಟೆನ ಕ್‍ೕಪಕ ಚೇಳ್‍ನ ತಪ್ಪ? 13 ಕಪಟಿಯಾನ ನಿಂಗ, ನಿಂಗಡ ಮಕ್ಕಕ್ ನಲ್ಲ ಇನಾಮ್‍ನ ಕೊಡ್‍ಪಕ್ ಗೊತ್ತಿಪ್ಪಕ, ಪರಲೋಕತ್‍ಲ್ ಉಳ್ಳ ನಿಂಗಡ ಅಪ್ಪ, ಅಂವೊಂಡ ಪಕ್ಕ ಬೋಡ್‌ವಯಿಂಗಕ್ ಪವಿತ್ರಾತ್ಮತ್‍ನ ತಪ್ಪದ್ ಎಚ್ಚಕ್ ನೇರ್‍ೕಂದ್ ಎಣ್ಣ್‌ಚಿ. ಯೇಸುನ ಕುತ್ತ ಪರಿವದ್ ( ಮತ್ತಾಯ 12.22–30 ; ಮಾರ್ಕ 3.20–27 ) 14 ಅಲ್ಲಿಂಜ, ಒರ್ ಮನುಷ್ಯನ ತಕ್ಕ್‌ಪರಿವಕ್ ಕಯ್ಯತ ಮಾಡಿತ್ಂಜ ಕೂಳಿನ ಯೇಸು ಬುಡ್‌ತ್‌ಚಿ. ಆ ಕೂಳಿ ಬುಟ್ಟಿತ್ ಪೋನ ಪಿಂಞ ಆ ಮನುಷ್ಯಂಗ್ ತಕ್ಕ್‌ಪರಿವಕ್ ಆಚಿ; ಅಲ್ಲಿ ಉಳ್ಳ ಜನಕೆಲ್ಲ ದುಂಬ ಆಶ್ಚರ್ಯ ಆಚಿ. 15 ಆಚೇಂಗಿ, ಅಲ್ಲಿ ಉಳ್ಳ ಚೆನ್ನ ಜನ: ಇಂವೊ ಕೂಳಿಯಡ ಮುಕ್ಯಸ್ತ ಬೆಲ್ಜೆಬೂಲನಗುಂಡ್ ಕೂಳಿ ಬುಡ್‌ತಿಯಂಡುಂಡ್‍ೕಂದ್ ಎಣ್ಣ್‌ಚಿ. 16 ಚೆನ್ನ ಜನ ಯೇಸುನ ಕೆಣಿಪಕಾಯಿತ್: ನೀನ್ ಬಾನತ್ಂಜ ಒರ್ ಗುರ್‍ತ್‍ನ ನಂಗಕ್ ಕಾಟಿತಾಂದ್ ಕ್‍ೕಟತ್. 17 ಆಚೇಂಗಿ, ಯೇಸುಕ್ ಅಯಿಂಗ ಎಂತ ಗೇನ ಮಾಡಿಯಂಡುಂಡ್‍ೕಂದ್ ಗೊತ್ತಾಚಿ. ಆನಗುಂಡ್ ಅಯಿಂಗಳ ನೋಟಿತ್: ಏದ್ ಒರ್ ರಾಜ್ಯತ್‍ರ ಜನ, ಅಯಿಂಗಯಿಂಗಳೇ ಜಗಳ ಮಾಡಿಯೊವ ಅಯಿಂಗ ಪಾಳ್ ಆಪ. ಏದ್ ಒರ್ ಮನೆರ ಜನ, ಅಯಿಂಗಯಿಂಗಳೇ ಜಗಳ ಮಾಡಿಯೊವ ಅಯಿಂಗ ಪಾಳ್ ಆಪ. 18 ಅನ್ನನೆ ಇಪ್ಪಕ, ಸೈತಾನ ಅಂವೊಂಗ್ ವಿರೋದವಾಯಿತ್ ಅಂವೊಂಡ ಗುಂಪ್‌ಲ್ ಜಗಳ ಮಾಡಿಯಂಡಿಂಜತೇಂಗಿ ಅಂವೊಂಡ ರಾಜ್ಯ ಎನ್ನನೆ ನಿಪ್ಪ? ಅಕ್ಕ, ನಾನ್ ಬೆಲ್ಜೆಬೂಲನಗುಂಡ್ ಕೂಳಿಯಳ ಬುಡ್‌ತಿಯಂಡುಂಡ್‍ೕಂದ್ ನಿಂಗ ಎನ್ನನೆ ಎಣ್ಣುವಿರಾಂದ್ ಕ್‍ೕಟತ್. 19 ಇಕ್ಕ ನಾನ್ ಕೂಳಿಯಳ ಬೆಲ್ಜೆಬೂಲ್‌ರ ಶಕ್ತಿಯಿಂಜ ಬುಡ್‌ತ್‌ಚೇಂಗಿ, ನಿಂಗಡ ಶಿಷ್ಯಂಗ ದಾಡ ಶಕ್ತಿಯಿಂಜ ಕೂಳಿಯಳ ಬುಡ್‌ತಿಯಂಡುಂಡ್? ಆನಗುಂಡ್, ಅಯಿಂಗಳೇ ನಿಂಗಕ್ ತೀರ್ಪ್ ತಪ್ಪ. 20 ನಾನ್ ದೇವಡ ಶಕ್ತಿಲ್ ಕೂಳಿಯಳ ಬುಡ್‌ತಿಯಂಡುಂಡೇಂಗಿ, ದೇವಡ ರಾಜ್ಯ ಇಕ್ಕಲೆ ನಿಂಗಡಲ್ಲಿ ಬಂದಿತುಂಡ್‍ೕಂದ್ ಗೊತ್ತಾಪ. 21 ಒರ್ ಗಟ್ಟಿಮುಟ್ಟಾನ ಮನುಷ್ಯ, ಅಂವೊಂಗ್ ಬೋಂಡಿಯಾನ ಎಲ್ಲಾ ಆಯುದತ್‍ನ ಇಟ್ಟಂಡ್ ತಾಂಡ ಮನೆನ ಕಾಪಕ, ಅಂವೊಂಡ ಎಲ್ಲಾ ವಸ್ತು ಬದ್ರವಾಯಿತ್‌ಪ್ಪ. 22 ಆಚೇಂಗಿ ಅಂವೊಗಿಂಜ ಬಲಶಾಲಿಯಾನ ಮನುಷ್ಯ ಬಂದಿತ್ ಅಂವೊನ ಚೋಪ್‌ಚಿಟ್ಟತೇಂಗಿ, ಆ ಬಲಶಾಲಿ ನಂಬಿಕೆ ಬೆಚ್ಚಿತ್ಂಜ ಆ ಎಲ್ಲಾ ಆಯುದತ್‍ನ ಎಡ್‌ತ ಪೋಯಿತ್ ಪಿಂಞ ಆ ಎಲ್ಲಾ ವಸ್ತುನ ಬೋರೆಯಿಂಗಡ ಕೂಡೆ ಪಾಲ್ ಮಾಡ್‌ವ. 23 ನಾಡ ಕೂಡೆ ಇಲ್ಲತಂವೊ ನಾಕ್ ವಿರೋದಿಯಾಯಿತ್‌ಪ್ಪ. ನಾಡ ಕೂಡೆ ಬೊಳೆನ ಕೂಟತಂವೊ ನಾಡದ್‌ನ ಚದ್‍ರಿಚಿಡುವ. ಕೂಳಿ ವಾಪಸ್ ಬಪ್ಪದ್ ( ಮತ್ತಾಯ 12.43–45 ) 24 ಒರ್ ಕೂಳಿ ಒರ್ ಮನುಷ್ಯನ ಬುಟ್ಟಿತ್ ಪೋಪಕ, ಆ ಕೂಳಿ ವಾಸ ಮಾಡ್‌ವಕಾಯಿತ್ ಮಣಬೂಮಿಲ್ ಜಾಗ ತ್‍ೕಡಿಯಂಡ್ ಪೋಪ. ಆಚೇಂಗಿ ಜಾಗ ಕ್‍ಟ್ಟತೆ ಪೋಪಕ, ಆ ಕೂಳಿ: ನಾನ್ ಬುಟ್ಟ್ ಬಂದ ಮನೆಕ್ ವಾಪಸ್ ಪೋಪೀಂದ್ ಎಣ್ಣಿತ್, 25 ಆ ಮನೆಕ್ ಬಪ್ಪಕ, ಆ ಮನೆ ಒಡ್‌ಕಿತ್, ಚಾಯಿ ಮಾಡಿತ್ ಇಪ್ಪದ್‍ನ ಕಂಡಿತ್, 26 ಅದ್ ಪೊರಮೆ ಪೋಪಂಜಿ ಅದ್‍ಕಿಂಜ ಮೋಸವಾಯಿತುಳ್ಳ ಇಂಞು ಏಳ್ ಕೂಳಿಯಳ ಕಾಕಿಯಂಡ್ ಬಪ್ಪ. ಅಯಿಂಗೆಲ್ಲಾರು ಆ ಮನೆಲ್ ಪೋಯಿತ್ ವಾಸ ಮಾಡ್‌ವ; ಅಕ್ಕ ಆ ಮನುಷ್ಯ ಮಿಂಞ ಇಂಜಾಂಗಿಂಜ ಪಾಳ್ ಸ್ತಿತಿಲ್ ಇಪ್ಪಾಂದ್ ಎಣ್ಣ್‌ಚಿ. 27 ಯೇಸು ಇನ್ನನೆ ಎಣ್ಣಿಯಂಡಿಪ್ಪಕ, ಜನಡ ಗುಂಪಿಂಜ ಒರ್ ಪೊಣ್ಣಾಳ್: ನಿನ್ನ ಪೆತ್ತ ಅವ್ವ, ನಿನ್ನ ಪಾಲ್ ಕುಡಿಪ್‍ಚಿಟ್ಟವ ಎಚ್ಚಕ್ ಆಶೀರ್ವಾದ ಪಡ್ಂದವಾಂದ್ ಕೂತ್ ಕೊಡ್‍ತತ್. 28 ಅದ್ಂಗ್ ಅಂವೊ: ಅಕ್ಕು ನೇರೇ, ಆಚೇಂಗಿಯು, ದೇವಡ ವಾಕ್ಯತ್‍ನ ಕ್‍ೕಟಿತ್, ಅದ್ಂಡ ಪ್ರಕಾರ ನಡ್‍ಪಯಿಂಗಳೇ ನೇರಾಯಿತ್ ಆಶೀರ್ವಾದ ಪಡ್ಂದಯಿಂಗಾಂದ್ ಎಣ್ಣ್‌ಚಿ. ಯೋನ ಪ್ರವಾದಿರ ಗುರ್‌ತ್ ( ಮತ್ತಾಯ 12.38–42 ) 29 ಪಿಂಞ ಜನಡ ಕೂಟ ದುಂಬಿತ್ ನೂಕಿಯಂಡ್ ಬಂದಿತ್‌ಪ್ಪಕ ಯೇಸು ಎಣ್ಣ್‌ಚಿ: ಈಂಗ ಮೋಸವಾನ ಸಂತಾನಕಾರಂಗಳಾಯಿತ್ ಉಂಡ್, ಅಯಿಂಗ ಎಕ್ಕಾಲು ಒರ್ ಗುರ್‌ತ್ ಬೋಂಡೂಂದ್ ತ್‍ೕಡ್‌ವ. ಆಚೇಂಗಿಯು ಯೋನ ಪ್ರವಾದಿರ ಗುರ್‌ತ್ ಅಲ್ಲತೆ ಬೋರೆ ಒರ್ ಗುರ್‌ತು ಅಯಿಂಗಕ್ ಕಾಟಿತಪ್ಪುಲೆ. 30 ಯೋನ ಪ್ರವಾದಿ ನಿನೆವೆ ಪಟ್ಟಣತ್‍ರ ಜನಕ್ ಎಚ್ಚರತ್‍ರ ಗುರ್‌ತಾಯಿತ್ಂಜನೆಕೆ, ಮನುಷ್ಯಕುಮಾರನು ಈ ಸಂತಾನಕಾರಂಗಕ್ ಗುರ್‌ತಾಯಿತ್‌ಪ್ಪ. 31 ತೆಕ್ಕ್ ದಿಕ್ಕ್‌ಂಜ ಬಂದ ಶೀಬ ರಾಜ್ಯತ್‍ರ ರಾಣಿ, ಸೊಲೊಮೋನ ರಾಜಂಡ ಜ್ಞಾನತ್‍ನ ಕ್‍ೕಪಕಾಯಿತ್ ಈ ಲೋಕತ್‍ರ ಕಡೇಯಿಂಜ ಪ್ರಯಾಣ ಮಾಡಿತ್ ಬಾತ್. ಇಕ್ಕ ಸೊಲೊಮೋನ ರಾಜಕಿಂಜ ಬಲ್ಯಂವೊ ಇಲ್ಲಿ ಉಂಡ್. ಆಚೇಂಗಿ ನಿಂಗ ಅಂವೊಂಡ ಬೋದನೆನ ಕ್‍ೕಟಿತ್‌ಲ್ಲೆ. ಆನಗುಂಡ್, ನ್ಯಾಯತೀರ್ಪ್ ದಿನತ್‌ಲ್ ಶೀಬ ರಾಜ್ಯತ್‍ರ ರಾಣಿ ಈ ಸಂತಾನಕಾರಡ ಕೂಡೆ ನಿಂದಿತ್ ಈಂಗಳ ಕುತ್ತ ಪರಿಯುವ. 32 ನ್ಯಾಯತೀರ್ಪ್ ದಿವಸತ್‍ಲ್ ನಿನೆವೆ ಪಟ್ಟಣತ್‍ರ ಜನ ಈ ಸಂತಾನಕಾರಡ ಕೂಡೆ ನಿಂದಿತ್ ಈಂಗಳ ಕುತ್ತ ಪರಿಯುವ. ಎನ್ನಂಗೆಣ್ಣ್‌ಚೇಂಗಿ, ಯೋನಂಡ ಬೋದನೆನ ಕ್‍ೕಟಿತ್ ನಿನವೆ ಪಟ್ಟಣತ್‍ರ ಜನ ದೇವಡ ಪಕ್ಕ ತಿರ್‍ಗ್‍ಚಿ. ಇಕ್ಕ, ಯೋನಕಿಂಜ ಬಲ್ಯಂವೊ ಇಲ್ಲಿ ಉಂಡ್ ಆಚೇಂಗಿ ನಿಂಗ ಅಂವೊಂಡ ಬೋದನೆನ ಕ್‍ೕಟಿತ್‌ಲ್ಲೆ. ಬೊಳಿಲ್ ಬದ್‍ಕ್‍ವದ್ ( ಮತ್ತಾಯ 5.15 ; 6.22 , 23 ) 33 ದಾರೂ ಬೊಳ್‌ಚತ್‍ನ ಕತ್ತ್‌ಚಿಟ್ಟಿತ್ ಪಾತ್ರತ್‍ರ ಒಳ್‍ಲ್ ಅಡಗಿಚಿಟ್ಟಿತ್ ಬೆಪ್ಪುಲೆ, ಅದ್‍ನ ಬೊಳ್‍ಚ ಕಂಬತ್‍ಲ್ ಬೆಪ್ಪ. ಅಕ್ಕ, ಅಲ್ಲಿ ಬಪ್ಪ ಜನಕ್ ಬೊಳ್‍ಚ ಕಾಂಬಾಂದ್ ಯೇಸು ಎಣ್ಣ್‌ಚಿ. 34 ಕಣ್ಣ್ ನಿಂಗಡ ತಡೀರ ಬೊಳ್‌ಚವಾಯಿತುಂಡ್. ನಿಂಗಡ ಕಣ್ಣ್ ಚಾಯಿತೆ ಉಂಡೇಂಗಿ ನಿಂಗಡ ತಡಿ ಪೂರ್ತಿ ಬೊಳಿಯಾಯಿತ್‌ಪ್ಪ; ಆಚೇಂಗಿ ನಿಂಗಡ ಕಣ್ಣ್ ಕೆಟ್ಟದಾಯಿತ್ಂಜತೇಂಗಿ ನಿಂಗಡ ತಡಿ ಪೂರ್ತಿ ಇರ್‌ಟಾಯಿತಿಪ್ಪ. 35 ಆನಗುಂಡ್, ನಿಂಗಡ ನಂಬಿಕೆ ನಿಂಗಳ ಇರ್‌ಟ್‌ಲ್ ಕಾಕಿಯಂಡ್ ಪೋಕತನೆಕೆ ನೋಟಿಯೊಳಿ 36 ನಿಂಗಡ ತಡೀಲ್ ಏದ್ ಬಾಗವು ಇರ್‌ಟ್‌ಲ್ ಇಲ್ಲತೆ, ಎಲ್ಲಾ ಬಾಗವು ಬೊಳಿಯಾಯಿತ್ಂಜತೇಂಗಿ, ಅಕ್ಕ ನೀನ್ ಪೂರ್ತಿಯಾಯಿತ್ ಬೊಳಿಲ್ ಇಪ್ಪಿಯ ಪಿಂಞ ಬೊಳ್‍ಚತ್‍ರ ಬೊಳಿ ನೀಡ ಮೇಲೆ ಪ್ರಕಾಶಿಚಿಡುವಾಂದ್ ಎಣ್ಣ್‌ಚಿ. ಯೇಸು ಫರಿಸಾಯಂಗಳ ತೀರ್ಪ್ ಮಾಡ್‍ವದ್ ( ಮತ್ತಾಯ 23.1–36 ; ಮಾರ್ಕ 12.38–40 ) 37 ಯೇಸು ಇನ್ನನೆ ತಕ್ಕ್ ಪರ್‌ದಂಡ್ ಇಪ್ಪಕ, ಒರ್ ಫರಿಸಾಯ ಯೇಸುನ ಅಂವೊಂಡ ಕೂಡೆ ಉಂಬಕ್ ಕಾಕ್‍ಚಿ. ಯೇಸು ಅನ್ನನೆ ಪೋಯಿತ್ ಕಾಲ್ ಮಡ್‌ಕಿತ್ ಅಳ್‌ತತ್. 38 ಯೇಸು ಉಂಬಕಿಂಜಿ ಮಿಂಞ ಕೈ ಕತ್ತತೆ ಉಂಬಕ್ ಅಳ್‌ತದ್‌ನ ಕಂಡಿತ್ ಆ ಫರಿಸಾಯಂಗ್ ಆಶ್ಚರ್ಯ ಆಚಿ. 39 ಪಿಂಞ ಒಡೆಯ ಅಂವೊಂಗ್: ಫರಿಸಾಯ ಎಣ್ಣುವ ನಿಂಗ ಕುಡಿಪ ಕಪ್ಪ್‌ರ ಪೊರಮೆ ಪಿಂಞ ಉಂಬ ತಳಿಯತ್‍ರ ಪೊರಮೆ ಚಾಯಿತೆ ಶುದ್ದವಾಯಿತ್ ಕತ್ತ್‌ವಿರ, ಆಚೇಂಗಿ ನಿಂಗಡ ಹೃದಯತ್‍ರ ಒಳ್‍ಲ್ ದುಂಬ ಬೋಂಡತ ಆಸೆ ಪಿಂಞ ಕೆಟ್ಟದ್ ದುಂಬಿತುಂಡ್ 40 ಮುಠಾಳಂಗಳೇ! ಪೊರ ಅಂಷತ್‍ನ ಮಾಡ್‍ನ ದೇವನೇ ಒಳ ಅಂಷತನೂ ಮಾಡಿತಲ್ಲ? 41 ನಿಂಗ ನಿಂಗಡದ್‍ೕಂದ್ ಗೇನಮಾಡಿಯಂಡುಳ್ಳದ್‍ನ ಗರೀಬಂಗಕ್ ಕೊಡಿ, ಅಕ್ಕ ಎಲ್ಲಾ ನಿಂಗಕ್ ಶುದ್ದ ಆಪ. 42 ಫರಿಸಾಯಂಗಳೇ, ನಿಂಗಕ್ ಅಯ್ಯೋ! ನಿಂಗ ಪುದಿನ ತೊಪ್ಪು, ಮರುಗ ಪಿಂಞ ಎಲ್ಲಾ ತರತ್‍ರ ಗಿಡ ಮೂಲಿಕೆಲ್‌ ಪತ್ತ್‌ಲ್ ಒರ್ ಪಾಲ್‍ನ ದೇವಕ್ ಕೊಡ್‍ಪಿರ, ಆಚೇಂಗಿ ದೇವಡ ಪ್ರೀತಿ ಪಿಂಞ ನ್ಯಾಯತ್‍ನ ಬುಡ್‍ವಿರ, ಇದ್‍ನ ಸಹ ನಿಂಗ ಮಾಡಂಡು ಅದ್‍ನ ಸಹ ನಿಂಗ ಬುಡ್‌ವಕ್ಕಾಗ. 43 ಫರಿಸಾಯಂಗಳೇ ನಿಂಗಕ್ ಅಯ್ಯೋ! ಸಬಾಮಂದಿರತ್‍ಲ್ ಸಬಾಮಂದಿರತ್ ಮುಕ್ಯಪಟ್ಟ ಕುರ್ಚಿ ನಿಂಗಕ್ ಬೋಂಡು, ಚತ್ತೆಲ್ ನಿಂಗಕ್ ಮರ್ಯಾದೆ ತಪ್ಪಯಿಂಗ ಬೋಂಡು. 44 ಕಪಟಿಯಾನ ನ್ಯಾಯಪ್ರಮಾಣತ್‍ರ ಉಪಾದ್ಯಂಗಳೇ, ಫರಿಸಾಯಂಗಳೇ ನಿಂಗಕ್ ಅಯ್ಯೋ! ನಿಂಗ ಒರ್ ಗುರ್‌ತ್ ಇಲ್ಲತ ಸಮಾದಿರನೆಕೆ ಉಳ್ಳಿರ, ಜನಕ್ ಅದ್ ಎಂತ್‍ೕಂದ್ ಗೊತ್ತಿಲ್ಲತೆ ಅದ್ಂಡಮೇಲೆ ನಡ್‍ಪ. 45 ನ್ಯಾಯಪ್ರಮಾಣತ್‍ರ ಶಾಸ್ತ್ರಿ ಒಬ್ಬ, ನೀನ್ ಇನ್ನನೆ ಎಣ್ಣಿತ್ ನಂಗಳ ಞಾಣ ಕೆಡ್‍ತಿಯಂಡುಳ್ಳಿಯಾಂದ್ ಕ್‍ೕಟತ್. 46 ಅದ್ಂಗ್ ಯೇಸು: ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಳೇ ನಿಂಗಕ್ ಅಯ್ಯೋ! ಜನ ಎಡ್‌ಪಕಯ್ಯತಚ್ಚಕ್ ಬಾರತ್‍ನ ಅಯಿಂಗಡ ಮೇಲೆ ಇಟ್ಟಿತುಳ್ಳಿರ, ಅಯಿಂಗ ಆ ಬಾರತ್‍ನ ಪೊರ್‍ಪಕ್ ನಿಂಗಡ ಬೆರತ್‌ನ ಸಹ ನೇತಿತ್ ಸಹಾಯ ಮಾಡುಲೆ. 47 ನಿಂಗಕ್ ಅಯ್ಯೋ! ನಿಂಗಡ ಪೂರ್ವಕಾಲತ್‌ರಯಿಂಗ ಕೊಂದ ಪ್ರವಾದಿಯಂಗಕ್ ನಿಂಗ ಬಲ್ಯ ಗೋರಿ ಕೆಟ್ಟುವಿರ. 48 ನಿಂಗಡ ಪೂರ್ವಕಾಲತ್‌ರಯಿಂಗ ಮಾಡ್‍ನ ಪಾಪಕ್ ನಿಂಗಳು ಕೂಡಿತುಳ್ಳಿರಾಂದ್ ನಿಂಗಳೇ ಸಾಕ್ಷಿ ಆಯಿತುಳ್ಳಿರ, ಎನ್ನನೆ ಎಣ್ಣ್‌ಚೇಂಗಿ ಅಯಿಂಗ ಕೊಂದಯಿಂಗಕ್ ನಿಂಗ ಬಲ್ಯ ಗೋರಿ ಕೆಟ್ಟಿತುಳ್ಳಿರ. 49 ಇದ್ಂಗಾಯಿತ್ ದೇವಡ ಜ್ಞಾನ ಎಣ್ಣ್‌ಚಿ: ನಾನ್ ದೇವಡ ಪ್ರವಾದಿಯಂಗಳ, ಅಪೊಸ್ತಲಂಗಳ ಅಯಿಂಗಡ ಪಕ್ಕ ಅಯಿಪಿ; ಅಯಿಂಗಡಲ್ಲಿ ಚೆನ್ನ ಜನಳ ಕೊಲ್ಲುವ, ಚೆನ್ನ ಜನಳ ತೊಂದರೆ ಮಾಡ್‌ವ; 50 ಆನಗುಂಡ್ ದೇವ ಬೂಲೋಕತ್‍ನ ಸೃಷ್ಟಿ ಮಾಡ್‍ನ ಕಾಲತ್ಂಜ ಆನ ಪ್ರವಾದಿಯಂಗಡ ಕೊಲೆಕ್, ಈ ಕಾಲತ್‍ರ ಸಂತಾನಕಾರಂಗಳಾನ ನಿಂಗಳೇ ಜವಾಬ್ದಾರಂಗ. 51 ಕೊಲೆಯಾನ ಹಾಬೇಲಂಡ ಚೋರೆಯಿಂಜ ಪುಡ್‌ಚಿತ್, ಬಲಿಪೀಠಕು ದೇವಾಲಯಕು ಮದ್ಯತ್‍ಲ್ ಕೊಲೆಯಾನ ಜಕರಿಯಂಡ ಚೋರೆಕತ್ತನೆ ಆನ ಪ್ರವಾದಿಯಂಗಳಾನ ಎಲ್ಲಾ ಕೊಲೆಕ್ ಕಂಡಿತವಾಯಿತ್ ನಿಂಗಕ್ ಶಿಕ್ಷೆ ಕ್‍ಟ್ಟುವ, ನೇರಾಯಿತು ಈ ಸಂತಾನತ್‍ರಯಿಂಗಳ ನ್ಯಾಯ ಕ್‍ೕಪಾಂದ್ ನಿಂಗಕ್ ಎಣ್ಣ್‌ವಿ. 52 ನ್ಯಾಯಪ್ರಮಾಣತ್‍ರ ಶಾಸ್ತ್ರಿಯಳೇ ನಿಂಗಕ್ ಅಯ್ಯೋ! ದೇವಡ ಜ್ಞಾನತ್‍ನ ಎಣ್ಣಿ ಕೊಡ್‍ಪ ಪಡಿರ ಬೀತ್‌ಕೈನ ನಿಂಗ ಬೆಚ್ಚಂಡುಳ್ಳಿರ, ನಿಂಗಳು ಅದ್ಂಡ ಒಳ್‍ಕ್ ಪೋಪುಲೆ, ಪೋಪಯಿಂಗಳ ಸಹ ನಿಂಗ ಪೋಪಕ್ ಬುಡುಲೆ. 53-54 ಯೇಸು ಅಲ್ಲಿಂಜ ಪೋನ ಪಿಂಞ ನ್ಯಾಯಪ್ರಮಾಣತ್‍ರ ಉಪಾದ್ಯಂಗ ಪಿಂಞ ಫರಿಸಾಯಂಗ ಯೇಸುರ ಮೇಲೆ ಜೋರಾಯಿತ್ ನಿಂದನೆಮಾಡ್‌ವಕ್, ನಾನಾ ತರತ್‍ರ ಪ್ರಶ್ನೆ ಕ್‍ೕಪಕ್, ಯೇಸುರ ಮೇಲೆ ಕುತ್ತ ಕಂಡ್‌ಪುಡಿಪಕ್, ಅಂವೊಂಡ ತಕ್ಕ್‌ಲ್ ಕೆಣಿಪಕಾಯಿತ್ ನೋಟಿಯಂಡ್ ಇಂಜತ್. |
© 2017, New Life Literature (NLL)