ಯೂದ ಒಳ್‍ದ್‍ನ ಕಾಗದ 1 - ಕೊಡವ ಬೈಬಲ್ವಂದನೆ 1 ಯೇಸು ಕ್ರಿಸ್ತಂಡ ಸೇವಕನಾನ ಯಾಕೋಬಂಡ ತಮ್ಮಣನಾನ ಯೂದ, ದೇವ ಕಾಕ್‍ನಯಿಂಗಳಾಯಿತ್, ಅಪ್ಪನಾನ ದೇವನ ಪ್ರೀತಿ ಮಾಡ್‌ವಯಿಂಗಳಾಯಿತ್, ಯೇಸು ಕ್ರಿಸ್ತಂಗಾಯಿತ್ ಬದ್ರವಾಯಿತ್ ಉಳ್ಳ ನಿಂಗಕ್ ಒಳ್‍ದ್‍ವ ಕಾಗದ ಇದ್. 2 ದೇವ ನಿಂಗಕ್ ಇಂಞು ದುಂಬ ಕರುಣೆಯು ಸಮಾದಾನವು ಪ್ರೀತಿಯು ತರಡ್. ಕಳ್ಳ ಬೋದನೆ ಮಾಡ್‌ವಯಿಂಗಡ ಮೇಲೆ ದೇವಡ ತೀರ್ಪ್ 3 ನಾಡ ಪ್ರೀತಿರ ಜನಳೇ, ನಂಗಕೆಲ್ಲಾರ್‌ಕು ಕ್‍ಟ್ಟ್‌ನ ರಕ್ಷಣೆರ ವಿಷಯತ್‍ನ ನೇರಾಯಿತ್ ಒಳ್‍ದ್‍ವಕ್ ಇಂಜ, ಆಚೇಂಗಿ ಇಕ್ಕ, ದೇವ ಅಂವೊಂಡ ಮಕ್ಕಳಾಯಿತ್ ಮಾಡ್‍ನಯಿಂಗಕ್ ಒಮ್ಮಕೆ ಒಪ್ಪ್‌ಚಿಟ್ಟ ನಂಬಿಕೆಕಾಯಿತ್ ನಿಂಗ ದೈರ್ಯತ್‍ಲ್ ಪೊರಾಡಂಡೂಂದ್ ಎಚ್ಚರ ಮಾಡಿತ್ ಒಳ್‍ದ್‍ವಕ್ ಅವಸ್ಯ ಉಂಡ್‍ೕಂದ್ ನಾಕ್ ತೋಂದ್‍ಚಿ. 4 ಎನ್ನಂಗೆಣ್ಣ್‌ಚೇಂಗಿ, ದೇವಡ ಮೇಲೆ ದಂಗೆ ಮಾಡ್‌ವ ಚೆನ್ನ ಜನ ನಿಂಗಕ್ ಗೊತ್ತಿಲ್ಲತೆ ನಿಂಗಡ ಸಬೇಲ್ ನುಗ್ಗಿತ್, ದೇವಡ ಕೃಪೆ ನಂಗಳ ಕಾಮಾಬಿಲಾಷೆ ಪಾಪ ಮಾಡ್‌ವಕ್ ಅನುಮತಿ ಕೊಡ್‍ತಿತುಂಡ್‍ೕಂದ್ ಎಣ್ಣಿಯಂಡ್, ಯೇಸು ಕ್ರಿಸ್ತ ಒಬ್ಬನೇ ನಂಗಡ ಮೇಲೆ ಎಲ್ಲಾ ಅದಿಕಾರ ಉಳ್ಳ ಒಡೆಯಾಂದ್ ಉಳ್ಳಾನ ಒತ್ತಂಡಿಲ್ಲೆ. ಅಯಿಂಗಡ ತೀರ್ಪ್‌ನ ಪಂಡೇ ದೇವ ಒಳ್‍ದಿ ಬೆಚ್ಚಿತುಂಡ್. 5 ಆನಗುಂಡ್, ನಿಂಗಕ್ ಇದೆಲ್ಲ ಗೊತ್ತ್ಂಜತೇಂಗಿಯು, ನಿಂಗ ಅದ್‍ನ ಗೇನ ಬೆಕ್ಕಂಡೂಂದ್ ಪುನಃ ನಾನ್ ನಿಂಗಕ್ ಎಣ್ಣ್‌ವಿ. ಅದ್ ಎಂತ ಎಣ್ಣ್‌ಚೇಂಗಿ: ಒಡೆಯ ಇಸ್ರಾಯೇಲ್ ಜನತ್‍ನ ಐಗುಪ್ತ ದೇಶತ್ಂಜ ಪೊರಮೆ ಕಾಕ್‍ವಂಜಿ ಕಾಪಾಡ್‍ಚಿ. ಆಚೇಂಗಿ, ಅಂವೊಂಡ ಮೇಲೆ ನಂಬಿಕೆ ಬೆಕ್ಕತಯಿಂಗಳ ಬಯ್ಯ ಪಾಳ್ ಮಾಡ್‍ಚಿ. 6 ಅಯಿಂಗಯಿಂಗಡ ಅದಿಕಾರತ್‍ರ ಸ್ತಾನತ್‍ನ ಕಾಪಾಡತೆ, ಅಯಿಂಗಕ್ ದೇವ ತಂದ ಜಾಗತ್‍ನ ಬುಟ್ಟಿತ್ ಪೋನ ಪರಲೋಕತ್‍ಲ್ ಇಂಜ ಚೆನ್ನ ದೂತಂಗಳ, ಅಂವೊ ಮಹಾ ದಿವಸತ್‍ರ ತೀರ್ಪ್‌ಕಾಯಿತ್ ಅಯಿಂಗಳ ನಿತ್ಯ ಸರ್ಪಣಿಲ್ ಕೆಟ್ಟಿತ್ ಇರ್‌ಟ್‌ಲ್ ಬೆಚ್ಚಿತ್ ಉಂಡ್. 7 ಅನ್ನನೆ ಸೊದೋಮ್ ಗೊಮೋರ ಪಟ್ಟಣತ್‍ರ ಜನ ಪಿಂಞ ಅದ್ಂಡ ಸುತ್ತ್‌ಮುತ್ತ್‌ಲ್ ಇಂಜ ಪಟ್ಟಣತ್‍ರ ಜನಳು ಅಯಿಂಗಡನೆಕೆ ಲೈಂಗಿಕ ಪಾಪತ್‍ನ ಮಾಡಿತ್, ಮನುಷ್ಯಂಗಡ ಸರಿಯಾನ ಆಸೇನ ಅಯಿಂಗಡ ಆಸೆರನೆಕೆ ತಿರಿಕಿತ್ ಪೋಚಿ. ದೇವ ಈ ಪಟ್ಟಣತ್‍ನ ತಿತ್ತ್‌ಕ್ ಇಟ್ಟಿತ್ ನಾಶ ಮಾಡ್‍ಚಿ. ಅನ್ನನೆ ಈಂಗ ದೇವ ತಪ್ಪ ನಿತ್ಯ ತಿತ್ತ್‌ರ ದಂಡೆನೆಕ್ ಉದಾರಣೆಯಾಯಿತ್ ಉಂಡ್. 8 ಅದೇ ತರತ್‍ಲ್ ದೇವಡ ಮೇಲೆ ಬಕ್ತಿ ಇಲ್ಲತ ಜನಳು, ದೇವ ಅಯಿಂಗಕ್ ಸ್ವಪ್ನತ್‌ಲ್ ಅನ್ನನೆ ಮಾಡ್‌ವಕ್ ಅದಿಕಾರ ತಾತ್‍ೕಂದ್ ಎಣ್ಣಿಯಂಡ್, ಅಯಿಂಗಡ ಶರೀರತ್‌ನ ಅಶುದ್ದ ಮಾಡಿಯಂಡ್, ದೇವಡ ಅದಿಕಾರ ಅಯಿಂಗಡ ಮೇಲೆ ಇಲ್ಲತನೆಕೆ ಮಾಡಿಯಂಡ್, ದೇವದೂತಂಗಡ ಅದಿಕಾರತ್‍ನ ಅಲ್ಲಗೆಳೆಯುವ. 9 ಆಚೇಂಗಿ ಮಹಾ ದೇವದೂತನಾನ ಮಿಕಾಯೇಲ ಮೋಶೇರ ಚಾವ್ ತಡೀರ ವಿಷಯತ್‍ಲ್ ತರ್ಕ ಮಾಡ್‌ವಕಾಪಕ, ಸೈತಾನನ ದೂಷಣೆ ಮಾಡತೆ, ಒಡೆಯ ನಿನ್ನ ಗದರಿಚಿಡಡ್‍ೕಂದ್ ಎಣ್ಣ್‌ಚಿ. 10 ಆಚೇಂಗಿ ನಿಂಗಡ ಮದ್ಯತ್‍ಲ್ ಕಳ್ಳ ಬೋದನೆ ಮಾಡಿಯಂಡುಳ್ಳ ಈ ಜನ ಅಯಿಂಗಕ್ ಅರ್ಥ ಆಕತ ವಿಷಯತ್‍ನ ಎಲ್ಲಾ ಕೆಟ್ಟದಾಯಿತ್ ತಕ್ಕ್ ಪರಿವ. ಪಿಂಞ ಬುದ್ದಿ ಇಲ್ಲತ ಪ್ರಾಣಿಯರನೆಕೆ ಅಯಿಂಗಕ್ ಗೊತ್ತುಳ್ಳ ವಿಷಯತ್‍ನ ಸ್ವಾಬಾವಿಕವಾಯಿತ್ ಕಳಿಚಿತ್, ಅದ್‍ಯಿಂಜ ಅಯಿಂಗಯಿಂಗಳೇ ಪಾಳ್ ಮಾಡಿಯೊವ. 11 ಕಳ್ಳ ಬೋದನೆ ಮಾಡ್‌ವಯಿಂಗಕ್ ಅಯ್ಯೋ! ಈಂಗ ತಮ್ಮಣನ ಕೊಂದ ಕಾಯಿನ ಎಣ್ಣ್‌ವಂವೊಂಡ ಬಟ್ಟೇಲ್ ನಡ್ಂದಂಡುಂಡ್. ಪಣಕಾಯಿತ್ ದೇವಡ ಮಕ್ಕಳ ಬಿಳಾಮ ಎಣ್ಣ್‌ವಂವೊ ಮೋಸ ಮಾಡ್‍ನನೆಕೆ ಈಂಗಳು ದುಡ್‍ಕಿಯಂಡ್ ಓಡ್‍ವ. ಪಿಂಞ ಕೋರಹ ಎಣ್ಣ್‌ವಂವೊ ಎದ್‍ರ್ ತಕ್ಕ್ ಪರ್ಂದಿತ್ ಎನ್ನನೆ ಪಾಳಾಯಿ ಪೋಚೋ, ಅನ್ನನೆ ಈಂಗಳು ಪಾಳಾಯಿ ಪೋಪ. 12 ಈಂಗ ನಿಂಗಡ ಕೂಡೆ ಅಳ್‌ತಂಡ್ ದೇವಡ ಗದ್ದಾಳತ್‍ಲ್ ತಿಂಬಕ ಅದ್ಂಡ ಪವಿತ್ರತ್‍ನ ಅಶುದ್ದ ಮಾಡಿತ್, ಞಾಣ ಇಲ್ಲತ ಕೊರಿ ಕಾಪಂವೊಂಡನೆಕೆ ಅಯಿಂಗಳ ಮಾತ್ರ ನೋಟಿಯೊವ. ಅಯಿಂಗ ನೆಲಕ್ ಮಳೆ ಕೊಡ್‍ಕತ ಬೀಜುವ ಮೋಡತ್‍ರನೆಕೆ ಪಿಂಞ ಫಲ ಕೊಡ್‍ಕತ ದಂಡ್ ಕುರಿ ಚತ್ತಿತ್ ಬೇರೋಡೆ ಒಣಂಗಿ ಪೋನ ಮರತ್‌ರನೆಕೆ ಆಯಿತುಂಡ್. 13 ಞಾಣ ಆಪನೆಕೆ ಕೆಟ್ಟ ಕಾರ್ಯ ಮಾಡ್‌ವ ಅಯಿಂಗ, ಕಡಲ್‍ರ ಅಲೆ, ಆಲೆ ಈಲೆ ಪೋಯಿತ್ ನೊರೆನ ತಳ್ಳ್‌ವನೆಕೆ ಪಿಂಞ ಎಲ್ಲಿ ಪೋಕಂಡೂಂದ್ ಗೊತ್ತಿಲ್ಲತೆ ಬಟ್ಟೆ ತಪ್ಪಿ ಪೋಯಂಡುಳ್ಳ ನಕ್ಷತ್ರನೆಕೆ ಉಂಡ್. ಈಂಗಕಾಯಿತ್ ಸದಾ ಇರ್‌ಟೇ ನಿತ್ಯವಾಯಿತ್ ಬೆಚ್ಚಿತುಂಡ್. 14-15 ಆದಾಮಯಿಂಜ ಏಳನೆ ವಂಶಾವಳಿಲ್ ಬಂದ ಹನೋಕ ಎಣ್ಣ್‌ವಂವೊ ಈಂಗಡ ವಿಷಯತ್‍ಲ್: ಎಲ್ಲಾರ್‌ಕು ನ್ಯಾಯತೀರ್ಪ್ ಕೊಡ್‍ಪಕಾಯಿತು, ದೇವಡ ಮೇಲೆ ಬಕ್ತಿ ಇಲ್ಲತಯಿಂಗ ಮಾಡ್‍ನ ಎಲ್ಲಾ ಬಕ್ತಿಯಿಲ್ಲತ ಕಾರ್ಯಕು, ಪಿಂಞ ಬಕ್ತಿಯಿಲ್ಲತ ಪಾಪಿಯಂಗ ಅಂವೊಂಗ್ ವಿರೋದವಾಯಿತ್ ಎಣ್ಣ್‌ನ ಎಲ್ಲಾ ಕಠಿಣ ತಕ್ಕ್‌ಕೂ ಶಿಕ್ಷೆ ಕೊಡ್‍ಪಕಾಯಿತ್ ಒಡೆಯ ಆಯಿರಾಯಿರ ಪವಿತ್ರ ದೂತಂಗಡ ಕೂಡೆ ಬಪ್ಪಾಂದ್ ಮಿಂಞಲೇ ಎಣ್ಣಿತ್ಂಜತ್. 16 ಈಂಗ ಗೊಣಗುವಯಿಂಗಳು, ಕುತ್ತಪರಿಯುವಯಿಂಗಳು, ತಂಗಡ ತಂಗಡ ಕೆಟ್ಟ ಆಸೆನೆ ಪೂರ್ತಿ ಮಾಡ್‌ವಯಿಂಗಳಾಯಿತುಂಡ್. ಅಯಿಂಗ ಅಯಿಂಗಳ ಹೊಗಳ್‍ಚಿಟ್ಟಂಡ್, ಅಯಿಂಗಕ್ ಬೋಂಡಿಯಾನದ್ ಕ್‍ಟ್ಟ್‌ವಕಾಯಿತ್ ಬೋರೆಯಿಂಗಳ ಕೊಂಡಾಡುವ. ಕಡೇಕತ್ತನೆ ನಂಬಿಕಸ್ತನಾಯಿತಿಪ್ಪದ್ 17 ಆಚೇಂಗಿ ನಾಡ ಕುಶೀರ ಜನಳೇ, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಅಪೊಸ್ತಲಂಗ, ಎಂತ ಬಪ್ಪಾಂದ್ ಮಿಂಞಲೇ ಎಣ್ಣ್‌ನ ತಕ್ಕ್‌ನ ಗೇನ ಬೆಚ್ಚೊಳಿ. 18 ಕಡೆ ಕಾಲತ್‍ಲ್ ಬಕ್ತಿಯಿಲ್ಲತ ತಂಗಡ ಸ್ವಂತ ಆಸೇನ ಪೂರೈಚಿಡುವ ಏಜುವಯಿಂಗ ಬಪ್ಪಾಂದ್ ಅಯಿಂಗ ನಿಂಗಕ್ ಎಣ್ಣಿತ್ಂಜತಲ್ಲ. 19 ಈಂಗ ನಿಂಗಡಡೆಲ್ ಉಳ್ಳ ಜನಳ ಬೋರೆ ಬೋರೆ ಮಾಡಿತ್, ಅಯಿಂಗ ಅಯಿಂಗಡ ಸ್ವಂತ ಬುದ್ದಿರನೆಕೆ ಅಯಿಂಗಳ ನಡ್‍ತಿಯಂಡ್ ಪೋಯಂಡ್ ಪಿಂಞ ಪವಿತ್ರಾತ್ಮ ಇಲ್ಲತಯಿಂಗಳಾಯಿತ್ ಇಪ್ಪ. 20 ಆಚೇಂಗಿ ನಾಡ ಪ್ರೀತಿರ ಜನಳೇ, ನಿಂಗ ನಿಂಗಡ ಮಹಾ ಪವಿತ್ರವಾನ ನಂಬಿಕೇರ ಮೇಲೆ ನಿಂಗಳ ದೃಡ ಮಾಡಿಯಂಡ್, ಪವಿತ್ರ ಆತ್ಮತ್‍ಲ್ ಪ್ರಾರ್ಥನೆ ಮಾಡಿಯಂಡ್, 21 ದೇವಡ ಪ್ರೀತಿಯಿಂಜ ನಿಂಗಳ ಕಾಪಾಡಿಯಂಡ್, ನಿತ್ಯ ಜೀವಕ್ ನಿಂಗಳ ಕೊಂಡ್ ಬಪ್ಪಕಾಯಿತ್, ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಕರುಣೆಕ್ ಪಾರಕಾತಂಡಿರಿ. 22 ಅದಲ್ಲತೆ, ನಂಬಿಕೇರ ವಿಷಯತ್‍ಲ್ ಸಂಶಯ ಉಳ್ಳಯಿಂಗಕ್ ಕರುಣೆ ಕಾಟಿ. 23 ಚೆನ್ನ ಜನತ್‍ನ ತಿತ್ತ್‌ರ ನ್ಯಾಯ ತೀರ್ಪ್‌ಯಿಂಜ ಬಲ್‍ಚಿತ್ ಕಾಪಾಡಿ. ಇಂಞು ಚೆನ್ನ ಜನಕ್ ಕರುಣೆ ಕಾಟಿ. ಆಚೇಂಗಿ, ಅನ್ನನೆ ಮಾಡ್‌ವಕ, ಅಯಿಂಗ ಮಾಡ್‌ವ ಕ್‍ೕಡಾನ ಪಾಪತ್‍ಲ್ ನಿಂಗಳು ಬೂವತನೆಕೆ ಇಪ್ಪಕ್ ದುಂಬ ಬಯತ್‍ಲ್ ಮಾಡಂಡು. ಪ್ರಾರ್ಥನೆ ಪಿಂಞ ತುದಿ 24 ತಾಂಡ ಮಹಿಮೆಯುಳ್ಳ ಪ್ರಸನ್ನತ್‌ಲ್ ಬಲ್ಯ ಕುಶೀಲ್ ಒರ್ ತಪ್ಪು ಇಲ್ಲತಯಿಂಗಳಾಯಿತ್ ನಿಂಗಳ ಬೂವತನೆಕೆ ನಿಪ್ಪ್‌ಚಿಡ್‍ವಕ್ ಶಕ್ತಿಯುಳ್ಳಂವೊನು, 25 ನಂಗಡ ರಕ್ಷಕನಾನ ದೇವಕ್ ನಂಗಡ ಒಡೆಯನಾನ ಯೇಸು ಕ್ರಿಸ್ತಂಡ ಮೂಲಕ ಮಹಿಮೆ, ಮಹತ್ವ, ಶಕ್ತಿ ಪಿಂಞ ಅದಿಕಾರವೆಲ್ಲ ಆದಿಯಿಂಜಲೆ, ಇಕ್ಕಲು, ಎಕ್ಕಾಲು ಇರಡ್. ಆಮೆನ್. |
© 2017, New Life Literature (NLL)