ಯೋಹಾನ 21 - ಕೊಡವ ಬೈಬಲ್ಯೇಸು ತಾಂಡ ಏಳ್ ಶಿಷ್ಯಂಗಕ್ ಕಾಂಬ್‍ಚಿಟ್ಟದ್ 1 ಇಂಞು ಚೆನ್ನ ದಿವಸ ಆನ ಪಿಂಞ, ಯೇಸು ತಿಬೇರಿಯ ಕೆರೆರ ಪಕ್ಕ ಅಯಿಂಗಕ್ ಪುನಃ ಅಂವೊನ ಕಾಂಬ್‌ಚಿಟ್ಟಂಡತ್. 2 ಅದ್ ಎನ್ನನೆ ಎಣ್ಣ್‌ಚೇಂಗಿ: ಸೀಮೋನ ಪೇತ್ರ, ದಿದುಮಾಂದ್ ಜನ ಕಾಕುವ ತೋಮ, ಗಲಿಲಾಯತ್‍ರ ಕಾನಾ ಊರ್‌ರ ನತಾನಯೇಲ, ಜೆಬೆದಾಯಂಡ ದಂಡ್ ಮೋನಿಯಂಗ, ಪಿಂಞ ಯೇಸುರ ಇಂಞು ದಂಡ್ ಶಿಷ್ಯಂಗ ಕೂಡಿ ಬಂದಿತ್ಂಜತ್. 3 ಆ ಸಮಯತ್‍ಲ್, ಸೀಮೋನ ಪೇತ್ರ: ನಾನ್ ಮೀನ್ ಪುಡಿಪಕ್ ಪೋಪೀಂದ್ ಎಣ್ಣ್‌ಚಿ. ಅಕ್ಕ ನಂಗಳು ನೀಡ ಕೂಡೆ ಬಪ್ಪಾಂದ್ ಎಣ್ಣ್‌ಚಿ. ಅನ್ನನೆ ಅಯಿಂಗೆಲ್ಲಾ, ದೋಣಿಲ್ ಪೋಚಿ. ಬಯಿಟ್ ಆಕಣೆಕ್ ಅಯಿಂಗಕ್ ಒರ್ ಮೀನು ಕ್‍ಟ್ಟಿತ್‌ಲ್ಲೆ. 4 ಪೊಲಾಕ ಯೇಸು ಕರೆಲ್ ನಿಂದಂಡಿಂಜತ್. ಆಚೇಂಗಿಯು ಶಿಷ್ಯಂಗಕ್ ಅಂವೊ ಯೇಸೂಂದ್ ಗೊತ್ತಾಯಿತ್ಂಜ್‍ತ್‌ಲ್ಲೆ. 5 ಯೇಸು ಅಯಿಂಗಳ ನೋಟಿತ್: ಮಕ್ಕಳೇ! ಮೀನ್ ಒಂದು ಕ್‍ಟ್ಟಿತ್‌ಲ್ಲೆಯಾಂದ್ ಕ್‍ೕಟತ್. ಅಂವೊಂಗ್ ಅಯಿಂಗ: ಒಂದು ಕ್‌ಟ್ಟಿತ್‌ಲ್ಲೇಂದ್ ಎಣ್ಣ್‌ಚಿ. 6 ಅಯಿಂಗಕ್ ಅಂವೊ: ನಿಂಗಡ ಬಲೆನ ನಿಂಗಡ ದೋಣಿರ ಬಲ್‌ತೆ ಬರಿಕ್ ಇಡಿ, ಅಕ್ಕ ನಿಂಗಕ್ ಮೀನ್ ಕ್‌ಟ್ಟುವಾಂದ್ ಯೇಸು ಎಣ್ಣ್‌ಚಿ. ಅಂವೊ ಎಣ್ಣ್‌ನನೆಕೆ ಅಯಿಂಗ ಬಲೆನ ಬೀಜಿತ್, ದುಂಬ ಮೀನ್ ಚಿಕ್ಕ್‌ನಗುಂಡ್, ಅಯಿಂಗಡ ಬಲೆನ ಬಲಿಪಕ್ ಕಯಿಂಜಿತ್‌ಲ್ಲೆ. 7 ಅಕ್ಕ, ಯೇಸುರ ಮೇಲೆ ದುಂಬ ಪ್ರೀತಿ ಬೆಚ್ಚಿತ್ಂಜ ಶಿಷ್ಯ ಪೇತ್ರನ ನೋಟಿತ್, ಅಂವೊ ಒಡೆಯಾಂದ್ ಎಣ್ಣ್‌ಚಿ. ಆ ಶಿಷ್ಯ ಅದ್ ಒಡೆಯಾಂದ್ ಎಣ್ಣುವಾನ ಕ್‍ೕಪಕ, ಪೇತ್ರ ಅಂವೊಂಡ ಪೊರಮೆ ಇಡ್‌ವ ಬಟ್ಟೇನ ಇಟ್ಟಂಡ್ ನೀರ್‌ಕ್ ಪಾರ್‌ಚಿ. (ಎನ್ನಂಗೆಣ್ಣ್‌ಚೇಂಗಿ, ಕೆಲಸ ಮಾಡ್‌ವಕಾಯಿತ್ ಅಂವೊ ಬಟ್ಟೆ ಇಟ್ಟಂಡಿಲ್ಲೆ). 8 ಬೋರೆ ಶಿಷ್ಯಂಗ ಕೆರೆಕ್ ಇಂಞು ಮುನ್ನೂರ್ ಅಡಿ ದೂರತ್‍ಲ್ ಇಂಜತ್, ಆನಗುಂಡ್ ದೋಣಿಲ್ ಇಂಜಂಡೇ ಮೀನ್‌ರ ಬಲೆನ ಕರೆಕ್ ಬಲ್‍ಚಂಡ್ ಬಾತ್. 9 ಅಯಿಂಗ ಕರೆಲ್ ಇಳಿಯುವಕ, ಮಸಿಕಂಡೆರ ತಿತ್ತ್ ಇಟ್ಟಿತುಳ್ಳದ್‍ನ, ಆಂಡ ಮೇಲೆ ಮೀನ್ ಪಿಂಞ ಒಟ್ಟಿ ಇಂಜಾನ ಕಂಡತ್. 10 ಯೇಸು ಅಯಿಂಗಳ ನೋಟಿತ್: ನಿಂಗ ಇಕ್ಕ ಪುಡ್‌ಚ ಮೀನ್‌ನ ಕೊಂಡ್‌ಬಾರೀಂದ್ ಎಣ್ಣ್‌ಚಿ. 11 ಅಕ್ಕ, ಸೀಮೋನ ಪೇತ್ರ ನೂಯಿಟೈಂಬತ್ ಮೂಂದ್ ಬಲ್ಯ ಮೀನ್ ಇಂಜ ಬಲೆನ ಕರೆಕ್ ಬಲ್‍ಚಂಡ್ ಬಾತ್. ಇಚ್ಚಕ್ ಮೀನ್ ಇಂಜತೇಂಗಿಯು ಸಹ ಆ ಬಲೆ ಕೀತಿ ಪೋಯಿತ್‌ಲ್ಲೆ. 12 ಪಿಂಞ ಯೇಸು ಅಯಿಂಗಳ ಕಾಕಿತ್: ಬಾರಿ, ನಿಂಗೆಲ್ಲಾರು ಊಟ ಮಾಡೀಂದ್ ಎಣ್ಣ್‌ಚಿ. ಅಂವೊ ಒಡೆಯಾಂದ್ ಅಯಿಂಗಕ್ ಗೊತ್ತಾನಗುಂಡ್, ನೀನ್ ದಾರ್‍ೕಂದ್ ಕ್‍ೕಪಕ್ ಒಬ್ಬಂಗು ದೈರ್ಯ ಇಂಜಿತ್‌ಲ್ಲೆ. 13 ಅಕ್ಕ ಯೇಸು: ಒಟ್ಟಿನ ಪಿಂಞ ಮೀನ್‌ನ ಎಡ್‍ತಿತ್ ಅಯಿಂಗಕ್ ಕೊಡ್‍ತತ್. 14 ಯೇಸು ಚತ್ತಿತ್ ಎದ್ದ ಪಿಂಞ ಶಿಷ್ಯಂಗಕ್ ಅಂವೊನ ಕಾಂಬ್‍ಚಿಡುವದ್ ಇದ್ ಮೂಂದನೆ ಕುರಿ. ಯೇಸು ಪಿಂಞ ಪೇತ್ರ 15 ಅಯಿಂಗೆಲ್ಲಾ ಉಂಡಿತಾನ ಪಿಂಞ ಯೇಸು ಸೀಮೋನ ಪೇತ್ರನ ನೋಟಿತ್: ಯೋಹಾನಂಡ ಮೋಂವೊನಾನ ಸೀಮೋನನೇ, ಈಂಗ ಎಲ್ಲಾಕಿಂಜ ನೀನ್ ನಾಡ ಮೇಲೆ ದುಂಬ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಕ್‍ೕಟತ್. ಅಂವೊಂಗ್ ಪೇತ್ರ: ಅಕ್ಕು ಒಡೆಯನೇ, ನಾನ್ ಪ್ರೀತಿಚಿಡ್‌ವೀಂದ್ ನೀಕ್ ಗೊತ್ತುಂಡ್‍ೕಂದ್ ಎಣ್ಣ್‌ಚಿ. ಯೇಸು ಅಂವೊಂಗ್: ನೀನ್ ನಾಡ ಕೊರಿಕುಟ್ಟಿಯಳ ಮೇಯಿಸೂಂದ್ ಎಣ್ಣ್‌ಚಿ. 16 ದಂಡನೆ ಕುರಿ ಯೇಸು ಅಂವೊನ ನೋಟಿತ್: ಯೋಹಾನಂಡ ಮೋಂವೊನಾನ ಸೀಮೋನನೇ, ನೀನ್ ನಾಡ ಮೇಲೆ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಕ್‍ೕಟತ್. ಅದ್ಂಗ್ ಅಂವೊ: ಅಕ್ಕು ದೇವ, ನಾನ್ ಪ್ರೀತಿಚಿಡ್‌ವೀಂದ್ ನೀಕ್ ಗೊತ್ತುಂಡ್‍ೕಂದ್ ಎಣ್ಣ್‌ಚಿ. ಅಕ್ಕ ಯೇಸು: ನಾಡ ಕೊರಿಯಳ ನೀನ್ ಮೇಯಿಸೂಂದ್ ಎಣ್ಣ್‌ಚಿ. 17 ಮೂಂದನೆ ಕುರಿ ಯೇಸು ಅಂವೊನ ನೋಟಿತ್: ಯೋಹಾನಂಡ ಮೋಂವೊನಾನ ಸೀಮೋನನೇ, ನೀನ್ ನಾಡ ಮೇಲೆ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಕ್‍ೕಟತ್. ನೀನ್ ನಾಡ ಮೇಲೆ ಪ್ರೀತಿ ಬೆಚ್ಚಿತುಳ್ಳಿಯಾಂದ್ ಮೂಂದನೆ ಕುರಿ ಯೇಸು ಕ್‍ೕಪಕ, ಪೇತ್ರಂಗ್ ದುಂಬ ಬೇಜಾರ್ ಆಚಿ, ಅಕ್ಕ ಅಂವೊ ಒಡೆಯನೇ: ನೀಕ್ ಎಲ್ಲಾನ ಗೊತ್ತುಂಡ್, ನಾಕ್ ನೀಡ ಮೇಲೆ ಉಳ್ಳ ಪ್ರೀತಿಯು ಗೊತ್ತುಂಡ್‍ೕಂದ್ ಎಣ್ಣ್‌ಚಿ. ಅಂವೊಂಗ್ ಯೇಸು: ನಾಡ ಕೊರಿಯಳ ಮೇಯಿಸೂಂದ್ ಎಣ್ಣ್‌ಚಿ. 18 ನೀನ್ ಚೆರಿಯಂವೊನಾಯಿತ್‌ಪ್ಪಕ ನೀನ್ ನೀಡ ಬಟ್ಟೇನೆ ಇಟ್ಟಂಡ್, ನೀಕ್ ಕುಶಿಯುಳ್ಳ ಜಾಗಕ್ ನೀನ್ ಪೋಪಕಿಂಜತ್. ಆಚೇಂಗಿ, ನೀಕ್ ವಯಸಾಪಕ; ನೀನ್ ನೀಡ ಕೈಯಿನ ನೀಟ್‌ವಿಯಾ, ಇಂಞೊಬ್ಬ ನೀಕ್ ನೀಡ ಬಟ್ಟೇನ ಇಟ್ಟಿತ್ ನೀಕ್ ಕುಶಿ ಇಲ್ಲತ ಜಾಗಕ್ ನಿನ್ನ ಕಾಕಿಯಂಡ್ ಪೋಪಾಂದ್ ನೇರಾಯಿತು ನೇರಾಯಿತು ನಾನ್ ನೀಕ್ ಎಣ್ಣುವೀಂದ್ ಯೇಸು ಎಣ್ಣ್‌ಚಿ. 19 ಪೇತ್ರ ಏದ್ ತರತ್‍ಲ್ ಚಾವಾ, ಎನ್ನನೆ ದೇವಡ ಪೆದತ್‍ನ ಮಹಿಮೆ ಪಡ್‌ತ್‌ವಾಂದ್ ಗೊತ್ತಾಪಕಾಯಿತ್ ಯೇಸು ಇನ್ನನೆ ಎಣ್ಣ್‌ಚಿ. ಪಿಂಞ ಅಂವೊನ ನೋಟಿತ್: ನಾಡ ಬಯ್ಯಕ್ ಬಾಂದ್ ಹುಕುಮ್ ಕೊಡ್‍ತತ್. ಯೇಸು ಪಿಂಞ ಪ್ರೀತಿರ ಶಿಷ್ಯ 20 ಪೇತ್ರ ತಿರಿತ್ ನೋಟ್‍ವಕ, ಯೇಸುರ ಮೇಲೆ ದುಂಬ ಪ್ರೀತಿ ಬೆಚ್ಚಿತ್ಂಜ, ಆಕೀರ್ ಗದ್ದಾಳತ್‍ಲ್ ಯೇಸುರ ಪಕ್ಕ ಅಳ್‌ತಂಡ್, ದೇವಾ ನಿನ್ನ ಪುಡ್‌ಚಿತ್ ಕೊಡ್‍ಪ ಶಿಷ್ಯ ದಾರ್‍ೕಂದ್ ಕ್‍ೕಟ ಶಿಷ್ಯ ಬಪ್ಪಾನ ಕಂಡತ್. 21 ಪೇತ್ರ ಅಂವೊನ ನೋಟ್‍ವಕ: ಇಂವೊಂಡ ವಿಷಯ ಎಂತ್‍ೕಂದ್ ಯೇಸುನ ಕ್‍ೕಟತ್. 22 ಯೇಸು ಪೇತ್ರಂಗ್: ನಾನ್ ಪುನಃ ಬಪ್ಪಕತ್ತನೆ ಇಂವೊ ಬದ್‌ಕಿತ್ ಇಪ್ಪಕ್ ನಾಕ್ ಕುಶಿ ಉಂಡೇಂಗಿ, ನೀಕ್ ಎಂತ? ನೀನ್ ನಾಡ ಬಯ್ಯ ಬಾಂದ್ ಯೇಸು ಎಣ್ಣ್‌ಚಿ. 23 ಯೇಸು ಇನ್ನನೆ ಎಣ್ಣ್‌ನ ವಿಷಯ ಎಲ್ಲಾರ್‌ಕು ಪಬ್ಬ್‌ವಕ, ಈ ಶಿಷ್ಯ ಚಾವ್‍ಲೇಂದ್ ಯೇಸುನ ನಂಬ್‍ನ ಜನ ಗೇನ ಮಾಡ್‍ಚಿ. ಆಚೇಂಗಿ, ಯೇಸು ಈ ಶಿಷ್ಯ ಚಾವ್‍ಲೇಂದ್ ಎಣ್ಣಿತ್‌ಲ್ಲೆ, ನಾನ್ ಬಪ್ಪಕತ್ತನೆ ಇಂವೊ ಬದ್‌ಕಿತ್ ಇಪ್ಪಕ್ ನಾಕ್ ಕುಶಿ ಉಂಡೇಂಗಿ, ನೀಕ್ ಎಂ‍ತಾಂದ್ ಮಾತ್ರ ಎಣ್ಣಿತ್ಂಜತ್. 24 ಈ ಶಿಷ್ಯನೇ, ಇದ್‍ನೆಲ್ಲಾ ಸಾಕ್ಷಿ ಕೊಡ್‌ತಂಡ್, ಇದ್‍ನೆಲ್ಲಾ ಒಳ್‍ದಿಯತ್. ಅಂವೊ ಒಳ್‍ದ್‍ನೆದೆಲ್ಲಾ ಸತ್ಯಾಂದ್ ನಂಗಕ್ ಗೊತ್ತುಂಡ್. 25 ಯೇಸು ಇಂಞು ದುಂಬ ವಿಷಯ ಮಾಡಿತ್ಂಜತ್, ಅದ್‍ನೆಲ್ಲಾ ಒಂದೊಂದಾಯಿತ್ ಒಳ್‍ದ್‍ವಕ್ ಪೋಚೇಂಗಿ, ಈ ಲೋಕತ್‍ಲ್ ಅಂವೊಂಡ ವಿಷಯತ್‍ನ ಒಳ್‍ದ್‍ವ ಪುಸ್ತಕತ್‍ನ ಬೆಪ್ಪಕ್ ಜಾಗ ಇಪ್ಪುಲೇಂದ್ ನಾನ್ ಗೇನ ಮಾಡ್‌ವಿ. ಆಮೆನ್. |
© 2017, New Life Literature (NLL)