ಯೋಹಾನ 12 - ಕೊಡವ ಬೈಬಲ್ಬೇಥಾನ್ಯ ಊರ್‌ಲ್ ಯೇಸುರ ಕಾಲ್‌ಕ್ ಸುಗಂದ ತೈಲತ್‌ನ ಬೂಕ್‌ನದ್ ( ಮತ್ತಾಯ 26.6–13 ; ಮಾರ್ಕ 14.3–9 ) 1 ಪಸ್ಕ ಎಣ್ಣುವ ನಮ್ಮೆಕ್ ಇಂಞು ಆರ್ ದಿವಸ ಮಾತ್ರ ಇಪ್ಪಕ, ಯೇಸು ಬೇಥಾನ್ಯ ಊರ್‌ಕ್ ಪೋಚಿ. ಈ ಬೇಥಾನ್ಯ ಊರ್, ಚತ್ತ್ ಪೋಯಿತ್ಂಜ ಲಾಜರನ ಯೇಸು ಪುನಃ ಎಪ್ಪ್‌ಚಿಟ್ಟ ಊರಾಯಿತ್ಂಜತ್. 2 ಅಲ್ಲಿ ಲಾಜರಂಡ ಮನೆಲ್ ಯೇಸುಕ್ ಬಯಿಟ್ ಗದ್ದಾಳ ತಯಾರ್ ಮಾಡಿತ್ಂಜತ್. ಮಾರ್ಥ ಎಲ್ಲಾರ್‌ಕು ಉಪಚಾರ ಮಾಡ್‍ಚಿ. ಯೇಸುರ ಕೂಡೆ ಬಯಿಟ್ ಉಂಬಕ್ ಅಳ್‌ತಂಡಿಂಜಯಿಂಗಡಲ್ಲಿ ಲಾಜರ ಸಹ ಅಳ್‌ತಿತ್ಂಜತ್. 3 ಅಕ್ಕ, ಮರಿಯ ಒರ್ ಬಲ್ಯ ಕುಪ್ಪಿಲ್ ದುಂಬ ಬೆಲೆಯುಳ್ಳ ಸುಗಂದ ತೈಲತ್‌ನ ಕೊಂಡ್ ಬಾತ್. ಅದ್‍ನ ಯೇಸುರ ಕಾಲ್‌ಕ್ ಬೂಕ್‌ವಂಜಿ, ತಾಂಡ ತೆಲ್‌ಮಿಲ್ ಯೇಸುರ ಕಾಲ್‌ನ ತ್‍ೕಟ್‍ಚಿ. ಆ ತೈಲತ್‌ರ ವಾಸನೆ ಮನೆಯೆಲ್ಲಾ ಪಬ್ಬ್‌ಚಿ. 4 ಬಯ್ಯಕ್ ಯೇಸುನ ಕೊಲ್ಲ್‌ವಕಾಯಿತ್ ಪುಡ್‌ಚಿತ್ ಕೊಡ್‍ಪ ಅಂವೊಂಡ ಶಿಷ್ಯನಾನ ಯೂದ ಇಸ್ಕರಿಯೋತ, 5 ಇದ್‍ನ ನೋಟಿತ್: ಈ ತೈಲತ್‌ನ ಒರ್ ಕಾಲತ್‍ರ ಸಂಬಳತ್‍ರ ಉರ್‍ಪಿಯಕ್ ಮಾರ್‍ವಕ್ ಕಯಿಂಜಿತ್‌ಲ್ಲೆಯಾ? ಮಾರಿತ್ ಆ ದುಡ್ಡ್‌ನ ಗರೀಬಂಗಕ್ ಕೊಡ್‍ಪಕ್ ಕಯಿಂಜಿತಿಲ್ಲೆಯಾಂದ್ ಎಣ್ಣ್‌ಚಿ. 6 ಅಂವೊ, ನೇರಾಯಿತು ಗರೀಬಂಗಡ ಮೇಲೆ ಕನಿಕರ ಇಂಜಗುಂಡ್ ಅನ್ನನೆ ಎಣ್ಣಿತ್‌ಲ್ಲೆ. ಅಂವೊ ಕಳ್ಳನಾಯಿತ್ ಇಂಜತ್. ದುಡ್ಡ್‌ರ ಚೀಲ ಅಂವೊಂಡ ಪಕ್ಕ ಇಂಜತ್, ಅಲ್ಲಿಂಜ ಅಂವೊ ಎಡ್‍ಪಕಿಂಜತ್. 7 ಅಕ್ಕ ಯೇಸು: ಅವಳ ಬುಡ್, ಅವ ಇದ್‍ನ ನಾಡ ಚಾವ್ ತಡೀನ ಗೋರಿಲ್ ಬೆಪ್ಪಕ್ ಮಿಂಞ ಇಡ್‌ವಕಾಯಿತ್ ಇಚ್ಚಕ್ ದಿನ ಬೆಚ್ಚಿತ್ಂಜತ್. 8 ಗರೀಬಂಗ ಎಕ್ಕಾಲು ನಿಂಗಡ ಕೂಡೆ ಇಪ್ಪ, ಆಚೇಂಗಿ ನಾನ್ ನಿಂಗಡ ಕೂಡೆ ಎಕ್ಕಾಲು ಇಪ್ಪುಲೇಂದ್ ಎಣ್ಣ್‌ಚಿ. ಲಾಜರನ ಕೊಲ್ಲುವಕ್ ಉಳ್ಳ ಪ್ರಯತ್ನ 9 ಯೇಸು ಬೇಥಾನ್ಯ ಊರ್‌ಲ್ ಉಂಡ್‍ೕಂದ್ ಅಲ್ಲಿ ಇಂಜ ದುಂಬ ಜನಕ್ ಗೊತ್ತಾಚಿ. ಆನಗುಂಡ್ ಎಲ್ಲಾರು ಅಲ್ಲಿಕ್ ಪೋಚಿ. ಯೇಸುನ ನೋಟ್‍ವಕ್ ಮಾತ್ರ ಅಲ್ಲ, ಅಂವೊ ಎಪ್ಪ್‌ಚಿಟ್ಟ ಲಾಜರನ ಸಹ ನೋಟ್‍ವಕಾಯಿತ್ ಪೋಚಿ. 10 ಅಕ್ಕ, ಮುಕ್ಯ ಯಾಜಕಂಗ ಲಾಜರನ ಸಹ ಕೊಲ್ಲಂಡೂಂದ್ ತೀರ್ಮಾನ ಮಾಡಿತ್ ನೋಟಿಯಂಡ್ ಇಂಜತ್. 11 ಎನ್ನಂಗೆಣ್ಣ್‌ಚೇಂಗಿ, ಲಾಜರ‌ನಗುಂಡ್ ದುಂಬ ಯೆಹೂದ್ಯಂಗ ಅಯಿಂಗಳ ಬುಟ್ಟಿತ್ ಯೇಸುನ ನಂಬ್‍ವಕ್ ಸುರು ಮಾಡ್‍ಚಿ. ಯೇಸು ರಾಜಾನಾಯಿತ್ ಯೆರೂಸಲೇಮ್‌ಕ್ ಪ್ರವೇಶ ಮಾಡ್‍ನದ್ ( ಮತ್ತಾಯ 21.1–11 ; ಮಾರ್ಕ 11.1–11 ; ಲೂಕ 19.28–40 ) 12 ಪಿತ್ಯಾಂದ್ ಯೇಸು ಪಸ್ಕ ನಮ್ಮೆಕ್ ಯೆರೂಸಲೇಮ್‌ಕ್ ಬಪ್ಪಾಂದ್ ನಮ್ಮೆಕ್ ಬಂದಿತ್ಂಜ ದುಂಬ ಜನಕ್ ಗೊತ್ತಾಚಿ. 13 ಆನಗುಂಡ್, ಅಯಿಂಗ ಎಲ್ಲಾರು ಖರ್ಜೂರ ಪಣ್ಣ್ ಮರತ್‍ರ ಕೊಂಬ್‍ನ ಎಡ್‍ತಂಡ್ ಯೇಸುನ ಕಾಂಬಕಾಯಿತ್ ಪಟ್ಟಣತ್‍ರ ಪೊರಮೆ ಪೋಚಿ. ಪಿಂಞ ಅಯಿಂಗ: ಹೊಸನ್ನ! ಒಡೆಯನಾನ ದೇವಡ ಪೆದತ್‍ಲ್ ಬಂದಂಡುಳ್ಳ ರಾಜ ಆಶೀರ್ವಾದ ಪಡ್ಂದಂವೊ. ಇಸ್ರಾಯೇಲ್ ಜನತ್‍ರ ರಾಜ ಆಶೀರ್ವಾದ ಪಡ್ಂದವೋಂದ್ ಜನಯೆಲ್ಲಾ ಜೋರಾಯಿತ್ ಕೂತ್ ಕೊಡ್‍ತಂಡಿಂಜತ್. 14 ಯೇಸು ಒರ್ ಕತ್ತೆ ಕುಟ್ಟಿನ ಕಂಡಿತ್, ಅದ್ಂಡಮೇಲೆ ಅಳ್‌ತಂಡ್ ಬಾತ್. 15 ಓ ಚೀಯೋನ್‍ರ ಮಕ್ಕಳೇ, ಬೊತ್ತತೆ, ನೋಟಿ, ನೀಡ ರಾಜ ಬಂದಂಡುಂಡ್, ನೀಡ ರಾಜ ಕತ್ತೆ ಕುಟ್ಟಿರ ಮೇಲೆ ಅಳ್‌ತಂಡ್ ಬಂದಂಡುಂಡ್‍ೕಂದ್ ಪ್ರವಾದಿಯಂಗಡ ಪುಸ್ತಕತ್‍ಲ್ ಒಳ್‌ದ್‌ನನೆಕೆ ಎಲ್ಲಾ ಆಚಿ. 16 ಅಂವೊಂಡ ಶಿಷ್ಯಂಗಕ್ ಅಕ್ಕ ಇದ್ ಅರ್ಥ ಆಯಿತ್‌ಲ್ಲೆ; ಆಚೇಂಗಿ ಯೇಸು ಮಹಿಮೆಲ್ ಪ್ರವೇಶ ಮಾಡ್‍ನ ಪಿಂಞ, ದೇವಡ ವಾಕ್ಯತ್‍ಲ್ ಇಂವೊಂಗ್ ಇನ್ನನೆ ಆಪಾಂದು ಪಿಂಞ ಅದ್ಂಗಾಯಿತೇ ಅಯಿಂಗ ಅಂವೊಂಗ್ ಇನ್ನನೆಲ್ಲಾ ಮಾಡ್‌ಚೀಂದು ಗೇನ ಮಾಡ್‍ಚಿ. 17 ಲಾಜರ ಚತ್ತ್ ಪೋಯಿತ್ ಗೋರಿಲ್ ಇಪ್ಪಕ, ಯೇಸು ಲಾಜರನ ಜೀವವಾಯಿತ್ ಪೊರಮೆ ಬಪ್ಪಕ್ ಎಣ್ಣ್‌ವಕ, ಅಂವೊಂಡ ಕೂಡೆ ಇಂಜ ಜನ ಅಕ್ಕ ಅಲ್ಲಿ ಇಂಜತ್. ಅಯಿಂಗ ಅದ್‍ನ ವಿವರಿಚಿಟ್ಟತ್. 18 ಯೇಸು ಇನ್ನನೆ ಅದ್ಬುತ ಕಾರ್ಯ ಮಾಡ್‌ನಾಂಗ್, ಯೇಸುನ ಕಾಂಬಕ್ ಜನಡ ಗುಂಪ್ ಪೋಯಂಡಿಂಜತ್. 19 ಅಕ್ಕ, ಫರಿಸಾಯಂಗ: ನಿಂಗ ನೋಟಿರ, ನಿಂಗಡ ಪ್ರಯತ್ನ ಎಲ್ಲಾ ಒಂದಾಂಗು ಪ್ರಯೋಜನ ಇಲ್ಲೇಂದ್ ಗೊತ್ತ್‌ಲ್ಲೆಯಾ? ಈ ಲೋಕವೇ ಯೇಸುರ ಬಯ್ಯಕ್ ಪೋಯಂಡುಂಡ್‍ೕಂದ್ ಅಯಿಂಗಯಿಂಗಳೇ ತಕ್ಕ್ ಪರ್‌ದಂಡ್ ಇಂಜತ್. 20 ಆ ನಮ್ಮೆರ ಸಮಯತ್‍ಲ್ ಯೆರೂಸಲೇಮ್ ದೇವಾಲಯತ್‍ಲ್ ಆರಾದನೆ ಮಾಡ್‌ವಕ್ ಬಂದಿತ್ಂಜ ಚೆನ್ನ ಗ್ರೀಕ್ ತಕ್ಕ್ ಪರಿಯುವ ಜನ ಇಂಜತ್. 21 ಅಯಿಂಗ, ಗಲಿಲಾಯತ್‍ಲ್ ಉಳ್ಳ ಬೇತ್ಸಾಯಿದ ಊರ್‌ರ ಫಿಲಿಪ್ಪಂಡ ಪಕ್ಕ ಬಂದಿತ್: ನಂಗ ಯೇಸುನ ಕಾಂಗಂಡೂಂದ್ ಎಣ್ಣ್‌ಚಿ. 22 ಫಿಲಿಪ್ಪ ಪೋಯಿತ್ ಅಂದ್ರೆಯಂಗ್ ಎಣ್ಣ್‌ಚಿ. ಪಿಂಞ ಅಯಿಂಗ ದಂಡಾಳು ಪೋಯಿತ್ ಯೇಸುಕ್ ಅದ್‍ನ ಎಣ್ಣ್‌ಚಿ. 23 ಅಯಿಂಗಕ್ ಯೇಸು: ಮನುಷ್ಯಕುಮಾರಂಗ್ ಮಹಿಮೆ ಕ್‍ಟ್ಟ್‌ವಕುಳ್ಳ ಸಮಯ ಬಾತ್. 24 ನಾನ್ ನಿಂಗಕ್ ನೇರಾಯಿತು ನೇರಾಯಿತು ಎಣ್ಣ್‌ವಿ: ಒರ್ ಗೋದಿರ ಕಾಳ್ ನೆಲಕ್ ಬುದ್ದಿತ್ ಚಾವತೆ ಪೋಚೇಂಗಿ ಅದ್ ಒರ್ ಕಾಳಾ‍ಯಿತ್ ಮಾತ್ರ ಇಪ್ಪ, ಆಚೇಂಗಿ ಅದ್ ಚತ್ತತೇಂಗಿ, ದುಂಬ ಫಲತ್‍ನ ತಪ್ಪ. 25 ತಾಂಡ ಜೀವತ್‍ರ ಮೇಲೆ ದಾರ್ ದುಂಬ ಆಸೆ ಬೆಚ್ಚಿತ್‌ಪ್ಪ, ಅಯಿಂಗಕ್ ಅಯಿಂಗಡ ಜೀವ ನಾಶ ಆಯಿಪೋಪ; ಈ ಲೋಕತ್‍ಲ್ ದಾರ್ ತಾಂಡ ಜೀವತ್‍ನ ದ್ವೇಶ ಮಾಡ್‌ವ, ಅಯಿಂಗ ಅಯಿಂಗಡ ಜೀವತ್‍ನ ನಿತ್ಯ ಜೀವಕಾಯಿತ್ ಕಾಪಾಡ್‌ವ. 26 ನಾಕ್ ಸೇವೆ ಮಾಡ್‌ವಕ್ ಕುಶಿಪಡ್‌ವಯಿಂಗ ನಾನ್ ಮಾಡ್‌ವನೆಕೆ ಮಾಡಿತ್ ನಾಡ ಬಯ್ಯಕ್ ಬರಂಡು; ನಾನ್ ಎಲ್ಲಿ ಇಪ್ಪಿ ಅಲ್ಲಿ ಅಂವೊನು ಇಪ್ಪ; ನಾಕ್ ಒಬ್ಬ ಸೇವೆ ಮಾಡ್‍ಚೇಂಗಿ ಅಪ್ಪನಾನ ದೇವ ಅಂವೊನ ಗನಪಡುತುವಾಂದ್ ಎಣ್ಣ್‌ಚಿ. ಯೇಸು ಅಂವೊಂಡ ಚಾವ್‍ರ ವಿಷಯತ್ ತಕ್ಕ್ ಪರ್ಂದದ್ 27 ಇಕ್ಕ ನಾನ್ ಎಂತ ಎಣ್ಣಡ್? ನಾಡ ಆತ್ಮ ನೊಂಬಲತ್‍ಲ್ ಉಂಡ್. ಅಪ್ಪ! ನನ್ನ ಈ ಕಷ್ಟತ್‍ರ ಸಮಯತ್ಂಜ ಕಾಪಾಡ್‍ೕಂದ್ ಕ್‍ೕಪದಾ? ಆಚೇಂಗಿ, ಇದ್ಂಗಾಯಿತೇ ನಾನ್ ಬಂದಿಯೆ. 28 ಅಪ್ಪ, ನೀಡ ಪೆದಕ್ ಮಹಿಮೆ ಕ್‍ಟ್ಟುವನೆಕೆ ಮಾಡ್‍ೕಂದ್ ಎಣ್ಣ್‌ಚಿ. ಇನ್ನನೆ ಯೇಸು ಎಣ್ಣ್‌ವಕ, ಪರಲೋಕತ್ಂಜ ಒರ್ ವಾಣಿ: ನಾಕ್ ಮಹಿಮೆ ಕ್‍ಟ್ಟ್‌ಚಿ, ಇಂಞು ಮಹಿಮೆ ಕ್‍ಟ್ಟುವನೆಕೆ ಮಾಡ್‌ವೀಂದ್ ಎಣ್ಣ್‌ಚಿ. 29 ಅಲ್ಲಿ ನಿಂದಂಡಿಂಜ ಜನ ಇದ್‍ನ ಕ್‍ೕಪಕ, ಚೆನ್ನ ಜನ ಗುಡ್‌ಗ್‍ೕಂದ್ ಎಣ್ಣ್‌ಚಿ. ಬೋರೆ ಚೆನ್ನ ಜನ ಇಲ್ಲೆ, ಒರ್ ದೇವದೂತ ಇಂವೊಂಡ ಕೂಡೆ ತಕ್ಕ್ ಪರ್ಂದತ್‍ೕಂದ್ ಎಣ್ಣ್‌ಚಿ. 30 ಯೇಸು ಅಯಿಂಗಳ ನೋಟಿತ್: ಈ ವಾಣಿ ನಿಂಗಕಾಯಿತೇ ಬಾತ್, ನಾಕಾಯಿತ್ ಬಂದದಲ್ಲ. 31 ದೇವ ಈ ಲೋಕಕ್ ನ್ಯಾಯತೀರ್ಪ್ ಮಾಡ್‌ವ ಸಮಯ ಇಕ್ಕಲೆ ಬಾತ್. ಈ ಲೋಕತ್‍ರ ಅದಿಪತಿನ ಇಕ್ಕಲೆ ದೇವ ಪೊರಮೆ ಚಾಡಿರ್‍ವ. 32 ನನ್ನ ಕೊಡಿಕ್ ನೇತುವಕ, ಎಲ್ಲಾರ್‌ನ ನಾನ್ ನಾಡ ಪಕ್ಕ ಬಲ್‍ಚಿರುವೀಂದ್ ಎಣ್ಣ್‌ಚಿ. 33 ಅಂವೊಂಗ್ ಏದ್ ತರತ್‍ರ ಚಾವ್ ಕ್‌ಟ್ಟುವಾಂದ್ ಗೊತ್ತುಮಾಡ್‌ಚಿಡುವಕಾಯಿತೇ ಇನ್ನನೆ ಎಣ್ಣ್‌ಚಿ. 34 ಅಕ್ಕ ಅಲ್ಲಿ ಇಂಜ ಜನಡ ಗುಂಪ್: ಕ್ರಿಸ್ತ ಎಕ್ಕಾಲು ಬದ್‍ಕಿಯಂಡ್ ಇಪ್ಪಾಂದ್ ನಂಗಡ ನ್ಯಾಯಪ್ರಮಾಣ ನಂಗಕ್ ಎಣ್ಣುವ. ಅನ್ನನೆ ಇಪ್ಪಕ, ಮನುಷ್ಯಕುಮಾರನ ಕೊಡಿಕ್ ನೇತುವಾಂದ್ ನಿಂಗ ಎನ್ನನೆ ಎಣ್ಣುವಿರ? ಅಕ್ಕ, ದಾರ್ ಈ ಮನುಷ್ಯಕುಮಾರಾಂದ್ ಕ್‍ೕಟತ್. 35 ಯೇಸು ಅಯಿಂಗಕ್: ಈ ಬೊಳಿ ಇಂಞು ಚೆನ್ನ ನೇರ ಮಾತ್ರ ನಿಂಗಡ ಕೂಡೆ ಇಪ್ಪ, ಇರ್‌ಟ್‌ಲ್ ಚಿಕ್ಕತನೆಕೆ, ಈ ಬೊಳಿಲ್ ಎಕ್ಕಾಲು ನಿಂಗ ಇರಿ, ಇರ್‌ಟ್‌ಲ್ ಇಪ್ಪಂವೊ ಅಂವೊ ಎಲ್ಲಿಕ್ ಪೋಯಂಡುಂಡ್‍ೕಂದ್ ಅಂವೊಂಗ್ ಗೊತ್ತಾಪುಲೆ. 36 ಬೊಳಿ ನಿಂಗಡ ಕೂಡೆ ಇಪ್ಪಕಾಪಲೆ ಬೊಳಿನ ನಂಬಿ. ಅಕ್ಕ ನಿಂಗ ಬೊಳಿರ ಮಕ್ಕಳಾಯಿತ್‌ಪ್ಪಿರಾಂದ್ ಎಣ್ಣ್‌ಚಿ. ಯೇಸು ಇದ್‍ನೆಲ್ಲಾ ಎಣ್ಣ್‌ನ ಪಿಂಞ ಅಯಿಂಗಕ್ ಕಾಂಗತನೆಕೆ ಒಳ್‌ಚಂಡತ್. ಯೆಹೂದ್ಯಂಗಡ ಅಪನಂಬಿಕೆ 37 ಯೇಸು ಇಚ್ಚಕೆಲ್ಲಾ ಅದ್ಬುತ ಕಾರ್ಯ ಈಂಗಡ ಮಿಂಞತ್‍ಲ್ ಮಾಡಿತಿಂಜತೇಂಗಿಯು, ಜನ ಅಂವೊನ ನಂಬುವಕಿಂಜಿಲೆ. 38 ನಂಗಡ ಮೂಲಕ ಕ್‍ೕಟದ್‍ನ ನಂಬ್‍ನಯಿಂಗ ದಾರ್? ನೀನ್ ಕಾಂಬ್‌ಚಿಡುವ ಶಕ್ತಿ ಅಯಿಂಗಕ್ ಗೊತ್ತಾಯಂಡಿಲ್ಲೇಂದ್ ಯೆಶಾಯ ಪ್ರವಾದಿ ಎಣ್ಣ್‌ನದ್ ನೆರೆವೇರುವನೆಕೆ ಇನ್ನನೆ ಆಚಿ. 39 ಆನಗುಂಡ್ ಅಯಿಂಗ ನಂಬುವಕ್ ಕಯಿಂಜಿತ್‌ಲ್ಲೆ; ಯೆಶಾಯ ಪ್ರವಾದಿ ಇಂಞೊಮ್ಮ: 40 ದೇವ, ಅಯಿಂಗಡ ಕಣ್ಣ್ ಕಾಂಗತನೆಕೆ ಮಾಡ್‍ನಗುಂಡ್ ಅಯಿಂಗ ಕಾಂಬುಲೆ, ದೇವ ಅಯಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡ್‍ನಗುಂಡ್ ಅಯಿಂಗಕ್ ಅರ್ಥ ಆಪುಲೆ. ಅಯಿಂಗಡ ಮನಸ್ಸ್‌ನ ತಿರಿಗಿತ್ ದೇವಡ ಪಕ್ಕ ಬರತನೆಕೆ, ದೇವ ಅಯಿಂಗಳ ವಾಸಿ ಮಾಡತನೆಕೆ ಮಾಡಿರ್‌ತ್. ಅದ್ಂಗಾಯಿತೇ ಅಯಿಂಗ ನಂಬುಲೇಂದ್ ಎಣ್ಣ್‌ಚಿ. 41 ಯೆಶಾಯ, ಯೇಸು ಎನ್ನನೆ ಇಪ್ಪಾಂದ್ ಪಿಂಞ ಅಂವೊಂಡ ಮಹಿಮೆನ ಗೊತ್ತಾನಗುಂಡ್ ಇನ್ನನೆ ಎಣ್ಣಿತ್ಂಜತ್. 42 ಆಚೇಂಗಿಯು ಸಹ, ಯೆಹೂದ್ಯ ಜನತ್‍ರ ದುಂಬ ಅದಿಕಾರಿಯಂಗ ಯೇಸುನ ನಂಬಿತ್ಂಜತ್. ಆಚೇಂಗಿ, ಅಯಿಂಗಳ ಸಬಾಮಂದಿರಕ್ ಪೊರಮೆ ಇಡತನೆಕೆ, ಫರಿಸಾಯಂಗಕಾಯಿತ್, ಎಲ್ಲಾಡ ಮಿಂಞತ್ ಅಯಿಂಗ ಯೇಸುನ ನಂಬುವಯಿಂಗಾಂದ್ ಅರಿಕೆ ಮಾಡಿತ್‌ಲ್ಲೆ. 43 ಎನ್ನಂಗೆಣ್ಣ್‌ಚೇಂಗಿ, ಅಯಿಂಗ ದೇವಡ ಕಡೇಯಿಂಜ ಕ್‍ಟ್ಟುವ ಮರ್ಯಾದೆಕಿಂಜ ಮನುಷ್ಯಂಗ ತಪ್ಪ ಮರ್ಯಾದೆಲ್ ದುಂಬ ಕುಶಿಪಟ್ಟತ್. 44 ಆ ಸಮಯತ್‍ಲ್ ಯೇಸು ಜೋರಾಯಿತ್: ನನ್ನ ನಂಬುವಂವೊ, ನಾಡ ಮೇಲೆ ಅಲ್ಲ, ನನ್ನ ಅಯಿಚಂವೊಂಡ ಮೇಲೆ ನಂಬಿಕೆ ಇಟ್ಟಂಡುಂಡ್. 45 ನನ್ನ ದಾರ್ ಕಂಡಂಡುಂಡೋ ಅಂವೊ ನನ್ನ ಅಯಿಚಂವೊನ ಕಂಡಂಡುಂಡ್. 46 ನಾಡ ಮೇಲೆ ನಂಬಿಕೇಲ್ ಉಳ್ಳಯಿಂಗ ದಾರೂ ಇರ್‌ಟ್‌ಲ್ ಇಕ್ಕತನೆಕೆ, ನಾನ್ ಈ ಲೋಕಕ್ ಬೊಳಿಯಾಯಿತ್ ಬಂದಿಯೆ. 47 ಒಬ್ಬ ನಾಡ ತಕ್ಕ್‌ನ ಕ್‍ೕಟಿತ್ ಅದ್‍ನ ನಂಬತೆ ಪೋನಕ, ಅಂವೊನ ನಾನ್ ನ್ಯಾಯತೀರ್ಪ್ ಮಾಡುಲೆ, ನಾನ್ ಈ ಲೋಕಕ್ ನ್ಯಾಯತೀರ್ಪ್ ಕೊಡ್‍ಪಕಾಯಿತ್ ಬಂದಿತ್‌ಲ್ಲೆ, ಅದ್‍ನ ಕಾಪಾಡ್‌ವಕಾಯಿತೇ ಬಂದಿಯೆ. 48 ನನ್ನ ಅಲ್ಲಗೆಳೆದಿತ್, ನಾಡ ವಾಕ್ಯತ್‍ನ ಸ್ವೀಕಾರ ಮಾಡತಯಿಂಗಳ ನಾನ್ ನ್ಯಾಯತೀರ್ಪ್ ಮಾಡುಲೆ, ನಾನ್ ಎಣ್ಣ್‌ನ ದೇವಡ ವಾಕ್ಯವೇ ಆಕೀರ್ ದಿವಸತ್‍ಲ್ ಅಂವೊನ ನ್ಯಾಯತೀರ್ಪ್ ಮಾಡ್‌ವ. 49 ನಾನ್ ನಾಡ ಇಷ್ಟತ್‍ರ ಪ್ರಕಾರ ಇನ್ನನೆ ತಕ್ಕ್ ಪರ್‌ಂದಂಡಿಲ್ಲೆ. ನಾನ್ ಎಂತ ತಕ್ಕ್ ಪರಿಯಂಡು, ಎಂತ ಬೋದನೆ ಮಾಡಂಡೂಂದ್ ನನ್ನ ಅಯಿಚ ದೇವ ನಾಕ್ ಹುಕುಮ್ ಕೊಡ್‌ತಿತುಂಡ್. 50 ಅಂವೊಂಡ ಆಜ್ಞೆ ನಿತ್ಯ ಜೀವತ್‍ನ ತಪ್ಪಾಂದ್ ನಾಕ್ ಗೊತ್ತುಂಡ್. ಆನಗುಂಡ್, ನಾಡ ಅಪ್ಪ ನಾಕ್ ಎಣ್ಣ್‌ನನೆಕೆ ನಾನ್ ತಕ್ಕ್ ಪರ್ಂದಂಡುಂಡ್‍ೕಂದ್ ಎಣ್ಣ್‌ಚಿ. |
© 2017, New Life Literature (NLL)