ಯಾಕೋಬ 4 - ಕೊಡವ ಬೈಬಲ್ಈ ಲೋಕತ್‍ರ ಕೂಡೆ ಉಳ್ಳ ನಂಗಡ ಸ್ನೇಹ 1 ನಿಂಗಡಲ್ಲಿ ಎನ್ನಂಗಾಯಿತ್ ಯುದ್ದ ಮಾಡ್‌ವಿರ? ಜಗಳ ಮಾಡ್‌ವಿರ? ನಿಂಗಡ ಶರೀರತ್‌ನ ಅದಿಕಾರ ಮಾಡ್‌ವಕಾಯಿತ್ ನಿಂಗಡಲ್ಲಿ ಯುದ್ದ ಮಾಡ್‌ವ ಇಚ್ಛೆರಗುಂಡಲ್ಲ? 2 ನಿಂಗಕ್ ಆಸೆ ಉಂಡೇಂಗಿಯು ನಿಂಗಕ್ ಕ್‌ಟ್ಟಿಯಂಡಿಲ್ಲೆ; ನಿಂಗ ಕೊಂದಿತು ಪಿಂಞ ಒಟ್ಟೆಕಿಚ್ಚ್ ಉಳ್ಳಯಿಂಗಳಾಯಿತ್ ಉಂಡೇಂಗಿಯು ನಿಂಗಕ್ ಬೋಂಡಿಯಾನದ್ ಕ್‌ಟ್ಟಿಯಂಡಿಲ್ಲೆ; ನಿಂಗ ಜಗಳ ಮಾಡ್‌ವಿರ, ಯುದ್ದವು ಮಾಡ್‌ವಿರ, ಆಚೇಂಗಿಯು ನಿಂಗ ದೇವಡ ಪಕ್ಕ ಕ್‍ೕಕತೆಗುಂಡ್ ನಿಂಗಕ್ ಅದ್ ಕ್‌ಟ್ಟಿಯಂಡಿಲ್ಲೆ. 3 ನಿಂಗ ಕ್‍ೕಪಿರ, ಆಚೇಂಗಿ ಕ್‌ಟ್ಟಿಯಂಡಿಲ್ಲೆ. ಎನ್ನಂಗೆಣ್ಣ್‌ಚೇಂಗಿ ನಿಂಗಕ್ ಕ್‌ಟ್ಟ್‌ವದ್‌ನ ನಿಂಗಡ ಸ್ವಂತ ಇಚ್ಛೆರ ಪ್ರಕಾರ ಉಪಯೋಗಿಚಿಡ್‌ವಕಾಯಿತ್ ತಪ್ಪಾನ ಉದ್ದೇಶತ್ಂಜ ಕ್‍ೕಪಿರ. 4 ನಿಯತಿ ಇಲ್ಲತ ಜನಳೇ, ಈ ಬೂಲೋಕತ್‌ರ ಕೂಡೆ ಕೂಟ್ ಉಂಡೇಂಗಿ ದೇವನ ಅಲ್ಲಗೆಳೆದಿತ್, ದೂರ ಮಾಡ್‌ನನೆಕೇಂದ್ ಗೊತ್ತ್‌ಲ್ಲೆಯ? ಆನಗುಂಡ್ ಈ ಬೂಲೋಕತ್‌ರ ಕೂಡೆ ಕೂಟ್ ಬೆಪ್ಪಕ್ ಕುಶಿ ಉಳ್ಳಯಿಂಗ ದೇವಕ್ ಶತ್ರು ಆಯಿಪೋಪ. 5 ಅಥವ, ನಂಗಡೊಳ್‌ಲ್ ವಾಸ ಮಾಡ್‌ವಕಾಯಿತ್ ದೇವ ಕೊಡ್‍ತ ಪವಿತ್ರಾತ್ಮ ನಂಗ ದೇವಡ ಪಕ್ಕ ಸತ್ಯವುಳ್ಳಯಿಂಗಳಾಯಿತ್ ಇರಂಡೂಂದ್ ವೈರಾಗ್ಯತ್‍ಲ್ ಉಂಡ್‍ೕಂದ್ ಎಣ್ಣ್‌ವ ದೇವಡ ವಾಕ್ಯ ಮುಂಡತೆ ಎಣ್ಣಿತುಂಡ್‍ೕಂದ್ ಗೇನಮಾಡಿಯಂಡುಳ್ಳಿರ? 6 ಅಂವೊ ನಂಗಕ್ ಇಂಞು ದುಂಬ ಕರುಣೆ ಕಾಟಿಯಂಡುಂಡಲ್ಲ. ಅದ್ಂಗಾಯಿತೇ, ಆಂಗಾರ ಉಳ್ಳಯಿಂಗಕ್ ದೇವ ಎದ್‍ರ್ ನಿಪ್ಪ, ಅಡಕ ಉಳ್ಳಯಿಂಗಕ್ ದೇವ ಕೃಪೆ ತಪ್ಪಾಂದ್ ದೇವಡ ವಾಕ್ಯ ಎಣ್ಣಿತುಂಡ್. 7 ಆನಗುಂಡ್ ನಿಂಗ ನಿಂಗಳ ದೇವಕ್ ಅರ್ಪಿಚಿಡಿ, ಸೈತಾನಂಗ್ ಎದ್‍ರ್ ನಿಲ್ಲಿ. ಅನ್ನನೆ ಮಾಡ್‍ಚೇಂಗಿ ಸೈತಾನ ನಿಂಗಳ ಬುಟ್ಟಿತ್ ಓಡಿ ಪೋಯಿರ್‌ವ. 8 ನಿಂಗ ದೇವಡ ಪಕ್ಕ ಬಾರಿ, ಅಕ್ಕ ದೇವ ನಿಂಗಡ ಪಕ್ಕ ಬಪ್ಪ. ಪಾಪಿಯಳೇ, ನಿಂಗಡ ಕೈಯಿನ ಕತ್ತಿಯೊಳಿ; ದೇವಡ ವಿಷಯತ್ ದಂಡ್ ಮನಸ್ಸ್ ಉಳ್ಳಯಿಂಗಳೇ, ನಿಂಗಡ ಹೃದಯತ್‍ನ ಶುದ್ದ ಮಾಡಿ. 9 ನಿಂಗ ದುಃಖಿತ್, ಗೋಳಾಡಿತ್, ಮೊರಟಿತ್ ನಿಂಗಡ ತೆಳಿನ ಬದ್‍ಲ್ ಮಾಡಿತ್ ವ್ಯಸನ ಪಡಿರಿ, ನಿಂಗಡ ಕುಶೀರ ಬದ್‍ಲ್ ವ್ಯಸನ ಪಡಿರಿ. 10 ದೇವಡ ಮಿಂಞತ್‍ಲ್ ತಾಳ್ಮೆಲ್ ಇರಿ, ಅಕ್ಕ ನಿಂಗಳ ದೇವ ಮಿಂಞಕ್ ಎಡ್‌ತ ಪೋಪ. 11 ನಾಡ ಅಣ್ಣತಮ್ಮಣಂಗಳೇ, ನಿಂಗ ಒಬ್ಬಂಗೊಬ್ಬ ವಿರೋದವಾಯಿತ್ ಕೆಟ್ಟದ್ ಪರಿಯತಿ; ನಿಂಗ ಒಬ್ಬಂಗೊಬ್ಬ ತಪ್ಪ್ ಪರ್ಂದಿತ್, ದೂಷಣೆ ಮಾಡ್‍ಚೇಂಗಿ, ಅಕ್ಕ ನಿಂಗ ನ್ಯಾಯಪ್ರಮಾಣತ್‍ಲ್ ತಪ್ಪ್ ಕಂಡ್‍ಪುಡ್‌ಚಿತ್ ದೂಷಣೆ ಮಾಡ್‍ನನೆಕೆ; ನ್ಯಾಯಪ್ರಮಾಣ ಸರಿ ತಪ್ಪ್‍ೕಂದ್ ನಿಂಗ ತೀರ್ಪ್ ಕೊಡ್‍ಪಕ್ಕಾಗ, ಅದ್‍ನ ಕ್‍ೕಟಿತ್ ನಡ್‍ಪದೇ ನಿಂಗಡ ಕೆಲಸ. 12 ನ್ಯಾಯಪ್ರಮಾಣತ್‍ನ ತಪ್ಪಂವೊ ಪಿಂಞ ನ್ಯಾಯ ಕೊಡ್‍ಪಂವೊ ಒಬ್ಬನೇ. ರಕ್ಷಣೆ ಮಾಡ್‌ವಕು ಪಾಳ್ ಮಾಡ್‌ವಕು ಅಂವೊಂಗ್ ಮಾತ್ರ ಅದಿಕಾರ ಉಂಡ್; ಬೋರೆಯಿಂಗಳ ಕುತ್ತ ಕಂಡ್‌ಪುಡಿಪಕ್ ನಿಂಗ ದಾರ್? ಪೆರುಮೆ ಉಳ್ಳಯಿಂಗಕ್ ಎಚ್ಚರ 13 ಇಂಞು, ಇಂದ್ ಅಲ್ಲತೆ ನಾಳೆ ನಂಗ ಒರ್ ಪಟ್ಟಣಕ್ ಪೋಪ. ಅಲ್ಲಿಕ್ ಪೋಯಿತ್ ವ್ಯಾಪಾರ ಮಾಡಿತ್ ಒರ್ ಕಾಲ ಇಂಜಿತ್ ಪಣ ಸಂಪಾದನೆ ಮಾಡಿತ್ ಐಶ್ವರ್ಯವಂತಂಗಳಾಪಾಂದ್ ಎಣ್ಣ್‌ವ ಜನಳೇ ಕ್‍ೕಳಿ. 14 ನಾಳೆ ಎಂತ ಆಪಾಂದ್ ನಿಂಗಕ್ ಗೊತ್ತ್‌ಲ್ಲೆ ಅಲ್ಲ? ನಿಂಗಡ ಬದ್‍ಕ್ ಎಂತ? ಪೊಲಾಕತ್‍ರ ಮಂಜ್ ಚೆನ್ನ ಗಳಿಗೆಲ್ ಮಾಯ ಆಯಿತ್ ಕಾಂಗತೆ ಪೋಪನೆಕೆ ನಿಂಗ ಉಳ್ಳಿರ. 15 ಆನಗುಂಡ್: ಇದ್ ದೇವಕ್ ಚಿತ್ತ ಉಂಡೇಂಗಿ, ನಂಗ ಬದ್‌ಕಿತ್ ಅದ್ ಇದ್ ಮಾಡ್‌ವಾಂದ್ ಎಣ್ಣಂಡು. 16 ಇಕ್ಕ ನಿಂಗ, ನಿಂಗಳ ದುಂಬ ಹೊಗಳಿಯಂಡುಂಡ್. ಈ ತರ ಹೊಗಳಿಕೆ ಎಲ್ಲಾ ಕೆಟ್ಟದ್. 17 ಅನ್ನನೆ ಆಚೇಂಗಿ, ಒಬ್ಬಂಗ್ ನಲ್ಲದ್ ಮಾಡ್‌ವಕ್ ಗೊತ್ತ್ಂಜತೇಂಗಿಯು ಅಂವೊ ಮಾಡತೆ ಪೋಚೇಂಗಿ, ಅದ್ ಅಂವೊ ಪಾಪ ಮಾಡ್‍ನನೆಕೆ. |
© 2017, New Life Literature (NLL)