ಯಾಕೋಬ 3 - ಕೊಡವ ಬೈಬಲ್ನಾವ್ 1 ನಾಡ ಅಣ್ಣತಮ್ಮಣಂಗಳೇ, ದೇವ ನಿಂಗಕ್ ಕಠಿಣ ತೀರ್ಪ್ ತಪ್ಪಾಂದ್ ಗೊತ್ತಾನಗುಂಡ್ ನಿಂಗ ಎಲ್ಲಾರು ಬೋದನೆಕಾರಂಗಳಾಯಿತ್ ಆಕತಿರಿ. 2 ನಂಗ ಎಲ್ಲಾರು ನಾನಾ ತರತ್‍ಲ್ ತಪ್ಪ್ ಮಾಡಿಯಂಡುಂಡ್; ಆಚೇಂಗಿ ನಿಂಗ ನಿಂಗಡ ನಾವ್‌ಕ್ ಕಡಿವಾಣ ಇಟ್ಟತೇಂಗಿ ನಿಂಗಡ ಬದ್‍ಕ್‍ನ ಕಾಪಾಡ್‍ವಿರ. 3 ನೋಟಿ, ಕುದ್‍ರೆರ ಬಾಯಿಕ್ ಕಡಿವಾಣ ಇಟ್ಟತೇಂಗಿ ಅದ್ ನಂಗ ಎಣ್ಣ್‌ನನೆಕೆ ಪೋಪ. ನಂಗಕ್ ಎಲ್ಲೆಲ್ಲಾ ಪೋಕಂಡುವೋ ಅಲ್ಲೆಲ್ಲಾ ಕುದ್‍ರೆನ ಓಟ್‌ವಕ್ ತಿರ್‌ಕಿಯವಲು. 4 ಇಂಞ್ಞೊರ್ ಉದಾರಣೆಕ್, ಒರ್ ಹಡಗ್‍ನ ಎಡ್‌ತೊಳಿ. ಅದ್ ಎಚ್ಚಕ್ ಬಲ್ಯದಾಯಿತಿಪ್ಪ, ಅದ್ಂಗ್ ಬಿರ್‌ಗಾಳಿ ಮುಟ್ಟ್‌ಚೇಂಗಿಯು ಹಡಗ್‍ರ ಮುಕ್ಯಸ್ತ ಎಲ್ಲಿ ಪೋಕಂಡೂಂದ್ ಗೇನ ಮಾಡ್‌ವ ಆ ಜಾಗಕ್ ನೇರೆ ಚುಕ್ಕಾಣಿರಗುಂಡ್ ತಿರ್‌ಕಿತ್ ಹಡಗ್‍ನ ಕೊಂಡ್ ಪೋಪ. 5 ಅನ್ನನೆ, ನಂಗಡ ತಡೀಲ್ ಉಳ್ಳ ನಾವ್ ಒರ್ ಚೆರಿಯ ಅಂಷ. ಆಚೇಂಗಿ ಅದ್ ದುಂಬ ಹೊಗಳ್‌ವ. ನೋಟಿ, ಚೆರಿಯ ತಿತ್ತ್‌ರ ಚೆಡಿ ಒರ್ ಬಲ್ಯ ಕಾಡ್‌ನ ಚುಟ್ಟ್‌ರ್‍ವ. 6 ಅನ್ನನೆ ನಂಗಡ ನಾವ್ ಒರ್ ತಿತ್ತ್‌ರನೆಕೆ. ಅದ್ ತಡೀರ ಅಂಷತ್‌ಲ್ ಅನೀತಿ ದುಂಬ್‍ನ ಲೋಕ; ಅದ್ ಮನುಷ್ಯಂಡ ಒಟ್ಟ್ ಶರೀರತ್‌ನ ಪಾಳ್ ಮಾಡ್‌ವ, ಅಂವೊಂಡ ಈ ಬದ್‍ಕ್‍ನ ನರಕತ್‌ರ ತಿತ್ತ್‌ರಗುಂಡ್ ಕತ್ತಿಚಿಡುವ. 7 ಎಲ್ಲಾ ಪ್ರಾಣಿಯಳ, ಪಕ್ಷಿಯಳ, ಪರ್‌ಪ ಜೀವ ಜಂತುವಳ, ಸಮುದ್ರತ್ ಉಳ್ಳ ಜೀವಜಂತುವಳಯೆಲ್ಲಾ ನಂಗಡ ಅದಿಕಾರಕ್ ಪುಡ್‌ಚಿತ್ ಬೆಕ್ಕಲು ಪಿಂಞ ಬೆಚ್ಚಿತುಂಡ್. 8 ಆಚೇಂಗಿ ನಂಗಡ ಶರೀರತ್‍ಲ್ ಉಳ್ಳ ನಾವ್‌ನ ದಾರ್‌ಕು ಅಡಕ್‍ವಕ್ ಆಪುಲೆ. ಅದ್ ಪುಡ್‍ಚಿ ಬೆಪ್ಪಕ್ ಕಯ್ಯತ, ಪಾಳಾನ, ಕೊಲ್ಲ್‌ವಂತ ವಿಷ ದುಂಬ್‌ನದಾಯಿತುಂಡ್. 9 ಅದೇ ನಾವ್‌ಲ್ ನಂಗಡ ಅಪ್ಪನಾನ ದೇವನ ತುದಿಚಿತ್ ಕೊಂಡಾಡುವ; ದೇವಡ ರೂಪತ್‌ಲ್ ಸೃಷ್ಟಿ ಮಾಡ್‍ನ ಮನುಷ್ಯಂಗಳ ಅದೇ ನಾವ್ಂಜ ಶಾಪ ಇಡ್‌ವ. 10 ತುದಿ ಪಿಂಞ ಶಾಪ, ದಂಡು ಒರೇ ನಾವ್ಂಜ ಬಪ್ಪ. ನಾಡ ಅಣ್ಣತಮ್ಮಣಂಗಳೇ, ಇನ್ನನೆ ಇಪ್ಪಕ್ಕಾಗ. 11 ಒರೇ ಜಲತ್‌ಂಜ ನಲ್ಲ ನೀರ್ ಪಿಂಞ ಉಪ್ಪ್ ನೀರ್ ಬಪ್ಪಕ್ ಕಯ್ಯುವ? 12 ನಾಡ ಅಣ್ಣತಮ್ಮಣಂಗಳೇ, ಒರ್ ಅತ್ತಿ ಮರತ್ಂಜ ಆಲಿವ್ ಪಣ್ಣ್ ಬಪ್ಪಕಯ್ಯುವ? ಅಥವ ಒರ್ ದ್ರಾಕ್ಷಿ ಬಳ್ಳಿಯಿಂಜ ಅತ್ತಿಪಣ್ಣ್ ಬಪ್ಪಕಯ್ಯುವ? ಅನ್ನನೆ, ಉಪ್ಪ್ ನೀರ್‌ರ ಜಲತ್‌ಂಜ ಶುದ್ದ ನೀರ್ ಬಪ್ಪುಲೆ. ದಂಡ್ ತರ ಜ್ಞಾನ 13 ನಿಂಗಡ ಕೂಟ್‌ಲ್ ಜ್ಞಾನಿಯು ಬುದ್ದಿವಂತಂವೊನು ದಾರೋ, ಅಂವೊ ಅದ್‍ನ ತಾಂಡ ಬದ್‍ಕ್‍ಲ್ ಜ್ಞಾನತ್‍ರ ಫಲವಾಯಿತ್ ಬಪ್ಪ ಶಾಂತ ಗುಣತ್‍ಲ್ ಅಂವೊಂಡ ನಲ್ಲರಿಕೆನ ಕಾಟಡ್. 14 ಆಚೇಂಗಿ ನಿಂಗಡ ಹೃದಯತ್‍ಲ್ ನಿಂಗ ಕೆಟ್ಟದ್ ಮಾಡಂಡೂಂದ್ ಗೇನ ಮಾಡಿಯಂಡ್ ಒಟ್ಟೆಕಿಚ್ಚ್‌ಪಟ್ಟಂಡ್, ನಿಂಗ ಬುದ್ದಿವಂತಂಗಾಂದ್ ಕಳಿಕತಿ, ಅದ್ ಎಲ್ಲಾಕಿಂಜಿ ಬಲ್ಯ ಪೊಟ್ಟ್. 15 ಅಂತ ಬುದ್ದಿವಂತಿಗೆ ಪರಲೋಕತ್ಂಜ ಬಪ್ಪದ್ ಅಲ್ಲ, ಅದ್ ಬೂಲೋಕಕ್ ಕೂಡ್‍ನದ್, ಆತ್ಮೀಯವಾನದಲ್ಲತದ್ ಪಿಂಞ ಕೂಳಿಯಡದ್. 16 ಎಕ್ಕ ಜನಕ್ ಒಟ್ಟೆಕಿಚ್ಚ್ ಪಿಂಞ ಸ್ವಾರ್ತತೆ ಇಪ್ಪ, ಅಕ್ಕ ಅಯಿಂಗ ಮೋಸ ಪಿಂಞ ಕಲಹ ಮಾಡ್‌ವ. 17 ಆಚೇಂಗಿ ಪರಲೋಕತ್ಂಜ ಬಪ್ಪ ಜ್ಞಾನ, ಆದ್ಯವಾಯಿತ್, ನಂಗಳ ಶುದ್ದ ಮಾಡ್‌ವ, ಅದ್ ಸಮಾದಾನ ಉಳ್ಳದಾಯಿತು ಅಡಕ ಉಳ್ಳದಾಯಿತು ಕುಶಿ ಉಳ್ಳದಾಯಿತು ಇಪ್ಪ. ಅದ್‍ಲ್ ಕರುಣೆ ಪಿಂಞ ನಲ್ಲ ಫಲ ದುಂಬಿತ್, ಎಲ್ಲಾ ಮನುಷ್ಯಂಗಕು ಒರೇ ತರ ಮರ್ಯಾದೆ ಮಾಡಿತ್, ಕಪಟ ಇಲ್ಲತ ಶುದ್ದ ನಂಬಿಕೆ ಉಳ್ಳದಾಯಿತಿಪ್ಪ. 18 ಸಮಾದಾನ ಮಾಡ್‌ವಯಿಂಗ ಸಮಾದಾನತ್‍ಲ್ ಬಿತ್ತುವ ಕುರು, ನೀತಿರ ಪಣ್ಣ್‌ನ ತಪ್ಪ. |
© 2017, New Life Literature (NLL)