ಯಾಕೋಬ 2 - ಕೊಡವ ಬೈಬಲ್ಪಕ್ಷಪಾತ ಮಾಡ್‌ವಯಿಂಗಕ್ ಎಚ್ಚರ 1 ನಾಡ ಅಣ್ಣತಮ್ಮಣಂಗಳೇ, ಮಹಿಮೇರ ಒಡೆಯ ಯೇಸು ಕ್ರಿಸ್ತಂಡ ಮೇಲೆ ನಂಬಿಕೆ ಬೆಚ್ಚಿತುಳ್ಳ ನಿಂಗ, ಮನುಷ್ಯಂಗಡ ಪೊರಪಾಡ್‌ನ ನೋಟಿತ್ ಮರ್ಯಾದೆ ಮಾಡತಿ. 2 ನಿಂಗಡ ಸಬೇಕ್ ಒರ್ ಮನುಷ್ಯ ಚಾಯಿ ಬಟ್ಟೆ ಇಟ್ಟಂಡ್, ಬೆಲೆಯುಳ್ಳ ಮಾಲ್ ಇಟ್ಟಂಡ್ ಬಪ್ಪಕಾಪ. ಅದೇ ಸಮಯತ್‍ಲ್ ಒರ್ ಬಡವ ಮಾಜಿ ಪೋನ ಬಟ್ಟೆ ಇಟ್ಟಂಡ್ ಸಹ ಬಪ್ಪಕಾಪ. 3 ಅಕ್ಕ ನಿಂಗ ಚಾಯಿ ಬಟ್ಟೆ ಇಟ್ಟಿತುಳ್ಳ ಮನುಷ್ಯನ ಚಾಯಿತೆ ಸತ್ಕಾರ ಮಾಡಿತ್ ಅಂವೊ ಅಳ್‌ಪಕ್ ನಲ್ಲ ಜಾಗ ಕೊಡ್‍ಪಿರ. ಅದೇ ಸಮಯತ್‍ಲ್ ಬಡವಂಗ್: ನೀನ್ ಇಲ್ಲೆ ನಿಂದ, ಅಲ್ಲತ ಪೋನಕ ನಾಡ ಕಾಲ್‍ರ ಅಡಿಲ್ ಅಳೆ ಎಣ್ಣಿಯಂಡ್ ಎಣ್ಣುವಿರ. 4 ನಿಂಗ ಇನ್ನನೆ ಮಾಡ್‍ಚೇಂಗಿ ನಿಂಗ ನಿಂಗಡೊಳ್‌ಲ್ ಪಕ್ಷಪಾತ ಮಾಡಿತ್, ಕೆಟ್ಟ ಬುದ್ದಿಲ್ ತೀರ್ಪ್ ಮಾಡ್‌ವಯಿಂಗಳಾಯಿತ್‌ಪ್ಪಿರಲ್ಲ? 5 ನಾಡ ಪ್ರೀತಿರ ಅಣ್ಣತಮ್ಮಣಂಗಳೇ, ಕ್‍ೕಳಿ; ದೇವ ಈ ಲೋಕತ್‍ರ ಬಡವಂಗಳ, ನಂಬಿಕೇಲ್ ಐಶ್ವರ್ಯ ಉಳ್ಳಯಿಂಗಳಾಯಿತ್, ಅಂವೊನ ಪ್ರೀತಿ ಮಾಡ್‌ವಯಿಂಗಕ್ ಅಂವೊ ವಾಗ್ದಾನ ಮಾಡ್‍ನ ರಾಜ್ಯತ್‍ನ ಆಳುವಯಿಂಗಳಾಯಿತ್ ಗೊತ್ತ್ ಮಾಡಿತಲ್ಲ? 6 ಆಚೇಂಗಿ ನಿಂಗ ಬಡವಯಿಂಗಳ ಅಲ್ಲಗೆಳದಿತುಳ್ಳಿರ. ಐಶ್ವರ್ಯವಂತಯಿಂಗತಾನೆ ನಿಂಗಳ ಮೋಸ ಮಾಡ್‌ವಯಿಂಗ? ಅಯಿಂಗತಾನೆ ನಿಂಗಳ ನ್ಯಾಯ ತೀರ್ಪ್‌ರ ಜಾಗಕ್ ಬಲ್‍ಚಂಡ್ ಪೋಪ? 7 ನಿಂಗಡ ದೇವಡ ನಲ್ಲ ಪೆದತ್‍ನ ಪಾಳ್ ಮಾಡ್‌ವಕಾಯಿತ್ ಅಯಿಂಗತಾನೆ ದೂಷಣೆ ಮಾಡ್‌ವ? 8 ನಿಂಗ ನಿಂಗಳ ಎಚ್ಚಕ್ ಪ್ರೀತಿ ಮಾಡ್‍ವಿರೋ ಅನ್ನನೆ ನೆರಮನೆಕಾರಳ ಪ್ರೀತಿ ಮಾಡ್‌ವಿರಾಂದ್ ಉಳ್ಳ ದೇವಡ ವಾಕ್ಯವಾನ ದೇವಡ ರಾಜ್ಯತ್‍ರ ಪ್ರಮಾಣತ್‍ನ ಮಾಡ್‍ಚೇಂಗಿ, ಅಕ್ಕ ನಿಂಗ ನಲ್ಲದ್ ಮಾಡ್‍ನನೆಕೆ. 9 ಆಚೇಂಗಿ ನಿಂಗ ಮನುಷ್ಯಂಗಡ ಪೊರಪಾಡ್‌ನ ನೋಟಿತ್ ಅದ್ಂಡ ಪ್ರಕಾರ ಮರ್ಯಾದೆ ಮಾಡ್‍ಚೇಂಗಿ, ನಿಂಗ ಪಾಪ ಮಾಡಿತ್, ನ್ಯಾಯಪ್ರಮಾಣಕ್ ವಿರೋದವಾಯಿತ್ ಮಾಡ್‌ನಯಿಂಗಾಂದ್ ತೀರ್ಪ್ ಆಪಿರ. 10 ಒಬ್ಬ ದೇವಡ ನ್ಯಾಯಪ್ರಮಾಣ ಎಣ್ಣುವಾನೆಲ್ಲ ಮಾಡಿತ್, ಒರೇ ಒರ್ ನ್ಯಾಯಪ್ರಮಾಣತ್‍ನ ಮಾತ್ರ ಮಾಡತೆ ಪೋಚೇಂಗಿ ಅಂವೊ ಎಲ್ಲಾ ವಿಷಯತ್‍ಲು ಅಪರಾದಿಯಾಯಿತ್‌ಪ್ಪ. 11 ಎನ್ನನೆ ಎಣ್ಣ್‌ಚೇಂಗಿ ವ್ಯಬಿಚಾರ ಮಾಡತೇಂದ್ ಎಣ್ಣ್‌ನಂವೊ ಕೊಲೆ ಮಾಡತೇಂದ್ ಸಹ ಎಣ್ಣಿತುಂಡ್; ಆನಗುಂಡ್ ನಿಂಗ ವ್ಯಬಿಚಾರ ಮಾಡತೆ ಇಂಜತೇಂಗಿಯು ಕೊಲೆ ಮಾಡ್‍ಚೇಂಗಿ ನ್ಯಾಯಪ್ರಮಾಣಕ್ ವಿರೋದವಾಯಿತ್ ಮಾಡಿಯಂಡುಳ್ಳಿರ. 12 ನಿಂಗಳ ಸ್ವಾತಂತ್ರ ಮಾಡ್‌ವ ಪ್ರಮಾಣತ್‍ರ ಪ್ರಕಾರ ತೀರ್ಪ್ ಕ್‍ಟ್ಟ್‌ವನೆಕೆ ನಿಂಗ ತಕ್ಕ್ ಪರ್ಂದಿತ್ ಅನ್ನನೆ ನಡ್‌ಕಂಡು. 13 ಈ ಲೋಕತ್‍ಲ್ ಜನಕ್ ಕರುಣೆ ಕಾಟತಯಿಂಗಕ್, ದೇವ ತೀರ್ಪ್ ತಪ್ಪ ದಿವಸತ್‍ಲ್, ಅಂವೊ ಕರುಣೆ ಕಾಟುಲೆ; ಆಚೇಂಗಿ, ನಿಂಗ ಕರುಣೆಯುಳ್ಳಯಿಂಗಳಾಯಿತ್ ಇಂಜತೇಂಗಿ, ದೇವ ನಿಂಗಳ ತೀರ್ಪ್ ಮಾಡ್‌ವ ದಿವಸತ್‍ಲ್ ನಿಂಗಕ್ ಕರುಣೆಯುಳ್ಳಂವೊನಾಯಿತಿಪ್ಪಾಂದ್ ನಿಂಗಕ್ ಗೊತ್ತಿರಂಡು. ನಂಬಿಕೆ ಪಿಂಞ ಕ್ರಿಯೆ 14 ನಾಡ ಅಣ್ಣತಮ್ಮಣಂಗಳೇ, ನಿಂಗಕ್ ದೇವಡ ಮೇಲೆ ನಂಬಿಕೆ ಉಂಡ್‍ೕಂದ್ ಎಣ್ಣ್‌ಚೇಂಗಿಯು, ಆ ನಂಬಿಕೇರ ಪ್ರಕಾರ ಕ್ರಿಯೆ ಇಲ್ಲತೆ ಪೋನಕ ನಿಂಗಕ್ ಎಂತ ಪ್ರಯೋಜನ? ಆ ನಂಬಿಕೆ ನಿನ್ನ ರಕ್ಷಣೆ ಮಾಡ್‌ವಕ್ ಕಯ್ಯುವ? 15 ಉದಾರಣೆಕ್ ಒರ್ ಅಕ್ಕತಂಗೆ ಅಥವ ಅಣ್ಣತಮ್ಮಣಂಗ ಇಡ್‌ವಕ್ ಬಟ್ಟೆ ಇಲ್ಲತೆ, ಉಂಬಕ್ ಕೂಳ್ ಇಲ್ಲತೆ ಇಪ್ಪಕ, 16 ನಿಂಗಡಲ್ಲಿ ಉಳ್ಳ ಒಬ್ಬ ಅಂವೊನ ನೋಟಿತ್: ನಿಂಗ ಶಾಂತಿಲ್ ಪೋಯಿರಿ, ತಿತ್ತ್ ಕಾಂಜಿತ್ ಕೆಲ ದುಂಬ್‌ಚಿಡೀಂದ್ ಎಣ್ಣಿತ್, ಅಂವೊಂಡ ತಡಿಕ್ ಬೋಂಡಿಯಾನದ್‍ನ ಒಂದು ಕೊಡ್‍ಕತೆ ಪೋನಕ ಪ್ರಯೋಜನ ಎಂತ? 17 ಅನ್ನನೆ ನಂಬಿಕೇರ ಕೂಡೆ ಕ್ರಿಯೆ ಇಲ್ಲತಪೋನಕ ಅದ್ ಚತ್ತನೆಕೆ ಆಪ. 18 ದಾರೇಂಗಿಯು ಒಬ್ಬ: ನೀಕ್ ನಂಬಿಕೆ ಉಂಡ್, ನಾಕ್ ಕ್ರಿಯೆ ಉಂಡ್; ನೀಕ್ ನಂಬಿಕೆ ಉಂಡ್‍ೕಂದ್ ಎಣ್ಣುವಿಯಲ್ಲ ಅದ್‍ನ ನಾಕ್ ಕ್ರಿಯೆ ಇಲ್ಲತೆ ಕಾಟಿತಾ, ನಾನ್ ನಾಡ ನಂಬಿಕೇನ ನಾನ್ ಮಾಡ್‌ವ ಕ್ರಿಯೇಲ್ ಕಾಟಿತಪ್ಪೀಂದ್ ಎಣ್ಣುವಲ್ಲ. 19 ನಿಂಗ ಒರೇ ದೇವ ಉಂಡ್‍ೕಂದ್ ನಂಬುವಿರ. ಅದ್ ನಲ್ಲದ್. ಆಚೇಂಗಿ, ಕೂಳಿಯಳು ಸಹ ಅನ್ನನೆ ನಂಬುವ, ಅಯಿಂಗ ಬೊತ್ತಿತ್ ನಡ್‌ಗುವ. 20 ಮುಠಾಳ ಮನುಷ್ಯಂಗಳೇ, ಕ್ರಿಯೆ ಇಲ್ಲತ ನಂಬಿಕೆ ಪ್ರಯೋಜನ ಇಲ್ಲೇಂದ್ ಎಕ್ಕ ಪಡಿಪಿರ? 21 ನಂಗಡ ಅಪ್ಪನಾನ ಅಬ್ರಹಾಮ ತಾಂಡ ಕುಂಞಿ ಇಸಾಕನ ದೇವ ಎಣ್ಣ್‌ನ ಪ್ರಕಾರ ತ್ಯಾಗ ಅರ್ಪಣೆ ಮಾಡ್‌ವಕಾಯಿತ್ ಬಲಿಪೀಠತ್‍ಲ್ ಕೊಲ್ಲ್‌ವಕಾಯಿತ್ ಅರ್ಪಿಚಿಡುವಂತ ಕ್ರಿಯೇಯಿಂಜತಾನೆ ನೀತಿವಂತವೊನಾಚಿ? 22 ನಂಬಿಕೆ ಪಿಂಞ ಕ್ರಿಯೆ ದಂಡು ಒಕ್ಕಚೆ ಕ್ರಿಯೆ ಮಾಡ್‌ನಗುಂಡ್‌ ಅಂವೊಂಡ ನಂಬಿಕೆ ಪೂರ್ತಿ ಆಚೀಂದ್ ನೋಟ್‌ವಿರಲ್ಲ? 23 ಅನ್ನನೆ ಅಬ್ರಹಾಮ ದೇವನ ನಂಬ್‍ಚಿ. ಅದ್ಂಗ್ ದೇವ ಅಂವೊನ ನೀತಿವಂತಂವೋಂದ್ ಲೆಕ್ಕ ಮಾಡ್‍ಚೀಂದ್ ಎಣ್ಣ್‌ವ ದೇವಡ ವಾಕ್ಯ ಪೂರ್ತಿಯಾಚಿ. ಇದ್‍ನಗುಂಡ್ ದೇವ ಅಂವೊನ ದೇವಡ ಸ್ನೇಹಿತಾಂದ್ ಕಾಕ್‍ಚಿ. 24 ಅನ್ನನೆ ಮನುಷ್ಯ, ನಂಬಿಕೇರಗುಂಡ್ ಮಾತ್ರ ಅಲ್ಲ, ಅಂವೊ ಮಾಡ್‌ವ ಕ್ರಿಯೇನಗುಂಡು ನೀತಿವಂತಂವೊನಾಯಿತ್ ಆಪಾಂದ್ ಕಾಂಬಿರಲ್ಲ. 25 ಇದೇ ತರ ರಾಹಾಬ ಎಣ್ಣುವ ವೇಶಿಯು ಗುಪ್ತಚಾರಂಗಳ ಅವಡ ಮನೆಲ್ ಸ್ವೀಕಾರ ಮಾಡಿತ್ ಅಯಿಂಗಕ್ ಸಹಾಯ ಮಾಡ್‌ವಕಾಯಿತ್ ಬೋರೆ ಬದ್ರವಾನ ಬಟ್ಟೇಲ್ ಅಯಿಪಕ, ಅವ ಮಾಡ್‍ನ ಕ್ರಿಯೇರಗುಂಡಲ್ಲ ಅವಳ ನೀತಿವಂತವಾಂದ್ ಎಣ್ಣ್‌ಚಿ? 26 ಎನ್ನನೆ ಆತ್ಮ ಇಲ್ಲತ ತಡಿ ಚತ್ತನೆಕೆ ಉಂಡೋ, ಅನ್ನನೆ ಕ್ರಿಯೆ ಇಲ್ಲತ ನಂಬಿಕೆಯು ಚತ್ತನೆಕೆ ಉಂಡ್. |
© 2017, New Life Literature (NLL)