ಇಬ್ರಿಯ 5 - ಕೊಡವ ಬೈಬಲ್1 ಮನುಷ್ಯಂಗಡಿಂಜ ಗೊತ್ತ್ ಮಾಡ್‍ನ ಏದ್ ಮಹಾ ಯಾಜಕನು, ಮನುಷ್ಯಂಗಕಾಯಿತ್ ದೇವಡ ಕಾರ್ಯತ್‍ನ ಮಾಡ್‌ವಕ್ ನೇಮಿಚಿಟ್ಟಿತುಂಡ್. ಅಂವೊ ಕಾಣಿಕೆ ಪಿಂಞ ಪಾಪಕಾಯಿತ್ ಕೊಡ್‍ಪ ಬಲಿನ ಅರ್ಪಿಚಿಡಂಡು. 2 ಅಂವೊನು ಸಹ, ದೇವಡ ಕೂಡೆ ಉಳ್ಳ ಐಕ್ಯತ್‍ಲ್ ಚಾಯಿ ಇಲ್ಲತಂವೊನಾನಗುಂಡ್, ಜ್ಞಾನ ಇಲ್ಲತಯಿಂಗಕು, ಪಾಳ್ ಬಟ್ಟೇಲ್ ಪೋಯಂಡಿಪ್ಪಯಿಂಗಕು ಕನಿಕರ ಕಾಟ್‍ವಂವೊನಾಯಿತುಂಡ್. 3 ಆ ಬಲಹೀನತ್‍ರಗುಂಡ್, ಅಂವೊ ಜನಡ ಪಾಪಕ್ ಬಲಿ ಕೊಡ್‍ಪನೆಕೆ, ತಾಂಡ ಪಾಪಕಾಯಿತು ಬಲಿ ಕೊಡ್‍ಪಂವೊನಾಯಿತುಂಡ್. 4 ಇದ್‍ಲ್ಲತೆ, ಆರೋನ ಎಣ್ಣ್‌ವಂವೊನ ದೇವ ಕಾಕ್‍ನನೆಕೆ, ಕಾಕಿತಿಲ್ಲೇಂಗಿ, ಏದ್ ಒರ್ ಮನುಷ್ಯನು ತಾನಾಯಿತೇ ಈ ಬಲ್ಯ ಸೇವೇನೆ ಎಡ್‌ತವಕ್ ಕಯ್ಯುಲೆ. 5 ಅನ್ನನೆ ಕ್ರಿಸ್ತ ಸಹ ಮಹಾ ಯಾಜಕನಾಯಿತ್ ಅಂವೊನಾಯಿತೇ ಈ ಗನತ್‍ನ ಎಡ್‍ತಿತ್‌ಲ್ಲೆ. ನೀನ್ ನಾಡ ಮೋಂವೊ, ಇಂದ್ ನಾನ್ ನೀಡ ಅಪ್ಪನಾಯೇಂದ್ ಎಣ್ಣ್‌ನ ದೇವ, ಕ್ರಿಸ್ತನ ಮಹಾ ಯಾಜಕನಾಯಿತ್ ನೇಮಿಚಿಟ್ಟತ್. 6 ಅನ್ನನೆ ದೇವಡ ವಾಕ್ಯತ್‍ಲ್ ಇಂಞೊರ್ ಜಾಗತ್‍ಲ್ ನೀನ್ ಮೆಲ್ಕಿಜೆದೇಕಂಡ ನೇಮ ಪ್ರಕಾರ ಕಾಲಕಾಲಕು ಯಾಜಕನಾಯಿತ್ ಇಪ್ಪಿಯಾಂದ್ ಎಣ್ಣಿತುಂಡ್. 7 ಯೇಸು ಈ ಲೋಕತ್‍ಲ್ ಬದ್‍ಕಿಯಂಡಿಂಜ ಕಾಲತ್‍ಲ್, ಅಂವೊನ ಚಾವ್‍ಯಿಂಜ ಕಾಪಾಡ್‌ವಕ್ ಶಕ್ತಿ ಉಳ್ಳಂವೊನ ನೋಟಿತ್, ಬಲ್ಯ ಸ್ವರತ್‍ಲ್ ಕೂತ್ ಕೊಡ್‌ತಿತ್, ಕಣ್ಣೀರಿಟ್ಟಂಡ್, ಪ್ರಾರ್ಥನೆ ಮಾಡಿತ್, ಬೋಡಿಯಂಡಿಂಜತ್. ಅಂವೊಂಗ್ ಇಂಜ ದೇವಡ ಬಕ್ತಿರಗುಂಡ್ ಅಂವೊಂಡ ಪ್ರಾರ್ಥನೆ ದೇವಕ್ ಎತ್ತ್‌ಚಿ. 8 ಅಂವೊ ದೇವಡ ಮೋಂವೊನಾಯಿತ್ ಇಂಜತೇಂಗಿಯು, ಅಂವೊ ಅನುಬವಿಚಿಟ್ಟ ಕಷ್ಟತ್‍ರಗುಂಡ್ ತಗ್ಗಿತ್ ನಡ್‍ಪದ್‌ನ ಪಡಿಚತ್. 9 ಅಂವೊನ ದೇವ ಪರಿಪೂರ್ಣ ಮಾಡ್‍ನ ಪಿಂಞ, ಒರ್ ಮಾಹಾ ಯಾಜಕನಾಯಿತ್, ಅಂವೊಂಗ್ ತಗ್ಗಿತ್ ನಡ್‍ಪಯಿಂಗ ಎಲ್ಲಾರ್‌ಕು ನಿತ್ಯ ರಕ್ಷಣೆನ ತಪ್ಪಕುಳ್ಳಂವೊನಾಯಿತ್ ಆಚಿ. 10 ಮೆಲ್ಕಿಜೆದೇಕಂಡ ನೇಮ ಪ್ರಕಾರ ದೇವ ಅಂವೊನ ಮಹಾ ಯಾಜಕನಾಯಿತ್ ಅರಿಚಿಟ್ಟತ್. ನಂಬಿಕೇನ ಬುಟ್ಟಿತ್ ಪೋಪಯಿಂಗಕ್ ಎಚ್ಚರಿಕೆ 11 ಈ ಮೆಲ್ಕಿಜೆದೇಕಂಡ ವಿಷಯತ್‍ನ ನಂಗಕ್ ಎಣ್ಣ್‌ವಕ್ ಇಂಞು ದುಂಬ ಉಂಡ್. ಆಚೇಂಗಿ, ಅರ್ಥ ಮಾಡ್‌ವಕ್ ನಿಂಗ ಕಷ್ಟಟಪಡುವಗುಂಡ್ ಆ ವಿಷಯತ್‍ನ ನಿಂಗಕ್ ವಿವರಿಚಿಡುವದ್ ಕಷ್ಟ ಆಪ. 12 ನಿಂಗಡ ಕ್ರಿಸ್ತ ಬದ್‍ಕ್‍ನ ನೋಟ್‍ಚೇಂಗಿ, ಇಕ್ಕ ನಿಂಗ ಉಪಾದ್ಯಂಗಳಾಯಿತ್ ಇಕ್ಕಂಡು. ಆಚೇಂಗಿ ನಿಂಗಕೇ, ದೇವಡ ವಾಕ್ಯತ್‍ರ ಅಡಿಪಾಯತ್‍ನ ಬೋರೆಯಿಂಗ ಬೋದನೆ ಮಾಡ್‌ವನೆಕೆ ಉಂಡ್. ನಿಂಗ ಪಾಲ್ ಕುಡಿಪ ಕುಂಞಿರನೆಕೆ ಉಳ್ಳಿರ, ಗಟ್ಟಿಯಾನ ಆಹಾರತ್‍ನ ಉಂಬಕ್ ಕಯಿಂಜಂಡಿಲ್ಲೆ. 13 ಪಾಲ್ ಮಾತ್ರ ಕುಡಿಪಯಿಂಗ ಕುಂಞಿಯಾಯಿತ್ ಉಳ್ಳಗುಂಡ್, ನೀತಿರ ವಾಕ್ಯತ್‍ರ ಬೋದನೆ ಅಯಿಂಗಕ್ ಅಬ್ಯಾಸ ಇಲ್ಲೆ. 14 ಗಟ್ಟಿಯಾನ ಆಹಾರ ಬಲ್ಯಂಗಕ್ ಮಾತ್ರ ಆಪ, ಎನ್ನನೆ ಎಣ್ಣ್‌ಚೇಂಗಿ ಅಯಿಂಗ ಅದ್‍ನ ಎಕ್ಕಾಲು ಉಪಯೋಗಿಚಿಡುವಗುಂಡ್, ನಲ್ಲದ್ ಕೆಟ್ಟದ್ ಎಂತದ್‍ೕಂದ್ ಅಯಿಂಗಕ್ ಗೊತ್ತಾಪನೆಕೆ ಅಯಿಂಗ ಪಡಿಚಿತುಂಡ್. |
© 2017, New Life Literature (NLL)