ಇಬ್ರಿಯ 3 - ಕೊಡವ ಬೈಬಲ್ಯೇಸು ಮೋಶೇಕಿಂಜ ಬಲ್ಯಂವೊ 1 ಆನಗುಂಡ್, ದೇವಡ ಮಕ್ಕಳಾಯಿತುಳ್ಳ ನಾಡ ಅಣ್ಣತಮ್ಮಣಂಗಳೇ, ಪರಲೋಕಕ್ ಪೋಪಕ್ ಕಾಕ್‍ನಯಿಂಗಡ ಪಾಲ್‍ದಾರಂಗಳಾಯಿತ್ ಉಳ್ಳಯಿಂಗಳೇ, ನಂಗ ಅರಿಕೆ ಮಾಡ್‌ವ ಅಪೊಸ್ತಲನು, ಮಹಾ ಯಾಜಕನು ಆಯಿತುಳ್ಳ ಕ್ರಿಸ್ತ ಯೇಸುನ ಗೇನ ಮಾಡಿಯೊಳಿ. 2 ಮೋಶೆ ದೇವಡ ಮನೆಲ್ ಎಲ್ಲಾ ವಿಷಯತ್‍ಲು ಸತ್ಯವಂತಂವೊನಾಯಿತ್ ಇಂಜನೆಕೆ, ಇಂವೊನು ಸಹ ಅಂವೊನ ನೇಮಿಚಿಟ್ಟಂವೊಂಗ್ ಸತ್ಯವಂತಂವೊನಾಯಿತುಂಡ್. 3 ಮನೇಕಿಂಜ, ಮನೆ ಕೆಟ್ಟ್‌ವಂವೊ ಬಲ್ಯ ಗೌರವಕ್ ಯೋಗ್ಯನಾಯಿತ್‌ಪ್ಪ; ಅನ್ನನೆ ಮೋಶೇಕಿಂಜ ಇಂವೊ ದುಂಬ ಗೌರವಕ್ ಯೋಗ್ಯನಾಯಿತುಂಡ್. 4 ಎನ್ನಂಗೆಣ್ಣ್‌ಚೇಂಗಿ, ಏದ್ ಮನೇಕು ಅದ್‍ನ ಕೆಟ್ಟ್‌ವಂವೊ ಒಬ್ಬ ಉಂಡ್, ಆಚೇಂಗಿ, ಎಲ್ಲಾನ ಕೆಟ್ಟ್‌ನಂವೊ ದೇವ ಒಬ್ಬನೇ. 5 ಮೋಶೆ ಒರ್ ಸೇವಕನಾಯಿತ್ ದೇವಡ ಮನೆಲ್ ಎಲ್ಲಾ ವಿಷಯತ್‍ಲು ಸತ್ಯವಂತಂವೊನಾಯಿತ್ಂಜತ್; ಅಂವೊ, ಬಪ್ಪ ಕಾಲತ್‍ಲ್ ಎಣ್ಣ್‌ವಕುಳ್ಳ ವಿಷಯಂಗಕೆಲ್ಲಾ ಸಾಕ್ಷಿಯಾಯಿತ್ ಇಂಜತ್. 6 ಆಚೇಂಗಿ ಕ್ರಿಸ್ತ, ದೇವಡ ಮನೇಕಿಂಜ ಬಲ್ಯಂವೊನಾಯಿತ್ ಒರ್ ಮೋಂವೊಂಡನೆಕೆ ಸತ್ಯವಂತಂವೊನಾಯಿತುಂಡ್; ನಂಗಡ ನಿರೀಕ್ಷೇರಗುಂಡ್ ಕ್‍ಟ್ಟುವ ದೈರ್ಯ ಪಿಂಞ ಹೆಮ್ಮೆನ ಕಡೇಕತ್ತನೆ ಗಟ್ಟಿಯಾಯಿತ್ ಪುಡ್‍ಚಂಡ್ ಇಂಜತೇಂಗಿ ನಂಗಳೇ ಅಂವೊಂಡ ಮನೇಯಾಯಿತ್‌ಪ್ಪ. ದೇವಡ ಮಕ್ಕಕ್ ಉಳ್ಳ ಆರಾಮ್ 7 ಆನಗುಂಡ್, ಪವಿತ್ರಾತ್ಮ ಎಣ್ಣುವನೆಕೆ: ಇಂದ್ ಅಂವೊಂಡ ಸದ್ದ್‌ನ ಕ್‍ೕಟತೇಂಗಿ, 8 ಮಣಬೂಮಿಲ್ ನಿಂಗಡ ಮುತ್ತಜ್ಜಂಗ ನಾಕ್ ಚೆಡಿ ಬಪ್ಪನೆಕೆ ಮಾಡಿತ್, ನನ್ನ ಪರೀಕ್ಷೆ ಮಾಡ್‍ನನೆಕೆ ನಿಂಗ ನಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡತಿ. 9 ಅಲ್ಲಿ ನಿಂಗಡ ಮುತ್ತಜ್ಜಂಗ ಮಣಬೂಮಿಲ್ ನನ್ನ ಸೋದನೆ ಮಾಡಿತ್, ನಾಡ ತಾಳ್ಮೆನ ಪರೀಕ್ಷೆ ಮಾಡಿತ್ ನಾಪದ್ ಕಾಲ ನಾಡ ಕ್ರಿಯೇನ ಕಂಡತ್. 10 ಆನಗುಂಡ್, ಆ ಸಂತಾನಕಾರಂಗಡ ಮೇಲೆ ನಾಕ್ ದುಂಬ ಚೆಡಿ ಆಯಿತ್, ಅಯಿಂಗಡ ಹೃದಯ ಎಕ್ಕಾಲು ನನ್ನ ಬುಟ್ಟಿತ್ ಪೋಪ, ನಾಡ ಬಟ್ಟೆ ಅಯಿಂಗಕ್ ಗೊತ್ತ್‌ಲ್ಲೇಂದ್ ಎಣ್ಣಿತ್, 11 ಈ ಜನ ಆರಾಮ್‍ಲ್ ಇಪ್ಪಕ್ ನಾನ್ ತಪ್ಪ ಜಾಗಕ್ ಕಂಡಿತವಾಯಿತ್ ಎತ್ತುಲೇಂದ್ ನಾಡ ಚೆಡಿಲ್ ಆಣೆ ಇಟ್ಟಿಯೆ. 12 ನಾಡ ಅಣ್ಣತಮ್ಮಣಂಗಳೇ, ಎಕ್ಕಾಲು ಬದ್‍ಕಿಯಂಡುಳ್ಳ ದೇವನ ಬುಟ್ಟಿತ್ ಪೋಪಕುಳ್ಳ ಏದ್ ಪಾಪವು, ಅಪನಂಬಿಕೇರ ಹೃದಯವು ನಿಂಗಡ ಒಳ್‍ಲ್ ಬಕ್ಕತನೆಕೆ ಎಚ್ಚರತ್‍ಲ್ ಇರಿ. 13 ನಿಂಗಡಲ್ಲಿ ಒಬ್ಬಂಡ ಹೃದಯ ಸಹ, ಪಾಪತ್‍ರ ವಂಚನೆರಗುಂಡ್ ಕಲ್ಲ್‌ರನೆಕೆ ಆಪಕ್ಕಾಗ. ಆಚೇಂಗಿ, ಅದ್ಂಡ ಬದ್‍ಲ್, ಇಂದ್ ಎಣ್ಣುವ ತಕ್ಕ್ ಇಪ್ಪಕತ್ತನೆ, ನಿಂಗ ಒಬ್ಬಂಗ್ ಒಬ್ಬ ಎಕ್ಕಾಲು ಪುರ್‌ಡ್ ಕೊಡ್‍ತಂಡಿರಂಡು. 14 ನಂಗಕ್ ಸುರುಲ್ ಇಂಜ ದೈರ್ಯತ್‍ನ ಆಕೀರ್‍ಕತ್ತನೆ ಪುಡ್‍ಚಂಡ್ ಇಂಜತೇಂಗಿ, ಕ್ರಿಸ್ತಂಡಲ್ಲಿ ನಂಗಳು ಪಾಲ್‍ದಾರಂಗಳಾಯಿತ್ ಉಂಡಲ್ಲಾ! 15 ಇಂದ್ ಅಂವೊಂಡ ಸದ್ದ್‌ನ ಕ್‍ೕಟತೇಂಗಿ, ದೇವಕ್ ಚೆಡಿ ಮಾಡ್‍ನ ಸಮಯತ್‍ಲ್ ಆನನೆಕೆ, ನಿಂಗಡ ಹೃದಯತ್‍ನ ಕಲ್ಲ್‌ರನೆಕೆ ಮಾಡತೀಂದ್ ಎಣ್ಣಿತುಂಡಲ್ಲಾ! 16 ದೇವಡ ವಿಷಯತ್‍ನ ಕ್‍ೕಟಿತ್ ಚೆಡಿ ಬಪ್ಪನೆಕೆ ಮಾಡ್‍ನಯಿಂಗ ದಾರ್? ಮೋಶೇರ ಮೂಲಕ ಐಗುಪ್ತ ದೇಶತ್ಂಜ ಅಂವೊಂಡ ಕೂಡೆ ಪೊರಟಿತ್ ಬಂದಯಿಂಗ ಎಲ್ಲಾರು ತಾನೇ? 17 ಅಲ್ಲತೆ, ದಾಡ ಕೂಡೆ ದೇವ ನಾಪದ್ ಕಾಲ ಚೆಡಿಲ್ ಇಂಜತ್? ಪಾಪ ಮಾಡ್‍ನಯಿಂಗಡ ಕೂಡೆ ತಾನೇ? ಅಯಿಂಗಡ ಚಾವ್ ತಡಿ ಮಣಬೂಮಿಲ್ ಬುದ್ದ್ ಪೋಚಲ್ಲಾ? 18 ನಾನ್ ತಪ್ಪ ಆರಾಮ್‍ರ ಜಾಗಕ್ ಎತ್ತುಲೇಂದ್ ದಾಡ ವಿಷಯತ್ ಆಣೆ ಮಾಡ್‍ಚಿ? ಅಂವೊಂಗ್ ತಗ್ಗಿತ್ ನಡ್‌ಕತಯಿಂಗಡ ವಿಷಯವಾಯಿತ್ ತಾನೇ? 19 ಆನಗುಂಡ್, ಅಪನಂಬಿಕೇರಗುಂಡೇ ನಂಗಡ ಮುತ್ತಜ್ಜಂಗ ಆರಾಮ್‍ರ ಜಾಗತ್‍ನ ಎತ್ತ್‌ವಕ್ ಕಯ್ಯತೆ ಆಚೀಂದ್ ನಂಗಕ್ ಗೊತ್ತಾಯಂಡುಂಡ್. |
© 2017, New Life Literature (NLL)