ಇಬ್ರಿಯ 2 - ಕೊಡವ ಬೈಬಲ್ಬಲ್ಯ ರಕ್ಷಣೆ 1 ಆನಗುಂಡ್, ನಂಗ ಕ್‍ೕಟಿತುಳ್ಳ ವಿಷಯತ್ಂಜ ಜಾರತನೆಕೆ, ಅದ್‍ನ ದುಂಬ ಎಚ್ಚರತ್‍ಲ್ ನೋಟಂಡು. 2 ಎನ್ನಂಗೆಣ್ಣ್‌ಚೇಂಗಿ, ದೇವದೂತಂಗಡ ಮೂಲಕ ಎಣ್ಣ್‌ನ ವಾಕ್ಯಕ್ ವಿರೋದವಾಯಿತ್ ಮಾಡ್‌ವ ಏದ್ ಪಾಪಕು, ತಗ್ಗಿತ್ ನಡ್‍ಕತ ವಿಷಯಕು, ದೇವ ನೀತಿಯಾಯಿತುಳ್ಳ ಶಿಕ್ಷೆ ತಪ್ಪಾಂದ್ ಅಂವೊಂಡ ವಾಕ್ಯ ದೃಡವಾಯಿತ್ ಎಣ್ಣಿಯಂಡುಂಡ್. 3 ಅನ್ನನೆ ಇಪ್ಪಕ, ಆದ್ಯವಾಯಿತ್ ಒಡೆಯಂಡ ಮೂಲಕ ಅರಿಚಿಟ್ಟಿತ್, ಪಿಂಞ ಅಂವೊಂಡಿಂಜ ಕ್‍ೕಟಯಿಂಗಡ ಮೂಲಕ ನಂಗಕ್ ಸ್ತಿರಪಡ್‌ತಿತ್, 4 ಆಶ್ಚರ್ಯ ಕಾರ್ಯ, ಅದ್ಬುತ ಕಾರ್ಯತ್‍ನಗುಂಡ್ ಪಿಂಞ ಅಂವೊಂಡ ಶಕ್ತಿರಗುಂಡ್ ಎಚ್ಚಕೋ ಕ್ರಿಯೇನ ನಂಗ ಕಂಡಿತುಂಡ್. ತಾಂಡ ಚಿತ್ತತ್‍ರನೆಕೆ, ಪಾಲ್ ಮಾಡ್‍ನ ಪವಿತ್ರಾತ್ಮತ್‍ರ ವರತ್‍ರಗುಂಡ್ ದೇವನೇ ಸಾಕ್ಷಿ ಎಣ್ಣ್‌ನ ಇಚ್ಚಕ್ ಬಲ್ಯ ರಕ್ಷಣೆರ ವಿಷಯತ್ ನಂಗ ಎಚ್ಚರ ಇಲ್ಲತೆ ಇಂಜತೇಂಗಿ, ಬಪ್ಪಕುಳ್ಳ ಶಿಕ್ಷೆಕ್ ನಂಗ ಎನ್ನನೆ ಬಚಾವ್ ಆಪಕಯ್ಯು? ಮನುಷ್ಯನಾನ ಯೇಸು 5 ಇಂಞು ಮಿಂಞಕ್ ಬಪ್ಪಕುಳ್ಳ ಲೋಕತ್‍ರ ವಿಷಯತ್‍ನ ನಂಗ ತಕ್ಕ್ ಪರ್ಂದಂಡುಂಡಲ್ಲಾ? ಅದ್‍ನ ದೂತಂಗಡ ಅದಿಕಾರತ್‍ರ ಅಡಿಕ್ ದೇವ ಕೊಡ್‍ತಿತ್‌ಲ್ಲೆ. 6 ಆಚೇಂಗಿ, ಮನುಷ್ಯನ ನೀನ್ ಗೇನಮಾಡ್‌ವಕು, ಮನುಷ್ಯಂಡ ಮೋಂವೊನ ನೀನ್ ಚಾಕ್‍ವಕು, ಅಂವೊ ಎಂತ ವಿಶೇಷ? 7 ಅಂವೊನ ದೂತಂಗಕಿಂಜ ಚೆನ್ನ ಕಮ್ಮಿಯಾಯಿತ್ ಮಾಡಿತ್, ಮಹಿಮೇರಗುಂಡ್ ಗನತ್‍ರಗುಂಡ್ ಅಂವೊನ ರಾಜನಾಯಿತ್ ಮಾಡಿತ್ ನೀನ್ ಸೃಷ್ಟಿ ಮಾಡ್‍ನ ಎಲ್ಲಾಂಗು ಅಂವೊನ ಅದಿಕಾರಿಯಾಯಿತ್ ಮಾಡಿತ್, ಎಲ್ಲಾನ ಅಂವೊಂಡ ಕಾಲ್‍ರ ಅಡಿಕ್ ಇಟ್ಟಿಯಾಂದ್ ದೇವಡ ವಾಕ್ಯತ್‍ಲ್ ಒಬ್ಬ ಸಾಕ್ಷಿಯಾಯಿತ್ ಎಣ್ಣಿತುಂಡ್. 8 ಎಲ್ಲಾನ ಅಂವೊಂಡ ಕಾಲ್‍ರ ಅಡಿಕ್ ಇಟ್ಟಿತುಂಡ್‍ೕಂದ್ ಎಣ್ಣ್‌ನ ವಿಷಯತ್, ಅಂವೊ ಅಂವೊಂಡ ಕಾಲ್‍ರ ಅಡಿಕ್ ಇಡತೆ ವಸ್ತು ಒಂದು ಇಲ್ಲೆ; ಅನ್ನನೆ ಇಂಜತೇಂಗಿಯು, ಇಕ್ಕಲು ಸಕಲವು ಅಂವೊಂಡ ಕಾಲ್‍ರ ಅಡಿಕ್ ಬಂದನೆಕೆ ನಂಗ ಕಂಡಂಡಿಲ್ಲೆ. 9 ಆಚೇಂಗಿಯು, ದೇವಡ ಕೃಪೇರಗುಂಡ್ ಯೇಸು ಎಲ್ಲಾರ್‍ಕಾಯಿತ್ ಚಾವ್‍ನ ತಾಂಡ ತಡೀಲ್ ಎಡ್‌ಪಕಾಯಿತ್, ಚೆನ್ನ ಸಮಯಕ್ ದೇವದೂತಂಗಕಿಂಜ ಅಂವೊನ ಕಮ್ಮಿ ಮಾಡ್‍ಚೀಂದ್ ನಂಗ ನೋಟಿಯಂಡುಂಡ್. ಅಂವೊ ಚಾವ್‍ನ ಸ್ವೀಕಾರ ಮಾಡ್‍ನಗುಂಡ್ ದೇವ ಅಂವೊನ ಮಿಹಿಮೇರಗುಂಡ್, ಗನತ್‍ರಗುಂಡ್ ರಾಜನಾಯಿತ್ ಮಾಡ್‍ಚಿ. 10 ಎಲ್ಲಾನ ತಾಂಗಾಯಿತ್ ತಾಂಡಗುಂಡ್ ಸೃಷ್ಟಿ ಮಾಡ್‍ನಂವೊ, ದುಂಬ ಜನಳ ಮಹಿಮೆಲ್ ಕೊಂಡ್ ಬಪ್ಪನೆಕೆ ಮಾಡ್‍ಚಿ. ಅನ್ನನೆ ಅಯಿಂಗಳ ಕೊಂಡ್ ಬಪ್ಪಕ, ಅಯಿಂಗಡ ರಕ್ಷಣೆರ ನಾಯಕನಾಯಿತುಳ್ಳ ಅಂವೊಂಗ್‌ ಕಷ್ಟ ಕೊಡ್‌ತಿತ್ ಅಂವೊನ ಪೂರ್ತಿಮಾಡ್‍ವದ್ ದೇವಕ್ ಸರೀಂದ್ ಆಚಿ. 11 ಎನ್ನನೆ ಎಣ್ಣ್‌ಚೇಂಗಿ, ಪವಿತ್ರ ಮಾಡ್‌ವಂವೊನು, ಪವಿತ್ರ ಆಪಯಿಂಗ ಎಲ್ಲಾರ್‌ಕು ಒರೇ ಅಪ್ಪ ಉಂಡ್; ಇದ್‍ನಗುಂಡ್ ಪವಿತ್ರ ಆಪಯಿಂಗಳ ತಾಂಡ ಅಣ್ಣತಮ್ಮಣಂಗಾಂದ್ ಕಾಕುವಕ್ ಯೇಸುಕ್ ಞಾಣ ಆಪುಲೆ. 12 ನೀಡ ಪೆದತ್‍ನ ನಾಡ ಅಣ್ಣತಮ್ಮಣಂಗಕ್ ಅರಿಚಿಟ್ಟಿತ್, ಸಬೆರ ಮದ್ಯತ್‍ಲ್ ನೀಕ್ ವಂದನೆ ಎಣ್ಣ್‌ವೀಂದು, 13 ನಾನ್ ಅಂವೊಂಡಲ್ಲಿ ನಂಬಿಕೇನ ಇಡ್‌ವೀಂದು ಎಣ್ಣ್‌ಚಿ. ನೋಟಿ, ನಾನ್ ಪಿಂಞ ನಾಕ್ ದೇವ ಕೊಡ್‍ತ ಮಕ್ಕಾಂದ್ ಸಹ ಪುನಃ ಎಣ್ಣ್‌ಚಿ. 14 ಆನಗುಂಡ್, ಮಕ್ಕ ಚೋರೆ ಪಿಂಞ ತಡಿ ಉಳ್ಳಂಗಾಯಿತ್ ಇಪ್ಪಕ ಅಂವೊನು ಸಹ, ಚೋರೆ ಪಿಂಞ ತಡಿ ಉಳ್ಳ ಮನುಷ್ಯನಾಯಿತ್ ಆಚಿ; ಚಾವ್‍ರ ಅದಿಕಾರಿಯಾಯಿತುಳ್ಳ ಸೈತಾನನ ತಾಂಡ ಚಾವ್‍ರಗುಂಡೇ ನಾಶ ಮಾಡ್‍ಚಿ. 15 ಇನ್ನನೆ, ಬದ್‍ಕಿಯಂಡಿಪ್ಪಕತ್ತನೆ ಚಾವ್‍ರ ಪೋಡಿಲ್ ಅಡಿಮೆಯಾಯಿತ್ ಇಂಜ ಎಲ್ಲಾರ್‌ನ ಬುಡುಗಡೆ ಮಾಡ್‍ಚಿ. 16 ಅನ್ನನೆ, ಅಂವೊ ದೂತಂಗಕ್ ಸಹಾಯ ಮಾಡತೆ, ಅಬ್ರಹಾಮಂಡ ಸಂತಾನಕಾರಂಗಕ್ ಸಹಾಯ ಮಾಡ್‍ಚಿ. 17 ಈ ಕಾರಣಕಾಯಿತ್, ಅಂವೊ ಜನತ್‍ರ ಪಾಪತ್‍ನೆಲ್ಲಾ ಕಳೆಯುವಕ್ ದೇವಡ ವಿಷಯತ್‍ಲ್ ಕರುಣೆ ಉಳ್ಳಂವೊನಾಯಿತು, ಸತ್ಯವಂತ ಮಹಾ ಯಾಜಕನಾಯಿತು ಆಚಿ. ಇನ್ನನೆ, ಎಲ್ಲಾ ರೀತಿಲು ತಾಂಡ ಅಣ್ಣತಮ್ಮಣಂಗಕ್ ಸಮವಾಯಿತ್ ಆಂಡೂಂದ್ ಇಂಜತ್. 18 ಅನ್ನನೆ, ಅಂವೊ ತಾನೆ ಪರೀಕ್ಷೆಪಟ್ಟಿತ್ ಕಷ್ಟಪಟ್ಟಗುಂಡ್, ನಂಗಕ್ ಪರೀಕ್ಷೆ ಬಪ್ಪಕ, ಸಹಾಯ ಮಾಡ್‌ವಕ್ ಶಕ್ತಿವಂತಂವೊನಾಯಿತುಂಡ್. |
© 2017, New Life Literature (NLL)