ಇಬ್ರಿಯ 13 - ಕೊಡವ ಬೈಬಲ್ಆಕೀರ್ ತಕ್ಕ್ 1 ಒಬ್ಬನ ಒಬ್ಬ, ಯೇಸುನ ನಂಬ್‍ನಯಿಂಗಡ ಪ್ರೀತಿಲ್ ಪ್ರೀತಿಚಿಡಿ. 2 ನಿಂಗಕ್ ಗೊತ್ತ್‌ಲ್ಲತಯಿಂಗ ನಿಂಗಡ ಪಕ್ಕ ಬಪ್ಪಕ, ಅಯಿಂಗಳ ಸತ್ಕಾರ ಮಾಡಿ; ಅನ್ನನೆ ಮಾಡ್‍ನ ಚೆನ್ನ ಜನ ಅಯಿಂಗಕ್ ಗೊತ್ತಿಲ್ಲತೆ ದೇವದೂತಂಗಳ ಸಹ ಸತ್ಕಾರ ಮಾಡಿತುಂಡ್. 3 ಕ್ರಿಸ್ತಂಗಾಯಿತ್ ಕೈದಿಯಾಯಿತ್ ಇಪ್ಪಯಿಂಗಡ ಕೂಡೆ ನಿಂಗಳು ಕೈದಿಯಾಯಿತ್ ಇಪ್ಪನೆಕೆ ಗೇನ ಮಾಡಿಯೊಳಿ; ಅವಮಾನತ್‍ನ ಸಹಿಸಿಯಂಡ್ ಇಪ್ಪಯಿಂಗಳ ಗೇನ ಮಾಡಿತ್ ನಿಂಗಕು ಅನ್ನನೆ ಆನನೆಕೆ ಗೇನ ಮಾಡಿಯೊಳಿ. 4 ಮಂಗಲತ್‍ನ ಎಲ್ಲಾರು ಗನಪಡ್‌ತಂಡು, ಮಂಗಲ ಕಯಿಚಯಿಂಗ ಅಯಿಂಗಯಿಂಗಡ ವಡಿಯ ಪೊಣ್ಣ್‌ಕ್ ನಂಬಿಕಸ್ತಯಿಂಗಳಾಯಿತ್ ಇಕ್ಕಂಡು; ವೇಶಿಯಳ ಪಿಂಞ ವ್ಯಬಿಚಾರ ಮಾಡ್‌ವಯಿಂಗಳ ದೇವ ನ್ಯಾಯತೀರ್ಪ. 5 ನಿಂಗ ಪಣ ಆಸೆ ಇಲ್ಲತಯಿಂಗಳಾಯಿತ್ ಬದ್‌ಕಿತ್, ನಿಂಗಕ್ ಉಳ್ಳದ್ ಮದೀಂದ್ ಗೇನ ಮಾಡಂಡು; ನಾನ್ ನಿನ್ನ ಬುಟ್ಟಿತ್ ಪೋಪದು ಇಲ್ಲೆ, ನಿನ್ನ ಕೈ ಬುಡ್‍ವದು ಇಲ್ಲೇಂದ್ ದೇವ ಎಣ್ಣಿಯಂಡುಂಡಲ್ಲ! 6 ಆನಗುಂಡ್, ನಂಗ ದೈರ್ಯವಾಯಿತ್: ಒಡೆಯ ನಾಕ್ ಸಹಾಯ ಮಾಡ್‌ವಂವೊ, ನಾಕ್ ಪೋಡಿ ಇಲ್ಲೆ, ಮನುಷ್ಯ ನಾಕ್ ಎಂತ ಮಾಡ್‌ವಾಂದ್ ಎಣ್ಣುವಕ್ ಆಪಲ್ಲಾ? 7 ದೇವಡ ವಾಕ್ಯತ್‍ನ ನಿಂಗಕ್ ಬೋದನೆ ಮಾಡಿತ್ ನಿಂಗಳ ನಡ್‌ತ್‍ನಯಿಂಗಳ ಗೇನ ಮಾಡಿತ್, ಅಯಿಂಗಡ ಬದ್‍ಕ್ ಆಕೀರ್‍ಕತ್ತನೆ ಎನ್ನನೆ ಇಂಜತ್‍ೕಂದ್ ಚಾಯಿತೆ ನೋಟಿತ್, ಅಯಿಂಗಡ ನಂಬಿಕೇರನೆಕೆ ನಡ್‍ಪಿರ. 8 ಯೇಸು ಕ್ರಿಸ್ತ ನಿನ್ನಾಂದ್, ಇಂದ್ ಪಿಂಞ ಎಕ್ಕಾಲು ಬದ್‍ಲಾಕತಂವೊನಾಯಿತುಂಡ್. 9 ಬೋರೆ ಬೋರೆ ಬೋದನೆಲ್ ಚಿಕ್ಕಿತ್ ಬಟ್ಟೆ ತಪ್ಪಿ ಪೋಕತಿ. ಏದ್ ತರ ಕೂಳ್ ಎನ್ನನೆ ತಿಂಗಂಡೂಂದ್ ತಿಂಬಗುಂಡ್ ಅಲ್ಲ, ಕೃಪೇರ ಮೂಲಕ ಹೃದಯ ಸ್ತಿರವಾಪದ್ ನಲ್ಲದ್. ಕೂಳ್‍ರ ವಿಷಯತ್ ಆಚಾರ ವಿಚಾರ ಮಾಡ್‌ವಗುಂಡ್ ಒರ್ ಪ್ರಯೋಜನವು ಇಲ್ಲೆ. 10 ದೇವಡ ಗುಡಾರತ್‍ಲ್ ಸೇವೆ ಮಾಡ್‌ವಯಿಂಗಕ್ ಅದ್‍ಂಜ ತಿಂಬಕ್ ಅದಿಕಾರ ಇಲ್ಲತ ಒರ್ ಬಲಿಪೀಠ ನಂಗಕ್ ಉಂಡ್. 11 ಎನ್ನಂಗೆಣ್ಣ್‌ಚೇಂಗಿ, ಏದ್ ಮೃಗತ್‍ರ ಚೋರೆನ ಪಾಪತ್‍ರ ವಿಮೋಚನಕಾಯಿತ್, ಪವಿತ್ರವಾನ ಜಾಗತ್‍ರ ಒಳ್‍ಲ್ ಮುಕ್ಯ ಯಾಜಕ ಕೊಂಡ್ ಬಪ್ಪ, ಆ ಮೃಗತ್‍ರ ತಡೀನ, ಜನ ವಾಸ ಮಾಡ್‌ವ ಜಾಗತ್‍ರ ಆಬರಿಲ್ ತಿತ್ತ್‌ಲ್ ಚುಡ್‌ವ. 12 ಅನ್ನನೆ ಯೇಸು ಸಹ, ತಾಂಡ ಸ್ವಂತ ಚೋರೆರಗುಂಡ್, ಜನತ್‍ನ ಪವಿತ್ರವಾಯಿತ್ ಮಾಡ್‌ವಕ್, ಊರ್‌ರ ಪಡಿರ ಪೊರಮೆ ಕಷ್ಟಪಟ್ಟತ್. 13 ಆನಗುಂಡ್, ನಂಗ ಅಂವೊಂಡ ಅವಮಾನತ್‍ನ ಎಡ್‍ತಂಡ್, ಗುಡಾರತ್‍ರ ಪೊರಮೆ ಅಂವೊಂಡ ಪಕ್ಕ ಪೋಕನ. 14 ಸ್ತಿರವಾನ ಪಟ್ಟಣ ನಂಗಕ್ ಇಲ್ಲಿ ಇಲ್ಲೆ, ಇಂಞು ಮಿಂಞಕ್ ಬಪ್ಪಕುಳ್ಳದ್‍ನ ನೋಟಿಯಂಡುಂಡ್. 15 ಆನಗುಂಡ್, ಅಂವೊಂಡ ಮೂಲಕವೇ, ದೇವಡ ಪೆದತ್‍ನ ಅರಿಕೆ ಮಾಡ್‌ವ ಕಿರಿರ ಪಣ್ಣಾಯಿತುಳ್ಳ ತುದೀರ ಬಲಿನ, ಎಕ್ಕಾಲು ಅರ್ಪಿಚಿಡಂಡು. 16 ಅದಲ್ಲತೆ, ನಲ್ಲದ್ ಮಾಡ್‌ವಕು, ದಾನದರ್ಮ ಮಾಡ್‌ವಕು ಮರ್ಂದ್ ಪೋಕತಿ; ಇನ್ನನೆ ಮಾಡ್‌ವ ಬಲೀಲ್ ದೇವ ಕುಶಿಪಡ್‍ವಂವೊನಾಯಿತುಂಡ್. 17 ನಿಂಗಳ ನಡ್‌ತುವಯಿಂಗಡ ಅದಿಕಾರಕ್ ತಗ್ಗಿತ್ ನಡ್‌ಂದಿತ್, ಅಯಿಂಗಡ ಪಕ್ಕ ಅಡಕತ್‍ಲ್ ನಡ್‌ಕಂಡು. ಅಯಿಂಗ ನಿಂಗಡ ಆತ್ಮಕಾಯಿತ್ ದೇವಡ ಪಕ್ಕ ಲೆಕ್ಕ ಕೊಡ್‍ಪಕುಳ್ಳ ಜವಾಬ್ದಾರಿಲ್ ಜಾಗ್ರತೆಯಾಯಿತುಂಡ್. ಅಯಿಂಗ ಅದ್‍ನ ವ್ಯಸನತ್‍ಲ್ ಮಾಡತೆ, ಕುಶೀಲ್ ಮಾಡಡ್. ಅಯಿಂಗ ಅದ್‍ನ ವ್ಯಸನತ್‍ಲ್ ಮಾಡ್‍ಚೇಂಗಿ ಅದ್ ಪ್ರಯೋಜನವಾಯಿತ್‌ಪ್ಪುಲೆ. 18 ನಂಗಕಾಯಿತ್ ಪ್ರಾರ್ಥನೆ ಮಾಡಿ; ನಂಗಕ್ ಶುದ್ದ ಮನಸಾಕ್ಷಿ ಉಂಡ್‍ೕಂದ್ ಗೊತ್ತುಂಡ್, ಪಿಂಞ ಎಲ್ಲಾ ವಿಷಯತ್‍ಲು ಯೋಗ್ಯವಾಯಿತ್ ನಡ್‍ಪಕ್ ನಂಗ ಕುಶೀಲ್ ಉಂಡ್. 19 ನಾನ್ ನಿಂಗಡ ಪಕ್ಕ ಬೆರಿಯ ವಾಪಸ್ ಬಪ್ಪಕಾಯಿತ್ ನಿಂಗ ಪ್ರಾರ್ಥನೆ ಮಾಡಂಡೂಂದ್ ನಿಂಗಳ ದುಂಬ ಕ್‍ೕಟೊವಿ. 20 ನಿತ್ಯ ಒಪ್ಪಂದತ್‍ರ ಚೋರೆರಗುಂಡ್, ಕೊರಿರನೆಕೆ ಉಳ್ಳ ದೇವಡ ಮಕ್ಕಡ ಬಲ್ಯ ಕೊರಿಕಾಪಂವೊನಾಯಿತುಳ್ಳ ನಂಗಡ ಒಡೆಯನಾನ ಯೇಸುನ ಚತ್ತಯಿಂಗಡ ಮದ್ಯತ್ಂಜ ಎಪ್ಪ್‌ಚಿಟ್ಟ ಸಮಾದಾನತ್‍ರ ದೇವ, 21 ಯೇಸುರ ಮೂಲಕ ತಾಂಡ ಮಿಂಞತ್ ಕುಶಿಯುಳ್ಳದ್‍ನ, ನಿಂಗಡ ಮದ್ಯತ್‍ಲ್ ಮಾಡಿತ್, ನಿಂಗ ಅಂವೊಂಡ ಚಿತ್ತತ್‍ರನೆಕೆ ಮಾಡ್‌ವಕ್, ನಿಂಗಳ ಎಲ್ಲಾ ತರತ್‍ರ ನಲ್ಲ ಕ್ರಿಯೇರಗುಂಡ್ ಪೂರ್ತಿ ಮಾಡಿತ್ ಬಲಪಡ್‍ತಡ್; ಅಂವೊಂಗ್ ಎಕ್ಕಾಲು ಮಹಿಮೆ ಬರಡ್. ಆಮೆನ್. 22 ನಾಡ ಅಣ್ಣತಮ್ಮಣಂಗಳೇ, ನಾನ್ ಚೆರಿಯದಾಯಿತ್ ಒಳ್‍ದ್‍ನ ಈ ಬುದ್ದಿ ತಕ್ಕ್‌ನ ನಿಂಗ ಪೊರುಮೆಯಾಯಿತ್ ಎಡ್‍ತೊಳೀಂದ್ ಬೋಡುವಿ. 23 ನಾಡ ತಮ್ಮಣನಾನ ತಿಮೊಥೆಯಂಗ್ ಬುಡುಗಡೆ ಕ್‍ಟ್ಟ್‌ಚೀಂದ್ ಗೊತ್ತಿರಡ್; ಅಂವೊ ಬೆರಿಯ ಬಾತೇಂಗಿ, ಅಂವೊಂಡ ಕೂಡೆ ಬಂದಿತ್, ನಿಂಗಳ ಕಾಂಬಿ. 24 ನಿಂಗಳ ನಡ್‌ತ್‌ವಯಿಂಗಕ್ ಪಿಂಞ ಅಲ್ಲಿಯತ್‍ರ ದೇವಡ ಮಕ್ಕಕೆಲ್ಲ ನಂಗಡ ವಂದನೆ ಎಣ್ಣಿ. ಇತಾಲ್ಯ ದೇಶತ್‍ಲ್ ಉಳ್ಳ ದೇವಡ ಮಕ್ಕ ಎಲ್ಲಾರು ನಿಂಗಕ್ ವಂದನೆ ಎಣ್ಣಿಯಂಡುಂಡ್. 25 ಕೃಪೆ ನಿಂಗಡ ಎಲ್ಲಾಡ ಕೂಡೆ ಇಕ್ಕಡ್. ಆಮೆನ್. |
© 2017, New Life Literature (NLL)